2 Bami
9 Mpoonya Elisha musinsimi wakaita umwi wabana babasinsimi akumwaambila kuti: “Kolyaanga zisani zyako mucibuno, alimwi cakufwambaana ubweze nsazi yamafwuta eeyi mujanza lyako, wamana uunke ku Ramoti-gileadi.+ 2 Waakusika ooko, umulangaule Jehu+ mwana wa Jehosafati imwana wa Nimusi; mpoonya ukanjile akumutola ambali kuzwa akati kabanabokwabo akumunjizya mukaanda kamukati. 3 Mpoonya ukabweze nsazi yamafwuta akumutila amutwe akwaamba kuti, ‘Mboobu mbwaamba Jehova: “Ndakunanika kuba mwami wa Israyeli.”’+ Waakumana ukajalule mulyango akutija, utakawayiwayi pe.”
4 Aboobo mubelesi wamusinsimi wakanyamuka akuunka ku Ramoti-gileadi. 5 Lino naakasika ooko, basilutwe bampi yabasikalumamba bakalikkede. Mpoonya wakati: “Kuli makani ngondiyanda kukwaambila, osilutwe.” Jehu wakabuzya kuti: “Nguni ngoyanda kwaambila akati kesu?” Mubelesi ooyo wakati: “Nduwe, osilutwe.” 6 Aboobo Jehu wakanyamuka akunjila muŋanda; mpoonya mubelesi ooyu wakamutila mafwuta amutwe akumwaambila kuti, “Mboobu mbwaamba Jehova Leza wa Israyeli: ‘Ndakunanika kuba mwami wabantu ba Jehova, nkokuti bana Israyeli.+ 7 Weelede kunyonyoona bamuŋanda ya Ahabu simalelaako, kuti ndipilusye mulandu wabulowa bwababelesi bangu basinsimi abulowa bwababelesi ba Jehova boonse aabo ibakafwa kumaanza aa Jezebeli.+ 8 Boonse bamuŋanda ya Ahabu bayoofwa; alimwi ndiyoonyonyoona baalumi* boonse balunyungu lwa Ahabu, kubikkilizya abaabo batajisi nguzu alimwi bawizukide mu Israyeli.+ 9 Alimwi ndiyoocita ŋanda ya Ahabu kuba mbubonya mbuli ŋanda ya Jeroboamu+ mwana wa Nebati aŋanda ya Basa+ mwana wa Ahija. 10 Kujatikizya Jezebeli, babwa bayoomulya mumuunda uuli ku Jezreeli,+ alimwi kunyina uuyoomuzikka pe.’” Naakamana kwaamba boobo wakajalula mulyango akutija.+
11 Lino Jehu naakapiluka kuli basilutwenyina, bakamubuzya kuti: “Sena zintu zyoonse zili kabotu? Ino musondosi ooyu wali kuyanda nzi kulinduwe?” Pele wakabaingula kuti: “Nywebo mulimuzyi kabotu muntu ooyu mbwabede alimwi ambwaambaula.” 12 Pele balo bakati: “Aayo taali masimpe pe! Kotwaambila buyo.” Mpoonya Jehu wakati: “Mboobu mbwaandaambila, mpoonya wakayungizya kuti, ‘Mboobu mbwaamba Jehova: “Ndakunanika kuba mwami wa Israyeli.”’”+ 13 Mpoonya cakufwambaana umwi aumwi wabo wakabweza cisani cakwe akucibikka kunsi aamaulu aa Jehu amatantilo mpaakakkede,+ kumane bakatalika kulizya mweembo akwaamba kuti: “Jehu waba mwami!”+ 14 Eelyo Jehu+ mwana wa Jehosafati imwana wa Nimusi wakabukila Jehoramu.
Lino Jehoramu abana Israyeli boonse bakalipakamene ku Ramoti-gileadi+ akaambo ka Mwami Hazaeli+ wa Siriya. 15 Mpoonya Mwami Jehoramu wakapiluka ku Jezreeli+ kuti akasilikwe zilonda nzyobakamucisa bana Siriya eliya naakalwana Mwami Hazaeli wa Siriya.+
Lino Jehu wakati: “Ikuti naa mulazumina oobo, mutalekeli muntu uuli woonse kuloboka kuzwa mumunzi kuti akaambe makani aaya ku Jezreeli.” 16 Mpoonya Jehu wakatanta nkalaki yakwe akuunka ku Jezreeli, nkaambo Jehoramu wakalilede ooko kaliciside alimwi Mwami Ahaziya wa Juda wakaunkide kuyoomubona Jehoramu. 17 Lino mulindizi naakaimvwi angazi ku Jezreeli, wakabona nkamu yabantu ba Jehu kaiboola. Mpoonya aawo wakati: “Ndabona nkamu yabantu.” Eelyo Jehoramu wakati: “Bweza sibbiza kuti umutume akaswaangane ambabo eelyo akaambe kuti, ‘Sena mwaboola muluumuno?’” 18 Aboobo sibbiza wakaunka kuyooswaangana anguwe akwaamba kuti: “Mboobu mbwaamba mwami, ‘Sena mwaboola muluumuno?’” Pele Jehu wakati: “Ino yebo ujisi makani nzi kujatikizya ‘luumuno’? Konditobela musyule!”
