Zekariya
8 Ijwi lya Jehova wamakamu lyakasika alimwi kaliti: 2 “Mboobu mbwaamba Jehova wamakamu, ‘Ndiyoosungwaalila Ziyoni abusungu bupati,+ alimwi ndiyoomusungwaalila abukali bupati.’”
3 “Mboobu mbwaamba Jehova, ‘Ndiyoopiluka ku Ziyoni+ akukkala mu Jerusalemu;+ eelyo Jerusalemu uyakwiitwa kuti munzi wakasimpe,*+ acalo cilundu ca Jehova wamakamu ciyakwiitwa kuti cilundu cisalala.’”+
4 “Mboobu mbwaamba Jehova wamakamu, ‘Bamadaala abamacembele bayookkala alimwi mumabuwa aabuleya aa Jerusalemu, umwi aumwi wabo kajisi nkoli mujanza lyakwe akaambo kakuti wapona myaka minji kapati.*+ 5 Alimwi mabuwa aabuleya aamunzi ayoozula bana basankwa abasimbi ibasobana mulingawo.’”+
6 “Mboobu mbwaamba Jehova wamakamu, ‘Nokuba kuti kubantu basyeede akati kabantu aaba mumazuba aayo eeci inga caboneka mbuli kuti tacikonzyi kucitika, sena andime ndeelede kucibona kuti tacikonzyi kucitika?’ mbwaamba Jehova wamakamu.”
7 “Mboobu mbwaamba Jehova wamakamu, ‘Amubone ndilabafwutula bantu bangu kuzwa kuzisi zyakujwe azyakumbo.*+ 8 Mpoonya ndiyoobaleta, eelyo bayookkala mu Jerusalemu;+ bayooba bantu bangu, andime ndiyooba Leza wabo+ mukasimpe* alimwi amubululami.’”
9 “Mboobu mbwaamba Jehova wamakamu, ‘Maanza aanu aabe anguzu,*+ nywebo lino nomuswiilila majwi aaya aazwa kumulomo wabasinsimi,+ imajwi ngamunya aakaambwa mubuzuba niyakabikkwa ntalisyo yaŋanda ya Jehova wamakamu, kutegwa tempele liyakwe. 10 Nkaambo kacitanasika ciindi eeco, kwakanyina zyakuvwozya bantu naa banyama;+ alimwi cakali kuyoosya ikuunka akujoka akaambo kasinkondo, mbokunga bantu boonse ndakabapa kuti babukilane umwi amweenzinyina.’
11 “‘Pele lino ibasyeede akati kabantu aaba tandikabacitili mbuli kumazuba aakaindi,’+ mbwaamba Jehova wamakamu. 12 ‘Nkaambo kuyoosyangwa mbuto yaluumuno; musaansa uyoozyala micelo yanguwo, inyika iyoopa butebuzi bwanjiyo,+ aalo majulu ayoolosya mume wangawo; eelyo ndiyoopa kuti ibasyeede akati kabantu aaba bakazikone zintu zyoonse eezyi.+ 13 Alimwi mbubonya nywebo nobamuŋanda ya Juda anobamuŋanda ya Israyeli mbomwakali cintu cisinganizyigwa akati kamasi,+ mbombubo mbondiyoomufwutula andime, eelyo muyooba cileleko.+ Mutayoowi pe!+ Maanza aanu aabe anguzu.’*+
14 “Nkaambo mboobu mbwaamba Jehova wamakamu, ‘“Mbubonya mbondakakanzide kumuletela mapenzi akaambo kakuti bamauso bakandinyemya,” mbwaamba Jehova wamakamu, “alimwi tiindakacinca mizeezo,+ 15 mbombubo lino mbondikanzide kucita zibotu kuli Jerusalemu alimwi akuli bamuŋanda ya Juda.+ Mutayoowi pe!”’+
16 “‘Nzyeezyi zintu nzyomweelede kucita: Amwaambilane zyamasimpe umwi amweenzinyina,+ alimwi kubeteka nkomucita kumilyango yamunzi wanu akusumpule kasimpe alimwi aluumuno.+ 17 Mumyoyo yanu mutakanzi kuletelana mapenzi umwi amweenzinyina,+ alimwi mutayandi kukonka cakubeja pe;+ nkaambo zintu zyoonse eezyi ndilizisulide,’+ mbwaamba Jehova.”
18 Ijwi lya Jehova wamakamu lyakandisikila alimwi, kaliti: 19 “Mboobu mbwaamba Jehova wamakamu, ‘Kuliimya kulya kwamumwezi wane,+ kuliimya kulya kwamumwezi wasanu,+ akuliimya kulya kwamumwezi waciloba+ alimwi akuliimya kulya kwamumwezi wa kkumi+ ziyooba ziindi zyakukkomana alimwi akusekelela kuli bamuŋanda ya Juda—imapobwe aapa kukondwa.+ Aboobo amuyandisye kasimpe alimwi aluumuno.’
20 “Mboobu mbwaamba Jehova wamakamu, ‘Bantu bamisyobo-misyobo antoomwe abantu bakkala muminzi minji bayooboola; 21 alimwi bantu bakkala mumunzi omwe bayakuunka kulibaabo bakkala mumunzi uumbi akwaamba kuti: “Atweende nobantu, atweende tukamukombelezye Jehova akumuyandaula Jehova wamakamu. Andiswe tulaunka.”+ 22 Aboobo bantu banji bamisyobo-misyobo alimwi amasi alaanguzu ayooboola kuzooyandaula Jehova wamakamu mu Jerusalemu+ alimwi akuzookombelezya Jehova.’
23 “Mboobu mbwaamba Jehova wamakamu, ‘Kumazuba aayo bantu bali kkumi bazwa mumyaambo yoonse yamasi+ bayoojata, inzya, bayoojatisya cikobela* camu Juda,* akwaamba kuti: “Tuyanda kuunka andinywe,+ nkaambo twamvwa kuti Leza ulaandinywe.”’”+