Libombye Kuti Kakuli Zintu Nzutamvwisisisyi

1. Jehova wakatulenga munzila iili biyeni alubo nkamboonzi?

JEHOVA wakatulenga munzila iigambya loko, tulakonzya kuyeeya, kwiiya zintu zipya akubona mbutukonzya kubelesya zintu nzitwazwa aakwiiya. Nkamboonzi naakatulenga munzila iili oobu? Uyanda kuti ‘tujane luzibo lwaLeza’ kuti tubelesye maanu eesu kuchitila kuti tusale kumukomba.—Tus. 2:​1-5; Rom. 12:1.

2. (a) Niinzi nzitweelede kuziba atala andiswe? (Jobu 37:​23, 24) (Langa chifanikisyo.) (b) Kuziba kuti kuli zintu nzitutazi pe kutugwasya biyeni?

² Nikuba kuti twakalengwa munzila yakuti katwiiya zintu zipya, pesi nzyiingi loko zintu nzitutazi pe. (Bala Jobu 37:​23, 24.) Atubone chikozyano chaJobu. Jehova wakabuzya Jobu mibuzyo myiingi loko yakamugwasya kuti abone kuti kwakachili zintu zyiingi nzyaakatazi pe. Kuziba eezi, kwakamugwasya Jobu kuti alibombye kuli Jehova akuti abambulule maboneno aakwe aatali kabotu. (Job. 42:​3-6) Andiswe tweelede kulibombya kwiinda mukuzumina kuti kuli zintu zyiingi nzitutazi pe. Kulibombya ooku, kutugwasya kuti tusyome Jehova kuti unootuyubunwida zintu nzyayanda kuti tuzibe kuchitila kuti tusale munzila yabusongo.—Tus. 2:6.

3. Tulalanga-langaanzi muchiiyo eechi?

³ Muchiiyo eechi, tulalanga-langa zimwi zintu nzitutazi pe abuyumu-yumu mbutukonzya kuswaana kuti teetwaziziba. Alubo tulalanga-langa bubotu buba akaambo kakutaziba zimwi zintu. Nitwanoolanga-langa twaambo ootu, tulatugwasya kuti tusyome Jehova ‘Ooyo uujisi luzibo lukkwene,’ uutubuzya zintu nzituyandikana kuziba.—Job. 37:16.

TATUZI PE KUTI MAMANINO AZOOSIKA LILI

4. Kweendelana alugwalo lwa Mateyo 24:​36, niinzi nzitutazi?

⁴ Bala Mateyo 24:36. Tatuzi pe kuti mamanino aabwiime bwazintu oobuno azoosika lili. Nikuba Jesu naakali aanyika, taakabuzi pe “buzuba a-awa.”a Wakazoobuzya baapostoli bakwe kuti Jehova nguwe uusala kuti zintu zizoochitika lili nkaambo zili “mumaboko aakwe.” (Mil. 1:​6, 7) Jehova wakachibikka kale chiindi chamamanino aabwiime bwazintu oobuno, pesi swe tatuzi pe kuti chiindi eecho chizookkwana lili loko.

5. Kutaziba kuti mamanino asika lili loko, kulakonzya kupa kuti tumvwe biyeni?

⁵ Kweendelana anzyaakaamba Jesu, tatuzi pe kuti tweelede kulindila kwachiindi chilamfu biyeni kuti mamanino azoosike. Akaambo kazeezi, tulakonzya kutaba aamoyo mulamfu naakuti kumana manguzu ikapati kuti kakuli twaba aachiindi chilamfu katuli kulindila buzuba bwaJehova. Naakuti kulakonzya kutukachila kulisimya kuti katuli kusekwa abamumpuli abamwi. (2 Pet. 3:​3, 4) Chimwi chiindi, tulakonzya kubonaanga kuti twaziba kuti ndiilili loko mamanino naazoosika, zilakonzya kutuubila kuti tube aamoyo mulamfu akuti tulisimye chiindi bamwi nibatuseka.

6. Kutaziba kuti mamanino azoosika lili, kutugwasya biyeni?

⁶ Kwiinda mukutatubuzya buzuba bwakuti mamanino azoosika lili, Jehova wakatupa mweenya wakuti tutondeezye kuti tulamukomba akaambo kakuti tulamuyanda akuti tulamusyoma. Tatukombi Jehova pe katulangilila kuti bumwi buzuba tuzooleka kumukomba naakuti mamanino naazoosika tuzooleka kumusyoma. Kwiinda kuti tubikkile maanu kuti “buzuba bwaJehova” busika lili, pesi tubikkila maanu kuzintu zizoochitwa mubuzuba bwaJehova. Kuchita oobo, kupa kuti twiinkilile kunembo katusyoma muli Leza akuchita zyoonse nzitukonzya kuti tumubotezye.—2 Pet. 3:​11, 12.

