Jeremiya

32 Ndeeli jwi lyakamusikila Jeremiya kuzwa kuli Jehova mumwaka wa 10 wa Mwami Zedekiya wa Juda, nkokuti, mumwaka wa 18 wa Nebukadinezara.*+ 2 Aciindi eeco impi zyabasikalumamba bamwami wa Babuloni zyakali kusinkila munzi wa Jerusalemu, eelyo walo musinsimi Jeremiya wakalaangidwe mu Lubuwa lwa Mulindizi+ muŋanda yamwami wa Juda. 3 Nkaambo Mwami Zedekiya wa Juda wakalimwaangide,+ kaamba kuti, “Ino nkaambo nzi yebo ncosinsimina boobu? Waamba kuti, ‘Mboobu mbwaamba Jehova: “Amubone ndilabikka munzi ooyu mumaanza aamwami wa Babuloni, eelyo walo ulauzunda,+ 4 alimwi Mwami Zedekiya wa Juda takootija pe kuzwa mumaanza aaba Kasidi, nkaambo ncobeni ulaabwa mumaanza aamwami wa Babuloni, eelyo uyakwaambaula anguwe mulomo mpande, akubonana anguwe cantongolameso.”’+ 5 ‘Uyootola Zedekiya ku Babuloni, eelyo ooko nkwanoobede kusikila leelyo nondiyoomulingula,’ mbwaamba Jehova. ‘Nokuba kuti muluujisi kulwana ba Kasidi, tamukoozwidilila pe.’”+

6 Mpoonya Jeremiya wakaamba kuti: “Ijwi lya Jehova lyandisikila kaliti, 7 ‘Ngooyu Hanameli mwana wa Salumu, ngocizyalwa limwi abauso uboola kulinduwe kuzikwaamba kuti: “Kolyuulila muunda wangu uulya uuli ku Anatoti,+ nkaambo yebo ndonduwe wakusaanguna uulaaceelelo cakuwuula akuunununa.”’”+

8 Hanameli mwana wamwanookwabo abataata wakanjila akusika kulindime, kweelana ajwi lya Jehova, mu Lubuwa lwa Mulindizi, eelyo wakandaambila kuti: “Kowuula muunda wangu uulya uuli ku Anatoti, mucisi ca Benjamini, nkaambo yebo ndonduwe uujisi ceelelo cakuukona alimwi akuunununa. Kolyuulila.” Aboobo ndakazyiba kuti eeci cacitika akaambo kajwi lya Jehova.

9 Aboobo muunda ooyo iwakali ku Anatoti ndakawuula kuli Hanameli mwana wamwanookwabo abataata. Ndakamupimina mali,+ masyekeli* aali ciloba alimwi ansiliva zili kkumi. 10 Kumane ndakalemba makani aaya mulugwalo lwacizuminano,+ ndakabikka cinamatizyo, ndakaita bakamboni,+ alimwi ndakapima mali acikkelo. 11 Ndakabweza lugwalo lwacizuminano lutondezya bumboni bwacintu cakaulwa, oolo lwakanamatikidwe kweelana amulawo alimwi amalailile, alimwi aloolo lumbi lwatakanamatikidwe, 12 kumane boobo lugwalo lwacizuminano citondezya bumboni bwacintu cakaulwa ndakalupa Baruki+ mwana wa Neriya+ imwana wa Maseya kalangilila Hanameli mwana wamwanookwabo abataata alimwi kabalangilila bakamboni aabo ibakalemba mulugwalo lwacizuminano citondezya bumboni bwacintu cakaulwa, alimwi aba Juda boonse aabo ibakakkede mu Lubuwa lwa Mulindizi.+

