Luka

1 Oolemekwa kapati Teyofilo, ibanji bakasoleka kujana akulemba makani aazyintu nzyotusyoma; 2 mbubonya buyo mbuli baabo kuzwa kumatalikilo ibakalibonena ameso akwaambilizya mulumbe mbobakatuletela makani aayo; 3 ndakabona kuti ncibotu kuti andime ndikulembele makani aayo mbwaabede nkaambo ndakaziccililizya zyintu zyoonse kuzwa kumatalikilo cakulomya; 4 ikutegwa usinizye kuti zyintu nzyookayiisyigwa mulomo mpande nzyamasimpe.

5 Kumazuba aa Heloda, mwami wa Judaya, kwakali mupaizi uutegwa Zakaliya umwi wankamu yabapaizi bamukowa wa Abija alimwi iwakakwetene aumwi wabana basimbi ba Aloni, izyina lyakwe wakali Elizabeta. 6 Boonse bobilo bakaliluleme kuli Leza nkaambo bakanyina kampenda mukweenda kwabo kweelana azyoonse nzyowakali kwaamba mulawo amalailile aa Jehova. 7 Pele bakanyina mwana nkaambo Elizabeta tanaakali kuzyala, alimwi boonse bobilo bakalicembeede.

8 Lino naakali kubeleka mulimo wabupaizi kuli Leza munkamu mwaakabede, 9 kweelana acilengwa cakaliko camulimo wabapaizi, bwakali bulizyi bwakwe bwakutuula tununkilizyo naakanjila mutempele lya Jehova, 10 alimwi bantu boonse bakali kupaila anze muwoola lyakutuula tununkilizyo. 11 Wakabona mungelo wa Jehova kaimvwi kululyo lwacipaililo catununkilizyo. 12 Pele Zakaliya wakanyongana naakabona ceeci, alimwi wakayoowa kapati. 13 Pele mungelo wakamwaambila kuti: “Utayoowi Zakaliya, nkaambo kulomba kwako kwamvwugwa, aboobo mukaintu wako, Elizabeta, uyookuzyalila mwana musankwa, eelyo ukamuulike zyina lyakuti Johane. 14 Eelyo uyookondwa akusekelela kapati, alimwi banji bayookondwa akaambo kakuzyalwa kwakwe, 15 mbwaanga unooli mupati kumeso aa Jehova. Pele teelede kunywa waini alimwi acakunywa cili coonse cikola, alimwi unoozwide muuya uusalala ikuzwa nayoozyalwa, 16 alimwi uyoopilusya ibunji bwabana ba Isilayeli kuli Jehova Leza wabo. 17 Alimwi uyoounka kumbele lya Leza kajisi muuya anguzu mbuli zya Elija kuti apilusye myoyo yabamatata kubana alimwi abataswiilili akabapilusye kubusongo bugwasya bwabalulami ikutegwa akabambile Jehova bantu balibambilide.”

18 Eelyo Zakaliya wakabuzya mungelo kuti: “Mbuti mbondikonzya kwaasyoma makani aaya? Nkaambo ndacembaala, alimwi mukaintu wangu myaka yakwelenkana.” 19 Mungelo wakamwiingula kuti: “Ndime Gabuliyeli, ooyo wiima kubusyu bwa Leza, alimwi ndatumwa kuti ndikanane anduwe akukwaambila makani mabotu aazyintu eezyi. 20 Pele bona! Ulaba syaataambi alimwi tokoocikonzya kwaambaula kusikila buzuba zyintu eezyi zyaakucitika nkaambo tonoosyoma majwi aangu aayo aayoozuzikizyigwa aciindi cibikkidwe.” 21 Balo bantu bakali kumulindila Zakaliya, eelyo bakalibilika nkaambo wakamuka kapati kuzwa mutempele. 22 Pele naakazwa, tanaakali kukonzya kwaambaula ambabo, mpoonya bakazyiba kuti wabona cilengaano mutempele. Wakali kwiile kutambaika maanza kuli mbabo pele kataambauli. 23 Lino mazuba aayo aamulimo wakwe uusetekene naakamana, wakaunka kuŋanda yakwe.

