NEHEMIYA

1 Ngaaya majwi aa Nehemiya*+ mwana wa Hakaliya: Lino mumwezi wa Kisilevi,* mumwaka wa 20, ndakali muŋanda yamwami iikwabilidwe yaku Susani.*+ 2 Aciindi eeco, Hanani+ umwi wabanabokwesu, wakaboola antoomwe abaalumi bamwi kuzwa ku Juda, eelyo ndakababuzya kujatikizya ba Juda bakasyeede ibakazwa mubwaange+ alimwi akujatikizya Jerusalemu. 3 Bakaingula kuti: “Aabo basyeede ibakazwa mubwaange, ibali mucooko ca Juda bali mumapenzi aataambiki amasampu.+ Bwaanda bwa Jerusalemu bulimwaidwe+ amilyango yamunzi yakaumpwa amulilo.”+

4 Lino mbondakamvwida buyo majwi aaya, ndakakkala ansi akutalika kulila akuba mubuumba kwamazuba aali mbwaabede, alimwi ndakazumanana kuliimya kulya+ akupaila kuli Leza wakujulu. 5 Mpoonya ndakati: “O Jehova, Leza wakujulu, Leza mupati alimwi uuyoosya, yebo oobamba cizuminano cako akutondezya luyando lutamani kulibaabo bakuyanda abaabo babamba milawo yako,+ 6 matwi aako aaswiilile ameso aako aabone kuti uswiilile mupailo wamubelesi wako, ngondipaila kulinduwe sunu, syikati amasiku+ kujatikizya bana Israyeli babelesi bako kumwi kandaamba zibi nzyobacita bana Israyeli kulinduwe. Twakubisizya, mebo antoomwe abamuŋanda yataata.+ 7 Masimpe twakubisizya+ kwiinda mukutyola milawo, malailile ambeta zyako nzyookapa mubelesi wako Musa.+

8 “Akaka, koyeeya majwi ngookaambila* Musa mubelesi wako kuti: ‘Ikuti naa mutakasyomeki, ndiyoomumwaya akati kabantu.+ 9 Pele ikuti naa mwapiluka kulindime akubamba milawo yangu akwiicita, nokuba kuti bantu banu balimwaikide kusikila kumagolelo aanyika, ndiyoobayobolola+ kuzwa kooko akubaleta kubusena mbondasala kuti ndibikke zina lyangu.’+ 10 Mbabelesi bako alimwi mbantu bako, aabo mbookanununa munguzu zyako zipati alimwi ajanza lyako lyanguzu.+ 11 Akaka O Jehova, matwi aako aaswiilile mupailo wangu ndemubelesi wako alimwi amupailo wababelesi bako ibayandisya kulemeka zina lyako, alimwi kocita kuti zintu zindeendele kabotu ndemubelesi wako sunu, akupa kuti ndifwidwe luzyalo kumuntu ooyu.”+

Mumazuba aayo mebo ndakali sikutola zyakunywa kumwami.+

2 Lino mumwezi wa Nisani,* mumwaka wa 20 + wabulelo bwa Mwami Aritasasita,+ waini wakalibikkidwe kumbele lyakwe, eelyo mbuli lyoonse ndakamupa waini mwami.+ Pele taakwe buzuba nondakauside kubusyu bwakwe. 2 Aboobo mwami wakandibuzya kuti: “Ino nkaambo nzi ncouside boobu kakuli tocisidwe? Taakwe cimbi pe, kuli cikupenzyede mumoyo.” Ndimvwe boobo, ndakayoowa kapati.

3 Mpoonya ndakaambila mwami kuti: “Aaongole mwami! Ino ndilekele nzi kuusa kakuli munzi ooko ikwakazikkilwa bamatata ulinyonyookede alimwi milyango yanguwo yakapya amulilo?”+ 4 Aboobo mwami wakandibuzya kuti: “Ino uyanda kuti ucite buti?” Mpoonya aawo ndakapaila kuli Leza wakujulu.+ 5 Kumane ndakaambila mwami kuti: “Ikuti naa cakubotela omwami, alimwi ikuti naa wandifwida luzyalo ndemubelesi wako, kondizumizya kuti nduunke ku Juda kumunzi ooko kwakazikkilwa bamatata kutegwa ndikauyakulule.”+ 6 Mpoonya namalelo wakwe kakkede munsi lyakwe, mwami wakati kulindime: “Ino lweendo lwako luyootola ciindi cilamfwu buti, alimwi uyoopiluka lili?” Aboobo cakamubotela mwami kundizumizya kuti nduunke,+ eelyo ndakamwaambila ciindi nondakali kuyoopiluka.+

7 Mpoonya ndakati kumwami: “Ikuti naa ncibotu kulinduwe omwami, kondipa magwalo aakutolela beendelezi ba Mutala aa Mulonga,*+ kutegwa bakandizumizye kwiinda kakunyina buyumuyumu mane ndikasike ku Juda, 8 alimwi alugwalo lwakutola kuli Asafu uulanganya Cisaka ca Mwami, kutegwa akandipe masamu aakubambya milyango ya Ŋanda Njumu Yamayubilo+ yatempele, bulambo bwamunzi+ alimwi aŋanda oomo mondiyookkala.” Aboobo mwami wakandipa+ magwalo nkaambo janza libotu lya Leza wangu lyakali alindime.+

9 Mukuya kwaciindi ndakasika kubeendelezi bakali Mutala aa Mulonga akubapa magwalo aamwami. Kuyungizya waawo mwami wakatuma basilutwe bampi zyabasikalumamba abasimabbiza kuti bandisindikile. 10 Lino Sanibalati+ muna Horoni a Tobiya+ umwi wabalupati-pati* muna Amoni+ nobakamvwa boobo, bakabijilwa kapati ikumvwa kuti kuli muntu wakaboola kuzoogwasya bana Israyeli.

11 Mpoonya ndakasika ku Jerusalemu akukkala ooko mazuba otatwe. 12 Eelyo ndakanyamuka masiku, mebo antoomwe abaalumi basyoonto mbondakali limwi, alimwi tiindakaambila muntu naba omwe zintu Leza nzyaakabikka mumoyo wangu kuti ndicite mu Jerusalemu, alimwi taakwe munyama ngundakajisi kunze lyayooyo ngundakatantide. 13 Lino masiku aayo ndakazwa a Mulyango wa Kkuti+ akwiinda kumbele lya Kasensa ka Muzoka Mupati alimwi a Mulyango wa Milwi ya Mulota.+ Eelyo ndakazumanana kulingula bwaanda bwa Jerusalemu kubona mbobwakanyonyookede alimwi amilyango yanguwo mboyakapide amulilo.+ 14 Kumane ndakainda ku Mulyango wa Kasensa+ aku Zyiba lya Mwami, pele kwakanyina busena bwakuti munyama ngundakatantide ainde. 15 Pele masiku aayo ndakazumanana kutobelezya kalonga+ kandiyaabulingula bwaanda, kumane ndakapiluka akunjila ku Mulyango wa Kkuti.

16 Baleli babili+ tiibakazyiba nkondakaunkide ancindakali kucita; alimwi tiindakalina kwaamba cili coonse kuba Juda, bapaizi, bantu balemekwa, baleli babili abantu boonse basimilimo. 17 Eelyo ndakati kulimbabo: “Mulibwene mapenzi aataambiki ngotujisi, Jerusalemu mbwanyonyookede alimwi amilyango yanguwo mboipide amulilo. Amuboole tuyakulule bulambo bwa Jerusalemu, kutegwa masampu aaya atazumanani.” 18 Mpoonya ndakabaambila mbuli janza libotu lya Leza mbolyakandigwasya+ alimwi amajwi mwami ngaakandaambila.+ Eelyo bakati: “Atutalike kuyakulula.” Aboobo bakakulwaizyanya* kuti babeleke mulimo.+

19 Lino Sanibalati muna Horoni a Tobiya+ umwi wabalupati-pati* muna Amoni+ a Gesemu muna Arabiya+ nobakaamvwa makani aaya, bakatalika kutusampaula+ akutufwubaazya kabati: “Ino ncinzi eeci ncomucita? Sena muyanda kuzangila mwami?”+ 20 Nokuba boobo ndakabavwiila kuti: “Leza wakujulu nguutiitupe kuzwidilila,+ alimwi swebo tobabelesi bakwe tulatalika kuyaka; pele nywebo tamukwe lubazu, caabilo naa cintu cili coonse ncimwakacita icikonzya kumupa kuyeeyegwa* mu Jerusalemu.”+

3 Lino Eliyasibu+ mupaizi mupati abanabokwabo bapaizi bakatalika kuyaka Mulyango wa Mbelele.+ Bakausalazya*+ akubikka zijazyo kulinguwo; bakasalazya cibeela eeci kusikila ku Ngazi ya Mea+ alimwi aku Ngazi ya Hananeli.+ 2 Mpoonya abalo baalumi baku Jeriko+ bakabambulula kuzwa waawo mpaakagolela Eliyasibu abanabokwabo; kumane Zakuri mwana wa Imiri wakabambulula kuzwa waawo mpobakagolela baalumi baku Jeriko.

3 Bana ba Hasenaya bakabambulula Mulyango wa Nswi;+ bakapanga minsende+ yamulyango akubikka zijazyo zyanguwo, zyaanzyo zyanguwo ampingizyo zyanguwo. 4 Mpoonya Meremoti+ mwana wa Urija mwana wa Hakozi wakabambulula kuzwa waawo mpobakagolela bana ba Hasenaya, eelyo Mesulamu+ mwana wa Berekiya mwana wa Mesezabele wakabambulula kuzwa waawo mpaakagolela Meremoti, mpoonya Zadoki mwana wa Baana wakabambulula kuzwa waawo mpaakagolela Mesulamu. 5 Mpoonya bana Tekowa+ bakabambulula kuzwa waawo mpaakagolela Zadoki, pele basololi babo bakakaka kubeleka mulimo wabasimalelaabo.

6 Joyada mwana wa Paseya a Mesulamu mwana wa Besodeya bakabambulula Mulyango wa Munzi wa Kaindi;+ bakapanga minsende yamulyango akubikka zijazyo zyanguwo, zyaanzyo zyanguwo aminkulwa yanguwo. 7 Mpoonya Melatiya muna Gibeoni+ a Jadoni muna Meronoti baku Gibeoni aku Mizipa+ aabo balo ibakali kweendelezyegwa amweendelezi wa Mutala aa Mulonga*+ bakabambulula kuzwa waawo mpaakagolela Joyada a Mesulamu. 8 Mpoonya Uzieli mwana wa Harehaya umwi wabafwuzi bangolida wakabambulula kuzwa waawo mpaakagolela Melatiya a Jadoni, Hananiya umwi wabasikupanga mafwuta aanunkilila wakabambulula kuzwa waawo mpaakagolela Uzieli; eelyo bakayala mabwe mu Jerusalemu kusikila ku Bwaanda Bupati.+ 9 Kumane Refaya mwana wa Huri, silutwe wacisela cacooko ca Jerusalemu, wakabambulula kuzwa waawo mpaakagolela Hananiya. 10 Mpoonya Jedaya mwana wa Harumafi wakabambulula bwaanda bwakali kumbele lyaŋanda yakwe, eelyo Hatusi mwana wa Hasabineya wakabambulula kuzwa waawo mpaakagolela Jedaya.

