Cibalo 49
Ilweendo Alumbi Lwakuya Kukambauka mu Galilaya
MBOKWAMANA myaka iitandila kwiibili kafwundumene kukambauka, sena lino Jesu ulajoka munsi akutalika kulengaana? Muciindi caboobo, wakomezya mulimo wakwe wakukambauka kwiinda mukucita lumbi lweendo, ilwatatu mu Galilaya. Waswaya minzi yoonse atunzi mucisi kayiisya muzikombelo alimwi akukambauka makani mabotu aa Bwami. Ncaabona mulweendo olu camupa kuti asyome ncobeni kwiinda lyoonse kuti kuyandika kufwundumana mumulimo wakukambuka.
Kufwumbwa nkwaunka Jesu ubona makamu aabantu bayandika kuponesyegwa munzila yakumuuya akuumbulizigwa. Bali mbuli mbelele zitakwe mweembezi, kabakatede akupenga elyo wabafwida luzyalo. Waambila basikwiiya bakwe ategwa: “Kutebula kwavula, batebuzi bacea. Nkaambo kaako amukumbile mwami uuli amuunda kuti atume batebuzi kukutebula kwakwe.”
Jesu wakanza mboutibelekwe mulimo. Waita baapostolo bali 12 balo mbaakasala ciindi citandila kumwaka cainda. Wababikka bobile-bobile, akupanga tubunga tuli cisambomwi twabasikukambauka elyo wabapa malailile. Wapandulula ategwa: “Mutatoli inzila yakulibamasi, nikuba kunjila kumunzi nuuba omwe waba-Samariya, pele kamuya kumbelele zisweekede zyamukowa waba-Israyeli. Nkabela mwanooya bweenda kamunooyookambauka kuti, Bwami bwakujulu buliswenede.”
Ibwami mbobayookambauka mbuboobo Jesu mbwaakabayiisya mumupailo wacikozyanyo. Ibwami buliswenede mukuti oyo Leza ngwasalide kuyooba Mwami, Jesu Kristo mpali akati kabo. Ikutondezya kuti basikwiiya bakwe mbaiminizi bamfwulumende eyo impati kwiinda zyabantu, Jesu wabapa nguzu zyakuponya balwazi akubusya bafwide. Wabalailila kucita milimo eyo kakutakwe kubbadelesya.
Mpoonya waambila basikwiiya bakwe kuti batalibambili zintu zyakumubili nzyobanga babelesya mulweendo lwabo lwakukambauka. “Mutavubi ingolida niiba insiliva nuuba mukuba muzikwama zyanu, niiba inkomo yazilyo, niziba indyasyo, niiba inkoli, nkaambo similimo uleelelede bulilu bwakwe.” Aabo bauyanda mulumbe bayooteelela akupa cakulya aakoona. Mbubwena Jesu mbwaamba kuti: “Nkabela nimunjila mumunzi umwi aumwi, nimuba mukanzi kamwi akamwi, amuyandaule muntu umwi wamumo uuelede, kuti mukale kwakwe mane lumwi mukainke.”
Mpoonya Jesu wapa malailile kujatikizya mbuli mbobasikilwa basiŋanda amulumbe wa Bwami. Walailila ategwa: “Alimwi, ciindi ncomunjila muŋanda, amubajuzye bali mumo. Lino bantu bali mumo kuti beelede luumuno lwanu alube alimbabo. Pele kuti tabeelede, luumuno lwanu aluboole kulindinywe. Alimwi, umwi aumwi uukaka kumutambula nikuba kuswiilila makani aanu, elyo ciindi ncomuzwa kuŋanda eyo nikuba kumunzi oyo, amukunkumune lusuko luli kuzituta zyanu.”
Kujatikizya munzi uukaka mulumbe wabo, Jesu wayubulula kuti lubeta lwanguwo lunooli lupati. Wapandulula ategwa: “Ncobeni ndamwaambila kuti mubuzuba bwalubeta oyo munzi uzoojana mulandu nikuba kwiinda cisi ca-Sodoma a-Gomora.” Matayo 9:35–10:15; Marko 6:6-12; Luka 9:1-5.
▪ Ndilili Jesu naatalika lweendo lwakwe lwatatu lwakukambauka mu Galilaya, alimwi lwamupa kuti asyome nzi?
▪ Naatuma baapostolo bakwe bali 12 kuya kukambauka, mmalailile nzi ngaabapa?
▪ Nkaambo nzi ncociluzi kuti basikwiiya kabayiisya kuti Bwami buliswenede?