Bahebrayo
3 Aboobo, nobakwesu basalala, nomutola lubazu mubwiite bwakujulu,+ kamuyeeyesya mwaapostolo amupaizi mupati ngotusyoma*—Jesu.+ 2 Wakali kusyomeka kuli yooyo wakamusala,+ mbubonya Musa awalo mbwaakali kusyomeka muŋanda ya Leza yoonse.+ 3 Nkaambo Jesu ubonwa kuti uleelede kulemekwa kapati+ kwiinda Musa, mbubonya muntu uuyaka ŋanda mbwalemekwa kapati kwiinda ŋanda njayaka. 4 Ncobeni, iŋanda iili yoonse kuli wakaiyaka, pele ooyo wakapanga zintu zyoonse ngu Leza. 5 Lino Musa wakali kusyomeka kali mugwasyi muŋanda yoonse ya Leza, mulimo wakwe kauli bumboni bwazintu zyakali kuyakwaambwa kumbele, 6 pele Kristo wakali kusyomeka kali mwana+ uulanganya ŋanda ya Leza. Swebo tuli ŋanda ya Leza,+ kufwumbwa kuti twajatisya kwaambaula cakutayoowa alimwi abulangizi mbotulidundila kusikila mane kumamanino.
7 Aboobo, mbubonya muuya uusalala mbowaamba kuti,+ “Sunu ikuti nywebo muswiilile jwi lyakwe, 8 mutayumyi myoyo yanu pe mbuli leliya nobakandinyemya, mbuli buzuba obuya nobakandisunka munkanda,+ 9 eelyo bamauso nobakandisunka akundisola, nokuba kuti bakabona milimo yangu kwamyaka iili 40.+ 10 Nkakaambo kaako ndakasesemwa azyalani eeli akwaamba kuti: ‘Balasweeka lyoonse mumyoyo yabo, alimwi tabanazizyiba nzila zyangu.’ 11 Aboobo kandinyemede ndakakonka ndilaamba: ‘Tabakanjili pe mukulyookezya kwangu.’”+
12 Amucenjele bakwesu, kuti kutabi muntu akati kanu uuba amoyo mubi uunyina lusyomo kwiinda mukulizandula kuli Leza uupona;+ 13 pele amuzumanane kukulwaizyanya abuzuba, kufwumbwa kuti kabucaambwa kuti ndi “Sunu,”+ kutegwa kutabi muntu naba omwe akati kanu uuyuma moyo akaambo kakweenwa anguzu zyacibi. 14 Nkaambo mubwini tuba baabo batola lubazu muli Kristo lilikke ikuti naa twajatisya lusyomo ndotwakajisi kumatalikilo mane kumamanino.+ 15 Mbubonya mbokwaambwa kuti, “Sunu ikuti nywebo muswiilile jwi lyakwe, mutayumyi myoyo yanu pe mbuli leliya nobakandinyemya.”+
16 Ino mbaani aabo ibakamvwa pele ibakamunyemya? Mubwini, sena tabali boonse aabo ibakazwa mu Egepita kabasololelwa a Musa?+ 17 Kunze lyaboobo, ino mbaani aabo Leza mbaakasesemwa kwamyaka iili 40?+ Sena tabali baabo ibakabisya, ibali amitunta yakaide kwaalabana munkanda?+ 18 Alimwi ino nkuuli bani nkwaakakonka kuti tabakanjili mukulyookezya kwakwe? Sena teensyi kuli baabo ibatakaswiilila? 19 Aboobo twabona kuti tiibakacikonzya kunjila nkaambo bakanyina lusyomo.+