11 Malikiya mwana wa Harimu+ a Hasubu mwana wa Pahati-moabu+ bakabambulula cibeela cimbi cabwaanda a Ngazi ya Zitofwu.+ 12 Kumane Salumu mwana wa Halohesi, silutwe wacisela cacooko ca Jerusalemu abana bakwe basimbi, wakabambulula kuzwa waawo mpaakagolela Malikiya a Hasubu.

13 Lino Hanuni abantu bakkala ku Zanowa+ bakabambulula Mulyango wa Kkuti;+ mbambabo bakauyaka akubikka zijazyo zyanguwo, zyaanzyo zyanguwo aminkulwa yanguwo, alimwi bakabambulula bwaanda bulampa tukokola tuli 1,000 * kusikila ku Mulyango wa Milwi ya Mulota.+ 14 Mpoonya Malikiya mwana wa Rekabu, silutwe wacooko ca Beti-hakeremu+ wakabambulula Mulyango wa Milwi ya Mulota; ngonguwe wakauyaka akubikka zijazyo zyanguwo, zyaanzyo zyanguwo aminkulwa yanguwo.

15 Salumu mwana wa Kolihoze, silutwe wacooko ca Mizipa+ wakabambulula Mulyango wa Kasensa;+ ngonguwe wakauyaka akubikka ciluli alimwi akubikka zijazyo zyanguwo, zyaanzyo zyanguwo aminkulwa yanguwo, alimwi abwaanda bwa Zyiba lya Kagelo*+ kaya ku Muunda wa Mwami+ alimwi akusika ku Matantilo+ aazwa ku Munzi wa Davida.+

16 Mpoonya Nehemiya mwana wa Azibuki silutwe wacisela cacooko ca Beti-zuri+ wakabambulula kuzwa waawo mpaakagolela Salumu kusikila kumbele lya Masena aa Kuzikkila aa Davida*+ alimwi akusikila kuzyiba+ lyakapangwa akusikila ku Ŋanda ya Basinguzu.

17 Mpoonya ba Levi kabasololelwa a Rehumu mwana wa Bani bakabambulula kuzwa waawo mpaakagolela Nehemiya; kumane Hasabiya silutwe wacisela cacooko ca Keila+ wakabambulula lubazu lwacooko cakwe kuzwa waawo mpobakagolela ba Levi. 18 Kumane banabokwabo, kabasololelwa a Bavai mwana wa Henadadi silutwe wacisela cacooko ca Keila, bakabambulula kuzwa waawo mpaakagolela Hasabiya.

19 Eelyo Ezeri mwana wa Jeshua,+ silutwe wa Mizipa, wakali kubambulula cibeela cimbi icakali kumbele aa Ciyobwedo ca Zilwanyo ku Citabilizyo ca Bwaanda.+

20 Kuzwa waawo Baruki mwana wa Zabai+ wakabeleka cabusungu akubambulula cibeela cimbi cabwaanda kuzwa ku Citabilizyo ca Bwaanda kusikila kumanjililo aaŋanda ya Eliyasibu+ mupaizi mupati.

21 Kumane Meremoti+ mwana wa Urija mwana wa Hakozi wakabambulula cibeela acimbi cabwaanda, kuzwa kumanjililo aaŋanda ya Eliyasibu mupaizi mupati kusikila kumamanino aaŋanda eeyo.

22 Mpoonya bapaizi, ibaalumi bamu cooko ca Jordano*+ bakabambulula kuzwa waawo mpaakagolela Meremoti. 23 Kumane Benjamini a Hasubu bakabambulula bwaanda bwakali kumbele lyaŋanda yabo kuzwa waawo mpobakagolela bapaizi. Eelyo Azariya mwana wa Maaseya mwana wa Ananiya wakabambulula bwaanda bwakali aafwaafwi aŋanda yakwe kuzwa waawo aakagolela Benjamini a Hasubu. 24 Mpoonya Binui mwana wa Henadadi wakabambulula cibeela cimbi cabwaanda, kuzwa kuŋanda ya Azariya kusikila ku Citabilizyo ca Bwaanda+ akusikila kukkona.

25 Kumane Palali mwana wa Uzai wakabambulula bwaanda kumbele lya Citabilizyo ca Bwaanda alimwi angazi iizwa a Ŋanda ya Mwami,+ nkokuti iili ku Lubuwa lwa Mulindizi.+ Mpoonya Pedaya mwana wa Parosi wakabambulula kuzwa waawo mpaakagolela Palali.+

26 Lino babelesi baatempele*+ ibakali kukkala mu Ofeli+ abalo bakabambulula bwaanda kusikila kumbele lya Mulyango wa Maanzi+ uuli kujwe alimwi angazi yakali kwiindilila kunze aabwaanda.

27 Mpoonya bana Tekowa+ bakabambulula cibeela acimbi cabwaanda, kuzwa kumbele lyangazi mpati iyakali kwiindilila kunze aabwaanda kusikila ku Ofeli.

28 Bapaizi bakabambulula atala aa Mulyango wa Mabbiza,+ umwi aumwi kumbele lyaŋanda yakwe.

29 Mpoonya Zadoki+ mwana wa Imeri wakabambulula bwaanda bwakali kumbele lyaŋanda yakwe kuzwa waawo mpobakagolela bapaizi.

Eelyo Semaya mwana wa Sekaniya, mulindizi wa Mulyango wa Kujwe,+ wakabambulula kuzwa waawo mpaakagolela Zadoki.

30 Kumane Hananiya mwana wa Selemiya a Hanuni mwana wacisambomwe wa Zalafi bakabambulula cibeela cimbi cabwaanda kuzwa waawo mpaakagolela Semaya.

Mpoonya Mesulamu+ mwana wa Berekiya wakabambulula bwaanda bwakali kumbele lyaŋanda yakwe kuzwa waawo mpaakagolela Hananiya.

31 Kumane Malikiya, umwi wabafwuzi bangolida wakabambulula kuzwa waawo mpaakagolela Mesulamu kusikila kuŋanda yababelesi baatempele*+ alimwi abasambazi, kumbele lya Mulyango wa Kulingwida* mane kusikila kuŋanda yamujulu yakukkona.

32 Alimwi bafwuzi bangolida abasambazi bakabambulula bwaanda akati kaŋanda yamujulu yakukkona alimwi a Mulyango wa Mbelele.+

4 Lino Sanibalati+ mbwaakamvwida buyo kuti tuyakulula bwaanda, wakakalala akunyema kapati eelyo wakatalika kusampaula ba Juda. 2 Lino kali abanabokwabo ampi yabasikalumamba yabana Samariya wakaamba kuti: “Ino bacita nzi ba Juda aaba batakwe nguzu? Sena bayeeya kuti inga bauyakulula munzi ooyu balikke? Sena bayootuula zipaizyo? Sena bayoomanizya kuyaka mubuzuba bomwe? Sena inga bafwukulula mabwe aakapya mulilo kuzwa kuzilwi zyalusuko?”+

3 Lino Tobiya+ muna Amoni+ iwakaimvwi afwaafwi a Sanibalati wakati: “Naba mwaaba ikuti watanta abwaanda bwamabwe mbobali mukuyaka, ulakonzya kubumwaya.”

4 Lino Nehemiya wakati, Koswiilila O Leza wesu nkaambo twasampaulwa,+ alimwi kopilusya masampu aabo amitwe yabo,+ akupa kuti babe mbuli zisaalo alimwi akuba bazike kucisi cimbi. 5 Utavwumbi milandu yabo naa kumwaya cibi cabo kubusyu bwako,+ nkaambo batukila bayaki.

6 Aboobo twakazumanana kuyaka bwaanda mane limwi bwaanda boonse bwakaswaangana akusika acisela cabulamfwu bwambubo, alimwi bantu bakazumanana kuubeleka mulimo camoyo woonse.

7 Lino Sanibalati, Tobiya,+ bana Arabiya,+ bana Amoni abana Asidodi+ mbobakamvwida buyo kuti mulimo wakubambulula bwaanda bwaku Jerusalemu wakali kuyaambele akuti myaako yakali kusinkwa, bakanyema kapati. 8 Bakalibunga-bunga boonse kuti balwane Jerusalemu akuleta lupyopyongano. 9 Pele twakapaila kuli Leza wesu alimwi twakabikka balindizi kuti kabatulinda syikati amasiku.

10 Nokuba boobo, bantu bamu Juda bakali kwaamba kuti: “Inguzu zyababelesi* zyamana, alimwi kuli tombe linji; tatukacikonzyi kuyaka bwaanda.”

11 Kuyungizya waawo, basinkondoma bakazumanana kwaamba kuti: “Kabatanazyiba naa kutubona, tuyoonjila akati kabo, eelyo tuyoobajaya akuwiimika mulimo.”

12 Lino kufwumbwa ba Juda ibakali kukkala afwaafwi ambabo nibakali kuboola, bakali kutwaambila cakwiinduluka-induluka* kuti: “Bayooboola kutulwana kumabazu oonse.”

13 Aboobo ndakabikka baalumi kunze aabwaanda mumasena aayo motwatakamanizyide kusinka alimwi ndakabikka bantu kweelana amikwasyi yabo kabajisi masumo, mapanga amata. 14 Lino nindakabona mbobakayoowede mpoonya aawo ndakanyamuka akwaambila bantu balemekwa,+ baleli babili alimwi abantu boonse kuti: “Mutabayoowi pe.+ Amuyeeye Jehova imupati alimwi uuyoosya;+ alimwi amubalwanine banabokwanu, bana banu basankwa abasimbi, bamakaintu banu alimwi amaanda aanu.”

15 Lino basinkondoma nobakamvwa kuti nzyobakali kucita twazizyiba, akuti Leza mwini-mwini wakapilinganya makanze aabo, toonse twakapiluka kumulimo wakuyaka bwaanda. 16 Kuzwa buzuba oobo, cisela cabalombwana bangu cakali kubeleka mulimo,+ eelyo cisela cimbi cakajisi masumo, ntobo, mata azikwabilizyo zyakucamba. Basilutwe+ bakaliimvwi kusyule lyaba Juda boonse 17 ciindi nobakali kuyaka bwaanda. Aabo ibakali kunyamuna mikuli bakali kubeleka ajanza lyomwe kakuli janza limwi lyakajisi cilwanyo. 18 Umwi aumwi wabayaki wakalijisi panga mucibuno kumwi kayaka, awalo sikulizya mweembo+ wakaliimvwi afwaafwi andime.

