Kkala Kwiiya Zintu Zipya Kunjiisyo zyamuBbayibbili Zyakusaanguna?

1. Njiisyo zyamuBbayibbili nzitwakasaanguna kwiiya, zyakatugwasya biyeni?

NJIISYO zyamuBbayibbili nzitwakasaanguna kwiiya, zyakachincha buumi bwesu. Muchikozyano, nitwakayiya kuti zina lyaLeza nguJehova, twakabweza ntaamu yakuti tube beenzinyina. (Is. 42:8) Nitwakayiya kuti bafwide bali muchiimo chili biyeni, zyakatugwasya kuti tutakataazikani pe kuti babbululu besu bakafwa balikupenzegwa. (Muk. 9:10) Alubo chiindi nitwakayiya atala achisyomezyo chaLeza chaParadayizi aanyika, zyakapa kuti tutakataazikani pe atala abuumi bwakunembo. Twakaziba kuti bantu tabaponi kwaminyaka iili 70 kusika ku 80 kupela pe, pesi balakonzya kupona mane kukabe kutamani.—Int. 37:29; 90:10.

2. Lugwalo lwa 2 Petro 1:​12, 13 lutondeezya biyeni kuti nikuba maKkristu basimide kale mubukombi, balakonzya kugwasigwa anjiisyo zyamuBbayibbili nzibakayiya chiindi?

² Tatweelede kuzilangilaansi pe njiisyo zyamuBbayibbili nzitwakasaanguna kwiiya. Mulugwalo lwakwe lwachibili, mwaapostoli Petro wakalembela maKkristu ‘bakazyatide mukasimpe.’ (Bala 2 Petro 1:​12, 13.) Pesi aachiindi eecho, kwakali bantu babi mumbungano bakali kuyanda kweena bakwesu abachizi kuti bazwe mukasimpe. (2 Pet. 2:​1-3) Petro wakali kuyanda kusimya bakwesu abachizi aaba, kuchitila kuti batantamuke bantu bakali kuyiisya manwa aayo. Nkinkaako, Petro wakabayeezya atala azimwi njiisyo nzibakali bayiya kale chiindi. Njiisyo eezyo, zyakali kukonzya kubagwasya kuti bakkale kabasyomeka kuli Jehova.

3. Nkamboonzi maKkristu nibeelede kwiinkilila kunembo kabayeeyesesya atala anjiisyo nzibakayiya chiindi? Amba chikozyano.

³ Chiindi nituyobusima mubukombi, kulakonzeka kuti nga twayiya zyiiyo zipya kunjiisyo nzitwakayiya chiindi. Muchikozyano, muntu ulaaluzibo lwakujika amuntu uuchiyiila kujika balakonzya kubelesya zintu zikozyenie nibali kujika. Pesi, muntu uulaaluzibo lwakujika wakayiya mbakonzya kujika kabelesya zintu nzizeezyo munzila zisiyene-siyene kuti ajike zyakulya zimbi alubo zinono. Munzila iikozyenie, bantu baba aachiindi chilamfu kabakomba Jehova, balakonzya kujana zyiiyo zipya kuzwa kunjiisyo nzibakayiya chiindi kwiinda bantu bachisaanguna kwiiya Bbayibbili. Zyiimo zyesu naakuti zilongezyo nzitulaazyo mumbunga, kulakonzeka kuti zyakachincha kuzwa nitwakabbabbatizigwa. Kuti twayeeyesesya atala anjiisyo zyamuBbayibbili nzitwakayiya chiindi, tulakonzya kujana nzila mpya nzitukonzya kubelesya muzyiimo nzitulaazyo. Atubone maKkristu basimide mubukombi mbubakonzya kujana zyiiyo zipya kulizimwi njiisyo nzibakayiya chiindi.

JEHOVA MULENGI

4. Kuziba kuti Jehova Mulengi kwakatugwasya biyeni?

⁴ “Wakayaka zintu zyoonse nguLeza.” (Heb. 3:4) Tulizi kuti Mulengi wanyika azintu zyoonse zili munyika zipona ulaabusongo amanguzu. Nguwe wakatulenga, nkinkaako, utuzi kabotu loko alubo ulaandaba andiswe. Ulizizi zintu zitugwasya. Kuziba kasimpe aaka kakuti Jehova Mulengi, kwakatugwasya loko alubo kwakapa kuti tuzibe kuti tuponenaanzi.

