Ciyubunuzyo
11 Mpoonya ndakapegwa tete ilyakali kulibonya mbuli musako*+ alimwi wakandaambila kuti: “Nyamuka upime busena busalala bwatempele lya Leza acipaililo alimwi abaabo bakombela mumo. 2 Pele ilubuwa oolo luli anze aabusena busalala bwatempele, koluleka alimwi utalupimi pe, nkaambo lwapegwa kuli bamasi, eelyo bayoolyatauka munzi uusalala+ kwamyezi iili 42.+ 3 Ndiyoopa kuti bakamboni bangu bobilo basinsime kwamazuba aali 1,260 kabasamide zisani zyamasaka.” 4 Aaba baimininwa azisamu zyamaolifa zyobilo+ alimwi azibikkilo zyamalambe zyobilo,+ alimwi baimvwi kumbele lya Mwami wanyika.+
5 Ikuti umwi kayanda kubacisa, mukanwa lyabo muzwa mulilo uubaumpa cakumaninina basinkondonyina. Ikuti umwi wayanda kuti abacise, oobu mbwayelede kujaigwa. 6 Aaba bajisi nguzu zyakusinka kujulu+ ikutegwa mvwula itawi+ mazuba aayo nobasinsima, alimwi bajisi nguzu zyakusandula maanzi kuba bulowa+ akuuma nyika apenzi lili lyoonse kufwumbwa ciindi ncobayanda.
7 Lino baakumanizya kupa bumboni, munyama ooyo uuzwa mumulindi uutagoli uyoobalwana akubazunda alimwi akubajaya.+ 8 Eelyo mitunta yabo inakwaalabene mumugwagwa mupati wamunzi mupati ooyo munzila yakumuuya wiitwa kuti Sodoma a Egepita, oomo awalo Mwami wabo mwaakajaigwa aacisamu. 9 Lino bantu bamikowa yoonse, milaka* yoonse alimwi amasi oonse bayooyeebelela mitunta yabo kwamazuba otatwe acisela,+ alimwi kunyina nobayoozumizya kuti mitunta yabo izikkwe mucuumbwe. 10 Alimwi aabo bakkala anyika bayookondwa akusekelela akaambo kalufwu lwabo, alimwi bayootuminana zipego, nkaambo basinsimi aaba bobilo bakali kubapenzya aabo bakkala anyika.
11 Mpoonya naakainda aayo mazuba otatwe acisela, muuya wabuumi uuzwa kuli Leza wakanjila mulimbabo,+ eelyo bakaimikila akwiima nji, alimwi aabo ibakababona bakayoowa kapati. 12 Mpoonya bakamvwa jwi pati kuzwa kujulu ilyakabaambila kuti: “Amutante muboole kuno.” Eelyo bakatanta kujulu mukkumbi, alimwi basinkondonyina bakababona.* 13 Muwoola eelyo ndilyonya kwakaba kuzungaana kwanyika kupati, mpoonya cibeela cakkumi camunzi cakakolomoka; alimwi bantu ibali 7,000 bakajaigwa akuzungaana kwanyika, mpoonya boonse ibakasyaala bakayoowa akulemeka Leza wakujulu.
14 Ipenzi lyabili+ lyainda. Amubone! Ipenzi lyatatu lilaboola cakufwambaana.
15 Imungelo waciloba wakalizya mweembo wakwe.+ Mpoonya kujulu kwakamvwugwa majwi mapati aamba kuti: “Ibwami bwanyika bwaba Bwami bwa Mwami wesu+ abwa Kristo wakwe,+ eelyo unoolela kali mwami lyoonse mane kukabe kutamani.”+
16 Mpoonya baalu bali 24 + ibakakkede kumbele lya Leza azyuuno zyabo zyabwami bakaliwaala ansi bavwuntama akukomba Leza, 17 balaamba: “Twakulumba, Jehova* Leza, Singuzuzyoonse, yebo ooliko+ alimwi iwakaliko, nkaambo wabelesya nguzu zyako zinji kapati akutalika kulela koli mwami.+ 18 Pele masi akakalala, eelyo bukali bwako bwakasika alimwi cakasika ciindi cibikkidwe cakuti bafwu babetekwe,+ acakupa bulumbu kubazike bako ibasinsimi,+ antoomwe abasalali abaabo ibayoowa zina lyako, ibaniini abapati, alimwi acakunyonyoona baabo banyonyoona nyika.”+
19 Mpoonya busena busalala bwatempele lya Leza lili kujulu bwakajalulwa, eelyo bbokesi lyacizuminano cakwe lyakabonwa mubusena busalala bwatempele lyakwe.+ Alimwi kwakaba ndabo, majwi, mizumo, kuzungaana kwanyika alimwi acivwulamabwe cipati.