Luka
16 Alimwi wakaambila basikwiiya bakwe kuti: “Imuntu umwi muvwubi wakajisi mubanzi* ngobakabejelezya kuti wakanyonyoona lubono lwakwe. 2 Aboobo wakamwiita akumwaambila kuti, ‘Ino makani nzi aaya ngondimvwide kujatikizya nduwe? Kondaambila bweende boonse bwamulimo wako wabubanzi, nkaambo toceeleli kulanganya ŋanda eeyi.’ 3 Mpoonya mubanzi wakalyaambauzya wati, ‘Ino ndilacita buti, mbwaanga simalelaangu uyanda kundigusya mulimo wabubanzi? Tandijisi nguzu zyakulima, alimwi ndilalisenda kulombelela. 4 Oowo! Ndilizyi mbondilaacite kutegwa bantu bakanditambule mumaanda aabo ndaakutandwa mulimo wabubanzi.’ 5 Eelyo naakaita umwi aumwi wabaabo bakajisi zikwelete kuli simalelaakwe, wakabuzya wakusaanguna kuti, ‘Ujisi cikwelete camafwuta manji buti kuli simalelaangu?’ 6 Wakavwiila kuti, ‘Zipimyo* zipati zyamafwuta aamaolifa zili 100.’ Wakamwaambila kuti, ‘Bweza pepa lyacizuminano lilembedwe cikwelete ncojisi, kkala aawa ulembe cakufwambaana kuti 50.’ 7 Mpoonya wakabuzya aumwi kuti, ‘Ino yebo ujisi cikwelete cawiiti munji buti?’ Wakati, ‘Zipimyo zipati zyawiiti zili 100.’* Wakamwaambila kuti, ‘Bweza pepa lyacizuminano lilembedwe cikwelete ncojisi, ulembe kuti 80.’ 8 Lino simalelaakwe wakamulumbaizya mubanzi ooyu nokuba kuti tanaakaluleme, nkaambo wakacita cabusongo;* aboobo bana bamubweende bwazintu oobu* mbasongo munzila iigwasya kubantu bamuzyalani lyabo beni kwiinda bana bamumuni.+
9 “Alimwi ndimwaambila kuti: Amujane balongwe kwiinda mukubelesya lubono lutaluleme+ ikutegwa lwaakubula mpindu, bakamutambule mumasena aakukkala aatamani.+ 10 Imuntu uusyomeka mutuntu tusyoonto ulasyomeka amuzintu zipati, alimwi imuntu uutaluleme mutuntu tusyoonto taluleme amuzintu zipati. 11 Aboobo ikuti tiimwalitondezya kuti mulasyomeka kujatikizya lubono lutaluleme, ino nguni uuyakumusyoma kulubono lwini-lwini? 12 Alimwi ikuti tiimwalitondezya kuti mulasyomeka kujatikizya zintu zyabamwi, ino nguni uutiikamupe canu?+ 13 Taakwe mubelesi uukonzya kuba muzike wabasimalelo bobilo, nkaambo uyoosulaika umwi akuyanda umbi, naa uyoosyomeka kuli umwi akusampula umbi. Tamukonzyi kuba bazike ba Leza aba Lubono.”+
14 Lino ba Farisi ibakali kuyandisisya mali bakali kuswiilila kumakani oonse aaya, eelyo bakatalika kusululwa anguwe.+ 15 Aboobo wakabaambila kuti: “Ndendinywe mulyaamba kuti muliluleme kubantu,+ pele Leza uliizyi myoyo yanu.+ Nkaambo cintu cibonwa abantu kuti cilisumpukide ncisesemyo kuli Leza.+
16 “Mulawo a Basinsimi zyakali kwaambilizyigwa kusikila kuciindi ca Johane. Kuzwa kuciindi eeco Bwami bwa Leza mbobwaambilizyigwa kaali makani mabotu, alimwi bantu bamisyobo yoonse balwanina kuti banjile mulimbubo.+ 17 Masimpe, ncuuba-uba kuti julu anyika zimane kwiinda kuti kabala kasyoonto nokaba komwe ka Mulawo katazuzikizyigwi.+
18 “Muntu woonse uuleka mukaintu wakwe akukwata umbi wacita bumambe, alimwi kufwumbwa uukwata mukaintu wakalekwa kumulumaakwe wacita bumambe.+
19 “Kwakali muvwubi umwi iwakali kusama zisani zyamubala wacisombo alimwi zyuuba-uba, akulya zibotu abuzuba. 20 Pele sikulombelela umwi uutegwa Lazaro iwakajisi zilonda amubili woonse wakali kusiigwa amulyango wamuvwubi 21 alimwi wakali kulombozya kulya bufwefwelenga ibwakali kuloka kutebulu lyamuvwubi ooyo. Inzya, nobaba babwa bakali kuboola akumyankuta zilonda zyakwe. 22 Lino mukuya kwaciindi, sikulombelela ooyo wakafwa, mpoonya bangelo bakamutola kumbali lya Abrahamu.*
“Awalo muntu ooyo muvwubi wakafwa akuzikkwa. 23 Lino mu Cuumbwe* kali mumapenzi mapati wakalanga mujulu, eelyo wakabona Abrahamu kulaale a Lazaro kali kumbali lyakwe.* 24 Aboobo wakoompolola akwaamba kuti, ‘Taata Abrahamu, kondifwida luse alimwi komutuma Lazaro kuti anjizye munwe wakwe mumaanzi akutontozya mulaka wangu, nkaambo ndapenga citaambiki mumulilo ooyu uupya kapati.’ 25 Pele Abrahamu wakati, ‘Mwanaangu, koyeeya kuti wakatambula zintu zyako zyoonse zibotu nookali kupona, pele Lazaro awalo wakatambula zintu zibyaabi. Pele lino walo ulaumbulizyigwa okuno kakuli yebo ulapenga. 26 Alimwi kunze lyazintu eezyi zyoonse, kwabikkwa dindi pati akati kesu andinywe kutegwa aabo bayanda kuzabuka kuzwa kokuno kuboola kulindinywe batacikonzyi alimwi abaabo bayanda kuzwa kooko akuboola kokuno batacikonzyi.’ 27 Mpoonya wakati, ‘Mbocili boobo, ndakulomba taata kuti umutume kuŋanda yabataata, 28 nkaambo ndijisi bakwesu bosanwe, ikutegwa akabapandulwide cakulomya kutegwa abalo batakabooli mubusena obuno bwamapenzi.’ 29 Pele Abrahamu wakati, ‘Balijisi Musa alimwi a Basinsimi; ababaswiilile.’+ 30 Mpoonya wakati, ‘Peepe, taata Abrahamu, pele ikuti umwi iwabuka kubafwu waunka nguwe kulimbabo, bayakweempwa.’ 31 Pele wakamwaambila kuti, ‘Ikuti kabataswiilili Musa+ alimwi a Basinsimi, tabakazumini nokuba kuti umwi wabuka kubafwu.’”