Milimo
16 Aboobo wakasika ku Debe aku Lusitulo. Eelyo amubone! Ooko kwakali sikwiiya umwi uutegwa Timoteyo, mwana wamukaintu umwi imu Juda musyomi pele usyi wakali mu Giliki, 2 alimwi wakali kulumbaizyigwa abakwesu bamu Lusitulo a Ikoniyo. 3 Paulo wakayanda kuti ooyu baunke limwi, eelyo wakamubweza akumupalula akaambo kaba Juda ibakali mumasena aayo, nkaambo boonse bakalizyi kuti usyi wakali mu Giliki. 4 Lino nobakali kuyaabwiinda muminzi bakali kuyaabwaambila basyomi bakali mumo milawo eeyo yakazuminanwa akati kabatumwa abaalu ibakali mu Jelusalemu kuti kabatobela njiyo. 5 Aboobo, bamumbungano eezyo bakazumanana kuyumizyigwa mulusyomo alimwi bakali kuyaabuvwula buzuba abuzuba.
6 Alimwi, bakainda mu Fuligiya amucisi ca Galatiya nkaambo muuya uusalala wakabakasya kwaamba jwi mucooko ca Asiya. 7 Kunze lyaboobo, nobakali kuselemukila ku Musiya bakasolekesya kuunka ku Bituniya, pele muuya wa Jesu tiiwakabazumizya pe. 8 Aboobo bakaciinda kumbali cisi ca Musiya akuselemukila ku Tulowa. 9 Eelyo masiku aayo Paulo wakabona cilengaano: mwaalumi umwi muna Makedoniya wakaliimvwi kamukombelezya kuti: “Amuzabukile okuno ku Makedoniya mutugwasye.” 10 Lino naakabona cilengaano eeco, ndilyonya twakalibambila kuya ku Makedoniya, katusyomede kuti Leza ngowatwiita kuyooambilizya makani mabotu kulimbabo.
11 Aboobo twakatanta bwato kuzwa ku Tulowa akululama kunsumbu ya Samotulake, pele nobwakaca twakaunka ku Niyapoli, 12 alimwi kuzwa kooko twakaunka ku Filipi, munzi weendelezyegwa aba Loma, walo uuyandika kapati mucooko ca Makedoniya. Twakakkala mumunzi ooyu kwamazuba aali mbwaabede. 13 Alimwi mubuzuba bwa Sabata twakazwa mumunzi akuunka kumbali lyamulonga, ooko nkotwakali kuyeeya kuti kwakali busena bwakukombela; eelyo twakakkala akutalika kukambaukila bamakaintu bakabungene. 14 Lino mukaintu umwi uutegwa Lidiya, iwakali kusambala zisani zyacisombo, uuzwa mumunzi wa Tiyatila alimwi mukombi wa Leza, wakali kuswiilila, aboobo Jehova wakajalula moyo wakwe cakumaninina kuti abikkile maano kuzyintu nzyaakali kwaamba Paulo. 15 Eelyo walo abamuŋanda yakwe nobakabbapatizyigwa, wakaamba cakukombelezya kuti: “Ikuti naa nywebo nobaalumi mwandibona ncobeni kuti ndilasyomeka kuli Jehova, amunjile mukkale muŋanda yangu.” Eelyo wakatukombelezya mane twakaunka kuŋanda yakwe.
16 Lino cakacitika kuti notwakali kuunka kubusena bwakukombela twakaswaangana amubelesi umwi musimbi wakanjidwe muuya, idaimona lyakusondya. Wakali kubaletela mpindu mpati basimalelaakwe kwiinda mumulimo wakwe wakusonda. 17 Musimbi ooyu wakazumanana kumutobela Paulo alimwi andiswe kumwi koompolola kuti: “Baalumi aaba mbazike ba Leza Mupatikampatila, ibaambilizya nzila yalufwutuko kulindinywe.” 18 Wakazumanana kucita boobu kwamazuba manji. Mane Paulo wakacimwa mpoonya wakacenguluka akwaambila muuya ooyo kuti: “Ndakulailila muzyina lya Jesu Kilisito kuti uzwe mulinguwe.” Eelyo muuya ooyo wakazwa mpoonya aawo.
