Luka

2 Lino mumazuba aayo, Kaisala Agusito wakabikka mulawo mubwami* bwakwe wakuti bantu boonse bakalilembye 2 (kulilembya kwakusaanguna ooku kwakacitika ciindi Kuleniyo naakali mweendelezi wa Siliya), 3 eelyo bantu boonse bakatalika kuunka kuyoolembwa, aumwi kumunzi wakwabo. 4 Awalo Josefa wakazwa ku Galilaya, mumunzi wa Nazaleta akuya ku Judaya, mumunzi wa Davida uutegwa Betelehemu, mbwaanga wakali wamuŋanda alimwi wamukwasyi wa Davida. 5 Wakaunka kutegwa bakalilembye a Maliya walo aciindi eeco wakali kale mukaintu wakwe, alimwi aciindi eeci wakali afwaafwi kutumbuka. 6 Nobakacili kooko, cakasika ciindi cakuti atumbuke. 7 Aboobo wakatumbuka mwana musankwa, mutaanzi kuzyalwa, wakamuvwungaila muzisani akumulazika mucilido cabanyama nkaambo tiibakajana busena muŋanda yabeenzu.

8 Alimwi mucooko nciconya eeco kwakali beembezi ibakali musyokwe kabeembela butanga bwabo masiku. 9 Kabatayeeyeli mungelo wa Jehova wakaima munsi lyabo, eelyo kwakaba mumuni mpobakabede kutondezya bulemu bwa Jehova, aboobo bakayoowa kapati. 10 Pele mungelo wakabaambila kuti: “Mutayoowi, amubone! Ndamuletela makani mabotu aayoobakkomanisya kapati bantu boonse 11 nkaambo sunu mwazyalilwa Mufwutuli, Kilisito Mwami, mumunzi wa Davida. 12 Alimwi mboobu mbomuyoomuzyiba: Muyoojana muvwanda kavwungaidwe muzisani alimwi kalede mucilido cabanyama.” 13 Ndilyonya kwakaba makamu-makamu aakujulu aakaba antoomwe amungelo ooyu kabatembaula Leza kuti: 14 “Aalemekwe Leza kujulu lyamajulu alimwi aanyika akube luumuno kubantu mbakkomanina.”

15 Aboobo bangelo nibakabasiya akujokela kujulu, beembezi bakatalika kwaambilana kuti: “Katuya ku Betelehemu lino aawa tukabone cintu eeci cacitika, eeco Jehova ncaatuzyibya.” 16 Mpoonya bakaunka cakufwambaana eelyo bakamujana Maliya a Josefa amuvwanda kalede mucilido cabanyama. 17 Nobakamubona muvwanda bakaluula makani ngobakaambilwa kujatikizya mwana ooyu. 18 Alimwi boonse ibakamvwa bakagambwa kumakani ngobakabaambila beembezi, 19 pele Maliya wakaayobola makani aaya mumoyo, kayeeya ncaakali kwaamba. 20 Kumane beembezi bakajokela kabatembaula akulemeka Leza akaambo kazyintu zyoonse nzyobakamvwa akubona, kazili mbubonya mbobakaambilwa.

21 Nikwakainda mazuba aali lusele, nicakasika ciindi cakuti apalulwe, wakaulikwa zyina lyakuti Jesu, izyina mungelo ndyaakaamba katanamitwa.

22 Alimwi nicakasika ciindi cakuti basalazyigwe kweelana a Mulawo wa Musa, bakatanta anguwe kuya ku Jelusalemu kutegwa bakamupe kuli Jehova, 23 kweelana ambokulembedwe mu Mulawo wa Jehova kuti: “Mwana musankwa mutaanzi kuzyalwa weelede kwaabwa kuli Jehova.” 24 Mpoonya bakatuula cipaizyo kweelana acaambwa mu Mulawo wa Jehova kuti: “Inziba zyobilo naa bana bankwilimba bobilo.”

