Matayo

7 “Amuleke kubeteka kutegwa mutabetekwi, 2 nkaambo lubeta ndomubetesya, ndomuyoobetesyegwa andinywe, acipimyo ncomubelesya kupimina bamwi, ncobayoobelesya kumupimina andinywe. 3 Aboobo, ino nkaambo nzi ncolanga kakwa kali muliso lyamunyoko pele tobikkili maano kutanda lili muliso lyako? 4 Naa, ino mbuti mbonga waambila munyoko kuti, ‘Atubone ndigusye kakwa kali muliso lyako,’ kakuli muli tanda muliso lyako? 5 Osikuupaupa ameso! Kosaanguna kugusya tanda muliso lyako, mpoonya ulabona kabotu mbonga wagusya kakwa kali muliso lyamunyoko.

6 “Mutapi babwa zyintu zisalala, nokuba kufwusila ngulube ngale zyanu kutegwa zitazilyatauli mpoonya zimupilukile akumukwamauna.

7 “Amuzumanane kulomba, eelyo muyoopegwa; amuzumanane kuyandaula, eelyo muyoojana; amuzumanane kukonkomona, eelyo muyoojulilwa. 8 Nkaambo kufwumbwa uulomba ulapegwa, uuyandaula ulajana, ayooyo uukonkomona uyoojulilwa. 9  Mubwini, nguni akati kanu uunga ikuti mwanaakwe walomba cinkwa ulamupa bbwe? 10 Naa ikuti walomba nswi, sena inga ulamupa nzoka? 11 Aboobo ikuti nywebo nokuba kuti muli babi, mulicizyi kupa zipego zibotu kubana banu, nkokuti Uso uuli kujulu uyooinda kupa zyintu zibotu kuli baabo bamulomba!

12 “Aboobo, zyintu zyoonse nzimuyanda kuti bantu bamucitile, anywebo nzimweelede kubacitila. Eeci mubwini ncencico Mulawo azyakalembwa a Basinsimi ncozipandulula.

13 “Amunjile mumulyango uusyanikide nkaambo nzila iitola kulunyonyooko ilikwazeme alimwi nimpati, kumane mbanji banjila mulinjiyo; 14 pele ulisyanikide mulyango alimwi ninsyoonto nzila iitola kubuumi, kumane mbasyoonto baijana.

15 “Amubacenjelele basinsimi bakubeja ibaboola kulindinywe kabasamide zisani zyambelele, pele mukati mbaaumpe babutambo. 16 Kwiinda mumicelo yabo muyoobazyiba. Sena bantu kuli nobacela misaansa kuzwa kumamvwa naa nkuyu kumitubetube? 17 Mbubonya oobo, cisamu cibotu cili coonse cilazyala micelo mibotu, pele cisamu cibi cili coonse cilazyala micelo mibi. 18 Cisamu cibotu tacikonzyi kuzyala micelo mibi; niciba cisamu cibi tacikonzyi kuzyala micelo mibotu. 19 Cisamu cili coonse citazyali micelo mibotu cilagonkwa akusowelwa mumulilo. 20 Aboobo mubwini, kwiinda mumicelo yabo muyoobazyiba bantu aabo.

21 “Tabali boonse baamba kulindime kuti ‘Mwami, Mwami,’ ibayoonjila mu Bwami bwakujulu, pele ooyo uucita kuyanda kwa Taata uuli kujulu. 22 Ibanji bayooamba kulindime mubuzuba oobo kuti: ‘Mwami, Mwami, sena tiitwakasinsima muzyina lyako, kutanda madaimona muzyina lyako, akucita milimo mipati minji muzyina lyako?’ 23 Pele mebo mpoonya aawo ndiyoobaambila kuti: Tiindaamuzyi pe! Amuzwe kulindime, nywebo nobasikucita zibi!

24 “Aboobo, kufwumbwa muntu uuswiilila akucita eezyi nzindaamba, uyookozyanisyigwa amwaalumi uucenjede, walo wakayaka ŋanda yakwe amwala. 25 Lino kwakawa mvwula mpati amaanzi akapaya, muwo wakaunga akubbubbula kuŋanda eeyo, pele tiiyakawa pe, nkaambo yakayakidwe amwala. 26 Kunze lyaboobo, kufwumbwa muntu uuswiilila pele kataciti eezyi nzindaamba, uyookozyanisyigwa amwaalumi mufwubafwuba, walo wakayaka ŋanda yakwe amusenga. 27 Lino kwakawa mvwula mpati amaanzi akapaya, muwo wakaunga akuuma ŋanda eeyo mpoonya yakawa, alimwi ikuwa kwanjiyo kwakali kupati.”

28 Lino Jesu naakamanizya kwaamba makani aaya, icakatobela ncakuti makamu aabantu akagambwa kapati ambwaakali kuyiisya, 29 nkaambo wakali kubayiisya mbuli muntu uujisi nguzu zya Leza, ikutali mbuli balembi babo.