24 Naakamana mazuba aaya, Elizabeta imukaintu wakwe wakamita, alimwi kwamyezi yosanwe tanaakali kuzwa muŋanda, kati: 25 “Oobu mbwaandicitila Jehova mazuba aano naandicebuka kundigusya masampu kubantu.”

26 Naakakkwanya myezi iili cisambomwi kamitide, Leza wakatuma mungelo Gabuliyeli kumunzi waku Galilaya uutegwa Nazaleta, 27 kuli nakalindu wakasinkilidwe kumwaalumi uutegwa Josefa wamuŋanda ya Davida, eelyo zyina lyanakalindu ooyu wakali Maliya. 28 Eelyo Gabuliyeli naakanjila mwaakabede Maliya, wakati: “Wapona ooyandwa kapati, Jehova ulaanduwe.” 29 Pele wakanyongana kapati kumajwi aaya, eelyo wakali kuyanda kuzyiba ncokwaamba kwaanzyigwa ooku. 30 Aboobo mungelo wakamwaambila kuti: “Utayoowi Maliya, nkaambo Leza wakufwida luse. 31 Alimwi bona! Uyoomita akuzyala mwana musankwa, ngoyakuulika zyina lyakuti Jesu. 32 Ooyu unooli mupati alimwi uyootegwa Mwana wa Mupatikampatila, alimwi Jehova Leza uyoomupa cuuno cabwami ca Davida usyi, 33 eelyo unooli Mwami uuyoolela muŋanda ya Jakobo kukabe kutamani, alimwi Bwami bwakwe tabukamani.”

34 Pele Maliya wakamubuzya mungelo kuti: “Ino eeci ciyookonzyeka buti mbwaanga mebo tandizyi* musankwa?” 35 Mukwiingula imungelo wakamwaambila kuti: “Muuya uusalala uyookusikila alimwi nguzu zya Mupatikampatila ziyooba alinduwe. Akaambo kaceeco ooyo uyoozyalwa uyakwaambwa kuti uusalala, Mwana wa Leza. 36 Alimwi bona! Elizabeta wamukowa wako awalo wakamita mwana musankwa kubucembele, eelyo lino wakkwanya myezi iili cisambomwi, ooyo wakali kutegwa mukaintu uutazyali, 37 nkaambo kunyina ncaamba Leza citakonzyi kucitika.” 38 Mpoonya Maliya wakati: “Bona, mebo ndili muzike wa Jehova! Akube mbubonya mbooamba.” Amane mungelo wakaunka.

39 Aboobo mumazuba ngoonya aayo Maliya wakanyamuka akuunka cakufwambaana kucisi camalundu, kumunzi wa Juda, 40 mpoonya wakanjila muŋanda ya Zakaliya akumwaanzya Elizabeta. 41 Eelyo Elizabeta amvwe buyo kwaanzya kwa Maliya, mwana mwida lyakwe wakasotoka, mpoonya Elizabeta wakazula muuya uusalala 42 akoongolola kuti: “Ulilelekedwe akati kabamakaintu boonse, alimwi ulilelekedwe mwana ngoyootumbuka! 43 Ino ndaba buti acoolwe eeci cakuti banyina Mwami wangu baboole kulindime? 44 Nkaambo bona! Mbondamvwida ijwi lyakwaanzya kwako mumatwi aangu, imwana uuli mwida wasotoka akukondwa kapati. 45 Ulikkomene awalo ooyo wakasyoma nkaambo ziyoocitika zyoonse nzyaakaambilwa a Jehova.”

