Milimo
17 Lino bakainda mumunzi wa Amfipoli a Apoloniya akusika ku Tesalonika, ooko ikwakali cikombelo caba Juda. 2 Aboobo kweelana acilengwa ca Paulo wakanjila mukati mobakabede, alimwi kwama Sabata otatwe wakali kubasalazyila Magwalo, 3 kapandulula akutondezya kwiinda muzilembedwe kuti cakaleelede kuti Kilisito apenge akubuka kubafwu, alimwi wakati: “Ooyu ngo Kilisito, ooyu Jesu ngondaambilizya kulindinywe.” 4 Akaambo kaceeci, bamwi akati kabo bakaba basyomi alimwi bakasangana Paulo a Sila, alimwi ba Giliki banji ibakali kukomba Leza antoomwe abamakaintu banji balemekwa abalo bakacita oobo.
5 Pele ba Juda bakaba abbivwe, eelyo bakabunganya nkamu yabaalumi bamwi babi ibakali kwiingaila amusika akutalika kunyonganya munzi. Bakanjila muŋanda ya Jasoni kababayandaula kutegwa babalete kunkamu yabantu. 6 Nobatakabajana, bakakwelaanya Jasoni ababunyina bamwi kubatola kubeendelezi bamumunzi, kaboompolola kuti: “Bantu aaba ibanyonganya nyika nkobali akokuno, 7 eelyo Jasoni wabatambula camaanza obilo. Bantu aaba boonse tabaitobeli milawo ya Kaisala, baamba kuti kuli mwami uumbi uutegwa Jesu.” 8 Nobakamvwa zyintu eezyi, bantu boonse munkamu alimwi abeendelezi bamumunzi bakalibilika; 9 alimwi nobakamana kubweza mali aacisyomezyo aakkwene kuzwa kuli Jasoni abamwi, bakabaleka.
10 Ndilyona masiku bakwesu bakatuma Paulo a Sila ku Beleya. Mbobakasikila buyo aaba bakanjila mucikombelo caba Juda. 11 Lino ba Juda baku Beleya bakali amizeezo mibotu kwiinda baku Tesalonika, nkaambo bakaliyandide kapati mumyoyo kutambula jwi, kabavwuntauzya cakulomya mu Magwalo abuzuba kutegwa babone naa zyintu eezyi mbozibede. 12 Aboobo bunji bwabo bakaba basyomi, kubikkilizya abamakaintu abaalumi banji ba Giliki ibalemekwa. 13 Pele ba Juda baku Tesalonika nobakazyiba kuti Paulo wakali kwaambilizya jwi lya Leza aku Beleya, bakaunka ooko kutegwa bakayunge akukopanya makamu aabantu. 14 Mpoonya cakufwambaana bakwesu bakatuma Paulo kulwizi; pele Sila a Timoteyo bakasyaala nkukonya ooko. 15 Pele aabo bakali kumusindikila Paulo bakaakumusisya ku Atene, alimwi nobakamana kulaililwa kuti Sila a Timoteyo bakeelede kumutobela cakufwambaana, bakapiluka.
16 Lino Paulo naakali kubalindila ku Atene, wakabijilwa kapati mumoyo naakabona kuti munzi wakazwide mituni. 17 Aboobo mucikombelo wakatalika kubapandulwida cakusalazya ba Juda alimwi abantu bamwi ibakali kukomba Leza, alimwi buzuba abuzuba kumusika wakali kubandika abaabo ibakali kujanika. 18 Pele basyaabusongo bamwi iba Epikuleya aba Sitoyiki bakatalika kumukazya, alimwi bakali kwaamba kuti: “Ino ncinzi simalabali ooyu ncasola kwaamba?” Bamwi bakali kwaamba kuti: “Uboneka kuti ngusikwaambilizya baleza bamasi.” Bakali kwaamba boobo nkaambo wakali kwaambilizya makani mabotu aa Jesu alimwi abubuke. 19 Aboobo bakamujata akumutola ku Aleyopagi,* kabaamba kuti: “Sena inga watusalazyila ncoyaamba njiisyo eeyi impya njoyiisya? 20 Nkaambo utwaambila zyintu zimwi zyeenzu mumatwi eesu. Aboobo tuyandisya kuzyiba ncozyaamba zyintu eezyi.” 21 Mubwini, bana Atene boonse abazwamasi ibakali kukkala-kkala* ooko bakali kumanina ciindi cabo cakulyookezya kababandika naa kuswiilila buyo makani mapya. 22 Lino Paulo wakaima akati kankuta ya Aleyopagi akwaamba kuti:
“Nobaalumi bamu Atene, ndabona kuti muzyintu zyoonse nywebo mulibonya kuti mulabayoowa kapati baleza kwiinda bamwi. 23 Mucikozyanyo, nindakali kwiinda akulangisisya zyintu nzyomukomba ndakajana acipaililo cilembedwe kuti ‘Kuli Leza Uutazyibidwe.’ Aboobo ooyo ngomukomba cakutazyiba, ooyu ngonguwe ngondaambilizya kulindinywe. 24 Leza iwakalenga nyika azyintu zyoonse zili mumo, mbwaanga Ooyu Mwami wakujulu aanyika, takkali mumatempele aakayakwa amaanza, 25 alimwi tagwasyigwi amaanza aabantu mbuli kuti kuli nabula cintu, nkaambo walo mwini nguupa bantu boonse buumi, muya alimwi azyintu zyoonse. 26 Alimwi kuzwa kumuntu omwe wakalenga bantu ibali muzisi zyoonse kuti bakkale munyika yoonse, alimwi wakacita kuti kube ziindi zibikkidwe aminyinza yazyooko nkobeelede kukkala bantu, 27 kutegwa bayandaulisye Leza, nokuba kwaampaampa buya akumujana ncobeni nokuba kuti mubwini tali kulamfwu kuli umwi aumwi wesu. 28 Nkaambo walo nguutupa buumi, kweenda akupona mbubonya basikweema banu bamwi mbobaamba kuti, ‘Nkaambo aswebo tuli lunyungu lwakwe.’
29 “Aboobo mbwaanga tuli lunyungu lwa Leza, tatweelede kuyeeya kuti Leza uli mbuli ngolida, nsiliva naa bbwe, mbuli cintu cibezedwe eeco basyaazibwene ncobakaide kuyeeyela buyo akupanga. 30 Masimpe, Leza wazileka buyo ziindi zyakutazyiba kuli boobu, pele lino waambila bantu kuli koonse kuti boonse beelede kweempwa. 31 Nkaambo wabikka buzuba mbwayoobeteka nyika mubululami kwiinda mumwaalumi ngwasalide, alimwi wapa cisinizyo kubantu boonse mukuti wakamubusya kubafwu.”
32 Lino nobakamvwa zyakubuka kwabafwu, bamwi bakatalika kumuseka, pele bamwi bakati: “Tuyookumvwa alimwi kujatikizya makani aaya.” 33 Aboobo Paulo wakazwa akati kabo, 34 pele baalumi bamwi bakamusangana alimwi bakaba basyomi. Akati kabaaba kwakali Diyonisiyo, imubetesi munkuta ya Aleyopagi, amukaintu uutegwa Damali alimwi abambi kunze lyabaaba.