2 Bakorinto

13 Eeci cilaba ciindi catatu kuboola kulindinywe. “Kubumboni bwabakamboni* bobilo naa botatwe makani oonse ayelede kusinizyigwa.”+ 2 Nokuba kuti tandili kooko lino, cili mbuli kuti ndamuswaya ciindi cabili, alimwi ndibacenjezyela limwi aabo ibakabisya musyule alimwi abaabo boonse bacaala kuti, ikuti naa ndikaboole alimwi tandikabaleki pe. 3 Ndaamba boobo akaambo kakuti muyandaula bumboni butondezya kuti Kristo, ooyo uujisi nguzu kulindinywe alimwi singuzu akati kanu mubwini ulaambaula kwiinda mulindime. 4 Nkaambo ncobeni wakajaigwa aacisamu akaambo kakubula nguzu, pele ulapona akaambo kanguzu zya Leza.+ Alimwi masimpe tatujisi nguzu anguwe, pele tuyookkala antoomwe anguwe+ akaambo kanguzu zya Leza zitondezyegwa kulindinywe.+

5 Amuzumanane kulisunka kutegwa mubone naa muli mulusyomo; amuzumanane kulilingula kutegwa mubone bwini mbomubede.+ Naa sena tamuzyi kuti Jesu Kristo ulikamantene andinywe? Ccita kuti mulaabutongo. 6 Masimpe ndasyoma mulazyiba kuti swebo tatukwe butongo pe.

7 Lino tulapaila kuli Leza kuti mutaciti cibi cili coonse, ikutali kuti swebo tutondezye kuti tunyina butongo, pele nkutegwa kamucita zibotu, nokuba kuti swebo tubonwa kuti tulaabutongo. 8 Nkaambo tatukonzyi kucita cikazyanya akasimpe, pele buyo ceendelana akasimpe. 9 Masimpe tulakondwa lyoonse swebo notutajisi nguzu pele nywebo nomuli basinguzu. Alimwi tupailila kuti mululamikwe. 10 Nkakaambo kaako ndilemba zintu eezyi nonditako, ikutegwa ndaakusika, nditakazibelesyi cabukali nguzu nzyaakandipa Mwami+ zyakuti kandiyaka ikutali kumwaya.

11 Lino mukumanizya, bakwesu, ndimwaambila kuti amuzumanane kukondwa, kululamikwa, kuumbulizyigwa,+ kweendelana mumizeezo+ akukkala muluumuno;+ eelyo Leza siluyando alimwi siluumuno+ unooli andinywe. 12 Kamwaanzyanya akumyontana kusalala. 13 Basalali boonse balamwaanzya.

14 Luzyalo lwa Mwami Jesu Kristo aluyando lwa Leza alimwi amuuya uusalala ngotupedwe azibe andinywe nyoonse.