19 Mpoonya ndakaambila balupati-pati, baleli babili alimwi abantu boonse kuti: “Mulimo wakuyaka bwaanda mupati kapati alimwi tulitanteene kuli umwi amweenzinyina kuzinguluka bwaanda. 20 Ikuti mwamvwa kulila kwamweembo, mweelede kubungana ooko nkotubede. Leza wesu uyootulwanina.”+

21 Aboobo twakazumanana kubeleka kakuli cisela cimwi cakajisi masumo kuzwa kubucedo kusikila masiku nozizwa nyenyeezi. 22 Aciindi eeco ndakaambila bantu kuti: “Mwaalumi umwi aumwi kakkala antoomwe amubelesi wakwe mu Jerusalemu masiku, kabatulinda ciindi camasiku mpoonya kababeleka ciindi casyikati.” 23 Aboobo mebo, banabokwesu, babelesi bangu+ alimwi abalindizi ibakali kunditobela tiitwakali kusamununa zisani, alimwi umwi aumwi wakalijisi cilwanyo cakwe mujanza lyalulyo.

5 Lino kwakali kulila kupati kuzwa kuba Juda baalumi abamakaintu babo kabatongooka banabokwabo ba Juda.+ 2 Bamwi bakali kwaamba kuti: “Tuli banji swebo abana besu basankwa abasimbi. Tweelede kupegwa maila aakulya kutegwa tupone.” 3 Bamwi bakali kwaamba kuti: “Tulapa myuunda yesu, myuunda yamisaansa amaanda eesu kuti zibe zijatilizyo kutegwa tupegwe maila ciindi canzala.” 4 Eelyo bamwi bakali kwaamba kuti: “Twakakweleta mali kutegwa tutele mutelo wamyuunda yesu amyuunda yamisaansa kumwami.+ 5 Lino swebo tuli mbuli banabokwabo,* alimwi bana besu bali mbuli bana babo; pesi bana besu basankwa abasimbi twabalekela kuba bazike alimwi bana besu bamwi basimbi bali kale mubuzike.+ Pele kunyina ncotukonzya kucita nkaambo myuunda yesu amyuunda yesu yamisaansa yaba yabantu bambi.”

6 Lino nindakaamvwa matongoosi aabo alimwi amajwi aaya ndakanyema kapati. 7 Aboobo ndakaayeeya makani aaya mumoyo wangu, alimwi ndakabajanina mulandu bantu balemekwa abaleli babili, eelyo ndakabaambila kuti: “Umwi aumwi wanu uyanda cinyonamucila kumwanookwabo.”+

Alimwi ndakabapangila muswaangano mupati. 8 Mpoonya ndakati kulimbabo: “Twakacita mbuli mbotukonzya kunununa banabokwesu ba Juda ibakasambalidwe kuli bamasi; pele sena nywebo lino muyanda kusambala banabokwanu,+ alimwi sena beelede kusambalwa kulindiswe?” Bamvwe boobo bakaumuna wi, alimwi bakabula acakwaamba. 9 Kumane ndakati: “Eeci ncomucita tacili kabotu pe. Sena tamweelede kweenda cakuyoowa Leza wesu+ kutegwa basinkondoma bamasi batatusampauli? 10 Alimwi mebo, banabokwesu ababelesi bangu tulakweletesya mali alimwi amaila kubanabokwesu. Ndakomba, atucileke kubbadelesya cinyonamucila.+ 11 Aboobo ndilyonya sunu amubapilusizye myuunda yabo,+ myuunda yabo yamisaansa, myuunda yabo yamaolifa, maanda aabo, cipaanzi camwaanda* camali, camaila, cawaini mupya acamafwuta eezyo nzyomubabbadelesya kazili cinyonamucila.”

12 Eelyo bakati: “Tulabapilusizya alimwi tatukooyanda cintu cili coonse kuzwa kulimbabo. Tulacita mbubonya mbowaamba.” Aboobo ndakabaita bapaizi, eelyo ndakapa baalumi aaba kuti bakonke kuti bacite mbubonya mbuli mbobakasyomezya. 13 Alimwi ndakadikimuna nkomo yacisani cangu yaacamba* akwaamba kuti: “Mbubonya oobu, Leza mwini-mwini amudikimune kuzwa muŋanda yakwe amulukono lwakwe muntu uuli woonse uutaciti kweelana acisyomezyo eeci, alimwi mbubonya oobo muntu ooyo adikimunwe akubula cintu.” Mpoonya boonse mumbungano bakati: “Ameni!”* Eelyo bakatembaula Jehova alimwi bantu bakacita kweelana ambobakasyomezya.

14 Kuyungizya waawo kuzwa buzuba mbwaakandibikka kuba mweendelezi wabo+ munyika ya Juda, kuzwa mumwaka wa 20+ kusikila mumwaka wa 32+ wabulelo bwa Mwami Aritasasita,+ nkokuti mumyaka iili 12, mebo abanabokwesu tatunalide cakulya ceelede mweendelezi.+ 15 Pele beendelezi ibakandisaangunina bakabaminya bantu alimwi bakali kubweza masyekeli* aansiliva aali 40 kuzwa kulimbabo aazyakulya awaini buzuba abuzuba. Alimwi babelesi babo bakali kudyaaminina bantu. Pele mebo tiindakacita oobo+ akaambo kakuyoowa Leza.+

16 Kuyungizya waawo, ndakatola lubazu mumulimo wakuyaka bwaanda oobu, alimwi tiitwakabweza muunda uuli woonse;+ abalo babelesi bangu boonse bakabungana ooko kuti babeleke mulimo. 17 Kwakali ba Juda abaleli babili bali 150 ibakali kulida atebulu lyangu kubikkilizya abaabo bakaboola kulindiswe kuzwa kumasi. 18 Buzuba abuzuba ndakali kubambilwa* mupoho omwe, mbelele zibotu zili cisambomwe abayuni, alimwi kwainda mazuba aali 10 bakali kutubambila waini munji uusiyene-siyene. Nokuba boobo, tiindakabaambila kuti bandipe cakulya ceelede mweendelezi nkaambo mulimo ngubakali kubeleka bantu aaba, wakali muyumu kale. 19 Kondiyeeya O Leza wangu, undicitile zibotu* akaambo kazintu zyoonse nzyondacitila bantu aaba.+

6 Lino Sanibalati, Tobiya,+ Gesemu, abana Arabiya+ alimwi abasinkondoma boonse mbobakaambilwa buyo kuti ndabuyakulula bwaanda+ alimwi akuti tiikwakacili myaako yakasyeede (nokuba kuti aciindi eeco tiindakalinabikka zijazyo mumilyango),+ 2 mpoonya aawo Sanibalati a Gesemu bakatuma mulumbe ooyu kulindime: “Koboola tumvwane ciindi ncotukonzya kuswaangana mukanzi kamwi kamu Cibanda ca Ono.”+ Pele makanze aabo akali aakundilwana. 3 Aboobo ndakatuma batumwa kuti bakabaambile kuti: “Mulimo ngondicita mupati kapati aboobo tandikonzyi kuboola ooko. Nkaambo ikuti naa ndaboola ooko, mulimo ulaima.” 4 Bakanditumina mulumbe ngweena kwaziindi zyone, pele ndakabavwiila amajwi ngeena.

5 Mpoonya Sanibalati wakatuma mubelesi wakwe amulumbe ngweena kwaciindi casanu, kajisi alugwalo lutajedwe mumaanza aakwe. 6 Mulugwalo oolu kwakalembedwe kuti: “Kuli maŋunuŋunu akati kabamasi, alimwi awalo Gesemu+ ulimukwaamba mbubonya oobo kuti, yebo aba Juda mukanza kuzanga.+ Nkakaambo kaako ncoli mukuyaka bwaanda; alimwi kweelana amakani ngotwamvwa, yebo uyanda kuba mwami wabo. 7 Alimwi wasala basinsimi kuti baambilizye kujatikizya nduwe mu Jerusalemu yoonse kuti, ‘Kuli mwami mucisi ca Juda!’ Lino mwami ulaambilwa makani aaya oonse. Aboobo koboola tuswaangane kutegwa twaabandike makani aaya.”

8 Nokuba boobo ndakamutumina mulomo wakuti: “Zintu eezyi nzyoamba tazili zyamasimpe pe; nzyakuliyeeyela buyo omwini.”* 9 Boonse bakali kuyanda kutukonga kabaamba kuti: “Maanza aabo alabula nguzu zyakubeleka alimwi mulimo ooyu tuukoomana.”+ Lino ndapaila, kondiyumya.+

10 Mpoonya ndakaunka kuŋanda ya Semaya mwana wa Delaya mwana wa Mehetabele oomo mwaakalijalilide. Eelyo wakati: “Atupangane ciindi cakuswaangana kuŋanda ya Leza mwini-mwini mukati katempele akujala milyango yatempele, nkaambo balaboola kuzookujaya. Ncobeni balaboola masiku kuzookujaya.” 11 Pele ndakati: “Sena muntu uuli mbuli ndime ulakonzya kutija? Sena muntu uuli mbuli ndime ulakonzya kunjila mutempele akupona?+ Tandikoonjila pe!” 12 Mpoonya ndakazyiba kuti tali Leza iwakamutuma pe, pele kuti Tobiya a Sanibalati+ bakalimuulide buya kutegwa aambe businsimi oobu kujatikizya ndime. 13 Wakaulwa buya kutegwa andiyoosye akundipa kubisya kutegwa bandibisizye zina akundisampaula.

14 Komuyeeya O Leza wangu, Tobiya+ a Sanibalati kujatikizya micito eeyi njobacita, alimwi a Noadiya musinsimi mukaintu abasinsimi bambi boonse ibakali kusola kundiyoosya lyoonse.