46 Mpoonya Maliya wakati: “Moyo wangu ulamulemeka Jehova 47 amuuya wangu ulakondwa kapati kuli Leza Mufwutuli wangu 48 nkaambo wayeeya bucete bwamuzike wakwe. Lino bona! Kuzwa sunu, mazyalani oonse ayoondaamba kuti ndililelekedwe 49 nkaambo Singuzu wandicitila milimo mipati alimwi lilasalala zyina lyakwe, 50 alimwi kumazyalani amazyalani, aabo bamuyoowa ulabafwida luzyalo. 51 Wacita milimo mipati ajanza lyakwe; wabamwaisya aabo ibalisumpula mumakanze aamyoyo yabo. 52 Wausya baalumi basinguzu muzyuuno zyabo akusumpula bacete; 53 wabapa zyintu zyoonse zibotu bafwide nzala, pele bavwubi wabatanda acinkwamaanza. 54 Wamugwasya Isilayeli mubelesi wakwe ikutegwa atondezye kuti uciyeeyede cisyomezyo cakutondezya luzyalo kukabe kutamani, 55 mbubonya mbwaakaambila bamatateesu, nkokuti Abulahamu alunyungu lwakwe.” 56 Aboobo Maliya wakakkala anguwe kwamyezi yotatwe, mpoonya wakajokela kuŋanda yakwe.

57 Akasika mazuba aakuti Elizabeta atumbuke, aboobo wakatumbuka mwana musankwa. 58 Mpoonya basimukobonyina abamukowa bakamvwa kuti Jehova wamufwida luzyalo, aboobo bakasekelela anguwe. 59 Eelyo mubuzuba bwalusele, bakaboola kutegwa bamupalule mwana, alimwi bakali kuyanda kuti bamuulike zyina lyausyi, lya Zakaliya. 60 Pele banyina bakaingula akwaamba kuti: “Peepe! Ulaulikwa lyakuti Johane.” 61 Balo bakamwaambila kuti: “Taakwe wamukowa wako wuulikidwe zyina eeli.” 62 Kumane bakaunka baakubuzya usyi kwiinda mukutambaika maanza kutegwa abaambile zyina ndyaakali kuyanda kuti mwana aulikwe. 63 Mpoonya wakalomba cakulembela akulemba kuti: “Izyina lyakwe ngu Johane.” Eeci cakabagambya boonse. 64 Ndilyonya, mulomo wakwe wakabbamuka, alimwi mulaka wakwe wakaangululwa akutalika kwaambaula, katembaula Leza. 65 Eelyo boonse aabo bakkala muminzi yeengelede bakayoowa, alimwi eezyi zyoonse zyakacitika akaba ngamakani aakali kwaambaulwa mucooko camalundu coonse ca Judaya, 66 alimwi boonse aabo ibakaamvwa bakaayobola mumoyo akulibuzya kuti: “Ino uyooba mwana uuli buti ooyu?” Nkaambo janza lya Jehova masimpe lyakali anguwe.

67 Eelyo Zakaliya, usyi, wakazula muuya uusalala, aboobo wakasinsima kati: 68 “Aatembaulwe Jehova Leza wa Isilayeli nkaambo wabacebuka bantu bakwe akubafwutula. 69 Alimwi watubusizya lwija lwalufwutuko muŋanda ya Davida mubelesi wakwe, 70 mbubonya mbwaakaamba kwiinda mubasinsimi bakwe basalala bansiku 71 kuti uyootuvwuna kuli basinkondoma akumaanza aabaabo batusulide, 72 kutufwida luzyalo akaambo kabamatateesu akuyeeya cizuminano cakwe cisalala, 73 cikonke ncaakakonka kuli Abulahamu taateesu, 74 twaakuvwunwa kumaanza aabasinkondoma uyootupa coolwe cakumubelekela mulimo uusetekene cakutayoowa 75 acakusyomeka amubululami kumbele lyakwe mazuba aabuumi bwesu boonse. 76 Pele yebo O Mwana uyooitwa kuti uli musinsimi wa Mupatikampatila, nkaambo uyakuunka kumbele lya Jehova kutegwa ukamululamikile nzila 77 akuzyibya bantu bakwe kuti uyoobafwutula kwiinda mukubalekelela zibi zyabo 78 akaambo kamoyo waluzyalo lwa Leza wesu. Akaambo kaluzyalo oolu, tuyoobona mumuni uuzwa kujulu uumunika mbuli nolipasula zuba, 79 kubamunikila aabo bakkede mumudima amucimvwule calufwu, akwaasololela kabotu maulu eesu munzila yaluumuno.”

80 Eelyo mwana ooyo wakali kuyaabukomena akuyuma kumuuya, alimwi wakali kukkala mucimpayuma kusikila buzuba mbwaakalitondezya caantangalala kuli Isilayeli.