19 Lino basimalelaakwe nobakabona kuti nzila yakujanina mpindu yamana, bakajata Paulo a Sila akubakwelela kumusika* kubaleli. 20 Nobakabasisya kubeendelezi batwaambo twabuleya, bakati: “Bantu aaba baunyonganya kapati munzi wesu. Mba Juda, 21 Alimwi baambilizya ziyanza nzyotutazumizyidwe kutobela naa kucita mbwaanga tuli bana Loma.” 22 Alimwi nkamu yakababukila; mpoonya beendelezi batwaambo twabuleya nobakamana kubazapawida zisani zyabo zyaatala, bakalailila kuti baumwe amisako. 23 Nobakamana kubauma kapati, bakabawaala muntolongo akulailila mulindizi wantolongo kuti abalinde cakulomya. 24 Akaambo kakuti wakalaililwa boobo, wakabawaala muntolongo yamukati akwaanga maulu aabo muziliba.
25 Pele akati kamasiku Paulo a Sila bakali kupaila akutembaula Leza munyimbo; alimwi baangenyina bakali kubaswiilila. 26 Mpoonya aawo kwakaba muzuzumo wanyika mupati cakuti ntalisyo zyantolongo zyakazungaanizyigwa. Alimwi milyango yoonse yakajaluka aciindi eeco azyaanzyo zyabo boonse zyakaangunuka. 27 Mulindizi wantolongo naakasinsimuka muŋonzi akubona kuti milyango yantolongo yakalijalukide, wakasomona panga lyakwe akuyanda kulijaya, kayeeya kuti baange batija. 28 Pele Paulo wakoongolola ajwi pati kati: “Utalijayi pe, nkaambo toonse nkotuli!” 29 Aboobo wakalomba malambe akuzuzila mukati, kazyangama, wakabafwugamina ba Paulo a Sila. 30 Mpoonya wakabagusya anze akubabuzya kuti: “Nobami, ino ncinzi ncondeelede kucita kutegwa ndifwutulwe?” 31 Bakati: “Kosyoma Mwami Jesu eelyo ulafwutulwa, yebo abaŋanda yako.” 32 Alimwi bakamwaambila jwi lya Jehova antoomwe abamuŋanda yakwe boonse. 33 Mpoonya wakabatola aciindi eeco camasiku waakubasanzya zilonda. Mpoonya walo amukwasyi wakwe woonse bakabbapatizyigwa ndilyonya eelyo. 34 Alimwi wakabanjizya muŋanda yakwe akubabambila cakulya, eelyo walo abamuŋanda yakwe boonse bakakondwa kapati nkaambo lino wakamusyoma Leza.
35 Nobwakaca, beendelezi batwaambo twabuleya bakatuma bakapaso kuyooamba ku-ti: “Amubaangunune baalumi aabo.” 36 Mpoonya mulindizi wantolongo wakaambila Paulo nzyobakaamba kuti: “Beendelezi batwaambo twabuleya batuma baalumi kuti nywebo nyobilo mwaangununwe. Aboobo, lino amuzwe akuunka muluumuno.” 37 Pele Paulo wakati kuli mbabo: “Bakatukwibbauda abuleya notutakwe mulandu, nokuba kuti tuli bana Loma, akutuwaala muntolongo; aboobo sena lino bayanda kutugusya kumbali? Peepe! Ababoole beni batugusye mbabo.” 38 Aboobo bakapaso bakatola majwi aaya kubeendelezi batwaambo twabuleya. Aaba bakayoowa nobakamvwa kuti baalumi aabo bakali bana Loma. 39 Eelyo bakaboola kukubakombelezya, mpoonya nobakabagusya anze, bakabalomba kuti bazwe mumunzi ooyo. 40 Nobakazwa muntolongo bakaunka kuŋanda ya Lidiya, alimwi nobakabona bakwesu, bakabayumya-yumya bamane bakaunka.