15 Aboobo bwaanda bwakamana kuyakwa mubuzuba bwa 25 bwamwezi wa Eluli,* mumazuba aali 52.

16 Lino basinkondoma boonse mbobakaamvwida buyo makani aaya, masi woonse aazingulukide aalo naakamvwa boobo, akafwa nsoni kapati*+ alimwi akazyiba kuti ngu Leza wesu wakatugwasya kuti mulimo ooyu ubelekwe. 17 Kuciindi eeco bantu balemekwa+ bamu Juda bakali kulemba magwalo manji kuli Tobiya alimwi awalo wakali kwaasandula magwalo aayo. 18 Banji mu Juda bakakonka kuba kulubazu lwakwe, nkaambo wakali mukwe wa Sekaniya mwana wa Ara,+ alimwi Jehohanana mwanaakwe wakakwete mwana musimbi wa Mesulamu+ mwana wa Berekiya. 19 Alimwi lyoonse bakali kundaambila zintu zibotu kujatikizya nguwe mpoonya awalo bakali kumwaambila majwi ngondakali kwaamba. Kumane Tobiya wakali kundilembela magwalo aakundikonga.+

7 Lino mbobwakamanina buyo kuyakululwa bwaanda,+ ndakabikka zijazyo;+ mpoonya balindizi bamilyango,+ baimbi+ aba Levi+ bakasalwa. 2 Kumane ndakabikka Hanani+ mwanookwesu a Hananiya silutwe wa Ngazi+ kuti kabalanganya Jerusalemu nkaambo Hananiya wakali mwaalumi uusyomeka kapati alimwi uuyoowa Leza+ mwini-mwini kwiinda bamwi banji. 3 Aboobo ndakabaambila kuti: “Milyango ya Jerusalemu tayeelede kujulwa kusikila zuba lyabala, alimwi nobaciimvwi aawo beelede kujala zijazyo akuzikkiya. Alimwi amubikke bantu bamu Jerusalemu kuba balindizi, umwi aumwi abusena bwakwe bwakulinda alimwi umwi aumwi kumbele lyaŋanda yakwe.” 4 Lino munzi wakali mupati alimwi wakali kwakwabukide, pele bantu ibakali kukkala mumo bakali basyoonto+ alimwi maanda tanaakaninga yakululwa.

5 Pele Leza wangu wakacibikka mumoyo wangu kuti ndibunganye bantu balemekwa, baleli babili alimwi abantu buyo kuti balembwe kweelana amilongo yamazyalani.+ Mpoonya ndakajana bbuku lyamulongo wamazyalani wabaabo bakasaanguna kuboola, eelyo mubbuku eeli ndakajana kulembedwe kuti:

6 Aaba mbabantu bamucooko ibakapiluka kuzwa mubuzike aabo Mwami Nebukadinezara+ wa Babuloni mbaakatolede mubuzike+ alimwi ibakapiluka ku Jerusalemu aku Juda, umwi aumwi kumunzi wakwe,+ 7 aabo ibakaboola a Zerubabeli,+ Jeshua,+ Nehemiya, Azariya,* Raamiya,* Nahamani, Moodekai, Bilisani, Mizipara, Bigivai, Nehumu* a Baana.

Mweelwe wabaalumi bana Israyeli wakali kubikkilizya:+ 8 bana ba Parosi ibakali 2,172; 9 bana ba Sefatiya ibakali 372; 10 bana ba Ara+ ibakali 652; 11 bana ba Pahati-moabu,+ nkokuti bana ba Jeshua a Joabu+ ibakali 2,818; 12 bana ba Elamu+ ibakali 1,254; 13 bana ba Zatu ibakali 845; 14 bana ba Zakai ibakali 760; 15 bana ba Binui ibakali 648; 16 bana ba Bebai ibakali 628; 17 bana ba Azigadi ibakali 2,322; 18 bana ba Adonikamu ibakali 667; 19 bana ba Bigivai ibakali 2,067; 20 bana ba Adini ibakali 655; 21 bana ba Ateri, iwamumukwasyi wa Hezekiya ibakali 98; 22 bana ba Hasumu ibakali 328; 23 bana ba Bezai ibakali 324; 24 bana ba Harifi ibakali 112; 25 bana ba Gibeoni+ ibakali 95; 26 baalumi bana Betelehemu a Netofa ibakali 188; 27 baalumi bana Anatoti+ ibakali 128; 28 baalumi bana Beti-azimaveti ibakali 42; 29 baalumi bana Kiriyati-jearimu,+ Kefira a Beeroti+ ibakali 743; 30 baalumi bana Rama a Geba+ ibakali 621; 31 baalumi baku Mikimasi+ ibakali 122; 32 baalumi baku Beteli+ a Ai+ ibakali 123; 33 baalumi bana ba Nebo uumbi ibakali 52; 34 bana ba Elamu uumbi ibakali 1,254; 35 bana ba Harimu ibakali 320; 36 bana ba Jeriko ibakali 345; 37 bana ba Lodi, Hadidi a Ono+ ibakali 721; 38 bana ba Senaa ibakali 3,930.

39 Bapaizi+ mbaaba: bana ba Jedaya bamuŋanda ya Jeshua bakali 973; 40 bana ba Imeri bakali 1,052; 41 bana ba Pasuri+ bakali 1,247; 42 bana ba Harimu+ bakali 1,017.

43 Ba Levi+ mbaaba: bana ba Jeshua iwaluzubo lwa Kadimiyeli+ baluzubo lwa Hodeva bakali 74. 44 Baimbi mbaaba:+ bana ba Asafu+ bakali 148. 45 Balindizi bamilyango mbaaba:+ ibana ba Salumu, bana ba Ateri, bana ba Talimoni, bana ba Akubu,+ bana ba Hatita abana ba Sobai, boonse antoomwe bakali 138.

46 Babelesi baatempele*+ mbaaba: bana ba Ziha, bana ba Hasufa, bana ba Tabaoti, 47 bana ba Kerosi, bana ba Sia,* bana ba Padoni, 48 bana ba Lebana, bana ba Hagaba, bana ba Salimai, 49 bana ba Hanani, bana ba Gideli, bana ba Gahari, 50 bana ba Reaya, bana ba Rezini, bana ba Nekoda, 51 bana ba Gazamu, bana ba Uza, bana ba Paseya, 52 bana ba Besai, bana ba Meunimu, bana ba Nefusesimu,* 53 bana ba Bakibuki, bana ba Hakufa, bana ba Harihuri, 54 bana ba Baziliti,* bana ba Mehida, bana ba Harisa, 55 bana ba Barikosi, bana ba Sisera, bana ba Tema, 56 bana ba Neziya abana ba Hatifa.

57 Bana bababelesi ba Solomoni+ mbaaba: bana ba Sotai, bana ba Sofereti, bana ba Perida,* 58 bana ba Jaala, bana ba Darikoni, bana ba Gideli, 59 bana ba Sefatiya, bana ba Hatili, bana ba Pokereti-hazebaimu abana ba Amoni.* 60 Babelesi baatempele*+ boonse abana bababelesi ba Solomoni bakali 392.

61 Lino mbaaba ibakaunka kuzwa ku Tele-mela, ku Tele-harisa, ku Kerubi, ku Adoni aku Imeri, pele tiibakali kukonzya kupa bumboni bukkwene kusinizya ciinga cabamausyi nkobakazwida, ikuti naa bakali bana Israyeli:+ 62 bana ba Delaya, bana ba Tobiya abana ba Nekoda, bakali 642. 63 Abana babapaizi mbaaba: ibana ba Habaya, bana ba Hakozi,+ bana ba Barizilai, ooyo iwakakwata umwi wabana basimbi ba Barizilai+ muna Gileadi, aboobo wakali kwiitwa zina lyabo. 64 Aaba bakayandaula mumabbuku aamulongo wamazyalani aabo kuti bazyibe mulongo wazyalani lyabo, pele tiibakajanwa oomo pe, aboobo bakagwisyigwa aabupaizi.*+ 65 Mweendelezi*+ wakabaambila kuti tabeelede kulya zintu zisalalisya+ kusikila mane kukabe mupaizi iwakali kukonzya kubuzya kwiinda mukubelesya Urimu a Tumimu.+

66 Mweelwe woonse wambungano yoonse wakali 42,360,+ 67 kunze lyabazike babo basankwa abasimbi+ ibakali 7,337; alimwi bakalijisi abaimbi basankwa abasimbi ibali 245.+ 68 Mabbiza aabo akali 736, mamyuulu* aabo akali 245, 69 nkamela zyabo zyakali 435, eelyo mbongolo zyabo zyakali 6,720.

70 Basilutwe bamwi baziinga zyabamausyi bakasanga kumulimo.+ Mweendelezi* wakapa kuciyobwedo madirakima* aangolida aali 1,000, mitiba iili 50 azisani zyabapaizi+ zili 530. 71 Alimwi kwakali basilutwe bamwi baziinga zyabamausyi ibakapa kuciyobwedo madirakima aangolida aali 20,000 amamaina* aansiliva aali 2,200 kugwasyilizya mulimo. 72 Eelyo bantu bambi bakapa madirakima aangolida aali 20,000, mamaina aansiliva aali 2,000 azisani zyabapaizi zili 67.

73 Eelyo bapaizi, ba Levi, balindizi bamilyango, baimbi,+ bantu bambi, babelesi baatempele* abana Israyeli boonse bakakkala muminzi yabo.+ Lino mumwezi waciloba,+ bana Israyeli bakalikkede kale muminzi yabo.+

8 Mpoonya bantu boonse bakabungana antoomwe mubbuwa lyabuleya kumbele lya Mulyango wa Maanzi,+ eelyo bakaambila Ezara+ sikukkopolola* kuti alete bbuku lya Mulawo wa Musa,+ ooyo Jehova ngwaakapa bana Israyeli.+ 2 Aboobo Ezara mupaizi wakaleta bbuku lya Mulawo kumbele lyambungano+ yabaalumi, bamakaintu abaabo boonse ibakali kukonzya kuswiilila akumvwisya mubuzuba bwakusaanguna bwamwezi waciloba.+ 3 Eelyo wakaubala cakupozya mulawo+ mubbuwa lyabuleya ilyakali kumbele lya Mulyango wa Maanzi, kubaalumi, bamakaintu alimwi abaabo boonse ibakali kukonzya kuswiilila akumvwisya kuzwa mafwumofwumo kusikila akalangabwaaseme; mpoonya bantu bakaswiililisya+ izyakali kubalwa mubbuku lya Mulawo. 4 Lino Ezara sikukkopolola* wakaliimvwi acibumbili cazisamu ncobakapangide akaambo kamuswaangano ooyu; alimwi afwaafwi anguwe kululyo lwakwe kwakaimvwi Matitiya, Sema, Anaya, Uriya, Hilikiya a Maaseya; eelyo kulumwensyi lwakwe kwakali Pedaya, Misayeli, Malikiya,+ Hasumu, Hasi-badana, Zekariya a Mesulamu.

