Luka
21 Lino naakalanga, wakabona bavwubi kababikka zipego zyabo muzibikkilo zyamali. 2 Mpoonya wakabona mukamufwu umwi mucete kabikka oomo tukkobili tobilo tujisi mpindu nsyoonto kapati, 3 eelyo wakati: “Ndimwaambila camasimpe kuti: Mukamufwu ooyu, nokuba kuti mucete wabikka mali manji kwiinda boonse. 4 Nkaambo boonse babikka zipego zyazyintu kuzwa kuli zyeezyo ziindilide, pele mukaintu ooyu abucete bwakwe, wabikka mali oonse ngaali kuponena.”
5 Mpoonya aciindi cimwi bamwi nobakali kwaambaula kujatikizya mbolyakabotesyedwe tempele amabwe mabotu azyintu zyakaabidwe kuli Leza, 6 wakati: “Kujatikizya zyintu eezyi nzyomubwene, imazuba ayoosika eelyo nokutakabi bbwe liyoocaala aano atala aabbwenyina kakunyina kukolomonwa.” 7 Mpoonya bakamubuzya, balaamba: “O Mwiiyi, ino ndilili mubwini zyintu eezyi noziyooba, alimwi ncinzi ciyooba citondezyo cituzyibya noziya kucitika zyintu eezyi?” 8 Wakati: “Amulangisye kuti muteenwi, nkaambo banji bayooboola muzyina lyangu kabati, ‘Ndime nguwe,’ alimwi akuti, ‘Ciindi cibikkidwe caswena afwaafwi.’ Mutakabatobeli pe. 9 Kunze lyaboobo, mwaakumvwa nkondo amazwanga, mutakayoowi pe. Nkaambo eezyi zyintu zyeelede kusaanguna kucitika, pele mamanino taakacitiki ndilyonya eelyo pe.”
10 Mpoonya wakabaambila kuti: “Cisi ciyoobukila cisinyina abwami buyoobukila bwaminyina, 11 kuyooba mizuzumo yanyika mipati, alimwi mumasena aaindene-indene kuyooba zilwazi anzala, bantu bayoobona zyintu ziyoosya azitondezyo zigambya zizwa kujulu.
12 “Pele zyintu eezyi zyoonse kazitanacitika, bantu bayoomujata akumupenzya, bayoomutola kuzikombelo akuntolongo. Muyooabwa kubami abeendelezi akaambo kazyina lyangu. 13 Eeci ciyoomupa coolwe cakuti mubakambaukile. 14 Aboobo, mumyoyo yanu mutalipenzyi kweezyeezya mbomuya kulivwuna, 15 nkaambo ndiyoomupa majwi abusongo, eezyo basikumukazya boonse nzyobatakakonzyi kukaka naa kukazya. 16 Kunze lyaboobo, nobaba bazyali, banabokwanu, basazinyoko abalongwe bayoomwaaba alimwi nobamwi bayoomujaya, 17 alimwi muyoosulwa abantu boonse akaambo kazyina lyangu. 18 Nokuba boobo, kunyina kasusu kakumitwe yanu nokaba komwe ikayoonyonyooka. 19 Kwiinda mukuliyumya kwanu, muyoofwutulwa.
20 “Kunze lyaboobo, mwaakubona Jelusalemu kazingulukidwe ampi, amukazyibe kuti kunyonyoonwa kwakwe kwaswena afwaafwi. 21 Mpoonya aabo bali mu Judaya bakatalike kutijila kumalundu, aabo ibali mumunzi mwini abakazwe, abaabo bali muminzi iili anze aamunzi batakanjili mulinguwo, 22 nkaambo aaya anooli mazuba aakupa cisubulo ikutegwa zyintu zyoonse zyakalembwa zizuzikizyigwe. 23 Maawe kubakaintu bamitide abaabo banyonsya bana kumazuba aayo! Nkaambo kuyooba mapenzi mapati mucisi abukali kubantu aaba, 24 alimwi bayoojaigwa amapanga akutolwa mubuzike mumasi oonse, alimwi Jelusalemu uyoolyataulwa amasi kusikila ciindi cibikkidwe cabamasi cikazuzikizyigwe.
25 “Alimwi kuyooba zitondezyo kuzuba, kumwezi akunyenyeezi, eelyo anyika aano zisi ziyoopenga, ziyoobula cakucita akaambo kakuvwuuma kwalwizi akuvwundauka kwandulo, 26 alimwi bantu bayoonetuka akaambo kakuyoowa akulibilika zyintu zilangilwa kucitika anyika, nkaambo nguzu zyakujulu ziyoozungaanizyigwa. 27 Mpoonya bayoobona Mwana wamuntu kaboola mukkumbi kajisi nguzu abulemu bupati. 28 Pele zyintu eezyi zyaakutalika kucitika, amukaimikile musumpuululu akulungumana nkaambo lufwutuko lwanu lunooswenede afwaafwi.”
29 Amane wakabaambila cikozyanyo eeci: “Amwiiye kumukuyu akumasamu aambi oonse. 30 Mwabona kuti atalika kusyuuka, mulazyiba nobeni kuti lino mainza ali afwaafwi. 31 Munzila njiyonya eeyi andinywe, mwaakubona zyintu eezyi kazicitika, amukazyibe kuti Bwami bwa Leza buli afwaafwi. 32 Ncobeni ndimwaambila kuti: Izyalani eeli talikooyoomana kusikila zyintu zyoonse zikacitike. 33 Julu anyika ziyoomana, pele majwi aangu kunyina naayoomana pe.
34 “Pele amulilingule nobeni kutegwa myoyo yanu itabi niilengaana akaambo kabulyato, budakwi akulibilika azyintu zyamubuumi, eelyo buzuba oobo bukaile kumusikila kamutalibambilide 35 mbuli kakole. Nkaambo buyoobasikila boonse aabo bakkala anyika. 36 Aboobo amupakamane lyoonse, kamupaila mipailo yakukombelezya ciindi coonse kutegwa mukakonzye kufwutuka muzyintu zyoonse eezyo zyeelede kucitika akwiima kumbele lya Mwana wamuntu.”
37 Aboobo isyikati wakali kuyiisya mutempele, pele masiku wakali kuzwa akuunka kucilundu citegwa Cilundu ca Maolifa. 38 Alimwi bantu boonse bakali kufwuma kuunka kulinguwe mutempele kuyoomumvwa.