Cibalo 50

Ikulibambila Mapenzi

NAAMANA kulailila baapostolo bakwe mboucitwa mulimo wakukambauka, Jesu wabacenjezya kujatikizya basikukazya. Ulaamba: “Amulange. Ndamutuma mbuli imbelele akati kabaumpe. . . . Mukacenjele bantu, nkaambo bayoomwaaba kumbeta impati, nkabela muzikombelo zyabo bayoomukwipaula. Alimwi muyootolwa kubusyu bwabeendelezi ababami nkaambo kandime.”

Nokuba kuti kuli mapenzi mapati ngobayooba angawo basikumutobela, Jesu wasyomezya kuti: “Nibayoomwaaba mutalibiliki kuti, Nkaambe buti? Nkaambenzi? nkaambo eco ncimweelede kwaamba muyoocipegwa kuciindi nciconya, nkaambo teensi ndinywe mwaamba pe, ngu-Muuya wa-Usowanu uuamba akati kanu.”

Jesu wazumanana ategwa: “Nkabela munyina uyooaba munyina kulufu, alakwe wisi uyooaba mwana, abalo bana bayoosandukila bazyali babo kuti babajaye.” Wayungizya ategwa: “Muyoosulwa kubantu boonse nkaambo kazina lyangu, nekubaboobo oyo uukakatila kusikila kumamanino uyoofutuka.”

Ikukambauka kulayandika kapati. Akaambo kaboobo Jesu wakankaizya kucenjela kutegwa katwaangulukide kucita mulimo. Ulaamba: “Alimwi ciindi ncibamupenzya mumunzi umwi amucijile kulyuumwi, nkaambo ncobeni ndamwaambila kuti, ciindi cimutana kwiimana minzi yoonse ya-Israyeli, uyoosika Mwana a-Muntu.”

Masimpe kuti Jesu wakalikupa malailile aya, ikucenjezya alimwi akukulwaizya kubaapostolo bakwe pele akali kupegwa akuli baabo bayootola lubazu mumulimo wakukambauka wanyika yoonse aakufwa akubusigwa. Eci cilalibonya mukwaamba kwakwe kwakuti basikwiiya bakwe ‘bayoosulwa kubantu boonse,’ ikutali buyo kubana Israyeli baapostolo nkubakatumidwe kuyookambauka. Kunze lyaboobo, ibaapostolo teebakatolwa kubeendelezi abami ciindi Jesu naakabatuma mulweendo lwabo lwakukambauka lwaciindi cisyoonto. Alimwi kuciindi eco basyomi teebakali kwaabwa kuti bafwe abanamukwasyi.

Aboobo naakali kwaamba kuti basikwiiya bakwe tabakamanizyi mulimo wabo “uyoosika Mwana a-Muntu,” Jesu wakali kusinsima kuti basikwiiya bakwe tabakamanizyi mulimo munyika yoonse mbwiizulwa wakukambauka zya Bwami bwa Leza katanasika Mwami uulemenede Jesu Kristo sikubeteka wa Jehova lya Harmagedoni.

Kacizumanana amalailile aakwe aakukambauka, Jesu ulaamba: “Sikwiiya tali mupati kwiinda mufundisi wakwe, alakwe muzike tali mupati kwiinda mwami wakwe.” Aboobo basikutobela Jesu beelede kulangila mapenzi akupenzyegwa mbuli nkwaakapenga akaambo kakukambauka Bwami bwa Leza. Pele walailila ategwa: “Mutabayoowi bajaya mubili pele tabakonzyi kujaya [buumi, NW], amuyoowe nguwe uukonzya kujaya mubili antoomwe a[buumi, NW] mu-Gehena.”

Jesu wakali nguwakeelede kuzyoopa citondezyo kumakani aya. Cakutayoowa, wakali kuzyoosala buyo kujaigwa kwiinda kujokela munsi mukusyomeka kwakwe kuli Yooyo singuzuzyoonse, Jehova Leza. Inzya, ngu Jehova uukonzya kunyonyoona “buumi” bwamuntu (nkokwaamba kuti ibulangizi bwakwe bwabuumi kumbele) nokuba kubusya muntu kuti abe abuumi butamani. Elo Taateesu wakujulu Jehova ngusiluyando alimwi siluzyalo kaka!

Mpoonya Jesu wakulwaizya basikwiiya bakwe kubelesya cikozyanyo icitondezya kulanganya kwa Jehova kwalubomba. Wabuzya ategwa: “Sa tuyuni tobile tatuulwi kobili? nekubaboobo taakwe nikaba komwe akati kantuto kawida ansi atazumina Usowanu. Anywebo aalo masusu aali amitwe yanu alibalidwe oonse. Nkaambo kaako mutayoowi, mulayandika kwiinda tuyuni tunji.”

Imulumbe wa Bwami Jesu ngwatuma basikwiiya bakwe kuyooambilizya uyooandaanya maanda nkaambo banamukwasyi bamwi balauzumina kakuli bamwi balaukaka. Wapandulula ategwa: “Mutayeeyi kuti ndeza kuleta luumuno ansi, nsizide kuleta luumuno pe, ndaleta iceba.” Aboobo ikutegwa munamukwasyi ajatisye kasimpe ka Bbaibbele, uyandika busicamba. Jesu ulaamba: “Oyo uuyanda wisi nibaba banyina kwiinda ndime teelede kwangu. Oyo uuyanda mwanaakwe mulombe naba mwanaakwe musimbi kwiinda ndime teelede kwangu.”

Ikumanizya malailile aakwe, Jesu wapandulula kuti aabo batambula basikwiiya bakwe balamutambula awalo. “Nkabela umwi aumwi uunywisya naba omwe akati kabaniini aba kanywido kamaanzi aatontola muzina lyasikwiiya, ncobeni ndamwaambila kuti takoozoosweekelwa bulumbu bwakwe.” Matayo 10:16-42.

▪ Nkucenjezya nzi Jesu nkwaambila basikwiiya bakwe?

▪ Nkukulwaizya nzi alimwi akuumbulizya nkwaabaambila?

▪ Nkaambo nzi malailile aa Jesu ncaabeleka aku Banakristo sunu?

▪ Muunzila nzi sikwiiya wa Jesu mwatamwiindi mwiiyi wakwe?