5 Ezara wakajalula bbuku bantu boonse kabalangilila, nkaambo wakali aabusena busumpukide kwiinda bantu boonse. Lino naakali kulijalula, bantu boonse bakaimikila. 6 Mpoonya Ezara wakatembaula Jehova Leza mwini-mwini, Leza mupati, eelyo bantu boonse bakati, “Ameni!* Ameni!”+ kumane bakatambika maanza aabo mujulu. Eelyo bakakotama akuvwuntama ansi kubusyu bwa Jehova. 7 Lino iba Levi, nkokuti Jeshua, Bani, Serebiya,+ Jamini, Akubu, Sebatai, Hodiya, Maaseya, Kelita, Azariya, Jozabadi,+ Hanani a Pelaya bakali kupandulwida bantu Mulawo.+ Lino bantu bakaliimvwi. 8 Alimwi bakazumanana kubala cakupozya mubbuku lya Mulawo wa Leza mwini-mwini, kabaupandulula kabotu-kabotu akutondezya mbougwasya; aboobo bakabagwasya bantu kumvwisya cakali kubalwa.+

9 Lino Nehemiya, iwakali mweendelezi* aciindi eeco, Ezara+ mupaizi alimwi sikukkopolola* aba Levi ibakali kuyiisya bantu bakaambila bantu boonse kuti: “Buzuba oobu bulasalala kuli Jehova Leza wanu.+ Tamweelede kulila nokuba koomoka.” Nkaambo bantu boonse bakali kulila nobakali kuswiilila majwi aa Mulawo. 10 Nehemiya wakabaambila kuti: “Kamuya mukalye zyakulya zili amafwuta akunywa zintu zilweela, akupa zipego+ kulibaabo batajisi; nkaambo buzuba oobu bulasalala ku Mwami wesu, alimwi mutausi pe, nkaambo lukkomano lwa Jehova ndolumuyumya.”* 11 Kumane ba Levi bakali kuumuzya bantu boonse kabati: “Amuumune! Nkaambo buzuba oobu bulasalala, mutausi pe.” 12 Aboobo bantu boonse bakaunka kuyoolya akunywa akupana zyakulya akusekelela kapati,+ nkaambo bakaamvwisya majwi ngobakaambilwa.+

13 Lino buzuba bwakatobela, basilutwe baziinga zyabantu boonse, bapaizi alimwi aba Levi bakabungana antoomwe kuli Ezara sikukkopolola* kuti bakamvwisisisye majwi aa Mulawo. 14 Mpoonya bakajana kuti kulilembedwe mu Mulawo ooyo Jehova ngwaakalailila kwiinda muli Musa kuti bana Israyeli beelede kukkala muzivwuka ciindi capobwe mumwezi waciloba,+ 15 akuti beelede kwaambilizya+ muminzi yabo yoonse alimwi amu Jerusalemu yoonse kuti: “Kamuya kubusena bwamalundu mukalete mitabi yamaolifa, yazisamu zyamafwuta, yamisiwe, yamakunka alimwi ayazisamu zimbi kutegwa mukapange zivwuka kweelana ambokulembedwe mumulawo.”

16 Aboobo bantu bakaunka kuyooleta mitabi kuti balipangile zivwuka, umwi aumwi aciluli caŋanda yakwe, mumabbuwa aabo, mumabbuwa aaŋanda ya Leza mwini-mwini,+ mubbuwa lyabuleya lyaku Mulyango wa Maanzi+ alimwi amubbuwa lyabuleya lyaku Mulyango wa Efraimu.+ 17 Eelyo boonse mumbungano yabantu ibakapiluka kuzwa mubuzike bakayaka zivwuka akukkala mulinzizyo, nkaambo bana Israyeli tiibakalinacitide pobwe lili boobu kuzwa kumazuba aa Joshua+ mwana wa Nuni kusikila buzuba oobo. Aboobo kwakali kusekelela kupati.+ 18 Buzuba abuzuba kwakali kubalwa bbuku lya Mulawo wa Leza mwini-mwini,+ kuzwa kubuzuba bwakusaanguna kusikila kubuzuba bwamamanino. Bakacita pobwe mazuba aali ciloba, eelyo mubuzuba bwalusele kwakaba muswaangano uusetekene kweelana amulawo.+

9 Mubuzuba bwa 24 bwamwezi ooyu, bana Israyeli bakabungana antoomwe; bakali kuliimya kulya kabasamide zisani zyamasaka akulibikka vwu amitwe yabo.+ 2 Mpoonya aabo balunyungu lwa Israyeli bakalyaandaanya kuzwa kuli bamasi boonse,+ eelyo bakaima akulyaambilila zibi zyabo amilandu yabamausyi.+ 3 Mpoonya bakaima aawo mpobakabede eelyo bakabalilwa cakupozya mubbuku lya Mulawo+ wa Jehova Leza wabo kwamawoola otatwe; kwamawoola aambi otatwe bakalyaambilila zibi zyabo akukotamina Jehova Leza wabo.

4 Lino Jeshua, Bani, Kadimiyeli, Sebaniya, Buni, Serebiya,+ Bani a Kenani bakaimikila acibumbili+ caba Levi akupozomoka ajwi lipati kuli Jehova Leza wabo. 5 Ba Levi aaba: Jeshua, Kadimiyeli, Bani, Hasabineya, Serebiya, Hodiya, Sebaniya a Petahiya bakati: “Amunyamuke mutembaule Jehova Leza wanu lyoonse alyoonse mane kukabe kutamani.+ Abatembaule zina lyako lilemekwa, iliinda kulumbwa koonse akutembaulwa koonse.

6 “Yebo olikke Jehova;+ nduwe wakalenga julu, noliba julu lyamajulu, amakamu oonse aali mumo, nyika azyoonse zili alinjiyo, lwizi azyoonse zili mumo. Nduwe upa kuti zyoonse kazipona, alimwi makamu aakujulu alakukotamina. 7 Nduwe Jehova Leza mwini-mwini iwakasala Abramu+ akumugwisya mu Uri+ waba Kasidi akumupa zina lya Abrahamu.+ 8 Wakajana kuti ulasyomeka kulinduwe,+ aboobo wakapangana cizuminano anguwe kuti umupe nyika yabana Kanana, bana Heti, bana Amori, bana Perizi, bana Jebusi abana Girigasi, alimwi akwiipa kulunyungu lwakwe;+ eelyo wakazuzikizya zisyomezyo zyako nkaambo uliluleme.

9 “Aboobo wakaabona mapenzi aabamatata mu Egepita+ alimwi wakakumvwa kulila kwabo ku Lwizi Lusalala. 10 Mpoonya wakacita zitondezyo amaleele kuli Farao, akubabelesi bakwe akubantu boonse bamucisi cakwe,+ nkaambo wakabona kuti bakali kupenzya+ bantu bako. Wakalipangila zina, eelyo liciliko kusikila sunu.+ 11 Wakaandaanya lwizi kubusyu bwabo, aboobo bakainda akati kalwizi kabayaabweenda anyika njumu,+ alimwi basikubatandaanya wakabawaala mulwizi mbuli bbwe mumaanzi malamfwu.+ 12 Wakabasololela amusumpuululu wakkumbi ciindi casyikati eelyo masiku wakabasololela amusumpuululu wamulilo kutegwa bamunikilwe nzila njobakeelede kutozya.+ 13 Wakaseluka a Cilundu ca Sinai+ akwaambaula ambabo kuzwa kujulu,+ eelyo wakabapa mbeta ziluleme, milawo yakasimpe,* milazyo mibotu alimwi amalailile.+ 14 Wakabazyibya Sabata yako iisetekene,+ akubapa milawo, milazyo amalailile kwiinda mumubelesi wako Musa. 15 Nibakafwa nzala wakabapa cinkwa cizwa kujulu,+ nibakafwa nyota wakabapa maanzi kuzwa mundomba,+ eelyo wakabaambila kuti banjile akubweza nyika eeyo njookakonkezya nowakatambika janza lyako kuti uyoobapa.

16 “Pele balo bamatata bakacita cakulisumpula+ akuba basicinguni,*+ alimwi tiibakali kwiiswiilila milawo yako. 17 Bakakaka kuswiilila+ alimwi kunyina nobakaiyeeya milimo yako iilibedelede njookacita akati kabo, pele bakaba basicinguni* akusala musololi kuti bapiluke mubuzike bwabo ku Egepita.+ Nokuba boobo, yebo nduwe Leza uulibambilide kulekelela,* silweetelelo* alimwi siluse, uutafwambaani kukalala alimwi uuzwide luyando lutamani,+ aboobo taakwe nookabasiya pe.+ 18 Noliba leelyo nobakalipangila cikozyanyo camoombe cifwulidwe akutalika kwaamba kuti, ‘Ngooyu Leza wako iwakakugwisya mucisi ca Egepita,’+ alimwi bakacita zintu zipati zitondezya kubula bulemu, 19 pele yebo, muluse lwako lupati, taakwe nookabasiya munkanda.+ Musumpuululu wakkumbi tiiwakaleka kubasololela ciindi casyikati ikubatondezya nzila, awalo musumpuululu wamulilo tiiwakaleka kubasololela ciindi camasiku ikubamunikila nzila njobakeelede kutozya.+ 20 Wakabapa muuya wako mubotu kuti babe basongo,+ alimwi tonookabaima mana+ alimwi wakabapa maanzi aakunywa nobakafwa nyota.+ 21 Kwamyaka iili 40 wakali kubapa cakulya munkanda.+ Tiibakabula cintu pe. Zisani zyabo tiizyakazakala+ alimwi maulu aabo tanaakazimba.

22 “Mpoonya wakabapa mami amisyobo yabantu, wakabaabanya nyika muzibeela-beela,+ aboobo bakakona nyika ya Sihoni,+ nkokuti nyika yamwami wa Hesiboni+ alimwi anyika ya Ogi+ mwami wa Basani. 23 Bana babo wakabavwuzya mbuli nyenyeezi zyakujulu.+ Mpoonya wakabanjizya munyika njookasyomezya bamausyi kuti bayoonjila akwiibweza.+ 24 Aboobo bana babo bakanjila akwiibweza nyika+ alimwi wakabagwasya kuzunda bana Kanana+ ibakali kukkala munyika eeyo akwaaba bami babo abantu bamunyika mumaanza aabo, kuti babacite kufwumbwa mbobayanda. 25 Alimwi bakazunda minzi iikwabilidwe+ akubweza nyika yambolezi,+ maanda aazwide zintu zibotu zyoonse, migoti iisyidwe kale, myuunda yamisaansa, myuunda yamaolifa+ azisamu zyamicelo zinji. Aboobo bakalya akukkuta akuneneya alimwi bakakondwa mububotu bwako bupati.

