Jeremiya
35 Ndeeli jwi lyakamusikila Jeremiya kuzwa kuli Jehova mumazuba aa Jehoyakimu+ mwana wa Josiya mwami wa Juda: 2 “Koya kuŋanda yabana Rekabu,+ ukaambaule ambabo akubaleta muŋanda ya Jehova, muŋanda imwi yakulida;* mpoonya ubape waini kuti banywe.”
3 Aboobo ndakabweza Jazaniya mwana wa Jeremiya imwana wa Habaziniya antoomwe abanabokwabo, bana bakwe boonse, alimwi abamuŋanda yabana Rekabu boonse 4 akubanjizya muŋanda ya Jehova. Ndakabaleta muŋanda yakulida yabana ba Hanani mwana wa Igidaliya, muntu wa Leza mwini-mwini, eeyo yakabambene aŋanda yakulida yabasilutwe iyakali atala aaŋanda yakulida ya Maaseya mwana wa Salumu mulindizi wamulyango. 5 Mpoonya ndakabikka nkapu alimwi anongo zizwide waini kumbele lyabaalumi aaba bamuŋanda yabana Rekabu akubaambila kuti: “Nobantu, ngooyu waini amunywe.”
6 Pele balo bakaamba kuti: “Peepe tatukoonywa waini pe, nkaambo Jehonadabu*+ mwana wa Rekabu, sikale wesu, wakatulailila kuti, ‘Tamweelede kunywa waini pe, nywebo nibaba bana banu, lyoonse alyoonse. 7 Alimwi tamweelede kuyaka ŋanda, naa kusyanga mbuto; tamweelede kusyanga muunda wamisaansa, nokuba kuba amuunda uuli woonse wamisaansa. Pele nywebo mweelede kunookkala buyo mumatente lyoonse, kutegwa muzumanane kupona kwaciindi cilamfwu mucisi momukkede kamuli bamuzwakule.’ 8 Aboobo twazumanana kutobela jwi lya Jehonadabu mwana wa Rekabu sikale wesu muzintu zyoonse nzyaakatulailila kwiinda mukutanywa waini uuli woonse mazuba eesu oonse, nkokuti swebo, bamakaintu besu, bana besu basankwa abasimbi. 9 Kunyina notuyaka maanda kuti katukkala mumo, alimwi tatujisi myuunda yamisaansa naa myuunda buyo noziba mbuto. 10 Aboobo swebo twazumanana kukkala mumatente akutobela zintu zyoonse nzyaakatulailila Jehonadabu* sikale wesu. 11 Pele ciindi Mwami Nebukadinezara* wa Babuloni naakaboola kuzoolwana cisi,+ twakaamba kuti, ‘Nobantu kamuboola tunjile mu Jerusalemu kutegwa tukwabililwe kumpi yabasikalumamba yaba Kasidi alimwi ampi yabasikalumamba yabana Siriya,’ aboobo lino tukkala mu Jerusalemu.”
12 Mpoonya ijwi lya Jehova lyakamusikila Jeremiya, kaliti: 13 “Mboobu mbwaamba Jehova wamakamu, Leza wa Israyeli, ‘Koya, ukaambile bantu bamu Juda abaabo bakkala mu Jerusalemu kuti: “Sena lyoonse tiimwali kulaililwa kuti kamutobela majwi aangu?”+ mbwaamba Jehova. 14 “Jehonadabu mwana wa Rekabu wakalailila bana bakwe kuti kabatanywi waini, alimwi balo baatobela majwi aakwe kwiinda mukutanywa waini kusikila buzuba obuno, aboobo batobela malailile aasikale wabo.+ Pele mebo, ndalikumwaambila nywebo cakwiinduluka-induluka,* nokuba boobo, tiimwandiswiilila pe.+ 15 Alimwi ndaluujisi kumutumina babelesi bangu boonse ibasinsimi, ndalikubatuma cakwiinduluka-induluka,*+ kanditi, ‘Amujokoloke, akaka, umwi aumwi wanu kuzwa kunzila yakwe mbyaabi,+ alimwi amucite zintu ziluleme! Mutatobeli baleza bambi akubabelekela. Aboobo mulazumanana kukkala munyika njendakamupa nywebo alimwi abasikale banu.’+ Pele nywebo tiimwateya matwi aanu, nokuba kundiswiilila. 16 Bana ba Jehonadabu mwana wa Rekabu baatobela malailile ngaakabapa sikale wabo,+ pele bantu aaba balo kunyina nobandiswiilila mebo pe.”’”
17 “Aboobo mboobu mbwaamba Jehova, Leza wamakamu, Leza wa Israyeli: ‘Amubone ndilaletela Juda abantu boonse bakkala mu Jerusalemu mapenzi oonse ngondakabacenjezya,+ akaambo kakuti ndalikubaambila pele balo tiibaswiilila pe, alimwi ndaluujisi kubaita pele balo tiibavwiila pe.’”+
18 Lino Jeremiya wakaambila basiŋanda yabana Rekabu kuti: “Mboobu mbwaamba Jehova wamakamu, Leza wa Israyeli, ‘Akaambo kakuti mwaatobela malailile aa Jehonadabu sikale wanu akuzumanana kubamba malailile aakwe oonse, inzya mwacita zintu zyoonse nzyaakamulailila, 19 nkokuti, mboobu mbwaamba Jehova wamakamu, Leza wa Israyeli: “Jehonadabu* mwana wa Rekabu takabuli mwana uundibelekela lyoonse kumbele lyangu.”’”