Matayo
6 “Amucenjele kuti mutanoociti bululami bwanu kumbele lyabantu kutegwa bamubone; buyo-buyo, tamukabi abulumbu kuzwa kuli Uso uuli kujulu. 2 Aboobo ciindi nomupa zipego zyaluse,* mutanoolizyi mweembo kumbele lyanu mbubonya basikuupaupa ameso mbobacita muzikombelo amunzila kutegwa batembaulwe abantu. Ncobeni ndimwaambila kuti: Batambwida limwi bulumbu bwabo boonse. 3 Pele nywebo, nomupa zipego zyaluse, janza lyanu lyalumwensyi litazyibi ncolicita janza lyalulyo, 4 kutegwa zipego zyanu zyaluse zitabonwi abantu. Mpoonya Uso uubona zisisidwe uyoomupa bulumbu.
5 “Alimwi ciindi nomupaila, mutanoociti mbuli basikuupaupa ameso, nkaambo balayanda kupaila kabaimvwi muzikombelo amumaswaanganino aanzila kutegwa babonwe abantu. Ncobeni ndimwaambila kuti: Batambwida limwi bulumbu bwabo boonse. 6 Pele nywebo ciindi nomupaila, amunjile muŋanda yanu, alimwi mwajala mulyango, amupaile kuli Uso uutalibonyi. Mpoonya Uso uutalibonyi uyoomupa bulumbu. 7 Pele ciindi nomupaila, mutani kwaambi majwi ngeena cakwiinduluka mbuli bantu bamasi mbobacita, nkaambo bayeeya kuti bayoomvwugwa ikuti babelesya majwi manji. 8 Aboobo mutabi mbuli mbabo, nkaambo Leza Uso ulizyi zyintu nzyomuyandika kamutana kumulomba.
9 “Aboobo mboobu mbomweelede kupaila:
“‘Taateesu ooli kujulu, alisalazyigwe zyina lyako. 10 Abuboole Bwami bwako. Akucitwe kuyanda kwako ansi aano mbubonya mbuli kujulu. 11 Kotupa sunu cakulya* cesu cabuzuba obuno, 12 alimwi kotulekelela zibi* zyesu, mbubonya andiswe mbotubalekelela batubisyila.* 13 Alimwi utatunjizyi mumusunko, pele utuvwune kumubi.’
14 “Nkaambo kuti kamulekelela bantu milandu yabo, awalo Uso uuli kujulu uyoomulekelela; 15 pele kuti kamutalekeleli bantu milandu yabo, awalo Uso takamulekeleli milandu yanu.
16 “Ciindi nomuliimya kulya, amuleke kusyulunganya kumeso mbuli basikuupaupa ameso, nkaambo balabisya kubusyu ikutegwa balibonye kubantu kuti baliimya kulya. Ncobeni ndimwaambila kuti: Batambwida limwi bulumbu bwabo boonse. 17 Pele nywebo ciindi nomuliimya kulya, amunane mafwuta kumutwe akusamba kubusyu 18 ikutegwa mulibonye kuti muliimya kulya, ikutali kubantu pele kuli Uso uutalibonyi. Mpoonya Uso uubona zisisidwe uyoomupa bulumbu.
19 “Amuleke kuliyobweda lubono anyika, aawo mpoluligwa zyuuka* ankalaya alimwi ababbi mpobanjila akubba. 20 Muciindi caboobo, amuliyobwede lubono kujulu, kwalo nkolutaligwi azyuuka naa nkalaya alimwi ababbi nkobatanjili akubba. 21 Nkaambo ooko kuli lubono lwako, awalo moyo wako nkuuyooba.
22 “Liso ndelambe lyamubili. Ikuti liso lyako kalilangide buyo acintu comwe,* mubili wako woonse ulaba mumumuni. 23 Pele ikuti liso lyako kalilanga zibi,* mubili wako woonse ulaba mumudima. Ikuti liso lyeelede kuleta mumuni kumubili lyabija akutalika kuleta mudima, mubili woonse ulaba mumudima uusiya mbi.
24 “Taakwe uukonzya kubelekela basimalelo bobilo, nkaambo uyoosula umwi akuyanda umbi naa uyoosyomeka kuli umwi akusampula umbi. Tamukonzyi kubelekela Leza alimwi a Lubono.
25 “Akaambo kaceeci ndimwaambila kuti: Amuleke kulibilika kujatikizya buumi bwanu kuti mulalya nzi naa kuti mulanywa nzi, noiba mibili yanu kuti mulasama nzi. Sena buumi tabuyandiki kwiinda cakulya amubili kwiinda zyakusama? 26 Amulangisye bayuni bauluka mujulu; tabasyangi mbuto naa kutebula nokuba kuyobola mumatala. Nokuba boobo, Uso wakujulu ulabasanina. Sena tamuyandiki kwiinda mbabo? 27 Nguni akati kanu kwiinda mukulibilika uukonzya kuyungizya buumi bwakwe naaceya? 28 Alimwi kumakani aakusama, nkaambo nzi ncomulibilika? Amwiiye kumaluba-luba aamusyokwe mbwaakomena; taabeleki nokuba kuluka; 29 pele ndimwaambila kuti naba Solomoni mubulemu bwakwe boonse kunyina naakasamide mbuli limwi lyayaaya. 30 Lino ikuti Leza kazisamika boobu zimena musyokwe iziliko sunu pele juunza zyayuma akusowelwa mumulilo, sena takaindi kumusamika nywebo, nywebo nobasilusyomo luniini? 31 Aboobo mutani kulibiliki akwaamba kuti, ‘Ino tulalya nzi?’ naa, ‘Ino tulanywa nzi?’ naa, ‘Ino tulasama nzi?’ 32 Nkaambo zyoonse eezyi, nzyezyintu bamasi nzyobayandaula kapati. Uso wakujulu ulizyi kuti mulaziyanda zyintu zyoonse eezyi.
33 “Aboobo amuzumanane kusaanguna kuyandaula Bwami abululami bwakwe, eelyo zyintu zimbi zyoonse eezyi ziyooyungizyigwa kulindinywe. 34 Aboobo mutani kulibiliki zyabuzuba butobela, nkaambo buzuba butobela bunooli azyakulibilika zyambubo. Buzuba buli boonse bulijisi mapenzi aambubo.