26 “Nokuba boobo bakaleka kukuswiilila alimwi bakakuzangila+ akufwutatila Mulawo wako.* Bakajaya basinsimi bako aabo ibakali kubacenjezya kutegwa babapilusye kulinduwe, alimwi bakacita zintu zipati zitondezya kubula bulemu.+ 27 Aboobo wakabaaba mumaanza aabasinkondonyina,+ aabo ibakazumanana kubapenzya.+ Pele mumapenzi aabo bakali kukukwiilila, eelyo wakali kuswiilila kujulu; alimwi akaambo kaluzyalo lwako lupati, wakabapa basikubafwutula kutegwa babafwutule mumaanza aabasinkondonyina.+

28 “Pele mbobaliiba buyo, bakali kutalika alimwi kucita zibi kubusyu bwako+ eelyo wakali kubalekelezya mumaanza aabasinkondonyina, aabo ibakali kubadyaaminina.*+ Mpoonya bakali kupiluka akwiita kulinduwe kulomba lugwasyo,+ alimwi yebo wakali kuswiilila kujulu akubavwuna ziindi zinji akaambo kaluzyalo lwako lupati.+ 29 Nokuba kuti wakali kubacenjezya kutegwa bapiluke ku Mulawo wako, balo bakalisumpula akukaka kuswiilila milawo yako;+ bakali kubisya kwiinda mukusotoka mbeta zyako, eezyo zinga ikuti naa muntu wazitobela ulapona akaambo kanzizyo.+ Pele cankazi bakacita muuzyamvwide akuyumya nsingo zyabo eelyo bakakaka kuswiilila. 30 Wakabakkazikila moyo+ myaka minji akuzumanana kubacenjezya kubelesya muuya wako kwiinda mubasinsimi, pele bakakaka kuswiilila. Aboobo wakabaaba mumaanza aabamasi.+ 31 Alimwi muluse lwako lupati, taakwe nookabanyonyoona+ nokuba kubasiya pe, nkaambo yebo nduwe Leza silweetelelo* alimwi siluse.+

32 “Lino O Leza wesu, Leza mupati, singuzu alimwi uuyoosya kapati, yebo oobamba cizuminano cako akutondezya luyando lutamani,+ utaaubyi-ubyi mapenzi oonse aatusikila swebo, bami besu, basilutwe besu,+ bapaizi besu,+ basinsimi besu,+ bamatata abantu bako boonse kuzwa kumazuba aabami bana Asuri+ kusikila sunu. 33 Yebo waliluleme muzintu zyoonse izyatucitikila, nkaambo wali kusyomeka; pele swebo ndiswe twabisya.+ 34 Bami besu, basilutwe besu, bapaizi besu abamatata, tiibakatobela Mulawo wako nokuba kuswiilila malailile aako naa ziyeekezyo* zyako zyakubacenjezya. 35 Noliba leelyo nobakali mubwami bwabo akukkomana abubotu butalivwulili mbookabapa alimwi kabali munyika mpati iilaambolezi njookabapa, tiibakakubelekela+ alimwi tiibakaleka micito yabo mibi. 36 Mpaawa sunu tuli bazike+–inzya, ibazike munyika njookapa bamatata kuti balye micelo yayo azintu zyayo zibotu. 37 Bulotwe bwanyika eeyi bwaba bwabami bamasi aabo mbookatubikkila akaambo kazibi zyesu.+ Balatweendelezya kufwumbwa mbobayanda, swebo abanyama besu bavwubwa, aboobo tuli mumapenzi aataambiki.

38 “Aboobo akaambo kazintu zyoonse eezyi, tulapanga cizuminano cisyomeka+ kwiinda mukulemba, alimwi cilasinizyigwa kwiinda mukubikkwa ciganto abasilutwe besu, ba Levi abapaizi besu.”+

10 Lino aabo ibakacisinizya kwiinda mukubikka ciganto+ mbaaba:

9 Aba Levi ibakacisinizya mbaaba: Jeshua mwana wa Azaniya, Binui umwi wabana ba Henadadi, Kadimiyeli,+ 10 abanabokwabo aaba: Sebaniya, Hodiya, Kelita, Pelaya, Hanani, 11 Mika, Rehobu, Hasabiya, 12 Zakuri, Serebiya,+ Sebaniya, 13 Hodiya, Bani a Beninu.

14 Basilutwe babantu ibakacisinizya mbaaba: Parosi, Pahati-moabu,+ Elamu, Zatu, Bani, 15 Buni, Azigadi, Bebai, 16 Adonija,* Bigivai, Adini, 17 Ateri, Hezekiya, Azuri, 18 Hodiya, Hasumu, Bezai, 19 Harifi,* Anatoti, Nebai, 20 Magipiasi, Mesulamu, Heziri, 21 Mesezabele, Zadoki, Jadua, 22 Pelatiya, Hanani, Anaya, 23 Hosea, Hananiya, Hasubu, 24 Halohesi, Piliha, Sobeki, 25 Rehumu, Hasabina, Maaseya, 26 Ahija, Hanani, Anani, 27 Maluki, Harimu a Baana.

28 Lino bantu boonse–nkokuti bapaizi, ba Levi, balindizi bamilyango, baimbi, babelesi baatempele* amuntu uuli woonse wakalyaandaanya kuzwa kuli bamasi kuti atobele Mulawo wa Leza mwini-mwini,+ antoomwe abamakaintu babo, bana babo basankwa abasimbi, nkokuti boonse aabo ibakali aluzyibo akukonzya kumvwa*– 29 bakabasangana banabokwabo, bantu babo ibalaampuwo, akulinjizya mucikonke icakali kukonzya kubapa kusinganizyigwa. Cikonke eeco cakali cakweenda mu Mulawo wa Leza mwini-mwini iwakapegwa kwiinda muli Musa mubelesi wa Leza mwini-mwini, alimwi akutobela cakulomya milawo yoonse, mbeta amalailile aa Jehova Mwami wesu. 30 Tatukakwasyi bana besu kuli bamasi nokuba kubweza bana babo basimbi kuti bakwatwe kubana besu.+

31 Ikuti bantu bamasi baleta zintu alimwi amaila aamisyobo yoonse kuzoosambala mubuzuba bwa Sabata, tatukauli cili coonse kulimbabo mubuzuba bwa Sabata+ naa mubuzuba busalala.+ Alimwi tatukalimi mumwaka waciloba+ alimwi tuyoolekelela zikwelete zyoonse ziliko.+

32 Alimwi twakalibikkila mulawo wakuti umwi aumwi wesu kapa cipaanzi catatu casyekeli* cazintu mwaka amwaka kumulimo waŋanda* ya Leza wesu,+ 33 kuti kazibelesyegwa kupanga zinkwa+ zyakwiilika,* zimwi kazili zyazituuzyo zyamaila+ zyalyoonse, zituuzyo zyuumpwa zyamuma Sabata+ azyaciindi noukkala mwezi,+ alimwi zimwi kazili zyamapobwe aabikkidwe,+ zyazintu zisalala azyazituuzyo zyacibi+ ikumanya milandu yabana Israyeli alimwi akubelesya mumilimo yoonse yaŋanda ya Leza.

34 Alimwi twakauma zisolo zyakupana bulizyi bwakuleta nkuni eezyo bapaizi, ba Levi abantu bambi nzyobakeelede kuleta kuŋanda ya Leza wesu kweelana aziinga zyabamatata, aziindi zibikkidwe mwaka amwaka izyakubelesya acipaililo ca Jehova Leza wesu kweelana ambokulembedwe mu Mulawo.+ 35 Alimwi tuyooleta micelo mitaanzi njotwakalima amicelo mitaanzi yazisamu zyamisyobo yoonse, mwaka amwaka kuŋanda ya Jehova,+ 36 alimwi akuleta bana besu basankwa bataanzi kuzyalwa abana bataanzi babanyama besu bavwubwa+–kweelana ambokulembedwe mu Mulawo–alimwi abana bataanzi baŋombe zyesu abambelele zyesu. Tuyoozileta kuŋanda ya Leza wesu, kubapaizi ibabeleka muŋanda ya Leza wesu.+ 37 Alimwi tuyooleta busu butasetede bwamicelo mitaanzi,+ izyakusanga zyesu, micelo mitaanzi yazisamu zyamisyobo-misyobo,+ waini mupya alimwi amafwuta,+ tuyoozileta kubapaizi kumaanda aakulida aali muŋanda ya Leza wesu,+ antoomwe acipaanzi cakkumi cabutebuzi bwesu kuba Levi,+ nkaambo mbambabo ibatambula zipaanzi zyakkumi muminzi yesu yoonse motulimina.

38 Lino mupaizi, imwana wa Aroni weelede kuba aba Levi ciindi nobatambula cipaanzi cakkumi; mpoonya abalo ba Levi beelede kupa cipaanzi cakkumi kuzwa kucipaanzi cakkumi eeco kuŋanda ya Leza wesu,+ kumaanda aakulida aali muŋanda yakuyobweda zintu. 39 Nkaambo bana Israyeli aba Levi beelede kutola zyakusanga+ zyamaila, waini mupya amafwuta+ kumaanda aakulida, alimwi ooko nkokuli zibelesyo zyatempele, bapaizi babeleka milimo, balindizi bamilyango alimwi abaimbi. Tatukailekelezyi pe ŋanda ya Leza wesu.+

11 Lino basilutwe babantu bakali kukkala mu Jerusalemu;+ pele bantu bambi bakauma zisolo+ kuti basale omwe akati kabantu bali kkumi kuti akkale mu Jerusalemu imunzi uusalala, eelyo bamwi bali fwuka kuti bakkale muminzi iimbi. 2 Eelyo bantu bakabalongezya baalumi boonse ibakalisungula kukkala mu Jerusalemu.

3 Lino aaba mbabasilutwe bazyooko ibakali kukkala mu Jerusalemu. (Bana Israyeli bambi, bapaizi, ba Levi, babelesi baatempele*+ alimwi abana bababelesi ba Solomoni+ bakakkala muminzi iimbi ya Juda umwi aumwi mulukono lwamunzi wakwe.+

4 Amwalo mu Jerusalemu mwakali kukkala bana Juda bamwi abana Benjamini bamwi.) Kuzwa kubana Juda kwakali Ataya mwana wa Uziya mwana wa Zekariya mwana wa Amariya mwana wa Sefatiya mwana wa Mahalaleli umwi wabana ba Perezi,+ 5 a Maaseya mwana wa Baruki mwana wa Kolihoze mwana wa Hazaya mwana wa Adaya mwana wa Joyaribu mwana wa Zekariya mwana wamuna Sela. 6 Bana ba Perezi boonse ibakali kukkala mu Jerusalemu bakali 468, ibaalumi basinguzu.

7 Aaba mbabakali bana Benjamini: Salu+ mwana wa Mesulamu mwana wa Joedi mwana wa Pedaya mwana wa Kolaya mwana wa Maaseya mwana wa Itiyeli mwana wa Jesaya, 8 alimwi kuzwa nguwe kwakali Gabai a Salai, antoomwe bakali 928; 9 alimwi a Joeli mwana wa Zikiri wakali mulangizi wabo, a Juda mwana wa Hasenuwa wakali mulangizi wabili wamunzi.

