Jeremiya
51 Mboobu mbwaamba Jehova:
2 Babuloni ndiyoomutumina basikupupulula,
Eelyo bayoomupupulula alimwi akupa kuti cisi cakwe cibule cintu cili coonse;
Bayoomulwana mumbazu zyoonse mubuzuba bwamapenzi.+
3 Simata atoongomeki* buta bwakwe.
Alimwi kutabi muntu uunyamuka kasamide cibaki cankondo.
Balombwana bakwe mutabafwidi lubomba pe.+
Amwiinyonyoone mpi yakwe yoonse yabasikalumamba.
4 Bayakuwa akaambo kakujaigwa mucisi caba Kasidi,
Bayooyaswa mumigwagwa yakwe.+
5 Nkaambo Israyeli a Juda tabali bamukamufwu ba Leza wabo, iba Jehova wamakamu.+
Pele cisi* cabo cizwide milandu mumeso aa Uusalala wa Israyeli.
Mutanyonyooki akaambo kazinyonyoono zyakwe.
Nkaambo nciindi ca Jehova cakupa cisubulo.
Ulamujolela kweelana azintu nzyaakacita.+
7 Babuloni wali nkapu yangolida mujanza lya Jehova;
Wapa kuti nyika yoonse ikolwe.
8 Cakutayeeyelwa Babuloni wawa, eelyo watyoka.+
Amumulile!+
Amubweze mabbona aakusilisya zicisa zyakwe; andiza inga wayumya.”
9 “Twalikusola kumuponya Babuloni, pele walo tanaapona.
Amumuleke, atweende umwi aumwi wesu kucisi cakwe.+
Nkaambo lubeta lwakwe lwasika kujulu kwini;
Ndulamfwu mbuli kuzwa ansi kusika kumakumbi.+
10 Jehova watuletela bululami.+
Kamuboola, tuluule milimo ya Jehova Leza wesu mu Ziyoni.”+
11 “Amukwenge mivwi;+ amubweze ntobo zyamubalo.*
Jehova wabusya muuya wabami baba Medi,+
Nkaambo ukanzide kunyonyoona Babuloni.
Nkaambo eeci ncisubulo cizwa kuli Jehova, inzya ncisubulo ncaleta akaambo katempele lyakwe.
12 Amwiimike cikwankwani*+ cakulwana malambo aa Babuloni.
Amubayumye balindizi, amubikke balindizi.
Amubabikkile limwi aabo bayubilila.
Nkaambo Jehova wayeeya nzila yakubelesya,
Eelyo ulacicita eeco ncaasyomezya kujatikizya kulwana bantu bakkala mu Babuloni.”+
13 “Yebo omukaintu uukkala amaanzi manji,+
Oojisi lubono lunji,+
Mamanino aako asika, mpindu njopanga yamana.+
14 Jehova wamakamu walikonkezya mwini ategwa,
‘Yebo ndiyookuzuzya abaalumi banji mbuli cikwikwi,
Eelyo bayakwiimba cakukondwa akaambo kakuzunda nduwe.’+
15 Walo ngo Mulengi wanyika kwiinda munguzu zyakwe,
Ooyo wakasitikizya nyika mbotu kwiinda mubusongo bwakwe+
Alimwi ooyo iwakatandabula majulu mumaano aakwe.+
16 Ciindi napa kuti jwi lyakwe limvwugwe,
Maanzi alavwuuma kujulu,
Alimwi upa kuti makumbi* aunke mujulu kuzwa kumagolelo aanyika.
17 Bantu boonse bacita zintu cakutayeeya alimwi cakubula luzyibo.
Bafwuzi boonse bayakuusyigwa nsoni akaambo kacikozyanyo cibezedwe;+
Nkaambo zikozyanyo zyabo zifwulidwe nzyakubeja,
18 Nzyabuyo,+ mulimo wakufwubaazya.
Ziyooloba bwaakusika buzuba mboziyoobetekwa.
19 Caabilo ca Jakobo tacili mbuli zintu eezyi pe,
Nkaambo walo ngo Mulengi wazintu zyoonse,
Nouba musako walukono lwakwe.+
Jehova wamakamu ndezina lyakwe.”+
20 “Yebo uli nkoli yangu yakulwanya, uli cilwanyo cankondo,
Ndiyookubelesya kupwayaula masi.
Ndiyookubelesya kunyonyoona mami.
21 Ndiyookubelesya kupwayaula bbiza ayooyo uulitantide.
Ndiyookubelesya kupwayaula nkalaki yankondo alimwi ayooyo wiitantide.
22 Ndiyookubelesya kupwayaula mwaalumi amukaintu.
Ndiyookubelesya kupwayaula mudaala amulombe.
Ndiyookubelesya kupwayaula mulombwana amusimbi.
23 Ndiyookubelesya kupwayaula mweembezi abutanga bwakwe.
Ndiyookubelesya kupwayaula mulimi acipani cakwe cabanyama.
