Bantu Batyeni Atala Akukomba?
“Chiindi nindikomba nga ndalimvwa mbuli kuti Leza ulaafwiifwi andime, undijisi kukuboko kalikunditondeezya nzila njindeelede kweendaayo.”—MARÍA.
“Mwanakazaangu wakachiswa bulwazi bwakkensa kwaminyaka iili 13 mpawo yakazoomutola. Buzuba abuzuba ndakali kukomba kuli Leza kandili aachoonzyo chakuti ulikuziswiilila nkombyo zyangu. Eezi zyakali kupa kuti ndikkalikane mumizeezo.”—RAÚL.
“Nkombyo nchipo chiyandikana loko chizwa kuli Leza.”—ARNE.
Bantu bali mbuli María, Raúl, Arne abamwi, babona nkombyo kachili chipo chiyandikana loko. Bakabona kuti nkombyo ibapa kuti bakonzye kwaambuula aaLeza, bamulumbe akuti bayanduule lugwasyo kulinguwe. Bantu aaba, bali aachoonzyo chakuti nzilyaamba Bbayibbele atala akukomba kuli Leza nzyachoonzyo. Bbayibbele lyaamba kuti: “Alimwi oolu ndolusyomo ndotujisi mulinguwe, kuti kufwumbwa cintu ncotumulomba ceendelana akuyanda kwakwe, ulatumvwa.”—1 Johane 5:14.
Pesi bamwi tabazisyomi pe zyaambwa aaBbayibbele atala ankombyo. Steve wakaamba mbaakali kulimvwa atala akukomba. Wakati: “Nindakali aaminyaka iili 17 beenzuma batatu bakafwa, umwi wakabbewuka mumoota mpawo babili bakanikila mulwizi.” Kuzwa waawo, Steve wakachitaanzi? Wakati: “Ndakakomba kuli Leza kandiyanda kuziba kuti nkamboonzi eezi nizyakachitika pesi taakandisandula pe. Ndakalibuzya kuti, ‘Manje ndikombelaanzi?’” Eezi zitondeezya kuti bamwi baleka kukomba akaambo kakuti nkombyo zyabo tazisandulwi pe.
Kuli tumwi twaambo tupa kuti bamwi babonaanga kukomba takugwasyi. Bamwi baamba kuti mbukunga Leza ulizizi zintu zyoonse nzituyanda amapenzi ngituswaana nkinkaako, tatweelede kukomba pe katumubuzya zintu nzyazi kale.
Bamwi balibuzya kuti Leza tabaswiilili pe akaambo kazibi nzibakachita chiindi. Jenny wakaamba kuti: “Nga ndalimvwa kanditagwasyi pe akaambo kazibi nzindakachita chiindi. Ndakali kulibuzya kuti tandeeleli pe kuti Leza aswiilile nkombyo zyangu.”
Iwe utyeni atala akukomba? Kuti kuli aamaboneno aali mbuli aabantu baambwa aajulu batakwe choonzyo chakuti nkombyo ilagwasya, Bbayibbele lilakonzya kukugwasya. Tulakonzya kusyoma nzilyaamba Bbayibbele atala ankombyo;a alubo Bbayibbele lilakonzya kukugwasya kuti ujane nsandulo zyamibuzyo iitobela:
Leza ulaziswiilila na nkombyo zyesu?
Nkamboonzi zimwi nkombyo nizitasandulwi?
Kujana wakomba biyeni kuti Leza asandule nkombyo zyako?
Kukomba kukugwasya biyeni?
a MuBbayibbele, muli nkombyo zyiingi loko zyabakombi baLeza kuswaanizya azyaJesu Kristu. MuMagwalo aachiHebrayo aazibikene kuti Old Testament, muli nkombyo zyiinda ku150.