10 Kuzwa kubapaizi kwakali: Jedaya mwana wa Joyaribu, Jakini,+ 11 Seraya mwana wa Hilikiya mwana wa Mesulamu mwana wa Zadoki mwana wa Merayoti mwana wa Ahitubi,+ imusololi waaŋanda* ya Leza mwini-mwini, 12 abanabokwabo ibakali kubeleka mulimo waŋanda ya Leza, antoomwe bakali 822; alimwi a Adaya mwana wa Jerohamu mwana wa Pelaliya mwana wa Amuzi mwana wa Zekariya mwana wa Pasuri+ mwana wa Malikiya, 13 abanabokwabo, basilutwe baziinga zyabamausyi, antoomwe bakali 242; alimwi a Amasisai mwana wa Azareli mwana wa Ahizai mwana wa Mesilemoti mwana wa Imeri, 14 abanabokwabo ibakali baalumi basinguzu alimwi basicamba, antoomwe bakali 128; mulangizi wabo wakali Zabidiyeli, umwi wamumukwasyi uulaampuwo.

15 Kuzwa kuba Levi kwakali: Semaya+ mwana wa Hasubu mwana wa Azirikamu mwana wa Hasabiya mwana wa Buni, 16 Sebatai+ a Jozabadi,+ bamwi babasilutwe baba Levi ibakali kulanganya mulimo waanze aaŋanda ya Leza mwini-mwini; 17 a Mataniya+ imwana wa Mika mwana wa Zabidi mwana wa Asafu,+ sikwiimbya, ngonguwe wakali kusololela mukwiimba ntembauzyo ciindi cakupaila,+ eelyo Bakibukiya ngowakali wabili kubanabokwabo, alimwi kwakali a Abida mwana wa Samua mwana wa Galali mwana wa Jedutuni.+ 18 Ba Levi boonse ibakali mumunzi uusalala bakali 284.

19 Balindizi bamilyango bakali ba Akubu, Talimoni+ abanabokwabo ibakali kulindilila milyango, antoomwe bakali 172.

20 Bana Israyeli bamwi boonse abapaizi bamwi alimwi aba Levi bamwi bakali muminzi iimbi yoonse ya Juda, umwi aumwi mulukono lwakwe. 21 Babelesi baatempele*+ bakali kukkala mu Ofeli,+ eelyo Ziha a Gisipa mbabakali kulanganya babelesi baatempele.*

22 Mulangizi waba Levi mu Jerusalemu wakali Uzi mwana wa Bani mwana wa Hasabiya mwana wa Mataniya+ mwana wa Mika umwi wabana ba Asafu ibaimbi; ngowakali kulanganya mulimo wamuŋanda ya Leza mwini-mwini. 23 Nkaambo mwami wakapa mulawo kujatikizya baimbi,+ alimwi kwakali bubambe bwakuti mwiimbi umwi aumwi kapegwa caabilo ceelede buzuba abuzuba. 24 Petahiya mwana wa Mesezabele umwi wabana ba Zera mwana wa Juda ngowakali sikulaya mwami* mumakani oonse aajatikizya bantu.

25 Kujatikizya tunzi amyuunda yantuto, bana Juda bamwi bakali kukkala mu Kiriyati-ariba+ aminzi misyoonto yanguwo,* mu Diboni aminzi misyoonto yanguwo, mu Jekabizeeli+ atunzi twanguwo, 26 mu Jeshua, mu Molada,+ mu Beti-peleti,+ 27 mu Hazara-suala,+ mu Beere-seba aminzi misyoonto yanguwo,* 28 mu Zikilaga,+ mu Mekona aminzi misyoonto yanguwo,* 29 mu Eni-rimoni,+ mu Zora,+ mu Jarimuti, 30 mu Zanowa+ amu Adulamu atunzi twanjiyo, mu Lakisi+ anyika yanguwo alimwi amu Azeka+ aminzi misyoonto yanguwo.* Bakakkala* kuzwa ku Beere-seba kusikila ku Kkuti lya Hinomu.+

31 Bana Benjamini bakali mu Geba,+ Mikimasi, Aija, Beteli+ aminzi misyoonto yanguwo,* 32 Anatoti,+ Nobi,+ Ananiya, 33 Hazori, Rama,+ Gitaimu, 34 Hadidi, Zeboimu, Nebalati, 35 Lodi a Ono,+ kkuti lyabasyaazibwene mukupanga zintu. 36 Mpoonya nkamu zimwi zyaba Levi kuzwa ku Juda zyakatumwa ku Benjamini.

12 Aaba mbabapaizi aba Levi ibakazwa mubuzike a Zerubabeli+ mwana wa Sealitiyeli+ a Jeshua:+ Seraya, Jeremiya, Ezara, 2 Amariya, Maluki, Hatusi, 3 Sekaniya, Rehumu, Meremoti, 4 Ido, Ginetoi, Abija, 5 Mijamini, Maadiya, Biliga, 6 Semaya, Joyaribu, Jedaya, 7 Salu,* Amoki, Hilikiya a Jedaya. Aaba mbabakali basilutwe babapaizi abanabokwabo mumazuba aa Jeshua.

8 Ba Levi mbaaba: Jeshua, Binui, Kadimiyeli,+ Serebiya, Juda a Mataniya,+ walo abanabokwabo mbabakali kulanganya baabo ibakali kwiimba nyimbo zyakulumba Leza. 9 Alimwi banabokwabo, Bakibukiya a Uni, bakalilangene ambabo nobakali kubeleka milimo yabo yabulindizi.* 10 Jeshua wakazyala Joyakimu, Joyakimu wakazyala Eliyasibu+ awalo Eliyasibu wakazyala Joyada.+ 11 Eelyo Joyada wakazyala Jonatani awalo Jonatani wakazyala Jadua.

12 Kumazuba aa Joyakimu, aaba mbabakali bapaizi, basilutwe baziinga zyabamausyi: muciinga ca Seraya,+ Meraya; muciinga ca Jeremiya, Hananiya; 13 muciinga ca Ezara,+ Mesulamu; muciinga ca Amariya, Jehohanana; 14 muciinga ca Maluki, Jonatani; muciinga ca Sebaniya, Josefa; 15 muciinga ca Harimu,+ Adina; muciinga ca Merayoti, Helikai; 16 muciinga ca Ido, Zekariya; muciinga ca Ginetoni, Mesulamu; 17 muciinga ca Abija,+ Zikiri; muciinga ca Minjamini,...;* muciinga ca Moadiya, Pilitai; 18 muciinga ca Biliga,+ Samua; muciinga ca Semaya, Jehonatani; 19 muciinga ca Joyaribu, Matenai; muciinga ca Jedaya,+ Uzi; 20 muciinga ca Salai, Kalai; muciinga ca Amoki, Eberi; 21 muciinga ca Hilikiya, Hasabiya; muciinga ca Jedaya, Netaneli.

22 Basilutwe baziinga zyabamausyi baba Levi mumazuba aa Eliyasibu ibakalembwa bakali ba Joyada, Johanani a Jadua,+ mbubonya mbuli bapaizi kusikila kubwami bwa Dariyo muna Persia.

23 Bana ba Levi ibakali basilutwe baziinga zyabamausyi bakali kulembwa mubbuku lyazintu zyakali kucitika kuciindi eeco, mane kusikila kumazuba aa Johanani mwana wa Eliyasibu. 24 Basilutwe baba Levi bakali ba Hasabiya, Serebiya, Jeshua+ mwana wa Kadimiyeli+ abanabokwabo mbobakalangene limwi mukutembaula akwiimba nyimbo zyakulumba Leza kweelana amalailile aa Davida+ muntu wa Leza mwini-mwini, nkamu yabalindizi yakalilangene ankamu yabalindizi iimbi. 25 Mataniya,+ Bakibukiya, Obadiya, Mesulamu, Talimoni a Akubu+ bakali kulindilila kabali balindizi bamilyango,+ kabalindilila ziyobwedo zyakumilyango yatempele. 26 Aaba bakabeleka mumazuba aa Joyakimu mwana wa Jeshua+ mwana wa Jozadaki amumazuba aa Nehemiya mweendelezi alimwi a Ezara+ mupaizi, sikukkopolola.*

27 Kuciindi cakwaabwa kwabwaanda bwa Jerusalemu, bakayandaula ba Levi, eelyo bakabaleta ku Jerusalemu kuzwa mumasena aabo oonse nkobakali kukkala ikutegwa bazoocite pobwe lyakwaaba bwaanda cakusekelela, akwiimba nyimbo zyakulumba+ kubelesya miyuwa, tuntimbwa azibelesyo zimbi zyakwiimbya. 28 Mpoonya bana babaimbi* bakabungana antoomwe kuzwa mucooko,* kuzwa mumasena aazingulukide Jerusalemu, mutunzi twabana Netofati,+ 29 kuzwa ku Beti-giligala+ akumyuunda ya Geba+ a Azimaveti,+ nkaambo baimbi bakayakide tunzi kuzinguluka Jerusalemu yoonse. 30 Kumane bapaizi aba Levi bakalisalazya, alimwi bakasalazya bantu,+ milyango+ abwaanda.+

31 Mpoonya ndakaleta basilutwe baba Juda atala aabwaanda. Kuyungizya waawo, ndakabikka nkamu zyobilo zipati zyabasikwiimba nyimbo zyakulumba Leza alimwi amakamu aabasikubatobela, eelyo nkamu imwi yakali kweenda atala aabwaanda kulubazu lwakululyo kugama ku Mulyango wa Milwi ya Mulota.+ 32 Hosaya acisela cabasilutwe baba Juda bakali kweenda musyule lyabo, 33 antoomwe a Azariya, Ezara, Mesulamu, 34 Juda, Benjamini, Semaya a Jeremiya. 35 Antoomwe ambabo kwakali bana babapaizi bamwi ibakajisi myeembo:+ Zekariya mwana wa Jonatani mwana wa Semaya mwana wa Mataniya mwana wa Mikaya mwana wa Zakuri mwana wa Asafu,+ 36 abanabokwabo ba Semaya, Azareli, Milalai, Gilalai, Maai, Netaneli, Juda a Hanani, kabajisi zibelesyo zyakwiimbya zya Davida+ muntu wa Leza mwini-mwini; eelyo Ezara+ sikukkopolola* ngowakali kubasololela. 37 Nobakasika ku Mulyango wa Kasensa+ bakeenda mane bainda aa Matantilo+ aa Munzi wa Davida+ kabatanta bwaanda bwiinda atala aa Ŋanda ya Davida, kumane bakagama kujwe ku Mulyango wa Maanzi.+

38 Nkamu iimbi yabasikwiimba nyimbo zyakulumba Leza yakali kweendela kulubazu lumbi,* eelyo mebo ndakaitobela musyule antoomwe acisela cabantu, bakainda atala aabwaanda akwiinda Ngazi ya Zitofwu+ alimwi a Bwaanda Bupati,+ 39 akwiinda Mulyango wa Efraimu+ akugama ku Mulyango wa Munzi wa Kaindi+ mane kuyoosika ku Mulyango wa Nswi+ aku Ngazi ya Hananeli+ a Ngazi ya Mea akuzumanana mane kuyoosika ku Mulyango wa Mbelele;+ mpoonya bakaima a Mulyango wa Balindizi.

