Busongo Ibukwabilila

NOKUBA kuti kuvwuba kulijisi bubotu bwankuko, pele kulijisi abubi ikapati muziindi eezyi zikatazya. (2 Timoteyo 3:1-5) Muzisi zimwi, bavwubi, kubikkilizya abasikuswaya masena ibaboneka kusumpuka, mbabavwula kubbidwa alimwi akubbigwa kutegwa babbi bajane mali.

Kujatikizya cisi cimwi icitasumpukide kapati, muteende umwi wakaamba kuti: “Kubbidwa calunya, bumpelenge alimwi akubbigwa cipa bantu bavwubide kuba basinkondonyina bacete. Mumasena mobasambala zyakulya kuli basikugatela bajisi antobolo; maanda aabavwubi ajisi bwaanda bujisi mawaya aanenga, malaiti aamweekesya, makkamela alimwi abasikugatela.” Bukkale oobu bulajanika amuzisi zimwi zinji.

Pele kujatikizya “bacete,” Bbaibbele lyaamba kuti “tabakongwi pe.” Ino mbuti mbomukonzya kugwasyigwa abusongo oobu? Ikuti mukkala mubusena buzwide micito yalunya naa kuunka kubusena buli boobu, mutalitondezyi kuti mulivwubide. Amuyeeyesye kujatikizya nzyomusama alimwi anzyomunyamuna ciindi nomuli mubuleya, ikapati kuti munyamuna zintu nzyobakonzya kubona bantu. Lugwalo lwa Tusimpi 22:3 lwaamba kuti: “Muntu uucenjede abona mapenzi ulayuba, pele aabo batakwe maano balaunka nkukonya ooko, aboobo balapenga.”

Busongo bwamu Bbaibbele butondezya mbwatubikkila maano Mulengi. Uyanda kuti katukwabilidwe. Lugwalo lwa Mukambausi 7:12 lwaamba kuti “busongo” buli boobu “bulakwabilila” nkaambo “bupa kuti ooyo uubujisi azumanane kupona.”