Marko

11 Lino nibakalondelela ku Jelusalemu, ku Betefage alimwi a Betaniya aa Cilundu ca Maolifa, wakatuma basikwiiya bakwe bobilo 2 akubaambila kuti: “Kamuya mumunzi uulya uulibonya, alimwi mwanjila buyo mumunzi ooyu, mulajana mwana wambongolo ulaangidwe, walo uutanatantidwe muntu; mumwaangulule akumuleta. 3 Kuti kwaba muntu uumubuzya kuti, ‘Ino mumwaangunwida nzi?’ Mwaambe kuti, ‘Mwami ulamuyanda alimwi ulamupilusya cakufwambaana.’” 4 Aboobo bakaunka akujana mwana wambongolo ulaangidwe amulyango kumbali aanzila, eelyo bakamwaangulula. 5 Pele bamwi ibakaimvwi waawo bakababuzya kuti: “Ino nkaambo nzi ncomumwaangulula mwana wambongolo?” 6 Bakaamba mbubonya Jesu mbwaakabaambila, aboobo bakabaleka baunka.

7 Aboobo bakaleta mwana wambongolo kuli Jesu, alimwi bakabikka zisani zyabo zyaatala alinguwe eelyo Jesu wakatanta akukkala alinguwe. 8 Alimwi banji bakayala zisani zyabo zyaatala munzila, pele bamwi bakatema matewu mumbali aanzila. 9 Alimwi aabo bakali kweenda kumbele abaabo bakali kuboola munsi bakazumanana koongolola kuti: “Amumufwutule! Ulilelekedwe ooyo uuboola muzyina lya Jehova! 10 Bulilelekedwe Bwami buboola bwataateesu Davida! Amumufwutule nywebo nomuli kujulu lyamajulu!” 11 Aboobo wakasika ku Jelusalemu akunjila mutempele, mpoonya wakalanga-langa zyintu zyoonse, pele mbwaanga ciindi cakalimanide, wakazwa akuunka ku Betaniya abali kkumi ababili.

12 Buzuba bwakaccilila nobakazwa ku Betaniya, wakafwa nzala. 13 Kacili alamfwu wakabona mukuyu uujisi matuvwu, aboobo wakaunka kuyoobona naa inga wajana cili coonse kulinguwo. Pele naakasika kulinguwo kunyina ncaakajana pele buyo matuvwu, nkaambo tiicakali ciindi cankuyu. 14 Aboobo wakawaambila kuti: “Kutabi muntu uuyoolya mucelo kulinduwe mane kukabe kutamani.” Basikwiiya bakwe bakali kuswiilila.

15 Lino bakaboola ku Jelusalemu. Ooko wakanjila mutempele akutalika kubatanda aabo bakali kusambala akuula mutempele, alimwi wakatingamuna matebulu aabasikucinca mali azyuuno zyabaabo bakali kusambala nkwilimba, 16 alimwi kunyina muntu ngwaakalekela kwiinzya cintu mulubuwa lwatempele. 17 Wakali kuyiisya akwaamba kuti: “Sena takulembedwe kuti: ‘Ŋanda yangu iyooitwa kuti niŋanda yakukombela yabantu bamisyobo yoonse’? Pele nywebo mwiicita kuba ciyubilo cababbi.” 18 Mpoonya basilutwe babapaizi abalembi bakamvwa cakacitika, aboobo bakatalika kuyandaula nzila mbobati kamujaye, kayi bakali kumuyoowa nkaambo bantu boonse bakali kugambwa kapati mbwaakali kuyiisya.

19 Alimwi nikwakaba kulubundubundu bakazwa mumunzi mbuli lyoonse. 20 Pele nobakali kwiinda mafwumofwumo, bakabona mukuyu wayuma kale kutalikila kumiyanda. 21 Aboobo Petulo naakaibaluka cakacitikide, wakati kuli Jesu: “Labbi, bona! Mukuyu ngookasinganya wayuma.” 22 Jesu wakabaambila kuti: “Amube alusyomo muli Leza. 23 Ncobeni ndimwaambila kuti kufwumbwa waambila cilundu eeci kuti, ‘Zyuka aawa uliwaale mulwizi,’ alimwi katadooneki mumoyo wakwe pele kajisi lusyomo lwakuti ncaamba cilacitika, ciyoocitika ncobeni. 24 Ncencico eeci ncendimwaambila kuti: Zyintu zyoonse nzyomupailila akulomba, amube alusyomo lwakuti mwazitambula kale, eelyo muyoozitambula ncobeni. 25 Alimwi nomwiimikila akupaila, amulekelele kufwumbwa muntu ncaakamubisizya, kutegwa awalo Uso wanu uuli kujulu akonzye kumulekelela milandu yanu.” 26* —

27 Bakaboola alimwi ku Jelusalemu. Lino naakali kweenda mutempele, basilutwe babapaizi abalembi abapati bakaboola kulinguwe 28 akumubuzya kuti: “Ino nkuli nkookajana nguzu zyakucita zyintu eezyi? Naa nguni wakakupa nguzu zyakucita zyintu eezyi?” 29 Jesu wakabaambila kuti: “Ndilamubuzya mubuzyo omwe. Ikuti naa mundiingule, andime ndilamwaambila wakandipa nguzu zyakucita zyintu eezyi. 30 Sena lubbapatizyo lwa Johane lwakazwa kujulu naa kubantu? Amundiingule.” 31 Aboobo bakatalika kulyaambauzya kabati: “Ikuti twaambe kuti, ‘Lwakazwa kujulu,’ ulaamba kuti, ‘Ino nkaambo nzi ncomwatakamusyoma?’ 32 Pele sena twaambe kuti, ‘Lwakazwa kubantu’?” Bakali kuyoowa kwaamba boobo nkaambo bantu boonse bakazyi kuti Johane wakali musinsimi ncobeni. 33 Aboobo ikwiingula Jesu bakati: “Tatuzyi pe.” Awalo Jesu wakabaambila kuti: “Andime tandikoomwaambila nkundakajana nguzu zyakucita zyintu eezyi.”