Ndakali Sikalumamba wa SS Kumane Ndakaba Mubelesi wa Leza Wakasimpe
AKALUULWA ABA GOTTLIEB BERNHARDT
Ndakali sikalumamba wa SS mu Germany, kakamu kakali kugatela Hitler ku Wewelsburg Castle. Mu April 1945, ndakapegwa mulawo wakuti ndibajaye basintolongo bakali mucilabba cakupenzezya cakali afwaafwi. Bakali Bakamboni ba Jehova. Basikalumamba ba SS bakali kuyanda kuti bantu kababamvwida beendelezi lyoonse. Ndakabula cakucita akaambo kakuti ndakalizyi kuti kujaya nkubi. Amuleke ndimwaambile cakapa kuti nditaciti boobo.
N DAKAZYALWA mu 1922 mumunzi uuli afwaafwi a Mulonga wa Rhine mucisi ca Germany. Nokuba kuti bantu banji bakubusena oobu bakali Bakatolika, mukwasyi wesu wakali kunjila cikombelo ca Piety, icakatalisyigwa mumwaanda wamyaka wa 17. Mu 1933, nindakali amyaka iili 11, Hitler wakatalika kulela mu Germany. Nikwakainda myaka misyoonto, akaambo kakuti ndakali musongo kucikolo alimwi ndakali kucita kabotu muzisobano, ndakasalwa kuya kucikolo icili kufwaafwi adolopo lya Malbork, ilyakali kwiitwa kuti Marienburg, mucisi ca Poland. Nindakali kucikolo eeci icakali kulamfwu kapati akuŋanda, ndakatalika kwiiya makani aajatikizya Mfwulumende Iidyaaminina, nkokuti makani aakali kujatikizya mfulumende ya Nazi. Basicikolo bakali kuyiisyigwa zyintu mbuli bulemu, bunkutwe, kusyomeka, kumvwida, busungu, alimwi akutulemeka kapati tunsiyansiya twamucisi ca Germany.
Nkondo Yanyika Yabili Abasikalumamba ba SS
Nkondo yanyika yabili noyakatalika mu 1939, ndakalilembya kuba sikalumamba wa SS wa Adolf Hitler ku Leibstandarte, kakamu ikakali kweendelezyegwa a Hitler lwakwe. Basikalumamba bakakamu aaka bakali kugatela bapati-pati bamfwulumende alimwi zimwi ziindi bakali kubelesyegwa munkondo. Ndakalibonena nkondo izyakali kucitika ku Belgium, France, Netherlands, Romania, Bulgaria aku Greece. Nindakali kucisi ca Bulgaria, ndakaakujanika kumuswaangano wacikombelo iwakali kweendelezyegwa amupaizi iwakali kubeleka mulimo wabusikalumamba. Ndakalibuzya kuti, ‘Sena basinkondo besu abalo balijisi miswaangano mbuli yooyu? Sena Leza ulazumizya kulwana? Sena kuli lubazu nkwalemenena?’
Mpoonya ndakasalwa kuunka ku Junkerschule, icikolo cakabambilidwe kuyiisya basankwa ibakeelede kusumpulwa mumulimo wabusikalumamba. Kumane ndakatalika kubeleka ankamu yakali kugatela maofesi mapati aamfwulumende aakali mudolopo lya Berlin, ooko nkondakabona Hitler kanyemena mulembi mupati wamfwulumende akati kabantu. Ndakabona kuti eeci ‘cakali kusampuzya,’ nokuba kuti tiindakaamba oobo cakupozya!
Ku Berlin, ndakazyibana a Inge, awalo wakali kubelekela kumaofesi mapati. Nitwakali kuyanda kukwatana, kakamu kesu kakatolwa andeke kunkondo yakali kucisi ca Russia nokuba kuti tiitwakalibambilide alimwi tiitwakanyamunizya zisani zyampeyo! Twakalamwa kapati akaambo kakuti kwakali mpeyo iitaambiki mu 1941/1942. Kandili ku Russia, ndakapegwa mendulo yabili yaciingano calubulo. Nokwakainda ciindi, bakandijosya kucisi ca Germany andeke akaambo kakuti ndakalicisa kapati. Twakakwatana a Inge mu 1943.
