Ciyubunuzyo
9 Imungelo wasanu wakalizya mweembo wakwe.+ Mpoonya ndakabona nyenyeezi yakalokela anyika kuzwa kujulu, eelyo yakapegwa kkii yabulyango busololela kumulindi uutagoli.+ 2 Mpoonya yakajalula bulyango busololela kumulindi uutagoli, eelyo busi buli mbuli busi bwabbibi lyamulilo pati bwakauntumuka kuzwa mubulyango oobo, mpoonya zuba lyakasiya mbi,+ awalo muya wakasiya kubusi bwabulyango oobo. 3 Lino mubusi oobo mwakazwa cikwikwi icakaboola anyika,+ alimwi cakapegwa nguzu izili mbuli zyeezyo zijisi tubanze twaanyika. 4 Cakaambilwa kuti citanyonyooni zimena ansi zyamunyika naa cisyango cili coonse camubala wanyanzabili naa cisamu cili coonse, pele buyo bantu aabo batajisi ciganto ca Leza ankumo zyabo.+
5 Lino cikwikwi tiicakazumizyigwa pe kubajaya, pele kubapenzya kwamyezi yosanwe, eelyo kupenga kwabo kwakali mbuli kucisa nkwamvwa muntu nalumwa kabanze.+ 6 Mumazuba aayo bantu bayooyandaula lufwu, pele tabakalujani pe, alimwi bayoolombozya kufwa, pele lufwu luyoobatija.
7 Lino cikwikwi eeco cakali kulibonya mbuli mabbiza aabambilidwe nkondo;+ alimwi amitwe yancico kwakali zyakali kulibonya mbuli misini yangolida, alimwi ibusyu bwancico bwakali mbuli masyu aabantu, 8 pele cakajisi masusu aali mbuli aabakaintu. Alimwi meno aancico akali mbuli aabasyuumbwa,+ 9 alimwi cakajisi zilikwabilizyo zyakucamba izili mbuli zyabutale. Alimwi kuvwuuma kwamababa aancico kwakali kulimvwisya mbuli kuvwuuma kwankalaki zikwelwa amabbiza aabindaanina kunkondo.+ 10 Kunze lyaboobo, cijisi micila alimwi alumoola mbuli tubanze, alimwi mumicila yancico momuli nguzu zyancico zyakupenzya bantu kwamyezi yosanwe.+ 11 Cilijisi mwami uuceendelezya, imungelo wamulindi uutagoli.+ Mu Chihebrayo izina lyakwe ngu Abadoni,* pele mu Chigiriki ujisi zina lyakuti Apoliyoni.*
12 Ipenzi lyomwe lyainda. Amubone! Kucili mapenzi obilo+ aaciboola zyamana zintu eezyi.
13 Imungelo wacisambomwe+ wakalizya mweembo+ wakwe. Mpoonya ndakamvwa ijwi kuzwa kumeja aacipaililo cangolida+ cili kumbele lya Leza 14 kalyaambila mungelo wacisambomwe iwakajisi mweembo, ikuti: “Baangunune bangelo bone ibaangidwe kumulonga mupati wa Firate.”+ 15 Aboobo bangelo aabo bone aabo ibabambilidwe woola, buzuba, mwezi alimwi amwaka, bakaangununwa kuti bajaye cibeela catatu cabantu.
16 Lino mweelwe wabasikalumamba mumpi zyabasikalumamba basimabbiza wakali mamiliyoni aali myaanda yobilo;* ndakaumvwa mweelwe wabo ooyo. 17 Lino mboobu mbwaakali kulibonya mabbiza ngondakabona mucilengaano, abaabo bakatantide alingawo: Bakasamide zilikwabilizyo zyakucamba zisalala pyu mbuli mulilo, izili mbuli bbwe liyandisi lyamubala wacikambwe alimwi mbuli bbwe lyasulufa, alimwi mitwe yamabbiza yakali mbuli mitwe yabasyuumbwa,+ mpoonya mukanwa lyangawo mwakazwa mulilo, busi alimwi asulufa. 18 Kwiinda muzipenzyo eezyi zyotatwe cibeela catatu cabantu bakajaigwa, nkokuti amulilo, busi alimwi asulufa izyakazwa mukanwa lyangawo. 19 Nkaambo nguzu zyamabbiza aaya zili mukanwa lyangawo amumicila yangawo, nkaambo micila yangawo ili mbuli nzoka alimwi ijisi mitwe, eelyo alanyonyoona kubelesya zyeezyi.
20 Pele bantu boonse ibatakajaigwa azipenzyo eezyi tiibakeempwa pe kumilimo yamaanza aabo; tiibakacileka kukomba madaimona amituni yangolida, yansiliva, yamukuba, yamabwe alimwi ayazisamu, eeyo iitakonzyi kubona naa kumvwa nokuba kweenda.+ 21 Alimwi tiibakeempwa kubujayi bwabo naa kukusyoma mizimo kwabo naa kubwaamu* bwabo naa kububbi bwabo.