Cibalo 48
Wazwa Kuŋanda ya Jairo Akuya ku Nazareta
BWALI buzuba bwamilimo kuli Jesu—ilweendo lwamumaanzi kuzwa ku Dekapole, kuponya mukaintu wakali kuciswa kalobola alimwi akubusya mwana musimbi wa Jairo. Pele buzuba tabuna mana pe. Kulibonya kuti Jesu naazwa buyo kuŋanda ya Jairo, iboofu bobile bamutobela kaboongolola ategwa: “Utufwide luzyalo, mwanaakwe Davida.”
Kwiinda mukwiita Jesu kuti “mwaanakwe Davida” aba baalumi batondezya lusyomo kuti Jesu ngomukamwini cuuno ca Davida aboobo nkukuti ngo Mesiya uusyomezyedwe. Nokuba boobo Jesu taabikkila kapati maanu kukulomba lugwasyo kwabo ambweni kubasunka kuti naa balazumanana. Pele baalumi aba tabatyompwi pe. Bamutobela Jesu oko nkwakkala elyo naanjila muŋanda bamutobela mukati.
Mpoonya Jesu wabuzya ategwa: “Sa mulazumina kuti ndakonzya kucita obo?”
Baingula calusyomo ategwa: “Ii, mwami.”
Elyo naajata meso aabo Jesu ulaamba: “Akube kulindinywe mbubonya mbuli lusyomo lwanu.” Nkabela bakonzya kubona! Mpoonya Jesu wabaambilisya kuti: “Amubone, kutazi[bi] muntu naba omwe.” Pele akaambo kakubotelwa kapati, baasowela ambali malailile aa Jesu akuya bumwaya mpuwo yakwe cisi coonse.
Mbubazwida buyo aba baalumi, ibantu baleta muntu uujidwe daimona walo wakamulesya kwaambaula. Jesu watanda daimona oyu ndilyona muntu oyu watalika kwaambaula. Makamu aabantu bagambwa akaambo kamaleele aya balaamba: “Cintu cili boobo tacina kubonwa mu-Israyeli lyoonse.”
Iba Farisi abalo nkobali. Tabakonzyi kwaakaka maleele pele mukutasyoma kwabo kubyaabi balaindulula kwaamba nkwajana nguzu Jesu zyakucitila milimo eyi yanguzu balaamba: “Mwami wabadaimona ngwabatandya badaimona.”
Nokwainda buyo ciindi kuzwa nozyacitika zyoonse ezi, Jesu wajokela kumunzi ookwabo ku Nazareta kasindikidwe lino abasikwiiya bakwe. Ciindi citandila kumwaka cainda, wakaswaide cikombelo akuyiisya mumwena. Nokuba kuti kukusaanguna bantu bakagambwa kumajwi aakwe aakondelezya, kwakazyoobacima kuyiisya kwakwe kumbele elyo bakasola kumujaya. Lino caluzyalo, Jesu wasoleka alimwi ikuyoogwasya bakali basimukobonyina.
Kakuli mumasena amwi bantu balayoboloka kuya kuli Jesu, kulibonya kuti oku tabaciti obo pe. Elyo mubuzuba bwa Sabata, waunka kucikombelo kuyooiisya. Bunji bwabaabo baswiilila bakankamana. Babuzya ategwa: “Ino muntu oyu wabujana kuli busongo obu anguzu ezi? Sa teensi nguwenya mwana wamubezi? Sa izina lyabanyina teensi Mariya, amazina aabakwabo sa tabeensi ba-Jakobo a-Josefa a-Simoni a-Juda? Abalo bacizi bakwe sa tabako boonse nkutubede? Muntu oyu wazijana kuli zintu ezi zyoonse?”
Balaamba, ‘Jesu ngusimunzi mbubonya mbuli ndiswe. Wakomena mumeseesu alimwi tuluuzi mukwasyi wakwe. Ino inga waba buti Mesiya?’ Aboobo nokuba kuti kuli bumboni boonse obu—busongo bwakwe bunji amaleele—bacimukaka. Akaambo kakumuzibila kapati abalo basazinyina babijilwa calo cakapa kuti Jesu aambe kuti: “Taakwe musinsimi uutalemekwa, pele kucisi cakulibo, aakati kabasiluzubonyina, amuŋanda yakwe mwini.”
Masimpe Jesu wagambwa akaambo kakubula lusyomo kwabo. Aboobo kunyina maleele ngaacita oko kunze lyakwaampa maanza kubantu basyoonto buyo baciswa akubaponya. Matayo 9:27-34; 13:54-58; Marko 6:1-6; Isaya 9:7.
▪ Kwiinda mukwiita Jesu kuti “mwaanakwe Davida” aba boofu batondezya kuti basyoma nzi?
▪ Mbupanduluzi nzi ba Farisi mbobazumanana kumaleele aa Jesu?
▪ Nkaambo nzi ncoluli luzyalo kuti Jesu wapilukila kuyoogwasya baabo bali ku Nazareta?
▪ Watambulwa buti Jesu mu Nazareta, alimwi nkaambo nzi?