7. Niinzi nzituzi?

⁷ Tweelede kubikkila maanu kuzintu nzituzi zili mbuli kuziba kuti mazuba aakumamanino akasaanguna mu 1914. Jehova wakatupa bupolofita bwamuBbayibbili bwaambuula atala amunyaka ooyo alubo bupandulula zintu zyakachitika kuzwa mumunyaka ooyo. Eezi zipa kuti tube aachoonzyo chakuti “buzuba bupati bwaJehova buli aafwiifwi.” (Zef. 1:14) Alubo tuluuzi mulimu Jehova ngwayanda kuti tuchite, mulimu wakubuzya bantu “makani mabotu aaBwaami.” (Mt. 24:14) Mulumbe ooyu ulikwaambilizigwa munyika zisika ku 240 alubo mumilaka yiinda ku 1 000. Takuyandikani kuti tuzibe “buzuba a-awa” pe kuchitila kuti tube basungu mumulimu ooyu uuyandikana loko.

TATUZI PE KUTI JEHOVA UZOOTUGWASYA BIYENI

8. Majwi aakuti “milimo ya Leza mwini-mwini” aambaanzi? (Mukambausi 11:5)

⁸ Teechiindi choonse pe mputumvwisisisya “milimo ya Leza mwini-mwini.” (Bala Mukambausi 11:5.) Majwi aaya aamba kuti Jehova upa kuti zintu zichitike naakuti uzumizya kuti zintu zichitike kuchitila kuti achite kuyanda kwakwe. Tatukonzyi pe kumvwisisisya kuti nkamboonzi Jehova nazumizya zimwi zintu kuti zichitike akuti niinzi nzyatazoochite kuti azootugwasye. (Int. 37:5) Nkani eeyi ninjumu kwiimvwisisisya mbuli mbukutuyumina kumvwisisisya kuti mwana ukomena biyeni mwida, nikuba basayensi tabazimvwisisisyi kabotu pe kuti mwana ukomena biyeni mwida.

9. Mbuubuli buyumu-yumu mbutukonzya kuswaana akaambo kakutaziba kuti Jehova uzootugwasya biyeni?

⁹ Kutaziba kuti Jehova uzootugwasya biyeni kulakonzya kupa kuti tubalile kusala zimwi zintu. Tulakonzya kubalila kuti tulipede kuyungizya mulimu wesu, mbuli kuubya buumi bwesu naakuti kulongela kundawu iiyanda basikupupulula biingi. Naakuti tulakonzya kubonaanga tatutambuliki pe kuli Jehova ikuti teetwajana chimwi chilongezyo nchituyanda mubukombi, kuti teetwajana mpindu mumulimu wesu wakukambawuka naakuti twaswaana buyumu-yumu nituli kuchita iimwi milimu yambunga.

10. Kutaziba kuti Jehova uzootugwasya biyeni, kupa kuti tube aabuntu buli biyeni?

¹⁰ Kutaziba kuti Jehova uzootugwasya biyeni kupa kuti tube aabuntu buyandikana buli mbuli kulibombya. Eezi ngazyapa kuti tubone kuti mizeezo yaJehova anzila njachitaayo zintu isumpukide loko kwiinda ndiswe. (Is. 55:​8, 9) Alubo nga twayiya kuti tusyome Jehova kuti ulazyeendelezya munzila iilikabotu zintu. Kuti twajana mpindu mbotu mumulimu wakukambawuka naakuti nituli kuchita umwi mulimu wambunga, tupa kuti kulumbayizigwa koonse kuye kuli Jehova. (Int. 127:1; 1 Kor. 3:7) Kuti zintu teezyeenda munzila njitwali kulangilila, tatweelede kuluba pe kuti Jehova nga ulizibwene zintu zyoonse. (Is. 26:12) Iswe tuchita bbazu lyesu alubo twiinkilila kunembo katusyoma Jehova kuti ulatugwasya. Tulaachoonzyo chakuti Jehova unootupa malayilile ngituyandikana nikuba kuti tanootuzulwidi munzila yachigambyo pe mbuli mbaakali kuchita chiindi.—Mil. 16:​6-10.