Kumane ndakatumwa kuyoobelekela kumaofesi mapati aa Hitler aakali ku Obersalzberg kumalundu aaku Bavaria. Ndakaakujana ba Heinrich Himmler, ibapati babasikalumamba ba SS. Bakacita bubambe bwakuti ba Felix Kersten, badokotela babo, kabandoolola akundisilika. Mukuya kwaciindi, ndakazyoozyiba kuti ba Kersten bakajisi mpulazi iitwa kuti Hartzwalde, iyakali kufwaafwi adolopo lya Berlin. Kaiyanda kumana nkondo, ba Kersten bakabalomba ba Himmler kuti Bakamboni ba Jehova ibakali mucilabba cakupenzezya icakali afwaafwi kababelekela mumpulazi yabo. Ba Himmler bakazumina, alimwi ba Kersten bakali kubabelesya kabotu Bakamboni. Kamboni umwi iwakali kubelekela ba Kersten kucisi ca Sweden lyoonse wakali kubatumina Ngazi Yamulindizi Bakamboni baku Germany kwiinda mukwiibikka mucibbeeke caba Kersten.a
Mbondakaba Umwi wa Bakamboni ba Jehova
Kumamanino kwamwaka wa 1944, ba Himmler bakandibikka kuba sikugwasyilizya mupati wabasikalumamba ba SS iwakali kulanganya Wewelsburg Castle, iŋanda-yakaindi yakayakwa myaka iili 400 yainda iyakali afwaafwi adolopo lya Paderborn. Ba Himmler bakali amakanze aakutalisya cikolo calwiiyo lujatikizya nkamu ya SS mu Wewelsburg. Afwaafwi aŋanda eeyi kwakali cilabba cisyoonto cakupenzyezya icakali kwiitwa kuti Niederhagen, ikwakali kukkala basintolongo baindene abamwi—Bakamboni ba Jehova, ibakali kwiitwa kuti Basikwiiya Bbaibbele.
Sintolongo wiitwa kuti Ernst Specht wakali kundiswaya ziindi zinji kuzoondisilika zilonda. Lyoonse wakali kundaanzya kuti, “Mwabuka buti, Omunene.”
Ndakamubuzya kuti, “Ino nkaambo nzi ncotaambili kuti ‘Aatembaulwe Hitler!’?”
Cabupampu wakandivwiila kuti, “Sena wakakomenena mumukwasyi wa Banakristo?”
Ndakamuvwiila kuti, “Inzya ndakakomenena mumukwasyi wakali kunjila cikombelo ca Piety.”
Wakazumanana kwaamba kuti, “uyakuzyiba kuti Ibbaibbele lisyomezya lufwutuko (heil) kwiinda mumuntu omwe, Jesu Kristo. Nkakaambo kaako tandikonzyi kwaamba kuti ‘Aatembaulwe Hitler!’’’
Kandilamwidwe ndakamubuzya kuti, “Ino ncinzi cakapa kuti uboole kokuno?”
Wakavwiila kuti, “Ndili Sikwiiya Bbaibbele.”
Makani ngotwakali kubandika a Ernst alimwi a Kamboni umwi wiitwa kuti Erich Nikolaizig, iwakali kubeleka mulimo wakubamba masusu, akandinjila mumoyo. Nokuba boobo, kubandika makani abukombi abasintolongo tiicakali kuzumizyigwa, aboobo mupati wabasikalumamba iwakali kutweendelezya wakandaambila kuti ndicileke. Pele ndakabona kuti ikuti naa bantu boonse bamu Germany—icisi ciitwa kuti nca Banakristo alimwi icijisi bakombi banji—nibali kulilemeka mbuli Bakamboni, nokutakwe nkondo. Ndakalizyi kuti Bakamboni ba Jehova, ‘beelede kulumbaizyigwa buya, ikutali kupenzyegwa.’
Muciindi eeco, mukamufwu umwi wakapengede mumizeezo akaambo kakuciswa kwamwanaakwe musankwa, wakatuma luwaile akulomba mootokala kutegwa mwanaakwe atolwe kucibbadela nkaambo wakeelede kwaandulwa. Ndakalailila sikweenzya mootokala kuti akabagwasye, pele mupati wabasikalumamba wakali kutweendelezya wakamukasya. Ino wakamukasyila nzi? Mulumaakwe wakajaigwa nkaambo wakali mukabunga kakali kuyanda kujaya Hitler mu July 1944. Uulya mwana wakafwa alimwi taaku ncendakali kukonzya kucita. Asunu cilandikatazya mumizeezo ndayeeya cakacitika.
Nokuba kuti ndakali amyaka iyiinda asyoonto a 20, ndakatalika kubona buumi mbuli mbobubede ncobeni—kutali mbuli mbobakali kububona ba Nazi. Alimwi ndakazumanana kubakkomanina Bakamboni ba Jehova azyintu nzyobakali kuyiisya. Eeci cakapa kuti ndipange cakusala cipati mubuumi bwangu.
