Ciyubunuzyo
14 Mpoonya ndakalanga akubona Mwanaambelele+ kaimvwi aa Cilundu ca Ziyoni,+ alimwi wakali antoomwe abali 144,000 + ibalembedwe zina lyakwe alimwi azina lya Bausyi+ ankumo zyabo. 2 Ndakamvwa kuyoba kujulu ikuli mbuli kuvwuuma kwamaanzi manji alimwi ambuli muzumo mupati; eelyo kuyoba nkondakamvwa kwakali kulimvwisya mbuli kuti mbaimbi baimba kumwi kabalizya tuntimbwa. 3 Alimwi baimba lwiimbo luli mbuli kuti ndwiimbo lupya+ kumbele lyacuuno cabwami akumbele lyazilenge zyuumi zyone+ akumbele lyabaalu,+ alimwi kunyina naba omwe wakali kukonzya kulwiiya akuluzyiba ncobeni ilwiimbo oolo pele buyo aabo bali 144,000,+ ibakaulwa munyika. 4 Aaba mbambabo ibatakalisofwaazya abakaintu; mubwini mbaanakalindu.+ Aaba mbambabo bazumanana kutobela Mwanaambelele kufwumbwa ooko nkwaya.+ Aaba bakaulwa+ akati kabantu kuti babe micelo mitaanzi+ kuli Leza alimwi aku Mwanaambelele, 5 alimwi kunyina bubeji bwakajanwa mumilomo yabo; tabajisi kampenda pe.+
6 Mpoonya ndakabona mungelo uumbi kauluka mumulengalenga, alimwi wakajisi makani mabotu aatamani aakwaambilizya kuli baabo bakkala anyika, kumasi oonse, kumisyobo yoonse, kumilaka* yoonse alimwi akubantu+ bamisyobo yoonse. 7 Kaamba ajwi pati kuti: “Amuyoowe Leza akumupa bulemu, nkaambo woola lyakubetekwa anguwe lyasika,+ aboobo amukombe yooyo wakapanga julu, nyika, lwizi+ alimwi atusensa twamaanzi.”
8 Mpoonya aumwi, imungelo wabili, wakatobela kaamba kuti: “Wawa! Babuloni Mupati+ wawa,+ ooyo wakapa kuti masi oonse anywe waini waluunyaunya* lwabwaamu* bwakwe!”+
9 Imungelo aumwi, watatu, wakabatobela kaamba ajwi pati kuti: “Ikuti umwi kakomba munyama+ acikozyanyo cakwe, akutambula caando ankumo yakwe naa ajanza lyakwe,+ 10 uyoonywa awaini wabukali bwa Leza uutilwa kautavweledwe maanzi munkapu yabukali bwakwe,+ alimwi uyoopenzyegwa amulilo alimwi asulufa+ kumbele lyabangelo basalala akumbele lya Mwanaambelele. 11 Mpoonya ibusi bwakupenzyegwa* kwabo bulasuka lyoonse mane kukabe kutamani,+ alimwi isyikati amasiku kunyina nobalyookezya, aabo ibakomba munyama acikozyanyo cakwe, alimwi amuntu uuli woonse uutambula caando cazina lyakwe.+ 12 Aawa mpobayandika kuliyumya basalali,+ aabo ibatobela milawo ya Leza akutobela lusyomo+ lwa Jesu.”
13 Alimwi ndakamvwa ijwi kuzwa kujulu kalyaamba kuti, “Kolemba: Balikkomene aabo bafwide ibafwa kabakamantene a Mwami+ kuzwa ciindi cino kuya kumbele. Inzya, mbowaamba muuya, abalyookezye kumilimo yabo miyumu nkaambo zintu nzyobakacita zilaunka antoomwe ambabo.”
14 Kumane ndakalanga akubona kkumbi lituba, mpoonya atala aakkumbi kwakakkede umwi uuli mbuli mwanaamuntu,+ kumutwe wakasamide musini wangolida alimwi wakajisi sikela libosya mujanza lyakwe.
15 Aumwi mungelo wakazwa mubusena busalala bwatempele, koongolola ajwi pati kuli yooyo wakakkede atala aakkumbi, kuti: “Vwukaula sikela lyako utebule, nkaambo lyasika woola lyakutebula, mbwaanga zisyango zyanyika zyabizwa zyoonse.”+ 16 Mpoonya ooyo wakakkede atala aakkumbi wakavwukaula sikela lyakwe anyika, eelyo nyika yakatebulwa.
17 Alimwi kwakazwa mungelo aumwi mubusena busalala bwatempele lili kujulu, awalo wakajisi sikela libosya.
18 Mpoonya alimwi kwakazwa mungelo uumbi kucipaililo alimwi wakajisi nguzu zyakweendelezya mulilo. Eelyo wakoongolola ajwi pati kuli yooyo wakajisi sikela libosya, ulaamba: “Kogonka asikela lyako libosya uyobolole zikama zyamusaansa waanyika, nkaambo misaansa yanguwo yabizwa.”+ 19 Aboobo mungelo wakagonka asikela lyakwe munyika akuyobolola musaansa waanyika, alimwi wakauwaala mucikandilo camisaansa cipati cabukali bwa Leza.+ 20 Lino cikandilo camisaansa cakalyataukwa kunze aamunzi, mpoonya mucikandilo camisaansa kwakazwa bulowa bunji ibwakali kusika mumatomu aamabbiza, alimwi bwakakunka kwamusinzo uulampa makkilomita aabalilwa ku 296.*