25 Lino amubone! Kwakali muntu mu Jelusalemu iwakali kutegwa Simiyoni, alimwi ooyu muntu wakali mululami alimwi mukombi, iwakali kulindila kuumbulizyigwa kwa Isilayeli alimwi wakalijisi muuya uusalala. 26 Alimwi Leza wakamuzyibya kwiinda mumuuya uusalala kuti, kunyina naakali kuyoofwa katanamubona Kilisito wa Jehova. 27 Kasololelwa amuuya, wakanjila mutempele, eelyo bazyali nobakaleta muvwanda Jesu kutegwa bamucitile kweelana aciyanza cilembedwe mu Mulawo, 28 walo mwini wakamubweza mwana mumaanza akutembaula Leza akuti: 29 “O Mwami Singuzuzyoonse, komuleka lino muzike wako afwe muluumuno kweelana amajwi aako 30 nkaambo meso aangu alibonena nzila yako yakufwutuzya 31 njookabamba kale iiboneka kubantu boonse, 32 mumuni uumunika mumudima uuvwumbide bamasi alimwi uumunikila bantu bako ba Isilayeli.” 33 Bausyi abanyina bakazumanana kugambwa kuzyintu zyakali kwaambwa kujatikizya mwana. 34 Alimwi Simiyoni wakabaleleka akwaambila Maliya banyina mwana kuti: “Bona! Ooyu usalidwe kupa kuti banji mu Isilayeli bakawe akubuka, alimwi akuba citondezyo cakusampaula 35 (inzya, uyooyasigwa ipanga damfwu) kutegwa nzyobayeeya mumyoyo banji zikayubununwe.”

36 Lino kwakali Ana musinsimi mukaintu, mwana wa Fanuwele, wamukowa wa Aseli. (Ooyu mwanakazi wakalicembeede alimwi wakakkala amulumi wakwe kwamyaka iili ciloba kuzwa nibakakwatana,* 37 kuzwa waawo wakaba mukamufwu, lino kajisi myaka iili makumi aali lusele aine.) Kunyina naakali kulovwa mutempele, wakali kubeleka mulimo uusetekene masiku asyikati, kuliimya kulya alimwi akupaila mipailo yakukombelezya. 38 Aciindi nciconya eeco wakaboola afwaafwi akutalika kulumba Leza, akwaamba zyamwana ooyu kuli boonse aabo bakali kulindila lufwutuko lwa Jelusalemu.

39 Aboobo nobakamanizya kucita zyoonse zyakali kuyandika mu Mulawo wa Jehova, bakapiluka ku Galilaya kumunzi wakwabo wa Nazaleta. 40 Eelyo mwana wakali kuyaabukomena akuba anguzu, busongo kabuyaabuvwula alimwi luse lwa Leza lwakazumanana alinguwe.

41 Lino bazyali bakwe bakajisi cilengwa cakuunka ku Jelusalemu amwaka ku Pobwe lya Kwiindilila. 42 Mpoonya naakaba amyaka iili kkumi aibili, bakaunka kweelana acilengwa capobwe. 43 Naakamana mazuba aapobwe eelyo nobakali kupiluka, mulombe Jesu wakacaala ku Jelusalemu pesi bazyali bakwe tiibakazyiba kuti wacaala. 44 Kabayeeya kuti bakali kweenda limwi munkamu, bakeenda musinzo uutola buzuba boonse mpoonya bakatalika kumuyandaula akati kabasazinyina abeenzinyina. 45 Pele nobatakamujana, bakapiluka ku Jelusalemu akuyoomulangaula cakulomya. 46 Kwiinde mazuba otatwe, bakamujana mutempele kakkede akati kabamayi kaswiilila akubabuzya mibuzyo. 47 Pele boonse aabo bakali kumuswiilila bakali kwiile kulijata kumulomo akaambo kabusongo mbwaakajisi alimwi ambwaakali kwiingula. 48 Mpoonya nobakamubona lyakabaleka, eelyo banyina bakamubuzya kuti: “Mwanaangu, nkaambo nzi ncootucitila boobu? Mebo abauso twapenga kukuyandaula.” 49 Mpoonya wakabaingula kuti: “Ino mwali kundiyandawida nzi? Sena tiimwalizyi kuti ndeelede kuba muŋanda ya Taata?” 50 Pele tiibaakamvwisya kaambo nkaakabaambila.

51 Mpoonya wakaunka ambabo akupiluka ku Nazaleta, eelyo wakazumanana kubamvwida. Alimwi banyina bakaayobola makani oonse aaya mumoyo wabo. 52 Eelyo Jesu wakali kuyaabukomena mubusongo aciimo, kayandwa kapati a Leza alimwi abantu.