Ncolyaamba Bbaibbele
Sena Koonana Kwabantu Bajisi Zizo Zikozyenye Kuli Nokuzumizyigwa?
MICITO yakoonana kwabantu bajisi zizo zikozyenye yazumanana kuzuminwa mumasi manji. Kabunga kamucikombelo cimwi caku United States kaamba kuti ncolyaamba Bbaibbele kujatikizya koonana kwabantu bajisi zizo zikozyenye ceelede kupandululwa alimwi munzila iimbi kweelana “abusongo bwamazuba aano.” Mufundisi wacikombelo cimwi ku Brazil, iwakakwata mwaaluminyina caino-ino, awalo wakakulwaizya “kulanga-langa ncolyaamba Bbaibbele munzila iimbi,” kutegwa kube kweendelana ambobazilanga zyintu mucikombelo cakwe.
Kulubazu lumwi, bantu aabo batayandi micito yakoonana kuliboobu kutaluzi baambwa kuti mbaasilusalululo. Ino Bbaibbele lyaamba nzi kujatikizya makani aakoonana kuliboobu?
Ncinzi Bbaibbele Ncolyaamba?
Ibbaibbele talikulwaizyi kusalulula bantu. Nokuba boobo, ncolyaamba kujatikizya micito yakoonana kwabaalumi naa bamakaintu balikke-likke cilasalala.
“Utaoni amwaaluminyoko mbubonya mbuli koona amwanakazi; malweza.”—Levitiko 18:22.
Kacili cibeela ca Mulawo wa Musa, mulawo ooyu wakali umwi wamilawo yakulilemeka minji yakapedwe kucisi cabana Israyeli kubagama. Nokuba boobo, ciindi mulawo nowaamba kuti: “Malweza,” utondezya Leza mbwakubona koonana kuliboobu, babe ba Juda naa batali ba Juda. Bantu bamuzisi zyakazingulukide Israyeli bakali kucita micito yakoonana kwabantu bajisi zizo zikozyenye, koonana mubusazinyina, bumambi, alimwi amicito imwi yakakasyidwe a Mulawo. Aboobo, bantu bamuzisi eezyi Leza wakali kubabona kuti bakalisofweede. (Levitiko 18:24, 25) Sena ncolyaamba Bbaibbele cakacinca muciindi ca Banakristo? Amubone lugwalo lutobela:
“Leza ncaakabalekela kutobela zisusi zyakoonana zyuusya nsoni, nkaambo bamakaintu akati kabo bakaleka bukkale mbobakazyalwa abwalo bwakoonana abaalumi akutobela zitondwa kwiinda mukoonana mulicabo; alimwi abalo baalumi mbubonya bakaleka koonana abamakaintu pele bakatalika kupya azisusi zyakoonana akati kabo beni, baalumi bakatalika koonana abaaluminyina, kabacita zisapi zisesemya.”—Baloma 1:26, 27.
Nkaambo nzi Bbaibbele ncolyaamba kuti micito yakoonana kuliboobu mbukkale mbobatakazyalwa abwalo bantu alimwi bulasesemya? Nkaambo ijatikizya koonana kuteendelani amakanze aa Mulengi wesu. Micito eeyi tiikonzyi kupa bantu kuzyala bana. Ibbaibbele likozyanisya micito eeyi akoonana kwabangelo bakazanga abanakazi kalitanasika zambangulwe lyamuciindi ca Nowa, bangelo aaba bakazooitwa kuti madaimona. (Matalikilo 6:4; 19:4, 5; Juda 6, 7) Leza ubona micito eeyi yoonse yobilo kuti mbukkale mbobatakazyalwa abwalo.
Sena Kuli Twaambo Tulimvwisya Tuzumizya Koonana Kwabantu Bajisi Zizo Zikozyenye?
Bamwi balakonzya kulibuzya kuti, ‘Sena bupange bwesu, zilengwa zyabantu batuzingulukide, naa zyintu zibi zyakatucitikila, mbuli koonwa kamucili baniini, zizumizya muntu kucita micito yakoonana kuliboobu?’ Peepe. Amubone cikozyanyo eeci: Muntu ulakonzya kajisi tumpenda basayaansi ntobaamba kuti ntwakuzyalwa aantuto kujatikizya kuciindizya kunywa bukoko, naa wakakomenena mumukwasyi mwalo kuciindizya kunywa mocakali cilengwa. Masimpe ngakuti, bantu bamwi balakonzya kumufwida lubomba muntu uuli mubukkale buli boobu. Nokuba boobo, eeci tacimukulwaizyi kuzumanana kuciindizya kunywa bukoko naa kuleka kusoleka kuti aleke kuciindizya kunywa bukoko akaambo buyo kakuti wakazyalwa akampenda naa mubukkale buli boobu.
Mbubwenya buyo, alyalo Bbaibbele nokuba kuti talibasulaiki aabo balwana tumpenda twakoonana kutaluzi, talibakulwaizi pe kuti kabacita micito iiliboobu, kufwumbwa naa mbobakazyalwa naa mbobakakomezyegwa. (Baloma 7:21-25; 1 Bakolinto 9:27) Muciindi caboobo, Ibbaibbele lilapa lugwasyo kubantu bayanda kuleka micito yakoonana kwabantu bajisi zizo zikozyenye.
Ncinzi Leza Ncayanda Kujatikizya Bantu Bajisi Mizeezo Yakoonana Abamaaluminyina naa Abamakaintunyina?
Ibbaibbele litusyomezya kuti kuyanda kwa Leza nkwakuti “bantu boonse bafwutulwe akuba aluzyibo lwini-lwini lwakasimpe.” (1 Timoteyo 2:4) Nokuba kuti Bbaibbele talizumizyi micito yakoonana kwabantu bajisi zizo zikozyenye, talikulwaizyi kusulaika baabo baicita.
Mbwakubona Leza koonana kwabantu bajisi zizo zikozyenye takukonzyi kuubaubizyigwa. Lugwalo lwa 1 Bakolinto 6:9, 10 lwaamba kuti “baalumi boona baaluminyina” balibikkilizyidwe ali baabo “batakabukoni Bwami bwa Leza.” Pele kapango 11 kalakkazyika moyo nokaamba kuti: “Lino oobo mbobakabede bamwi. Pele mwakasanzyigwa, mwakasalazyigwa, akwaambwa kuti muli balulami muzyina lya Mwami wesu Jesu Kilisito amumuuya wa Leza wesu.”
Masimpe, aabo bakajisi luyandisisyo lwa kukomba Leza kweelana ambwayanda, bakatambulwa amaanza obilo mumbungano ya Banakristo yakusaanguna. Mbubwenya buyo amazuba aano mbocibede kubantu boonse bayanda kukkomaninwa a Leza kwiinda mukupona kweelana ancolyaamba Bbaibbele kutali kuyanda kulipandulula kweelana ambobayanda balo.
SENA KULI NOMWAKALIBUZYIDE KUTI?
● Ncinzi Bbaibbele ncolyaamba kujatikizya koonana kwabantu bajisi zizo zikozyenye?—Baloma 1:26, 27.
● Sena Bbaibbele lilabasalulula bantu bajisi mizeezo yakoonana abamaaluminyina naa abamakaintunyina?—1 Timoteyo 2:4.
● Sena cilakonzyeka kutantamuka micito yakoonana iitaluzi?—1 Bakolinto 6:9-11.
[Cifwanikiso icili apeeji 29]
Sena mbwakubona Leza koonana kwabantu bajisi zizo zikozyenye kweelede kupandululwa alimwi munzila iimbi?