5. Nkaakali kasimpe kakonzya kutugwasya kuti tulibombye? (Isaya 45:​9-12)

⁵ Kasimpe kakuti Jehova Mulengi katuyiisya kuti tulibombye. Muchikozyano, chiindi Jobu naakaba aamaboneno aatali kabotu atala aJehova wakali waluba kuti niinzi chakali kuyandikana loko alubo wakaliyeeya lwakwe akweezya kutondeezya kuti uliluleme. Pesi Jehova wakagwasya Jobu kuti abone kuti Jehova Mulengi singuzuzyoonse. (Job. 38:​1-4) Nzila Jehova njaakamugwasyaayo Jobu, yakamugwasya kuti abone kuti zintu zyoonse nzyachita Jehova zililuleme kwiinda zyabantu. Mukuya kwachiindi, mupolofita Isaya wakazoolemba kuti: “Sena bulongo bweelede kwaambila Mubumbi wambubo kuti: ‘Ino upanga nzi?’”—Bala Isaya 45:​9-12.

6. Ndiilili loko nikuyandikana kuti tubone kuti mizeezo yaJehova isumpukide loko kwiinda yesu? (Langa zifanikisyo.)

⁶ Kuti muntu waba aaminyaka myiingi kali kukomba Jehova, ulakonzya kusaanguna kulisyoma kwiinda kuti alangile kuli Jehova akugwasigwa aaJwi Lyakwe, Bbayibbili. (Job. 37:​23, 24) Zimugwasya biyeni muntu kuti wayeeyesesya atala ambubusumpukide busongo amanguzu ngalaawo Mulengi wesu? (Is. 40:22; 55:​8, 9) Kasimpe aaka kayandikana, kalakonzya kumugwasya kuti akkale kalibombya akubona kuti mizeezo yaJehova ilisumpukide kwiinda yabantu.

7. Niinzi nzyaakachita Rahela kuti ayendelanaamwi ambunga nikwakaba kuchincha?

⁷ Umwi muchizi uutegwa Rahela uukkala kuSlovenia, wakabona kuti kuyeeyesesya atala aMulengi wakwe kwakamugwasya kuti ayendelanaamwi ambunga nikwaba kumvwisisisya kupya. Wakaamba kuti: “Chimwi chiindi kulandiyumina kuti ndiyendelanaamwi akuchincha kupya kunga kwaba mumbunga. Muchikozyano, nikuba kuti ndakali ndayiyebela Lipoti Iizwa kuKabunga Keendelezya Namba 8 yamu2023, ndakagamba kumasaangunino nindakabona mukwesu uulaamalezu kalikupa nkani. Nkinkaako, ndakakomba kuli Jehova kuti andigwasye kuti ndeendelane aakuchincha ooku kupya.” Rahela wakabona kuti mbukunga Jehova Mulengi wajulu anyika, kuchincha koonse kuba mumbunga yakwe kuli kabotu. Kuti kakukuyumina kweendelanaamwi ambunga nikwaba kumvwisisisya kupya naakuti kutambula malayilile mapya, ulakonzya kuyeeyesesya atala ambubusumpukide busongo amanguzu ngalaawo Mulengi wesu.—Rom. 11:​33-36.

NKAMBOONZI LEZA NAZUMIZYA MAPENZI?

8. Kuziba kuti nkamboonzi Leza nazumizya mapenzi kutugwasya biyeni?

⁸ Nkamboonzi Leza nazumizya mapenzi? Bamwi batayizi pe nsandulo yamubuzyo ooyu bakamunyemena Leza naakuti bakachinka kabaamba kuti tawo biya pe Leza! (Tus. 19:3) Pesi iswe twakayiya kuti chibi nchitwakakona akutamaninina nzizyo zipa kuti tuswaane mapenzi kutali Jehova. Alubo twakayiya kuti, akaambo kakuti Jehova ulaamoyo mulamfu, wakabapa mweenya bantu wakuti bamuzibe akuti bazoolibonene abalikke mbatazoomaninsye mapenzi aaya chakumaninina. (2 Pet. 3:​9, 15) Kasimpe aaka, kalatuumbulizya akupa kuti tuswene aafwiifwi aJehova.

9. Ndiilili loko nitweelede kuyeeyesesya atala akuti nkamboonzi Jehova nalikuzumizya mapenzi?

⁹ Tulizi kuti tweelede kuba aamoyo mulamfu chiindi nitulindila Jehova kuti azoomaninsye mapenzi. Pesi iswe naakuti babbululu besu nibaswaana mapenzi, nitwatajatwa kabotu naakuti nitwafwidwa, tulakonzya kubonaanga Jehova wanonoka kubweza ntaamu. (Hab. 1:​2, 3) Muziindi zili oobu, kulayandikana kuti tuyeeyesesye kuti nkamboonzi Jehova nalikuzumizya mapenzi.a (Int. 34:19) Alubo tulakonzya kuyeeyesesya atala achisyomezyo nchaakatusyomezya Jehova chakuti uzoomaninsya mapenzi woonse chakumaninina.