11. Nziizili zintu ziyandikana nzituzi?

¹¹ Tulizi kuti Jehova chiindi choonse ulaaluyando, bululami abusongo. Tulizi kuti uzibona kaziyandikana loko zintu nzitumuchitila anzituchitila bakombima. Alubo tulizi kuti Jehova ukkala kabalongezya aabo basyomeka kulinguwe.—Heb. 11:6.

TATUZI PE KUTI NIINZI ZIZOOTUCHITIKILA MUBUUMI

12. Kweendelana a Jakkobo 4:​13, 14, niinzi nzitutazi?

¹² Bala Jakkobo 4:​13, 14. Kasimpe kaliwo nkakuti, tatuzi pe kuti niinzi zizoochitika mubuumi bwesu. Mubwiime bwazintu oobuno, tunooswaana “ziindi zyamapenzi akucitikilwa zintu zitalangilwi.” (Muk. 9:11) Akaambo kazeezi, ngatatuzi pe kuti tuzoozwidilila na kuchita zintu nzitwakapulana naakuti tuchinooli bawumi na kuti tuzoochite zintu eezyo nzitwakapulana.

13. Kutaziba kuti niinzi zizoochitika mubuumi bwesu, kupa kuti tumvwe biyeni?

¹³ Kulakonzya kutuyumina kuti tulisimye kuti katutazizi pe kuti niinzi loko zizoochitika mubuumi bwesu. Zichitika biyeni eezi? Tulakonzya kukataazikana kuti twayeeyela kuti niinzi zikonzya kuchitika mubuumi bwesu alubo eezi zilakonzya kupa kuti tutachibotelwi pe. Mapenzi aachitika chachibukilambuta alakonzya kupa kuti tuwuse akuti tukataazikane. Alubo kuti zintu nzitwali kulangilila teezyazuzikizigwa pe, tulakonzya kunyema akumana manguzu.—Tus. 13:12.

14. Kubotelwa kwesu kuyeeme aali? (Langa zifanikisyo.)

¹⁴ Nikuba kuti twaswaana zyiimo ziyumu biyeni mubuumi, tulakonzya kutondeezya kuti tukomba Jehova akaambo kakuti tulamuyanda. Zikozyano zyamuBbayibbili, zitondeezya kuti tatweelede kulangilila kuti Jehova atukwabilile pe kubuyumu-yumu boonse mbutuswaana akuti tatupulanini pe zintu zizoochitika mubuumi bwesu. Ulizi kuti kubotelwa kwesu takuyeeme aakuziba zintu zizootuchitikila pe muchiindi chilikunembo. Pesi kuyeeme aakuyanduula kuzulwida aanguwe akumuswiilila. (Jer. 10:23) Kuti twalangila kulinguwe chiindi nitusala zyakuchita nga kuli mbuli kuti tulikwaamba kuti, “Kuti Jehova kayanda, tuzoopona mpawo tuchite eechi naakuti eechiya.”—Jak. 4:15.

15. Niinzi nzituzi kuti zizoochitika muchiindi chilikunembo?

¹⁵ Nikuba kuti nga tatuzi pe kuti tulaswaana zyiimo zili biyeni buzuba bumwi abumwi, pesi tulizi kuti Jehova wakatusyomezya buumi butamani, bulangilizi bwakupona kujulu naakuti aanyika. Tulizi kuti Jehova tabeji pe akuti taakwe chintu pe chimukachizya kuti azuzikizye zisyomezyo zyakwe zyoonse. (Tit. 1:2) Jehova alikke nguwe uukonzya kwaamba kuti: “Ndaambila limwi ciyoocitika kumbele, alimwi kuzwa kaindi ndaambila limwi zintu zitanacitika.” Wakazuzikizya zisyomezyo zyakwe chiindi alubo uzoozizuzikizya muchiindi chilikunembo. (Is. 46:10) Tulizi kuti taakwe chintu pe chikachizya Jehova kuti atuyande. (Rom. 8:​35-39) Utupa busongo, ulatuumbulizya alubo utupa manguzu ngituyandikana kuti tulisimye kufumbwa zyiimo ziyumu nzituswaana mubuumi. Tulaachoonzyo chakuti Jehova unootugwasya akuti unootulongezya.—Jer. 17:​7, 8.

