Bapengede

Sena Leza ulabalanganya bapengede?

“Ibukkale bwanu butabi bwakuyandisya mali pe . . . Nkaambo [Leza] wakaamba kuti: “Ziyume zitete, tandikakusiyi pe alimwi tandikakulekelezyi pe.’”—Bahebulayo 13:5.

LEZA MBWABALANGANYA BAPENGENDE

Ciindi mukombi wa Jehova naaba aamapenzi, Leza ulakonzya kumulanganya munzila zisiyene-siyene. Nzila imwi nkwiinda mukugwasyigwa abakombinyina.a Lugwalo lwa Jakobo 1:27 lwaamba kuti: “Ibukombi busalala alimwi butasofweede mumeso aa Leza wesu alimwi Taata mboobu: ikulanganya bamucaala abamukabafwu mumapenzi aabo.”

Banakristo bakusaanguna bakali kugwasyanya umwi amweenzinyina. Mucikozyanyo, ciindi nikwakasinsimwa kuti kuyooba nzala mpati mu Judaya, Banakristo baku Antiokeya mucisi ca Suliya bakalilibambilide “ikutuma lugwasyo kubakwesu bakkala mu Judaya.” (Milimo 11:28-30) Akaambo kaceeci, Banakristonyina bakatambula lugwasyo luyandika. Kupa kwakulisungula ooku kwakatondezya luyando lwa Bunakristo.—1 Johane 3:18.

Ino bapengede inga bacita nzi kutegwa baligwasye?

“Ndime Jehova Leza wako. Ndime uukwiiyisya kuti ugwasigwe.”—Isaya 48:17, 18.

LEZA ULATUPA NGUZU ZYAKUTI TULIGWASYE

Bantu banji bajana kuti busongo bwamu Bbaibbele bulagwasya alimwi bulapa busolozi buyandika. Lugwalo lwa Tusimpi 2:6, 7 lwaamba kuti: “Nkaambo Jehova ulapa busongo; kumulomo wakwe kuzwa luzyibo abupampu. Baluleme ubayobweda busongo bugwasya.” Ciindi bantu nobayandaula busongo buli boobu alimwi akububelesya, balagwasyigwa kapati.

Mucikozyanyo, balagwasyigwa kweeleba ntenda alimwi azilengwa zibyaabi, mbuli kubelesya misamu iikola. (2 Bakolinto 7:1) Balatalika kusyomeka alimwi akubikkila maano kucita zyintu calo cipa kuti babe bankutwe kumilimo nokuba kuyandwa buya amulimo. Lugwalo lwa Baefeso 4:28 lwaamba kuti: “Ooyo uubba atabbi limbi pe, pele muciindi cakubba abeleke mulimo canguzu, . . . kutegwa abe acintu cakupa yooyo uubulide.”

Sena kuli bumboni butondezya kuti busongo bwamu Bbaibbele bulabagwasya bapengede?

“Busongo bulabonwa kuti buliluleme kwiinda mumilimo yambubo.”—Matayo 11:19.

BUMBONI BUTONDEZYA KUTI MAKANI AAYA NGAMASIMPE

Ba Wilson baku Ghana ibakalembedwe mulimo waciindi cisyoonto buyo, bakali afwaafwi akumanizya ciindi ncobakalembedwe mulimo. Mubuzuba bwabo bwamamanino, ciindi nibakali kusanzya mootokala wabapati bamulimo, ba Wilson bakajana mali mucibbokesi. Bakapitau babo bakabaambila kuti baasise mali aayo. Pele ba Wilson, Bakamboni ba Jehova, bakakaka kubba. Muciindi cakucita boobo, bakaapilusya mali kuli bamukamwini. Alimwi muciindi cakuti mulimo umane, ba Wilson bakalembwa mulimo waciindi coonse alimwi kumbele bakaba bapati bamulimo.

Ku Europe, ba Géraldine bakatandwa mulimo akaambo kakuti basikubalemba mulimo tiibakali kubayanda Bakamboni ba Jehova. Nokuba boobo, banyina babasikubalemba mulimo bakaambila mwanaabo kuti wakalubizya kapati. Bakaamba kuti: “Ikuti koyanda mubelesi uusyomeka alimwi munkutwe, kunyina kumbi nkoyoomujana kunze lya Bakamboni ba Jehova.” Mwanaabo wakavwuntauzya kujatikizya Bakamboni, mpoonya wakabapilusya ba Géraldine amulimo.

Ciindi muzyali uuli alikke wazyina lya Sarah waku South Africa naakaba amapenzi, wakalubona luyando lwa Bunakristo kalubeleka kulinguwe ciindi basimbungano nibakaugwasya mukwasyi wakwe kwiinda mukubapa zyakulya alimwi azyakweendela. Mukuya kwaciindi, bana bakwe bakaamba kuti: “Tulijisi bazyali banji mumbungano.”

Bantu banji bakajanika kale mubukkale buli boobu. Eeci cituyeezya lugwalo lwa Tusimpi 1:33, ilwaamba kuti: “Abo baswiilila ndime bayookkala kabotu.” Eelo kaka majwi aaya ngamasimpe!