Marko

10 Kuzwa kooko wakanyamuka akuboola kuzyooko zili kuminyinza ya Judaya amutala lya Jodano, alimwi makamu aabantu akaboola kulinguwe. Eelyo mbuli mbwaakali kucita lyoonse, wakatalika alimwi kubayiisya. 2 Lino ba Falisi bakaboola, eelyo kutegwa bamusunke, bakamubuzya ikuti naa cilizumizyidwe kumwaalumi kuleka mukaintu. 3 Wakabaingula kuti: “Ino Musa wakamulailila buti?” 4 Bakati: “Musa wakazumizya kulemba lugwalo lwakumutanda akumuleka.” 5 Pele Jesu wakabaambila kuti: “Akaambo kakuyuma kwamyoyo yanu ncaakamulembela mulawo ooyu. 6 Pele, kuzwa kumatalikilo ‘Leza wakalenga mwaalumi amukaintu. 7 Akaambo kaceeci mwaalumi uyoosiya bausyi abanyina, 8 eelyo aaba bobilo bayooba mubili* omwe,’ aboobo tabacili bobilo, pele baba mubili omwe. 9 Aboobo eeco Leza ncaakaswaanganya kutabi muntu uucaandaanya.” 10 Alimwi naakali muŋanda, basikwiiya bakatalika kumubuzya makani aaya. 11 Kumane wakabaambila kuti: “Kufwumbwa uuleka mukaintu wakwe akukwata umbi wacita bumambe alimwi wabisizya mukaintu wakwe mutaanzi, 12 alimwi ikuti mukaintu wazwa kumulumi wakwe* akukwatwa kuluumbi, wacita bumambe.”

13 Lino bantu bakatalika kumuletela bana basyoonto kutegwa abajate, pele basikwiiya bakabakalalila. 14 Jesu naakabona boobo wakakalala akubaambila kuti: “Amubaleke bana baboole kulindime; mutabakasyi pe, nkaambo Bwami bwa Leza mbwabaabo bali mbuli baaba. 15 Ncobeni ndimwaambila kuti: Kufwumbwa uutatambuli Bwami bwa Leza mbuli mwana musyoonto takanjili pe muli mbubo.” 16 Eelyo wakababweza bana akubafwukatila alimwi wakatalika kubaleleka kwiinda mukubikka maanza ali mbabo.

17 Lino naakali kuyaabweenda, umwi muntu wakamubalikila akumufwugamina akumubuzya kuti: “O Mwiiyi mubotu, ncinzi ncondeelede kucita kutegwa nkajane buumi butamani?” 18 Jesu wakamubuzya kuti: “Nkaambo nzi ncondaamba kuti omubotu? Taakwe mubotu ccita buyo Leza alikke. 19 Tee uliizyi milawo yakuti: ‘Utajayi muntu; utaciti bumambe; utabbi; utalengeleli kaambo; utaunini; lemeka bauso abanyoko.’” 20 Imwaalumi wakati: “O Mwiiyi, eezyi zyoonse ndali kuzitobela kuzwa kubwana.” 21 Jesu wakamulanga caluyando akumwaambila kuti: “Kuli cintu comwe ncobulide: Koya ukasambale zyintu nzyojisi akupa bacete, aboobo uyooba alubono kujulu, wamana uboole ube sikunditobela.” 22 Pele mwaalumi ooyu naakamvwa bwiinguzi oobu wakausa akuunka katyompedwe, nkaambo wakali alubono lunji.

23 Lino Jesu naakamana kubalanga bantu, wakaambila basikwiiya bakwe kuti: “Eelyo kaka ciya kuba cintu ciyumu kubantu bajisi mali kunjila mu Bwami bwa Leza!” 24 Pele basikwiiya bakagambwa kumajwi ngaakaamba. Mpoonya Jesu wakabaambila kuti: “Nobana, eelyo kaka ncintu ciyumu kunji-la mu Bwami bwa Leza! 25 Ncuuba kunkamela ikwiinda mukapulo kanyeleti kwiinda mbocibede kumuntu muvwubi kunjila mu Bwami bwa Leza.” 26 Pele alimwi bakakankamana akumubuzya kuti: “Ino nguni mubwini uukonzya kufwutuka?” 27 Jesu wakabalanga kumane wakati: “Kubantu tacikonzyeki pe, pele ikutali kuli Leza, nkaambo zyintu zyoonse zilakonzyeka kuli Leza.” 28 Petulo wakatalika kumwaambila kuti: “Bona! Twakasiya zyintu zyoonse alimwi twali kukutobela.” 29 Jesu wakati: “Ncobeni ndimwaambila kuti: Taakwe wakasiya ŋanda naa banabokwabo naa bacizyi naa banyina naa bausyi naa bana naa myuunda akaambo kandime alimwi akaambo kamakani mabotu 30 uutakajani myaanda muciindi cino—yamaanda, banabokwabo, bacizyi, bamamama, bana alimwi amyuunda antoomwe akupenzyegwa—eelyo mubweende bwazyintu buboola, ibuumi butamani. 31 Nokuba boobo, banji bataanzi bayooba bakumamanino abaabo bakumamanino bayooba bataanzi.”