TATUKONZYI PE KWIIMVWISISISYA NZILA JEHOVA NJATUZAAYO

16. Niinzi Jehova nzyazi atala andiswe alubo zipa kuti tumvwe biyeni? (Intembauzyo 139:​1-6)

¹⁶ Bala Intembauzyo 139:​1-6. Mulengi wesu taakwe nchatazi pe atala andiswe, ulizi kuti nkamboonzi nituyeeya munzila njituyeeyaayo anitulimvwa munzila njitulimvwaayo. Ulizizi zintu nzitwaambuula azili mumyoyo yesu alubo ulizizi zintu zyoonse nzituchita akuti nkamboonzi nituzichita. Mwaami Davida wakaamba kuti Jehova ukkede kalibambilide kuti atugwasye. Zilawumbulizya kuziba kuti Leza Singuzuzyoonse uusumpukide loko alubo wakalenga zintu zyoonse ulaandaba andiswe. Davida wakaamba kuti: “Luzyibo luli boobu lulandigambya kapati. Lulisumpukide kapati cakuti tandikonzyi kulumvwisya.”—Int. 139:6 amakani aamunsi.

17. Nkamboonzi nikukonzya kutuyumina chimwi chiindi kuzumina kuti Jehova utuzi kabotu?

¹⁷ Akaambo kanzila njitwakakomenaayo, ziyanza zyesu naakuti nzitwakali kusyoma chiindi, kulakonzya kutuyumina kuti tuzitambule kuti Jehova nguNdeende ulaaluyando akuti ulatuyanda. Naakuti zibi nzitwakachita chiindi zilakonzya kupa kuti tubonaanga tatutambuliki pe kuli Jehova, kuti Jehova tatuzi kabotu akuti ulikule loko andiswe. Nikuba Davida wakali kulimvwa oobo anguwe chimwi chiindi. (Int. 38:​18, 21) Naakuti umwi muntu ulakonzya kuti ulikubeleka changuzu kuti achinche maponeno aakwe aatali kabotu kuti apone kweendelana azyeelelo zyaLeza. Ulakonzya kulibuzya kuti, ‘Kuti Leza kandizi kabotu, nkamboonzi nalangilila kuti ndisaangune kupona buumi mbunditajayide pe?’

18. Kuziba kuti Jehova utuzi kabotu loko kwiinda mbutulizi swebo kutugwasya biyeni? (Langa zifanikisyo.)

¹⁸ Tulakonzya kwiiya kuti tuzitambule kuti Jehova utuzi kabotu loko kwiinda mbutulizi swebo akuti ulanga zintu zibotu mulindiswe nzitutakonzyi pe kubona. Nikuba oobo, Jehova ulazibona zintu nzitupambanisya alubo ulazimvwisisisya kuti nkamboonzi nitulimvwa mbuli mbutulimvwa anituchita zintu munzila njituchitaayo. Jehova ulatuyanda. (Rom. 7:15) Kuziba kuti Jehova ulanga zintu zibotu mulindiswe kupa kuti twiinkilile kunembo katumukomba chakusyomeka alubo katuchita oobo katubotelwa.

19. Niinzi nzituzi atala aJehova?

¹⁹ Tulizi kuti Jehova nduyando alubo tatuzumbuuzyi pe atala azeezi. (1 Joh. 4:8) Tulizi kuti zyeelelo zyakwe ziluleme zitondeezya mbatuyanda akuti uyanda kuti zintu zitweendele kabotu mubuumi. Tulizi kuti Jehova uyanda kuti tuzoojane buumi butamani. Wakatupa chinunuzyo kuti eezi zikonzeke. Chipo chachinunuzyo chitondeezya kuti tulakonzya kuzwidilila nikuba katutamaninide pe. (Rom. 7:​24, 25) Alubo tulizi kuti “Leza mupati kwiinda myoyo yesu alubo ulizizi zintu zyoonse.” (1 Joh. 3:​19, 20) Jehova taakwe nzyatazi pe atala andiswe alubo ulaachoonzyo chakuti tulakonzya kuzwidilila mukuchita kuyanda kwakwe.

20. Niinzi zikonzya kutugwasya kuti tutalikataazyi zyiindilide?

²⁰ Jehova ulatubuzya zintu zyoonse nzituyandikana kuti tuzizibe. Kuti katulibombya tulazumina kuti kuli zintu nzitutazi pe alubo tatukoolikataazya zyiindilide pe atala azintu nzitutakonzyi kuchincha. Tulabikkila maanu kuzintu ziyandikana. Kuti twachita oobo, nga tulikutondeezya kuti tusyoma Jehova chakumaninina “Ooyo uujisi luzyibo lukkwene.” (Job. 36:4) Nikuba kuti kuli zimwi zintu nzitutazi pe lino, pesi tulangilila aawo mputuyoopona kukabe kutamani katwiiya zintu zipya atala aJehova.—Muk. 3:11.