Ndiyookubelesya kupwayaula beendelezi abaleli babili.
24 Ndiyoomusubula Babuloni abantu boonse bakkala mucisi caba Kasidi
Akaambo kabubi boonse mbobakacita mu Ziyoni mumeso aanu,”+ mbwaamba Jehova.
25 “Bona ndilakulwana yebo,+ ocilundu cinyonyoona,” mbwaamba Jehova,
“Yebo oonyonyoona nyika yoonse.+
Ndilatandabika janza lyangu kuti nkulwane akukukunkulisya amyala
Akukupanga kuti ube cilundu cuumpidwe.”
26 “Bantu tabakabwezi bbwe lyakukkona naa bbwe lyantalisyo kuzwa kulinduwe,
Nkaambo unooli buyo matongo lyoonse mane kukabe kutamani,”+ mbwaamba Jehova.
27 “Amwiimike cikwankwani* mucisi.+
Amulizye mweembo akati kamasi.
Amusale* masi kuti amulwane.
Amumwiitile mami aaku Ararati,+ Mini a Asikenazi.+
Amumutumine sikunjizya basikalumamba mulimo.
Amupe kuti mabbiza aboole mbuli cikwikwi ciyasa-yasa.
28 Amusale* masi kuti amulwane,
Bami bacisi ca Mediya,+ beendelezi bancico abaleli babili bancico boonse
Alimwi azisi zyoonse nzyobalela.
29 Nyika iyoozungaana akukankama,
Nkaambo makanze aa Jehova aakulwana Babuloni ayoocitwa
Kutegwa cisi ca Babuloni cibe cintu cigambya, citakwe muntu uukkala mulincico.+
30 Basikalumamba ba Babuloni baleka kulwana.
Baile kukkede mumampangala aabo.
Nguzu zyabo zyamana.+
Baba buyo mbuli bamakaintu.+
Maanda aanguwo adonekwa mulilo.
Mpingizyo zyanguwo zyatyolaulwa.+
31 Simposo wabalika kuyooswaangana asimposonyina,
Awalo mutumwa wabalika kuyooswaangana amutumwanyina,
Kuti akaambile mwami wa Babuloni kuti munzi wakwe wazundwa mumbazu zyoonse,+
32 Kuti zito zyabwezegwa,+
Mato aantumbu aumpwa amulilo,
Akuti basikalumamba bayoowa.”
33 Nkaambo mboobu mbwaamba Jehova wamakamu, Leza wa Israyeli:
“Mwana musimbi wa Babuloni uli mbuli lubuwa lwakuumina maila.
Casika ciindi cakuti alyataukwe.
Lino-lino, ciindi cakwe cakutebulwa cilasika.”
Wanditula ansi mbuli cibikkilo cinyina cintu mukati.
35 ‘Bubi mbwaandicitila mebo amubili wangu, abube amutwe wa Babuloni!’ mbwaamba ooyo uukkala mu Ziyoni.+
‘Bulowa bwangu abube amitwe yabaabo bakkala mu Kasidi!’ mbwaamba Jerusalemu.”
36 Aboobo mboobu mbwaamba Jehova:
Ndiyoopa kuti lwizi lwakwe alimwi amigoti yakwe ziyuminine.+
37 Babuloni uyooba mulwi wamabwe,+
Bwina bwabamwaaba,+
Cintu cigambya alimwi cakusibila mulosi,
Citakwe muntu uukkala mulincico.+
38 Boonse buyo antoomwe bayoovwuluma mbuli basyuumbwa bacili bana-bana.
Bayoolila mbuli twana twabasyuumbwa.”
39 “Ciindi myoyo yabo noipya, ndiyoobabambila mapobwe akubapa kuti bakolwe,
Kutegwa bakasekelele;+
Mpoonya bayakoona ŋonzi zitamani,+
Tabakabuki limbi kuzwa muŋonzi eezyi,” mbwaamba Jehova.
40 “Ndiyoobaleta mbuli bana bambelele baunka kukujaigwa,
Mbuli bagutu antoomwe abajembwe.”
Ma, Babuloni waba cintu cigambya akati kazisi!
42 Lwizi lwamuvwumba Babuloni.
Lwamuvwumba amayuwe aandulo manji kapati.
43 Minzi yakwe yaba cintu cigambya, yaba nyika iitakwe maanzi alimwi yaba cimpayuma.
Nyika yanjiyo taikakkalwi muntu pe, alimwi mulinjiyo tamukaindi muntu naba omwe.+
Masi kunyina limbi naayakuwuumukila kulinguwe,
Abwalo bulambo bwa Babuloni buyoowa.+
45 Amuzwe mulinguwe nobantu bangu!+
Amutije muvwune buumi bwanu+ kubukali bwa Jehova buvwilima!+
46 Myoyo yanu itapengi alimwi mutayoowi pe akaambo kamulumbe uuyoomvwugwa mucisi.
Mumwaka omwe kuyoosika mulumbe,
Mpoonya mumwaka uutobela kuyoosika mulumbe aumwi,
Wankondo mucisi alimwi awamuleli uulwana mulelinyina.
