13 Mwana musongo ulamvwa kulaigwa nobamulaya bausyi,+
Pele sikasampusampu tamvwi kukalalilwa.+
2 Muntu ulalya bubotu bwamicelo iizwa kumulomo wakwe,+
Pele ncobayandisya bampelenge ninkondo.
3 Ooyo uujata mulomo wakwe ukwabilila buumi bwakwe,+
Pele ooyo waasamuna milomo yakwe ulanyonyoonwa.+
4 Mutolo ulaanzyalombozya, pele kunyina ncajisi,+
Pele munkutwe uyookkuta.+
5 Mululami ulikusulide kubeja,+
Pele micito yababi ilajazya nsoni alimwi ileta masampu.
6 Bululami bulamukwabilila muntu uutakwe mulandu munzila yakwe,+
Pele bubi mbobunyonyoona sizibi.
7 Kuli muntu uulicengeezya kuti muvwubi, nokuba boobo taakwe ncajisi;+
Kuli aumwi uulicengeezya kuti mucete, nokuba boobo ulijisi lubono lunji kapati.
8 Cinunuzyo cabuumi bwamuntu ndubono lwakwe,+
Pele bacete tabakongwi pe.+
9 Mumuni wabalulami ulamwekesya,+
Pele lambe lyabantu babi liyoozimwa.+
10 Kulisumpula kuletela buyo mazwanga,+
Pele bantu balomba kulaigwa mbasongo.+
11 Lubono lujanwa cakufwambaana luyooceya,+
Pele lubono lwayooyo uuluyobolola asyoonto-syoonto luyoovwula.
12 Bulangizi busumpizyigwa bulacisizya moyo,+
Pele cintu cilombozyegwa ncisamu cabuumi ikuti naa cacitika.+
13 Kufwumbwa muntu uunyansya malailile uyoosubulwa,+
Pele ooyo uulemeka mulawo uyoolumbulwa.+
14 Malailile aamusongo nkasensa kabuumi+
Alesya muntu kucegwa mutukole twalufwu.
15 Bupampu bwini-bwini bupa kuti muntu akkomaninwe,
Pele nzila yabampelenge njamapenzi.
16 Muntu uucenjede ucita zintu caluzyibo,+
Pele mufwubafwuba utondezya bufwubafwuba bwakwe.+
17 Mutumwa mubi ulanjila mumapenzi,+
Pele mutumwa uusyomeka ulaponya.+
18 Kufwumbwa muntu uubya-ubya lulayo ulacetaala akusampuka,
Pele ooyo uuzumina kululamikwa uyoolemekwa.+
19 Muntu ulakondwa najana ceeco ncalombozya,+
Pele bafwubafwuba tabayandi kutantamuka cibi.+
20 Ooyo weenda abasongo ulaba musongo,+
Pele ooyo uuyanzana abafwubafwuba ulajana mapenzi.+
21 Mapenzi atobela basizibi,+
Pele balulami balalumbulwa abuvwubi.+
22 Muntu mubotu ulasiila bazyukulu bakwe lukono,
Pele lubono lwasizibi luyobwedwa mululami.+
23 Bulimo bwamucete buzyala zilyo zinji kapati,
Pele bulakonzya kukukululwa akaambo kakuti taakwe bululami.
24 Muntu uutabelesyi muluso wakwe tamuyandi mwanaakwe,+
Pele ooyo uumuyanda ulasungwaala kumulaya.+
25 Mululami ulalya akumana nzala yakwe,+
Pele da lyamubi talijisi cakulya.+