Marko
11 Lino nibakalondelela ku Jerusalemu, ku Betefage alimwi a Betaniya+ aa Cilundu ca Maolifa, wakatuma basikwiiya bakwe bobilo+ 2 akubaambila kuti: “Kamuya mumunzi uulya uulibonya, eelyo mwanjila buyo mumunzi ooyu, mulajana mwana wambongolo ulaangidwe, walo uutanatantidwe muntu kusikila sunu. Mumwaangunune akumuleta okuno. 3 Kuti kwaba muntu uumubuzya kuti, ‘Ino mumwaangunwida nzi?’ Mwaambe kuti, ‘Mwami ulamuyanda alimwi ulakujolela cakufwambaana.’” 4 Aboobo bakaunka akujana mwana wambongolo ulaangilidwe amulyango kumbali aanzila, eelyo bakamwaangununa.+ 5 Pele bamwi ibakaimvwi waawo bakababuzya kuti: “Ino mumwaangunwida nzi mwana wambongolo ooyo?” 6 Bakaamba mbubonya Jesu mbwaakabaambila, aboobo bakabaleka kuti baunke.
7 Aboobo bakaleta mwana wambongolo+ kuli Jesu, alimwi bakabikka zisani zyabo zyaatala alinguwe eelyo Jesu wakatanta akukkala alinguwe.+ 8 Alimwi bantu banji bakayala zisani zyabo zyaatala munzila, pele bamwi bakatema tutabi mumbali aanzila.+ 9 Alimwi aabo bakali kweenda kumbele abaabo bakali kuboola munsi bakazumanana koongolola kuti: “Amumufwutule!+ Ulilelekedwe ooyo uuboola muzina lya Jehova!*+ 10 Bulilelekedwe Bwami buboola bwataateesu Davida!+ Amumufwutule nywebo nomuli kujulu lyamajulu!” 11 Aboobo wakanjila mumunzi wa Jerusalemu akunjila mutempele, mpoonya wakalanga-langa zintu zyoonse, pele mbwaanga ciindi cakalimanide, wakazwa akuunka ku Betaniya abali Kkumi Ababili.+
12 Buzuba bwakaccilila nobakali kuzwa ku Betaniya, wakafwa nzala.+ 13 Kacili alamfwu wakabona mukuyu uujisi matuvwu, aboobo wakaunka kuyoobona naa inga wajana cili coonse kulinguwo. Pele naakasika kulinguwo kunyina mucelo ngwaakajana pele buyo matuvwu, nkaambo tiicakali ciindi cankuyu. 14 Aboobo wakawaambila kuti: “Kutabi muntu uuyoolya mucelo kulinduwe mane kukabe kutamani.”+ Basikwiiya bakwe bakali kuswiilila.
15 Lino bakaboola ku Jerusalemu. Ooko wakanjila mutempele akutalika kubatandila anze aabo ibakali kusambala akuula mutempele, alimwi wakatingamuna matebulu aabasikucinca mali azyuuno zyabaabo ibakali kusambala nkwilimba,+ 16 alimwi kunyina muntu ngwaakalekela kwiinzya cintu mulubuwa lwatempele. 17 Wakali kuyiisya akubaambila kuti: “Sena takulembedwe kuti: ‘Ŋanda yangu inakwiitwa kuti niŋanda yakukombela yazisi zyoonse’?+ Pele nywebo mwaicita kuba ciyubilo cababbi.”+ 18 Mpoonya basilutwe babapaizi abalembi bakamvwa cakacitika, aboobo bakatalika kuyandaula nzila yakuti bamujaye;+ kayi bakali kumuyoowa, nkaambo bantu boonse bakali kugambwa kapati mbwaakali kuyiisya.+
19 Nokwakaba kumangolezya bakazwa mumunzi mbuli lyoonse. 20 Pele nobakali kwiinda mafwumofwumo, bakabona mukuyu kauyumide kuzwa kumiyanda.+ 21 Petro naakayeeya cakacitikide, wakati kuli Jesu: “Rabbi, bona! Mukuyu ngookasinganya wayuma.”+ 22 Jesu wakabaambila kuti: “Amube alusyomo muli Leza. 23 Ncobeni ndimwaambila kuti kufwumbwa waambila cilundu eeci kuti, ‘Zyuka aawa uliwaale mulwizi,’ alimwi katadooneki mumoyo wakwe pele kajisi lusyomo lwakuti ncaamba cilacitika, ciyoocitika ncobeni.+ 24 Ncencico eeci ncendimwaambila kuti, zintu zyoonse nzyomupailila akulomba, amube alusyomo lwakuti mwapegwa kale, eelyo muyooba aanzizyo.+ 25 Alimwi nomwiimikila akupaila, amulekelele kufwumbwa muntu ncaakamubisizya, kutegwa awalo Uso wanu uuli kujulu akonzye kumulekelela milandu yanu.”+ 26 *—
27 Bakaboola alimwi ku Jerusalemu. Lino naakali kweenda mutempele, basilutwe babapaizi abalembi abaalu bakaboola 28 akumubuzya kuti: “Ino nkuli nkookajana nguzu zyakucita zintu eezyi? Naa ino nguni wakakupa nguzu zyakucita zintu eezyi?”+ 29 Jesu wakabaambila kuti: “Ndilamubuzya mubuzyo omwe. Ikuti naa mundiingule, andime ndilamwaambila wakandipa nguzu zyakucita zintu eezyi. 30 Sena lubbapatizyo lwa Johane+ lwakazwa kujulu naa kubantu? Amundiingule.”+ 31 Aboobo bakatalika kulyaambauzya mulicabo kabati: “Ikuti twaambe kuti, ‘Lwakazwa kujulu,’ ulaamba kuti, ‘Ino nkaambo nzi ncomwatakamusyoma?’ 32 Pele sena twaambe kuti, ‘Lwakazwa kubantu’?” Bakali kuyoowa kwaamba boobo nkaambo bantu boonse bakazyi kuti Johane wakali musinsimi ncobeni.+ 33 Aboobo Jesu bakamuvwiila kuti: “Tatuzyi pe.” Awalo Jesu wakabaambila kuti: “Andime tandikoomwaambila nkundakazijana nguzu zyakucita zintu eezyi.”