47 Aboobo, amubone! Mazuba alaboola
Eelyo ndiyoolingula zikozyanyo zibezedwe zya Babuloni.
Cisi cakwe coonse ciyakuusyigwa nsoni,
Alimwi bantu bakwe boonse ibajaigwa bayoowida mukati kanguwe.+
48 Majulu alimwi anyika azintu zyoonse zili mumo
Ziyakoongolola cakukondwa akaambo ka Babuloni,+
Nkaambo basikunyonyoona bayoomuboolela kuzwa kunyika,”+ mbwaamba Jehova.
49 “Babuloni tanaakajaya buyo bantu bamu Israyeli pe+
Pele alimwi ku Babuloni nkobakajailwa bantu bamunyika yoonse.
50 Nywebo nomwafwutuka kupanga, kamuyaabuya, mutaimi pe!+
Amumuyeeye Jehova kamuli kulamfwu ooko,
Alimwi amuyeeye Jerusalemu mumyoyo yanu.”+
51 “Twagunwa, nkaambo twamvwa masampu.
Nsoni zyatuvwumba kumeso,
Nkaambo bamuzwakule* baboola kuzoolwana masena aasalala aaŋanda ya Jehova.”+
52 “Aboobo, amubone! Mazuba alaboola,” mbwaamba Jehova,
“Eelyo ndiyoolingula zikozyanyo zyakwe zibezedwe,
Alimwi mucisi cakwe coonse aabo baliciside bayootongela.”+
53 “Nokuba kuti Babuloni akatante kujulu,+
Nokuba kuti akayumye ngazi zyakwe zilamfwu alimwi ziyumu,
Basikumunyonyoona bayoozwa kulindime,”+ mbwaamba Jehova.
54 “Amuswiilile! Kuli kukwiila mu Babuloni,+
Kwamvwika lunyonyooko lupati mucisi caba Kasidi,+
55 Nkaambo Jehova unyonyoona Babuloni,
Ulaumuzya jwi lyakwe lipati,
Aalo mayuwe aabo alavwuuma mbuli maanzi manji.
Kuyobeka kwajwi lyabo kulamvwugwa.
56 Nkaambo sikunyonyoona ulaboola kuli Babuloni;+
Eelyo basikalumamba bakwe bayoojatwa,+
Aalo mata aabo ayootyolaulwa,
Nkaambo Jehova ngu Leza uupa cisubulo.+
Masimpe uyoobasubula.+
57 Basilutwe bakwe alimwi abantu bakwe basongo ndiyoobapa kuti bakolwe,+
Beendelezi bakwe, baleli bakwe babili alimwi abasikalumamba bakwe,
Eelyo bayakoona ŋonzi zitamani,
Tabakabuki limbi kuzwa muŋonzi eezyi,”+ mbwaamba Mwami, ooyo uujisi zina lyakuti Jehova wamakamu.
58 Mboobu mbwaamba Jehova wamakamu:
“Nokuba kuti bulambo bwa Babuloni mbupati, buyoomwaigwa boonse,+
Alimwi nokuba kuti milyango yakwe milamfwu, iyakuumpwa amulilo.
Bantu bayoolipenzya buyo kubeleka canguzu;
Ayalo misyobo yabantu iyooliminya kubelekela buyo mulilo.”+
59 Ngaaya majwi musinsimi Jeremiya ngaakalailila Seraya mwana wa Neriya,+ mwana wa Maseya eelyo naakaunka a Mwami Zedekiya wa Juda ku Babuloni mumwaka wane wabulelo bwakwe; Seraya wakali kulanganya zintu zyamwami. 60 Jeremiya wakaalemba mubbuku lyomwe mapenzi oonse aakali kuyoosikila Babuloni, majwi aaya oonse akalembelwa Babuloni. 61 Kuyungizya waawo, Jeremiya wakaambila Seraya kuti: “Mboyakusikila buyo ku Babuloni akuubona munzi, ukaabale cakupozya majwi aaya oonse. 62 Mpoonya ukaambe kuti, ‘O Jehova, yebo nduwe wasinganya busena oobu kuti buyoonyonyoonwa akusyaala kakutakwe uukkala mumo, muntu naba munyama, alimwi akuti bunooli buyo matongo lyoonse mane kukabe kutamani.’+ 63 Lino waakumana kulibala bbuku eeli, ukaange bbwe kulindilyo mpoonya ukalifwusile akati kamulonga wa Firate. 64 Mpoonya ukaambe kuti, ‘Oobu mbombubo mbwayakubbila Babuloni eelyo takabuki kabili pe+ akaambo kamapenzi ngondimuletela; bayooliminya buyo.’”+
Aawa mpaamanina majwi aa Jeremiya.