13 Mpoonya kabalangilila ndakalailila Baruki, kuti: 14 “Mboobu mbwaamba Jehova wamakamu, Leza wa Israyeli, ‘Bweza magwalo aaya aacizuminano, ilugwalo oolu lwacizuminano citondezya bumboni bwacintu caulwa, inzya oolu lunamatikidwe, alimwi aloolu lumbi lutanamatikidwe, mpoonya waabikke muciyobwedo cabulongo, kutegwa akkale kwaciindi cilamfwu.’ 15 Nkaambo mboobu mbwaamba Jehova wamakamu, Leza wa Israyeli, ‘Maanda, myuunda alimwi amyuunda yamisaansa ziyakuulwa alimwi mucisi cino.’”+

16 Mpoonya nindakamana kupa Baruki mwana wa Neriya lugwalo lwacizuminano lutondezya bumboni bwacintu cakaulwa, ndakapaila kuli Jehova kuti: 17 “Akaka, O Mwami Singuzuzyoonse Jehova! Bona yebo nduwe wakalenga majulu alimwi anyika kwiinda munguzu zyako zinji+ alimwi akwiinda mukuboko kwako kutandabikidwe. Kunyina cintu nociba comwe cikugambya yebo pe, 18 yebo ootondezya luyando lutamani kuzyuulu-zyuulu zyabantu, pele oojokezya cinyonyoono cabamausyi kubana babo* baboola musyule lyabo,+ yebo O Leza mwini-mwini, mupati alimwi singuzu, inzya yebo oojisi zina lyakuti Jehova wamakamu. 19 Yebo ulijisi makanze mapati alimwi ulacita milimo mipati,+ yebo oojisi meso aabona nzila zyoonse zyabantu,+ kutegwa umwi aumwi wabo umupe kweelana anzila zyakwe alimwi anzyacita.+ 20 Yebo wakacita zitondezyo amaleele mucisi ca Egepita eezyo zizyibidwe kusikila buzuba obuno, aboobo wakalipangila zina mu Israyeli alimwi aakati kabantu bambi buyo,+ mbubonya mbocibede asunu. 21 Alimwi wakagwisya bantu bako bana Israyeli kuzwa mucisi ca Egepita, azitondezyo, amaleele, ajanza lyanguzu, akuboko kutandabikidwe alimwi amilimo iiyoosya kapati.+

22 “Mukuya kwaciindi wakabapa nyika eeyi njookakonkezya kupa bamausyi,+ inyika iikunka buci amukupa.+ 23 Aboobo bakanjila akwiikona, pele tiibakaswiilila jwi lyako nokuba kweenda mumulawo wako. Taakwe cintu niciba comwe ncibakacita akati kazintu nzyookabalailila kuti bacite, aboobo yebo wakapa kuti mapenzi aaya oonse abasikile.+ 24 Bona! Bantu baboola amayake aakusinkilila munzi kuti bauzunde,+ alimwi akaambo kapanga,+ nzala alimwi acilwazi+ munzi ooyu ulaabwa mumaanza aba Kasidi aabo baulwana; ncobeni zintu zyoonse nzyookaamba zyacitika, mbubonya mbobwene anduwe. 25 Nokuba boobo yebo O Mwami Singuzuzyoonse Jehova wandaambila kuti, ‘Kolyuulila muunda amali alimwi koita bakamboni,’ nokuba kuti masimpe ngakuti munzi ulaabwa mumaanza aaba Kasidi.”

26 Mpoonya jwi lya Jehova lyakamusikila Jeremiya kaliti: 27 “Bona, mebo nde Jehova, Leza wabantu boonse. Sena kuli cintu nociba comwe cindigambya? 28 Aboobo mboobu mbwaamba Jehova, ‘Ndilaaba munzi ooyu mumaanza aaba Kasidi alimwi amumaanza aa Mwami Nebukadinezara* wa Babuloni, eelyo walo ulauzunda.+ 29 Alimwi ba Kasidi aabo balwana munzi ooyu balaboola akuudoneka mulilo munzi ooyu eelyo balawuumpa cakumaninina+ antoomwe amaanda aanguwo aajisi ziluli bantu mpobali kuumpila zipaizyo kuli Baala alimwi akutila zituuzyo zinyugwa kuli baleza bambi kutegwa bandinyemye.’+