Mpoonya mulindizi wakaamba kuti: “Mutumwa wasika nkobabede, pele tanaapiluka.” 19 Aboobo wakatuma sibbiza wabili, awalo naakasika kulimbabo wakati: “Mboobu mbwaamba mwami, ‘Sena mwaboola muluumuno?’” Pele Jehu wakati: “Ino yebo ujisi makani nzi kujatikizya ‘luumuno’? Konditobela musyule!”
20 Mpoonya mulindizi wakati: “Wasika nkobabede, pele tanaapiluka, alimwi kweenzya nkalaki ooku kuli mbuli kweenzya kwa Jehu muzyukulu* wa Nimusi, nkaambo nguuenzya mbuli muntu uusondokede.” 21 Jehoramu wakati: “Amundibambile nkalaki!” Aboobo bakamubambila nkalaki yakwe yankondo, eelyo Mwami Jehoramu wa Israyeli a Mwami Ahaziya+ wa Juda bakanyamuka umwi aumwi munkalaki yakwe yankondo kuyooswaangana a Jehu. Bakamujana mumuunda wa Naboti+ muna Jezreeli.
22 Lino Jehoramu mbwaakamubonena buyo Jehu, wakati: “Sena waboola muluumuno Jehu?” Pele wakati: “Inga kwaba buti luumuno kakuli kuli buvwuule abulozi bunji+ bwa Jezebeli+ banyoko?” 23 Mpoonya aawo Jehoramu wakanyona nkalaki yakwe kuti atije, eelyo wakati kuli Ahaziya: “Twajatwa Ahaziya!” 24 Kumane Jehu wakabweza buta akuyasa Jehoramu andelo, eelyo muvwi wakapolela amoyo wakwe mpoonya wakawa munkalaki yakwe yankondo. 25 Mpoonya wakaambila Bidakara mubelesi wakwe walupati-pati kuti: “Komunyamuna akumusowela mumuunda wa Naboti muna Jezreeli.+ Koyeeya kuti mebo anduwe twakali kweenzya nkalaki antoomwe kusyule lya Ahabu usyi, ciindi Jehova naakaamba majwi aaya kujatikizya nguwe:+ 26 ‘“Masimpe mbubonya mbondakabona bulowa bwa Naboti+ abulowa bwabana bakwe jilo,” mbwaamba Jehova, “Ndiyookupilusizya+ bubi bwako mumuunda nguwenya ooyu,” mbwaamba Jehova.’ Aboobo lino amumunyamune akumusowela mumuunda kweelana ajwi lya Jehova.”+
27 Lino Mwami Ahaziya+ wa Juda naakabona cakali kucitika, wakatija kutozya kunzila yiinda kumuunda mupati. (Kumane Jehu wakamutobela akwaamba kuti: “Awalo amumuyase!” Aboobo bakamuyasa kali munkalaki kaya ku Guri, kufwaafwi a Ibleamu.+ Pele wakazumanana kutija kuya ku Megido eelyo wakaakufwa nkukonya ooko. 28 Mpoonya babelesi bakwe bakamubweza munkalaki akumutola ku Jerusalemu, mpoonya bakamuzikka mucuumbwe cakwe antoomwe abamausyi mu Munzi wa Davida.+ 29 Ahaziya+ wakaba mwami wa Juda mumwaka wa 11 wabulelo bwa Jehoramu mwana wa Ahabu.)
30 Lino Jehu naakasika ku Jezreeli,+ Jezebeli+ wakaamvwa makani aaya. Aboobo wakalinanika musila uusiya munkoye akwaabamba kabotu masusu aakwe akusondela awindo. 31 Eelyo Jehu naakanjila amulyango, Jezebeli wakati: “Sena zintu zyakamweendela kabotu Zimuri iwakajaya simalelaakwe?”+ 32 Jehu naakalanga awindo wakabuzya kuti: “Ino nguni uuli kulubazu lwangu? Nguni?”+ Mpoonya aawo basinkuta bobilo naa botatwe bakamulanga. 33 Jehu wakati: “Amumuwaale ansi Jezebeli!” Aboobo bakamuwaala ansi, eelyo bulowa bwakwe bumwi bwakatapukila kubwaanda akumabbiza, eelyo mabbiza aa Jehu akamulyatauka. 34 Kuzwa waawo Jehu wakanjila muŋanda akutalika kulya akunywa. Eelyo wakati: “Ndakomba mumubweze mukaintu ooyu uusinganizyidwe mumuzikke kayi mwana wamwami.”+ 35 Ciindi nobakaunka kuti bakamuzikke, kunyina ncobakajana pele buyo cipapa camutwe, zituta alimwi amaanza aakwe.+ 36 Lino nibakapiluka kuzoomwaambila makani aaya, Jehu wakati: “Eeci cazuzikizya jwi ndyaakaamba Jehova+ kwiinda mumubelesi wakwe Elija muna Tisibe naakati, ‘Babwa bayakuulya mubili wa Jezebeli+ mumuunda wa Jezreeli. 37 Alimwi mutunta wa Jezebeli uyooba mbolezi mumuunda wa Jezreeli kutegwa batakaambi kuti: “Ooyu ngu Jezebeli.”’”