Mu April 1945, basinkondo besu bakali afwaafwi, sikalumamba mupati iwakali kutweendelezya wakacija ku Wewelsburg. Mpoonya kwakasika basikalumamba ibakapegwa mulawo kuzwa kuli ba Himmler iwakali kwaamba kuti iŋanda ya Wewelsburg inyonyoonwe akuti basintolongo bajaigwe. Sikalumamba mupati wacilabba cakupenzyezya cakali afwaafwi wakandipa mulongo wamazyina aabasintolongo bakeelede kujaigwa—boonse bakali Bakamboni ba Jehova. Ino nkaambo nzi ncobakeelede kujayigwa? Nkaambo kakuti bantu bakali kwaamba kuti bakalizyi aakasisidwe zyakuzekaula zyakasaalwa a Bulelo Bwatatu bwa Germany. Nokuba kuti bakalizyi oobo, nobatakaayubununa maseseke aaya! Aboobo ino ncinzi ncondakeelede kucita kujatikizya mulawo wakujaya basintolongo?
Ndakaunka kumupati wankambe yabasikalumamba akumwaambila kuti: “Basikalumamba bana America bali munzila. Sena inga tacili camaano kuti nywebo abantu benu mucije?” Taaku naakawayawaya pe! Mpoonya nobakaunka ndakacita cintu citayeeyelwi kucitwa asikalumamba wa SS— tiindakautobela mulawo ngondakapegwa, aboobo Bakamboni tiibakajayigwa.
Coolwe Cipati Cakwiitwa Kuti Mukwesu
Niyakamana nkondo, Inge andime twakabonana a Bakamboni ba Jehova akutalika kwiiya Bbaibbele cakusinizya. Kamboni mukaintu wiitwa kuti Auguste abamwi, bakatugwasya. Izilonda zyangu zyakunkondo alimwi amapenzi aakaliko niyakamana nkondo zyakapa kuti buumi butuyumine. Nokuba boobo, mebo abakaintu bangu twakalyaaba kuli Jehova akubbapatizyigwa—Mebo mu 1948, Inge mu 1949.
Mumyaka yakuma 1950, Bakamboni bali mbobabede ibakaangidwe ku Wewelsburg bakajokela kutegwa bakabonane abeenzinyina. Akati kabo kwakali Ernst Specht, Erich Nikolaizig alimwi a Max Hollweg, sintolongo uusyomeka. Ndilikkomene kuti mazuba aano ndiitwa kuti mukwesu, akaambo kakuti ibaalumi aaba basicamba bakabikka buumi bwabo muntenda kutegwa bandikambaukile. Ba Martha Niemann ibakali kubeleka mulimo wabulembi ku Wewelsburg abalo bakaboola kuti babonane abeenzyinyina. Abalo bakakkomana abukkale bwa Bakamboni ba Jehova, aboobo bakaba babelesi ba Jehova balyaabide.
Ndayeeya zyintu zyakali kucitika myaka yainda, ndibona bumboni bunji butondezya kuti “nyika yoonse ili mumaanza aamubi [Saatani Diabolosi]”—nokuba kuti tiindakali kukamvwisya kaambo aaka nindakacili mukubusi. (1 Johane 5:19, NW) Alimwi ndalubona lwiindano luliko akati kakubelekela mfwulumende zyabantu zidyaaminina, mbuli mfwulumende ya Hitler, akubelekela Jehova. Imfwulumende zyabantu zisinikizya bantu kuti kababamvwida, kakuli Jehova uyanda kuti tumubelekele akaambo kaluyando luyeeme aluzyibo lwini-lwini lwabube bwakwe alimwi amakanze aakwe aali mu Bbaibbele. (Luka 10:27; Johane 17:3) Inzya, ndiyakubelekela Jehova mubuumi bwangu boonse.
Bupanduluzi buyungizidwe
a Amubone Ngazi Yamulindizi ya July 1, 1972, peeji 399.
[Cifwanikiso icili apeeji 29]
Cifwoto ncotwakabweza ciindi cabwiinga bwesu mu February 1943
[Cifwanikiso icili apeeji 29]
Iŋanda ya Wewelsburg Castle yakali kuzooba cikolo calwiiyo lujatikizya nkamu ya SS
[Cifwanikiso icili apeeji 30]
Amukaintu wangu Inge mazuba aano