40 Mukuya kwaciindi nkamu zyobilo zyabasikwiimba nyimbo zyakulumba Leza zyakasika akwiima kuŋanda ya Leza mwini-mwini; alimwi andime antoomwe acisela cabaleli babili twakasika, 41 alimwi abapaizi ba: Eliyakimu, Maaseya, Minjamini,* Mikaya, Eliunai, Zekariya a Hananiya kabajisi myeembo, 42 alimwi a Maaseya, Semaya, Eleazara, Uzi, Jehohanana, Malikiya, Elamu a Ezeri. Lino baimbi ibakali kulanganizyigwa a Izirahiya bakaimbisya kapati.

43 Mubuzuba oobo bakatuula zipaizyo zinji akusekelela,+ nkaambo Leza mwini-mwini wakabapa kusekelela alukondo lupati. Abalo bamakaintu abana bakasekelela+ cakuti kusekelela ooku ikwakali mu Jerusalemu kwakamvwigwa akumasena aali kule kapati.+

44 Mubuzuba oobo kwakasalwa baalumi kuti balanganye ziyobwedo+ imwakali kubikkwa zyakusanga,+ micelo mitaanzi+ azipaanzi zyakkumi.+ Mulinzizyo bakeelede kubikka zyaabilo nzyobakali kuyobolola kuzwa mumyuunda yamuminzi izyakeelede kupegwa kubapaizi aba Levi+ kweelana a Mulawo,+ nkaambo kwakaba kusekelela mu Juda akaambo kabapaizi aba Levi ibakali kubeleka. 45 Alimwi bakatalika kuzuzikizya mikuli yabo kuli Leza amikuli yabo yakusalazya, abalo baimbi abalindizi bakacita oobo kweelana amalailile aa Davida a Solomoni mwanaakwe. 46 Nkaambo kalekale mumazuba aa Davida a Asafu kwakali beendelezi* babaimbi alimwi abanyimbo zyakutembaula akulumba Leza.+ 47 Lino mumazuba aa Zerubabeli+ amumazuba aa Nehemiya bana Israyeli boonse bakali kupa zyaabilo zyabaimbi+ azyabalindizi bamilyango+ kweelana azyakali kuyandika abuzuba. Alimwi bakali kuzyaaba kuba Levi,+ eelyo ba Levi bakali kuzyaaba kuli balunyungu lwa Aroni.

13 Mubuzuba oobo bbuku lya Musa lyakabalwa kubantu,+ eelyo kwakajanwa aakalembedwe kuti, kunyina muna Amoni naa muna Moabu+ iwakeelede kuboola mumbungano ya Leza mwini-mwini,+ 2 nkaambo tiibakapa bana Israyeli cakulya amaanzi, pele bakabbadela Balamu kuti abasinganye.+ Nokuba boobo, Leza wesu wakasandula kusinganya ooku kuti kube cilongezyo.+ 3 Mbobakamvwida buyo Mulawo ooyo, bakatalika kwaandaanya bamasi*+ boonse kuzwa mu Israyeli.

4 Lino kacitanacitika eeci, mupaizi iwakali kulanganya maanda aakulida aamuŋanda* ya Leza wesu+ wakali Eliyasibu+ musazinyina a Tobiya.+ 5 Wakamuyakila ŋanda yakulida mpati, ooko kaindi nkobakali kubikka zituuzyo zyamaila, tununkilizyo, zibelesyo azipaanzi zyakkumi zyamaila, zyawaini mupya azyamafwuta+ eezyo izyakali zyaba Levi,+ baimbi abalindizi bamilyango alimwi azyakusanga izyabapaizi.+

6 Ciindi coonse eeci tiindakali mu Jerusalemu, nkaambo ndakaunkide kumwami mumwaka wa 32 + wabulelo bwa Mwami Aritasasita+ wa Babuloni; eelyo mukuya kwaciindi ndakalomba mwami kuti ndipiluke. 7 Mpoonya ndakapiluka ku Jerusalemu akubona cintu cibi Eliyasibu+ ncaakacitila Tobiya,+ kwiinda mukumupa ŋanda mulubuwa lwaŋanda ya Leza mwini-mwini. 8 Eeci cakandicima kapati, aboobo ndakasowa zintu zyoonse zyamuŋanda ya Tobiya kuzwa muŋanda yakulida. 9 Kumane ndakapa malailile, eelyo bakaasalazya maanda aakulida; mpoonya ndakapilusya zibelesyo zyamuŋanda ya Leza mwini-mwini+ antoomwe acituuzyo camaila atununkilizyo.+

10 Alimwi ndakajana kuti zyaabilo zyaba Levi+ tiizyakapegwa kulimbabo,+ aboobo ba Levi abaimbi ibakali kubeleka mulimo bakaunka, umwi aumwi kumuunda wakwe.+ 11 Aboobo ndakabanyemena baleli babili+ akubabuzya kuti: “Ino nkaambo nzi ŋanda ya Leza mwini-mwini ncoyalekelezyegwa?”+ Mpoonya ndakababunganya antoomwe ba Levi akubapilusya mumasena aabo. 12 Aboobo ba Juda boonse bakaleta cipaanzi cakkumi+ camaila, cawaini mupya alimwi acamafwuta kuziyobwedo.+ 13 Mpoonya ndakabikka Selemiya mupaizi, Zadoki sikukkopolola,* Pedaya umwi waba Levi kuti kabalanganya ziyobwedo, alimwi Hanani mwana wa Zakuri mwana wa Mataniya wakali sikubagwasyilizya, nkaambo baalumi aaba bakali kubonwa kuti balasyomeka. Wakali mukuli wabo kupa zyaabilo kubanabokwabo.

14 Kondiyeeya,+ O Leza wangu mumakani aaya, alimwi utalubi milimo yangu yaluyando lutamani njindacitila ŋanda ya Leza wangu alimwi amilimo yanjiyo.*+

15 Mumazuba aayo ndakabona bantu mu Juda kabalyatauka misaansa mubuzuba bwa Sabata,+ kabaleta milwi yamaila akwiibikka ambongolo, alimwi kabaleta awaini, misaansa, nkuyu amikuli yamisyobo-misyobo mu Jerusalemu mubuzuba bwa Sabata.+ Aboobo ndakabacenjezya kuti tabeelede kusambala zintu mubuzuba oobu.* 16 Alimwi bana Turo ibakali kukkala mumunzi bakali kuleta nswi amakwebo aamisyobo-misyobo akusambala kubantu bamu Juda amu Jerusalemu mubuzuba bwa Sabata.+ 17 Aboobo ndakabanyemena bantu balemekwa bamu Juda akubaambila kuti: “Ino ncintu nzi eeci cibi ncomucita, icakusofwaazya nobuba buzuba bwa Sabata? 18 Sena oobu tabuli mbubo mbobakacita bamauso, cakuti Leza wesu wakaleta mapenzi oonse aaya alindiswe alimwi aamunzi ooyu? Lino muyungizya bukali buyaka mbuli mulilo kubana Israyeli kwiinda mukusofwaazya Sabata.”+

19 Aboobo mbokwakatalika buyo kusiya kumilyango yamu Jerusalemu buzuba bwa Sabata kabutanatalika, ndakalailila kuti milyango yoonse ijalwe. Alimwi ndakalailila kuti tabeelede kwiijalula kusikila bwiinde buzuba bwa Sabata, alimwi ndakabikka babelesi bangu bamwi kumilyango kutegwa babone kuti taakwe mikuli iiletwa mubuzuba bwa Sabata. 20 Aboobo basambazi abasimakwebo bazintu zyamisyobo-misyobo bakabucesya anze aa Jerusalemu ciindi comwe naa zyobilo. 21 Mpoonya ndakabacenjezya akubaambila kuti: “Ino nkaambo nzi ncomubucesya kumbele lyabwaanda? Ikuti mukaciinduluke alimwi, ndiyoomutanda.” Kuzwa ciindi eeco tiibakaboola kabili mubuzuba bwa Sabata.

22 Mpoonya ndakaambila ba Levi kuti beelede kulisalazya lyoonse akuboola kuti kabalindilila milyango kutegwa basalazye buzuba bwa Sabata.+ Akaambo kamakani aaya, kondiyeeya O Leza wangu akundifwida luzyalo kweelana aluyando lwako lupati lutamani.+

23 Alimwi mumazuba aayo ndakabona aba Juda ibakakwete bamakaintu*+ bana Asidodi,+ bana Amoni abana Moabu.+ 24 Cisela cabana babo bakali kwaambaula mwaambo wabana Asidodi alimwi amyaambo yabantu baindene-indene, pele kunyina naba omwe akati kabo iwakali kukonzya kwaambaula mwaambo waci Juda. 25 Aboobo ndakabanyemena akubasinganya alimwi bamwi babo ndakabauma+ akubajwa masusu akubapa kukonka kuli Leza, ndakati: “Tamweelede kukwasya bana banu basimbi kubana babo basankwa alimwi tamweelede kukwata bana babo basimbi nokuba kuzumizya bana banu basankwa kukwata bana babo.+ 26 Sena taali makwata-kwata aakapa kuti Mwami Solomoni wa Israyeli abisye? Akati kamasi manji kwakanyina mwami wakali mbuli nguwe;+ alimwi wakali kuyandwa kuli Leza wakwe,+ aboobo Leza wakamubikka kuba mwami wabana Israyeli boonse. Pele naba nguwe, bamakaintu beenzu bakamupa kubisya.+ 27 Sena tacitondwi kulindinywe kucita cibi cipati boobu, kucita cakutasyomeka kuli Leza wesu kwiinda mukukwata bamakaintu beenzu?”+

28 Lino umwi wabana ba Joyada+ mwana wa Eliyasibu+ mupaizi mupati wakaba mukwe wa Sanibalati+ muna Horoni. Aboobo ndakamutanda kuzwa kulindime.

29 Kobayeeya, O Leza wangu, nkaambo basofwaazya bupaizi acizuminano cabupaizi+ alimwi acaba Levi.+

30 Alimwi ndakabasalazya kubusofwaazi bwabamasi buli boonse, alimwi ndakapa milimo kubapaizi aba Levi, umwi aumwi kumulimo wakwe uumugeme,+ 31 ndakabikka bubambe bwakuleta nkuni+ muziindi zibikkidwe alimwi amicelo mitaanzi.

Kondiyeeya O Leza wangu,+ undicitile zibotu.*