1 Bakorinto

15 Lino bakwesu ndimuyeezya makani mabotu ngondakaambilizya kulindinywe, aayo ngomwakatambula alimwi ngomutobela cakusitikila. 2 Alimwi lino mulafwutulwa ikuti mwakakatila kumakani mabotu ngondakaambilizya kulindinywe, ccita kuti mwakaba basyomi cabuyo.

3 Nkaambo akati kazyintu zyakusaanguna nzyondakamwaambila kuli ceeco ncondakatambula andime, cakuti Kilisito wakafwa kutegwa atwaangulule kuzibi zyesu kweelana ancaamba Magwalo, 4 ikuti wakazikkwa, wakabusyigwa mubuzuba bwatatu kweelana ancaamba Magwalo, 5 ikuti wakalibonya kuli Kefa, mpoonya akuli bali kkumi ababili. 6 Kuzwa waawo wakalibonya kubakwesu bainda ku 500 aciindi comwe, ibunji bwabo tucili limwi, pele bamwi baloona mulufwu. 7 Kuzwa waawo wakalibonya kuli Jakobo, mpoonya akubatumwa boonse; 8 pele ciindi camamanino wakalibonya akulindime mbuli kumwana wakazyalwa ciindi kacitanakkwana.

9 Nkaambo ndendime muniini akati kabatumwa boonse, alimwi tandeeleli kwiitwa kuti ndimutumwa, nkaambo ndakapenzya mbungano ya Leza. 10 Pele kwiinda muluzyalo lwa Leza ndili boobu mbondibede lino. Alimwi luzyalo ndwaakandifwida tiilwakaba lwabuyo pe, pele ndakabeleka cakulitakata kwiinda muntu uuli woonse akati kabo, nokuba boobo tandili ndime pe, pele nduzyalo lwa Leza iluli andime. 11 Nokuba boobo, kufwumbwa naa ndime naa balo, eeci ncotukambauka alimwi oobu nywebo mbomwakasyoma.

12 Lino ikuti kakukambaukwa kuti Kilisito wakabusyigwa kubafwu, ino nkaambo nzi bamwi akati kanu ncobaambila kuti kunyina bubuke bwabafwu? 13 Ikuti naa ncobeni kunyina bubuke bwabafwu, nkokuti naba Kilisito tanaakabusyigwa pe. 14 Pele ikuti naa Kilisito tanaakabusyigwa, kukambauka kwesu ncobeni nkwabuyo alimwi alwalo lusyomo lwesu ndwabuyo. 15 Kunze lyaboobo, alimwi twaba bakamboni bakubeja kujatikizya Leza, nkaambo tupa bumboni kubejelezya Leza kwiinda mukwaamba kuti wakamubusya Kilisito, pele walo ngwaatakabusya ikuti naa ncobeni bafwu tabakabusyigwi. 16 Nkaambo ikuti naa bafwu tabakabusyigwi, nkokuti Kilisito tanaakabusyigwa pe. 17 Kunze lyaboobo, ikuti naa Kilisito tanaakabusyigwa, lusyomo lwanu ndwabuyo; mucili muzibi zyanu. 18 Mubwini, aabo bakoona mulufwu kabakamantene a Kilisito abalo bakaloba. 19 Ikuti naa ikulangila Kilisito kwesu kakuli kwabuumi obuno luzutu, tweelede kweetelelwa kapati kwiinda muntu uuli woonse.

20 Pele mubwini Kilisito wakabusyigwa kubafwu, walo uuli ngomicelo mitaanzi yabaabo bakoona mulufwu. 21 Nkaambo mbwaanga lufwu lwakaboola kwiinda mumuntu omwe, abwalo bubuke bwabafwu bulaboola kwiinda mumuntu omwe. 22 Nkaambo mbubonya muli Adamu boonse balafwa, mbubonya buyo muli Kilisito boonse bayoopegwa buumi. 23 Pele umwi aumwi ulabusyigwa aciindi cakwe ceelede: kusaanguna Kilisito uuli njemicelo mitaanzi, mpoonya aabo bazulilwa kuli Kilisito bayoobusyigwa kuciindi cakubako kwakwe. 24 Mpoonya kumamanino, uyoopa Bwami kuli Leza wakwe alimwi Usyi, aakumana kunyonyoona mfwulumende zyoonse abweendelezi boonse alimwi anguzu zyoonse. 25 Nkaambo weelede kuba mwami uulela kusikila Leza akabikke basinkondonyina boonse kunsi aamaulu aakwe. 26 Sinkondo wamamanino uuyoonyonyoonwa, ndufwu. 27 Nkaambo Leza “wakabombya zyintu zyoonse kunsi aamaulu aakwe.” Pele nokwaambwa kuti ‘zyintu zyoonse zyakabombesyegwa,’ cilalimvwisya kuti eeci tacibikkilizyi Leza ooyo wakabombya zyintu zyoonse kulinguwe. 28 Pele Leza aakumana kubombya zyintu zyoonse kumwanaakwe, mpoonya Mwana ooyo awalo uyoolibombya kuli Leza ooyo wakabombya zyintu zyoonse kulinguwe, ikutegwa Leza abe mweendelezi wazyintu zyoonse.