30 “‘Nkaambo bana Israyeli alimwi abana Juda balikucita buyo zintu zibyaabi mumeso aangu, kuzwa kubwana bwabo;+ bana Israyeli baluujisi kundinyemya amilimo yamaanza aabo,’ mbwaamba Jehova. 31 ‘Nkaambo kuzwa buzuba nobakauyaka munzi ooyu kusikila sunu, wali buyo cintu cindipa kukalala akunyema,+ aboobo ndilaugusya kubusyu bwangu,+ 32 akaambo kabubi boonse bwabana Israyeli abwabana Juda oobo mbobacita kutegwa bandinyemye, nkokuti balo, bami babo,+ basilutwe babo,+ bapaizi babo, basinsimi babo,+ bantu ba Juda alimwi abaabo bakkala mu Jerusalemu. 33 Balikuzumanana kundipa syule lyabo kutali busyu bwabo;+ nokuba kuti ndalikusola kubayiisya cakwiinduluka-induluka,* kunyina naba omwe wabo walikuswiilila kuti atambule lulayo.+ 34 Alimwi babikka mituni yabo iisesemya muŋanda eeyo yiitwa azina lyangu, kutegwa baisofwaazye.+ 35 Kuyungizya waawo, bakayaka masena aakukombela aa Baala mu Kkuti lya Mwana wa Hinomu,*+ kutegwa baumpe* bana babo basankwa abasimbi mumulilo kuli Moleki,+ icintu ncindatakabalailila,+ nokuba kuciyeeya mumoyo wangu* kuti bacite cintu eeci cisesemya, akupa kuti Juda abisye.’

36 “Aboobo mboobu mbwaamba Jehova Leza wa Israyeli kujatikizya munzi ooyu ngomwaamba kuti ulaabwa mumaanza aamwami wa Babuloni kwiinda mupanga, nzala alimwi acilwazi, 37 ‘Amubone, ndiyoobayobolola kuzwa kuzisi zyoonse ooko nkondakabamwaila kandikalede, kandinyemede alimwi akubijilwa kapati,+ eelyo ndiyoobajola mubusena oobu akubapa kuti bakkale cakuliiba.+ 38 Eelyo bayooba bantu bangu, andime ndiyooba Leza wabo.+ 39 Ndiyoobapa kuba amoyo omwe+ alimwi anzila yomwe kutegwa kabandiyoowa lyoonse, kuti zintu kazibeendela kabotu balo alimwi abana babo baboola musyule lyabo.+ 40 Ndiyoopangana ambabo cizuminano citamani,+ icakuti tandikaleki kubacitila zibotu;+ alimwi ndiyoobikka muuya wakundiyoowa mumyoyo yabo kutegwa batakaleyi kuzwa kulindime.+ 41 Ndiyoobotelwa kubacitila zibotu,+ aboobo ndiyoobasimpa mucisi eeci+ cakusyomeka amoyo wangu woonse alimwi abuumi bwangu boonse.’”

42 “Nkaambo mboobu mbwaamba Jehova, ‘Mbubonya mbondaletela bantu aaba mapenzi aaya oonse mapati, mbombubo mbondiyoobaletela bubotu boonse* oobu mbondibasyomezya.+ 43 Aboobo, myuunda iyakuulwa alimwi mucisi ncimunya cino,+ nokuba kuti nywebo mwaamba kuti: “Ma! Cisi eeci matongo buyo aatakwe muntu naba munyama, alimwi caabwa mumaanza aaba Kasidi.”’

44 “‘Myuunda iyakuulwa amali, kuyoolembwa magwalo aacizuminano aatondezya bumboni bwacintu caulwa akwaanamatika alimwi akwiita bakamboni mucisi ca Benjamini,+ mumasena aayengelede Jerusalemu, muminzi ya Juda,+ muminzi yanyika yamalundu, muminzi yacooko cakunselelo+ alimwi amuminzi yakumusanza, nkaambo ndiyoobapilusya bantu babo baangidwe,’+ mbwaamba Jehova.”