10. Niinzi chakagwasya Anne bayina nibakafwa?

¹⁰ Kuziba kuti nkamboonzi Leza nazumizizye mapenzi kutugwasya kuti tulisimye. Muchikozyano, Anne uukkala kukasuwa kaMayotte kali mu-Indian Ocean, wakaamba kuti: “Chiindi baama nibakafwa minyaka miche yayinda, ndakawusa loko. Nikuba oobo, ndakali kukkala kandiliyeezya kuti Jehova teenguwe pe uulikutweetela mapenzi. Ulaachiyandisyo chakumaninsya mapenzi woonse alubo uzoobusya babbululu besu bakafwa. Kuyeeyesesya atala akasimpe aaka, kupa kuti ndibe aaluumuno lwamumizeezo.”

11. Kuziba twaambo tupede kuti Jehova azumizye mapenzi, kutugwasya biyeni kuti tukkale katukambawuka?

¹¹ Kuziba kasimpe kali atala akuti nkamboonzi Leza nalikuzumizya mapenzi kulakonzya kutugwasya kuti tukkale katukambawuka. Naakazwa aakupandulula kuti Jehova ulaamoyo mulamfu akaambo kakuti uyanda kuti bantu basanduke akuti bazoofutuke, Petro wakalemba kuti: “Amubone kuti mweelede kuba bantu bali biyeni mumilimu iisalala yakulijata amumichito yakulipeda kuli Leza.” (2 Pet. 3:11) Imwi yamichito “yakulipeda kuli Leza,” mulimu wesu wakukambawuka. Tulabayanda bantu mbuli Taateesu. Tuyanda kuti bazoonjile munyika mpya. Jehova ulaamoyo mulamfu akaambo kakuti ulikubapa mweenya wakuti bamukombe bantu bamuchilawu chanu. Ulaachilongezyo chipati loko chakubelekaamwi aLeza akugwasya bantu biingi kuti bayiye atala anguwe mamanino kaatanasika.—1 Kor. 3:9.

TULIKUPONA “KUMAZUBA AAKUMAMANINO”

12. Kuziba kuti tulikupona “kumazuba aakumamanino” kutugwasya biyeni?

¹² Bbayibbili lyaamba choonzyo chiindi nilipandulula mbubabede bantu balikupona “kumazuba aakumamanino.” (2 Tim. 3:​1-5) Chiindi nitubona buntu mbubalaabo bantu mazubaano, zili kututondeezya aantanganana kuti nzilyaamba Bbayibbili nzyachoonzyo. Alubo nitubona michito iitali kabotu anzila njibalijataayo iitali kabotu kayili kwiindilila kubija, nga zilikutondeezya kuti Jwi lyaLeza lyaamba choonzyo.—2 Tim. 3:​13-15.

13. Chikozyano nchakaamba Jesu chili muli Lukka 12:​15-21, chitugwasya biyeni?

¹³ Kuziba kuti tulikupona kumazuba aakumamanino, kutugwasya kuti tubikkile maanu kuzintu ziyandikana loko. Tulakonzya kuziba kuti nkamboonzi nikuyandikana kuchita oobo kwiinda mukulanga-langa chikozyano nchaakaamba Jesu muli Lukka 12:​15-21. (Bala.) Nkamboonzi mwaalumi ooyu naakaambwa kuti “Yoomufuba-fuba”? Taakaamba oobo pe akaambo kakuti mwaalumi ooyo wakalinotede. Pesi wakaamba oobo akaambo kakuti wakali kubikka zintu zitayandikani loko pe mubusena bwakusaanguna. Mwaalumi ooyo wakalibunganizizya “zintu zyiingi loko pesi katanotede pe kuli Leza.” Penzi lyakali aali aawa? Leza wakabuzya mwaalumi ooyo kuti: “Mansiku aano balabuyanda buumi bwako.” Mbukunga mamanino aabwiime bwazintu oobuno aba aafwiifwi, tulakonzya kulibuzya kuti: ‘Nzindisala zilatondeezya na kuti ndilikubikka zintu ziyandikana mubusena bwakusaanguna? Nziizili zipeekezyo nzibalaazyo bana bangu? Ndibelesya manguzu na, chiindi naakuti zintu nzindilaazyo kuti ndiliyandwiide bunoti aanyika naakuti bunoti kujulu?’

