ZICITIKA MUNYIKA

Gulf of Mexico

Niyakacitika ntenda yakutika kwamafwuta mu April 2010, mungwimba munji alimwi agaasi zyakakali kutika mulwizi kwamyezi iitandila kuli yotatwe. Kabunga kabasikuvwuntauzya kakajana kuti nokwakainda myezi yobilo acisela kuzwa noyakacitika ntenda eeyi, maanzi akaba kabotu alimwi—kabayeeya kuti tombe lyoonse lyakaligwa atuzunda twalo tulya tombe lijanika mumungwimba. Nokuba boobo, basyaazibwene bamwi balaadooneka makani aaya. Basyoma kuti mafwuta manji alakkalila kunsi aalwizi.

Russia

Kweelana abuvwuntauzi bumwi, 59 pesenti yabantu baku Russia bajisi myaka yakuzyalwa iili akati ka 18 a 35 basyoma kuti “kutegwa upone buumi buli kabotu, zimwi ziindi weelede kutyola milawo yakulilemeka.” Oobu mbuwakaamba muteende utegwa Rossiiskaya Gazeta.

Peru

Zimwi zinkonti zyamapopwe akaindi izyakajanika (mbuli ceeci citondezyedwe atala aawa) zitondezya kuti bantu baku Peru bakali kupanga mapopukkoni alimwi abusu kwamyaka iitandila ku 3,000 yainda.

Italy

Musololi wacikombelo ca Katolika wazyina lya Lucio Soravito De Franceschi, waku Adria-Rovigo, usyoma kuti mulumbe wacikombelo weelede kubeleka “kumuntu umwi aumwi kumugama” kweelana ankwakkala. Wakaamba kuti: “Mulimo wesu wabufwundisi weelede kucinca akuleka kulizya milangu mucikombelo mpoonya akutalika kukonkomona mumilyango yamaanda aabantu.”

South Africa

Muulo wa lwija lwacipembele lubelesyegwa mubusilisi ilusambalwa kutali mumulawo, watanta kusikila ku $65,000 (U.S.) kkilo lyomwe. Mu 2011, zilembedwe zitondezya kuti bacipembele bali 448 bakajaigwa abantu batazumizidwe amulawo mucisi ca South Africa mulikke. Imaanda aaku Europe muyobwedwa zyintu zyakaindi akanjililwa ababbi ibakali kuyanda meja aabacipembele. Nobaba bacipembele bali mumasena muyobwedwa banyama, bayeeyelwa kuti bali muntenda.

[Cifwanikiso icili apeeji 3]

[Kulumba]

Photo by John Kepsimelis, U.S Coast Guard

[Cifwanikiso icili apeeji 3]

[Kulumba]

Courtesy STRI

[Cifwanikiso icili apeeji 3]

[Kulumba]

© llukee/Alamy