32 Lino bakali munzila kabatanta kuya ku Jelusalemu, Jesu nguwakali kusolola alimwi bakagambwa, pele aabo bakali kumuccilila bakayoowa. Alimwi wakatola bali kkumi ababili kumbali akutalika kubaambila zyintu eezyi zyakali kulangilwa kumucitikila: 33 “Lino mpaawa tulatanta kuunka ku Jelusalemu, alimwi Mwana wamuntu uyooabwa kuli basilutwe babapaizi abalembi. Bayoomupa mulandu wakuti ajaigwe akumwaaba kubantu bamasi, 34 alimwi aaba bayoomufwubaazya akumuswida mate, bayoomukwibbaula, alimwi akumujaya, pele kwaakwiinda mazuba otatwe uyoobuka.”

35 Lino Jakobo a Johane, bana ba Zebedayo bobilo basankwa bakaboola kulinguwe akumwaambila kuti: “Mwiiyi, tuyanda kuti utucitile kufwumbwa ncotutiikulombe.” 36 Wakababuzya kuti: “Ncinzi ncomuyanda kuti ndimucitile?” 37 Bakamwaambila kuti: “Tulomba kuti waakulemekwa tukakkale umwi kujanza lyako lyalulyo aumwi kujanza lyako lyalumwensyi.” 38 Pele Jesu wakabaambila kuti: “Tamucizyi ncomulomba. Sena mulakonzya kunywa nkomeki njondinywa naa kubbapatizyigwa alubbapatizyo ndondibbapatizyigwa?” 39 Bakamwaambila kuti: “Inzya tulakonzya.” Mpoonya Jesu wakabaambila kuti: “Nkomeki njondinywa, muya kwiinywa, alimwi lubbapatizyo ndondibbapatizyigwa, muya kubbapatizyigwa. 40 Pele aaya makani aakukkala kululyo lwangu naa kulumwensyi lwangu tandili ndime ndipa pe, pele masena aaya ngabaabo bakabambilwa ngawo.”

41 Lino ibali kkumi nobakaamvwa makani aaya, bakatalika kumukalalila Jakobo a Johane. 42 Pele Jesu naakabaita, wakabaambila kuti: “Mulizyi kuti aabo babonwa kuti mbaleli babamasi balabadyaaminina bantu, alimwi bapati akati kabo balabeendelezya calunya. 43 Oobu tabusyi mbocibede akati kanu; pele kufwumbwa uuyanda kuba mupati akati kanu weelede kuba mubelesi wanu, 44 alimwi kufwumbwa uuyanda kuba mutaanzi akati kanu weelede kuba muzike waboonse. 45 Nkaambo naba Mwana wamuntu wakaboola, ikutali kuzyoobelekelwa, pele kuzyoobeleka akupa buumi bwakwe ikuba cinunuzyo cabanji.”

46 Lino bakasika ku Jeliko. Pele eelyo walo abasikwiiya bakwe abantu bali mbobabede nobakali kuzwa mu Jeliko, Batimeyu imwana wa Timeyu, mulombi moofwu wakalikkede mumbali aanzila. 47 Naakamvwa kuti ngu Jesu waku Nazaleta, wakatalika koongolola akwaamba kuti: “Jesu, O Mwana wa Davida, kondifwida luse!” 48 Mpoonya banji bakatalika kumukalalila kabamwaambila kuti aumune, pele walo wakazumanana koongololesya kati: “O Mwana wa Davida, kondifwida luse!” 49 Aboobo Jesu wakaima akwaamba kuti: “Amumwiite.” Mpoonya bakamwiita moofwu ooyu kabamwaambila kuti: “Kkazyika moyo! Nyamuka; ulakwiita.” 50 Mpoonya wakacisowa cisani cakwe caatala, wasotoka akuunka kuli Jesu. 51 Mpoonya Jesu wakamubuzya kuti: “Ncinzi ncoyanda kuti ndikucitile?” Moofwu wakamwaambila kuti: “O Mwiiyi,* ndilomba kuti nditalike kulanga.” 52 Eelyo Jesu wakamwaambila kuti: “Koya. Lusyomo lwako lwakuponya.” Mpoonya aawo wakatalika kulanga alimwi wakatalika kumutobela munzila.