14. Zyakachitikila Miki, zitugwasya biyeni kuti tutalubi kuti tulikupona kumazuba aakumamanino?

¹⁴ Chiindi nituyeeyesesya atala abukamboni butondeezya kuti tulikupona kumazuba aakumamanino chachoonzyo, zilakonzya kutugwasya kuti tusale munzila yabusongo. Eezi nzizyo zyakachitika kuluumwi muchizi uutegwa Miki. Wakaamba kuti: “Nindakamaninsya chikolo, ndakali kuyanda kuyiila zyabanyama. Alubo aachiindi eecho ndakali aachipeekezyo chakuzooba payona wachiindi choonse akuti ndilongele kubusena kuyandikana basikupupulula biingi. Beenzuma basimide mubukombi, bakandigwasya kuti ndiyeesesye atala akuti ndilakonzya na kwaandila tusulwe tubili aachiindi chimwi. Beenzuma aaba bakandiyeezya kuti bwiime bwazintu oobuno bwaba aafwiifwi loko kuti bunyonyoonwe. Alubo munyika mpya, ndiyooyiya zyiingi loko atala abanyama mbindiyandisya mane kukabe kutamani. Nkinkaako, ndakasala kuti ndiyiile mulimu wamaboko wakatali kuyanda chiindi chilamfu pe chakwiiya. Eezi zyakandigwasya kuti ndijane mulimu wakali kundigwasya nindakali kupayona anindakazoolongela ku-Ecuador kubusena buyanda basikupupulula biingi. Miki amulumaakwe lino bali mumulimu wabbazu ku-Ecuador.

15. Bamwi baabona biyeni makani mabotu? Amba chikozyano. (Langa zifanikisyo.)

¹⁵ Tatweelede kumana manguzu pe chiindi bamwi nibakaka kumvwa makani mabotu. Bantu balakonzya kuchincha. Muchikozyano, mwanike waJesu Jakkobo wakamubona Jesu kali kukomena, naakaba Mesiya anaakali kuyiisya bantu. Pesi Jakkobo wakakkala kwaminyaka katali mutobeli waJesu. Jakkobo wakazooba mutobeli waJesu, Jesu kali wabusigwa alubo wakazooba sikwiiya waJesu musungu loko.b (Joh. 7:5; Gal. 2:9) Kuyandikana loko kuti tutalengwaani pe kukambawukila babbululu besu batanatondeezya kuti balaachiyandisyo chakuswiilila makani mabotu. Alubo tweelede kukambawukila bantu bakakakide kutuswiilila muchiindi chayinda. Tutalubi kuti tulikupona kumazuba aakumamanino, nkinkaako mulimu wesu wakukambawuka uyandikana loko. Kuti twabakambawukila bantu lino, balakonzya kutachincha, pesi amwi bazoochincha muchiindi chilikunembo, amwi balakonzya kuzoochincha mapenzi mapati naazoosaanguna.c

ATUKKALE KATULUMBA ZIYEEKEZYO ZYAJEHOVA

16. Ziyeekezyo zyaJehova zyakakugwasya biyeni? (Langa kabbokesi katii, “Zibelesye Kuti Ugwasye Bamwi.”)

¹⁶ Chimwi chakulya chamubukombi nchitupegwa chibambilwa bantu batanazimvwa pe njiisyo zyamuBbayibbili zyakasimpe. Muchikozyano, nkani yabantu boonse iipegwa mviki amviki, zimwi zyiiyo amavidiyo aali aa jw.org amamagazini aabantu boonse, zibambilidwe bantu batali Bakamboni pe. Nikuba oobo, tulakonzya kugwasigwa aziyeekezyo zijanika muzintu eezi. Zitugwasya kuti tumuyande loko Jehova, tulisyome Jwi lyakwe alubo zitugwasya kuti tuzwidilile mukuyiisya bamwi kasimpe kamuBbayibbili.—Int. 19:7.

17. Muuzyiimo zili biyeni mutweelede kubelesya njiisyo nzitwakasaanguna kwiiya?

¹⁷ Mbukunga tuli Bakamboni baJehova, tulabotelwa chiindi nikwaba kumvwisisisya kupya. Alubo tulabotelwa akaambo kakasimpe kamuBbayibbili nkitwakasaanguna kwiiya nkaambo kakatugwasya kuti tuswene aafwiifwi aJehova. Mbuli mbutwayiya, kasimpe nkitwakasaanguna kwiiya kalakonzya kutugwasya lino. Chiindi nitwapegwa malayilile mapya ambunga mpawo twabonaanga zintu zyeelede kuchitwa mbuli mbutuli kuyeeyela, tweelede kulibombya kwiinda mukuyeeya kuti Jehova Mulengi wesu musongo alubo ulaamanguzu, nguwe uulikuzulwida mbunga yakwe. Kuti iswe naakuti umwi bbululu wesu kalikulisimya kusunko, tweelede kuba aamoyo mulamfu akuyeeyesesya kuti nkamboonzi Jehova nalikuzumizya mapenzi. Alubo chiindi nitusala zintu nzituyanda kubikka mubusena bwakusaanguna, tatweelede kuluba pe kuti tulikupona kumazuba aakumamanino. Ziyeekezyo zyaJehova azitupe busongo akutugwasya kuti tukkale katukomba Jehova.