Kujana Bbayibbele Lyandigwasya Biyeni?—Chipanzi 1: Ziba Bbayibbele Lyako

“Ngandeezya kubala Bbayibbele pesi ngandamana manguzu nkaambo ndidamfu loko.”—Briana, 15.

Ulimvwa oobo na anduwe? Chiiyo eechi chilakonzya kukugwasya.

• Nkamboonzi nitweelede kubala Bbayibbele?

• Nga ndilatalikilaali kubala Bbayibbele?

• Nzibaamba basela lyako

Nkamboonzi nitweelede kubala Bbayibbele?

Kulakubbowa na kubala Bbayibbele? Kuti kakuli boobo, teenduwe pe awulikke. Ulakonzya kuyeeya kuti Bbayibbele lili aamapeji miingi loko, lili aatubala tuniini akuti talikwe mapikicha pe alubo lilisiyene aTV amavidiyo.

Pesi yeeya eezi: Atuteedi wabona bbokesi pati lyachiindi iili aazintu ziyandikana, teewayinooba aachiyandisyo chakubona zili mukati na?

Bbayibbele lili mbuli bbokesi eelyo lili aazintu ziyandikana. Lilaamakani aabusongo akonzya kukugwasya kuti

• Usale kabotu

• Wambuuzyanie kabotu abazyali bako

• Ujane beenzinyokwe balikabotu

• Ulisimye nukataazikene

Nkamboonzi Bbayibbele nilikonzya kutugwasya nikuba kuti ndyachiindi loko? Nkaambo “Magwalo oonse akasololelwa a Leza.” (2 Timoteyo 3:16) Eezi zyaamba kuti makani aali muBbayibbele aazwa kuMuntu ulaabusongo kwiinda bantu boonse.

Nga ndilatalikilaali kubala Bbayibbele?

Imwi nzila nkulibala kuzwa kumasaangunino kusikila kumamanino. Eezi zilakugwasya kuti umvwisisisye mulumbe woonse uuli muBbayibbele. Kuli nzila zyiingi zyakubala Bbayibbele. Bona zikozyano zibili:

• Ulakonzya kubala mabbuku aaBbayibbele aali 66 kweendelana ambaatobelene, kuzwa kuli Matalikilo kusikila kuli Ciyubunuzyo.

• Ulakonzya kubala kweendelana ambuzitobelene zintu zyakachitika.

Chikonzya Kukugwasya: Mumakani Aayungizyidwe A7 muBbaibbele lya Busanduluzi Bwanyika Mpya, muli chaati iitondeezya zintu zyakachitika mubuumi bwaJesu naakali aanyika. Zintu eezi zilembedwe kweendelana ambuzitobelene.

Nzila yabili yakubala Bbayibbele njakusala imwi nkani yeendelana apenzi ndulikuswaana. Muchikozyano:

• Ulikuyanduula beenzuma basyomeka na? Bala Lwaano lwaJonatani aDavida. (1 Samuele zyaandaano  18-20) Mpawo ulange buntu bubotu mbwakalaabo Davida bwakapa kuti amvwanane aaJonatani.

• Uyanda kuba aachibindi chakuzunda masunko na? Bala lwaJosefa lutondeezya mbaakazunda sunko. (Matalikilo, chaandaano 39) Mpawo ubone kuti Josefa wakali kwaajana kuli manguzu aakuti azunde masunko.

• Uyanda kuziba mbukonzya kugwasigwa aankombyo na? Bala lwaano lwaNehemiya. (Nehemiya chaandaano 2) Mpawo ulange bukamboni butondeezya kuti Leza wakasandula nkombyo yaNehemiya.

Chikonzya Kukugwasya: Yanduula ndawu yuumwide chiindi nulikubala Bbayibbele kuchitila kuti ubikkile maanu kuzintu nzulikubala.

Nzila yachitatu yakubala Bbayibbele nkusala imwi nkani naakuti ntembawuzyo, uyibale mpawo uyanduule zyiiyo nzukonzya kubelesya mubuumi bwako. Nwaamaninsya kubala libuzye mibuzyo iili mbuli yakuti:

• Nkamboonzi Jehova naakapa kuti makani aaya alembwe muBbayibbele?

• Nkani eeyi indiyiisyaanzi atala abuntu bwaJehova naakuti nzila njachitaayo zintu?

• Kujana ndazibelesya biyeni nzindayiya mubuumi bwangu?

Chikonzya Kukugwasya: Libikkile chipekeezyo. Lemba aansi buzuba mbuyanda kuzootalisya kubala Bbayibbele.