Ciyubunuzyo
17 Lino umwi wabangelo bali ciloba ibakajisi mitiba iili ciloba wakaboola akundaambila kuti: “Boola, ndilakutondezya lubeta lwamukaintu muvwuule imupati ooyo uukkala atala amaanzi manji, 2 ooyo bami bamunyika ngobakacita limwi bwaamu, alimwi aabo bakkala anyika bakakolwa awaini wabwaamu bwakwe.”
3 Eelyo wakandibweza munguzu zyamuuya akunditola munkanda. Mpoonya ndakabona mukaintu kakkede atala amunyama uusalala pyu iwakali amazyina aakusampaula Leza amubili woonse alimwi iwakajisi mitwe iili ciloba ameja aali kkumi. 4 Lino mukaintu ooyo wakasamide zisani zyacisombo alimwi azisalala pyu, alimwi wakalisakatizya angolida, mabwe mayandisi alimwi angale, mpoonya mujanza lyakwe wakajisi nkomeki yangolida iyakazwide zyintu zisesemya azyintu zisofweede zyabwaamu bwakwe. 5 Eelyo ankumo yakwe kwakalembedwe zyina lyamaseseke lyakuti: “Babuloni Mupati, nyina wabamakaintu bavwuule alimwi azyintu zisesemya zyamunyika.” 6 Mpoonya ndakabona kuti mukaintu ooyo wakalikoledwe abulowa bwabasalali alimwi abulowa bwabakamboni ba Jesu.
Lino nindakamubona ndakagambwa kapati. 7 Aboobo mungelo wakandaambila kuti: “Ino nkaambo nzi ncowagambwa? Ndilakwaambila maseseke aamukaintu ooyu alimwi aamunyama ngwatantide ooyo uujisi mitwe iili ciloba ameja aali kkumi: 8 Imunyama ngowabona wakaliko, pele lino tako pe, nokuba boobo ulaafwaafwi kuzwa mumulindi uutagoli, mpoonya ulaunka mulunyonyooko. Lino aabo ibakkala anyika—aabo ibali amazyina aatalembedwe mubbuku lyabuumi kuzwa kumatalikilo* aanyika—bayoogambwa baakubona munyama ooyo mbwaakaliko, pele lino tako pe, nokuba boobo uuyoobako.
9 “Aawa mpaayandika kuyeeya cabusongo: Mitwe iili ciloba yiiminina zilundu zili ciloba, aawo imukaintu ooyo mpakkede atala. 10 Alimwi kuli bami bali ciloba: bosanwe bakawa, omwe nkwali lino, ooyo umbi tanasika pe, pele aakusika uyookkala buyo kwakaindi kaniini. 11 Alimwi munyama ooyo iwakaliko pele lino uutako, walo alimwi mwami walusele, pele uzwa kuli baabo bali ciloba, alimwi ulaunka mulunyonyooko.
12 “Lino meja aali kkumi ngowabona aiminina bami bali kkumi, aabo batanatambula bwami, pele balatambula nguzu zyakweendelezya kabali bami kwawoola lyomwe antoomwe amunyama. 13 Aaba bajisi muzeezo omwe, aboobo bapa nguzu abweendelezi bwabo kumunyama. 14 Aaba bayoolwana a Mwanaambelele, pele akaambo kakuti walo ngu Simalelo wabasimalelo alimwi Mwami wabami, Mwanaambelele uyoobazunda. Abalo aabo ibali antoomwe anguwe ibakaitwa, ibakasalwa alimwi ibasyomeka bayoocita oobo.”
15 Alimwi wakandaambila kuti: “Imaanzi ngowabona, aawo mpakkede mukaintu muvwuule, aiminina mikowa yabantu, makamu aabantu, masi alimwi amilaka. 16 Lino imeja aali kkumi ngowabona, amunyama uulya, eezyi ziyoomusulaika mukaintu muvwuule alimwi ziyoomusaala akumusiya mantanda, alimwi ziyoolya nyama yamubili wakwe akumuumpa amulilo mane akalote. 17 Nkaambo Leza wakacibikka mumyoyo yabo kuti bazwidilizye muzeezo wakwe, inzya, ikuti bazwidilizye muzeezo wabo omwe kwiinda mukupa bwami bwabo kumunyama, kusikila leelyo majwi aa Leza aakuzuzikizyigwa. 18 Alimwi mukaintu ngowabona wiiminina munzi mupati ooyo uujisi bwami bweendelezya bami bamunyika.”