Leza Usyomezya Kuti Nyika Inooliko Lyoonse

Oobu mbobakaamba basikuvwuntauzya kujatikizya kucinca kwambobuca. Kuti kamumusyoma Mulengi wabubumbo alimwi uubabikkila maano bantu, kaambo aaka nkobakasinizya basayaansi kalakonzya kumuyeezya kuti Leza wakalenga nyika munzila yakuti kailibambulula.

Akaambo kakuti bantu bainyonyoona citaambiki nyika tuyandika kubeleka canguzu kwiibambulula akaambo kakuti ilikke buyo taikonzyi kulibambulula cakumaninina. Nkaambo nzi ncotukonzya kuba masimpe kuti Leza uyoozibambulula zintu?

Amubone magwalo aali mukabbokesi mbwaatupa kusinizya kuti nyika inooliko lyoonse.

• Leza ngowakalenga nyika. “Kumatalikilo, Leza wakalenga julu anyika.”—Matalikilo 1:1

• Leza ngomukamwini nyika. “Nyika njiya Jehovaa azintu zyoonse izili mulinjiyo.”—Intembauzyo 24:1

• Leza wakalenga nyika munzila yakuti kainooliko lyoonse. “Wakkazikizya nyika antalisyo zyanjiyo ziyumu; kunyina noiyoogwisyigwa abusena bwanjiyo lyoonse alyoonse, mane kukabe kutamani.”—Intembauzyo 104:5

• Leza usyomezya kuti buumi bunooliko anyika mane kukabe kutamani. “Leza mwini-mwini, ooyo wakabumba nyika, . . . watakailenga buyo kakunyina kaambo, pele iwakaibumba kutegwa kaikkalwa bantu.”—Isaya 45:18

• Leza usyomezya kuti bantu bayookkala anyika mane kukabe kutamani. “Balulami bayookona nyika, alimwi bayookkala alinjiyo lyoonse mane kukabe kutamani.” —Intembauzyo 37:29

Leza wakalenga nyika kutegwa bantu kabakkomene kupona mulinjiyo kakunyina kwiinyonyoona. Bbaibbele lyakaambila limwi kuti Jehova Leza uyoobanyonyoona aabo banyonyoona nyika alimwi akumanizya bubi boonse aciindi ncabikkide.—Ciyubunuzyo 11:18

Bbaibbele lisyomezya kuti kuzwa waawo Leza uyoocinca nyika eeyi kuba paradaiso yeebeka alimwi akuvwungulula janza lyakwe “kukkutya cilenge coonse cipona kwiinda mukucipa ncociyanda.”—Intembauzyo 145:16.