29 Ikuti naa bafwu tabakabusyigwi, ino nimpindu nzi njobayoojana aabo babbapatizyigwa kutegwa babe bafwu? Ikuti naa bafwu kunyina nobayoobusyigwa, ino nkaambo nzi abalo ncobali mukubbapatizyigwa kutegwa babe bafwu? 30 Ino nkaambo nzi andiswe ncotuli muntenda ciindi coonse? 31 Abuzuba ndijanika muntenda yalufwu. Eeci ncamasimpe mbubonya mbuli lukkomano ndondijisi kujatikizya ndinywe bakwesu muli Kilisito Jesu Mwami wesu. 32 Ikuti ku Efeso ndakalwana abanyama babutambo mbubonya mbobakacita bamwi, ino cindigwasya nzi mebo eeci? Ikuti bafwu tabakabusyigwi, nkokuti “atulye akunywa, nkaambo kayi juunza tuyoofwa.” 33 Muteenwi pe. Kuyanzana kubyaabi kunyonganya zilengwa zibotu. 34 Amusinsimuke munzila yabululami alimwi mutabi nimucita cibi pe, nkaambo bamwi tabajisi luzyibo lwa Leza. Ndaamba boobu kutegwa ndimuusye nsoni.

35 Nokuba boobo, umwi inga wabuzya kuti: “Ino bafwu bayoobusyigwa buti? Inzya, ino bayoobuka amubili uuli buti?” 36 Yebo omufwubafwuba! Ncosyanga tacibi cuumi pe ccita kuti casaanguna kufwa; 37 alimwi kujatikizya ncosyanga, tosyangi mubili uuyookomena pe, pele usyanga nseke buyo, ibe yamaila naa iimbi buyo; 38 pele Leza ulaipa mubili mbuli mbwayanda, alimwi nseke imwi aimwi ulaipa mubili wayo. 39 Tiili mibili yoonse iikozyenye pe, kuli mubili wabantu, kuli mubili waŋombe, kuli mubili wabayuni alimwi amubili wanswi. 40 Alimwi kuli mibili yakujulu amibili yaanyika; pele bulemu bwamibili yakujulu mbumbi, abwalo bulemu bwamibili yaanyika mbumbi. 41 Bulemu bwazuba mbumbi, alimwi abulemu bwamwezi mbumbi, abwalo bulemu bwanyenyeezi mbumbi; mubwini nyenyeezi imwi aimwi iliindene kunyenyeezinyina kubulemu.

42 Mbobubede oobo abubuke bwabafwu. Mubili wazikkwa ulabola, pele wabusyigwa tuuciboli limbi pe. 43 Ulazikkwa kuusampukide, ulabusyigwa mubulemu. Ulazikkwa kuutajisi nguzu, ulabusyigwa munguzu. 44 Ulazikkwa kuuli mubili wanyama, ulabusyigwa kuuli mubili wamuuya. Ikuti kakuli mubili wanyama, nkokuti awalo mubili wamuuya nkouli. 45 Kulilembedwe buya kuti: “Muntu wakusaanguna Adamu wakaba muumi.” Adamu wamamanino wakaba muuya uupa buumi. 46 Nokuba boobo, mubili wamuuya tauli wakusaanguna pe. Mubili wanyama nguusaanguna, mpoonya nokuya kube wamuuya. 47 Muntu wakusaanguna wakazwa anyika alimwi wakabumbwa abulongo; muntu wabili wakazwa kujulu. 48 Mbubonya mbwabede ooyo wakabumbwa abulongo, mbobabede abaabo bakabumbwa abulongo; alimwi mbubonya mbwabede ooyo wakazwa kujulu, mbobabede abaabo bakujulu. 49 Alimwi mbubonya mbotujisi cinkozya cayooyo wakabumbwa abulongo, tuyooba acinkozya cayooyo wakazwa kujulu.

50 Nokuba boobo, bakwesu ndimwaambila kuti, mubili wanyama abulowa tuukonzyi kunjila mu Bwami bwa Leza, mbubonya kubola mbokutakwe lubazu mukutabola. 51 Amubone! Ndimwaambila maseseke aa Leza aakuti: Tatukooni toonse mulufwu pe, pele toonse tuyoosandulwa, 52 mukaindi kaniini buyo, mukulaba kwaliso, muciindi cakulila kwamweembo wamamanino. Nkaambo mweembo uyoolila eelyo bafwide bayoobusyigwa amibili iitaboli alimwi tuyoosandulwa. 53 Nkaambo mubili ooyu uubola weelede kusama mubili uutaboli, alimwi mubili ooyu uufwa weelede kusama mubili uutafwi. 54 Pele mubili ooyu uubola waakusama kutabola, amubili ooyu uufwa waakusama kutafwa, ayoozuzikizyigwa majwi aalembedwe aakuti: “Lufwu lwamenwa kukabe kutamani.” 55 “O lufwu, ino luli kuli luzundo lwako? O lufwu, ino kuli kuli kuluma kwako?” 56 Ikuluma kuletela lufwu ncibi, alimwi nguzu zyacibi zizwa ku Mulawo. 57 Pele aalumbwe Leza, nkaambo ulatupa luzundo kwiinda mu Mwami wesu Jesu Kilisito!

58 Aboobo nomuyandwa bakwesu, amukakatile, mutazungaani pe, lyoonse kamujisi zyakucita zinji mumulimo wa Mwami, kamuzyi kuti kubeleka kwanu nkomubelekela Mwami takuli kwabuyo pe.