Cibalo 60
Ikubona Bulemu Kristo Mbwanoojisi mu Bwami
JESU waboola mucooko ca Kaisareya-Filipi elyo lino uyiisya nkamu iibikkilizya abaapostolo bakwe. Waambilizya makani aaya aagambya kulimbabo ategwa: “Ncobeni ndamwaambila kuti mpobali bamwi baimvwi awa batakooyoomvwa lufu mane lumwi bakabone Mwana a-Muntu uuboola mu-Bwami bwakwe.”
‘Ino Jesu inga kaamba nzi awa?’ basikwiiya bazingwa. Nokwainda mazuba aatandila kunsondo yomwe, Jesu wabweza Petro, Jakobo alimwi a Johane baakutanta cilundu cilamfwu. Kulalangilwa kuti mmasiku nkaambo basikwiiya balaa ŋonzi. Kacipaila Jesu, ciwa cakwe casanduka. Busyu bwakwe bwabala mbuli zuba azyakusama zyakwe zyatuba buu mbuli mumuni.
Mpoonya bantu bobile bazibwa kuti mbaa “Musa a-Eliya” balibonya elyo batalika kwaambaula a Jesu kujatikizya ‘kwiinka kwakwe kwalo kuyoocitikila mu Jerusalemu.’ Ikwiinka oku caamba lufwu lwa Jesu akubusigwa kuyootobela. Aboobo mubandi oyu watondezya kuti lufwu lwakwe lwamasampu ncintu cimwi citakonzyi kweelebwa pe mbuli mbwaakali kulombozya Petro.
Lino nozyamaninina buya ŋonzi, basikwiiya balangilila akuswiilila cakugambwa. Nokuba kuti eci ncilengaano, ciboneka mbuli kuti cicitika ncobeni cakuti Petro watalikaa kuvwiilizya mumakani kaamba kuti: “Mwami, ncibotu kulindiswe kuba ano. Kuti koyanda, ndayaka zilao zyotatwe, cimwi cibe cako, cimwi cibe ca-Musa, acimwi cibe ca-Eliya.”
Kacaambaula Petro, kwabavwumba kkumbi lituba nkabela kwazwa jwi mukkumbi liti: “Ngooyu mwanaangu uuyandwa ngwinkondelwa, amuswiilile nguwe.” Nobalimvwa jwi basikwiiya bavwundama. Pele Jesu ulaamba: “Amuvundamuke, mutayoowi.” Nobacita obo, babona kuti kunyina muntu umbi pele Jesu.
Mukuseluka kwabo kuzwa amulundu buzuba butobela, Jesu walailila ategwa: “Mutaambili muntu naba omwe cilengano eco mane lumwi Mwana a-Muntu akabuke kuzwa kubafu.” Ikulibonya kwa Eliya mucilengaano kwabusya mubuzyo mumizeezo yabasikwiiya. Babuzya ategwa: “Ino nkaambonzi balembi balaamba kuti Eliya uleelede kusaanguna kuza?”
Jesu ulaamba: “Eliya wasika kale nkabela tabana kumuziba.” Pele Jesu waamba Johane Mubbapatizi walo wakazuzikizya mulimo uukonzyenye awa Eliya. Johane wakabamba mugwagwa wa Kristo mbubwena bwakacita Eliya kuli Elisha.
Elo camuyumya-yumya kaka cilengaano eci Jesu antoomwe abasikwiiya bakwe! Icilengaano eci inga categwa citondezya bulemu mbwanoojisi Kristo mu Bwami. Basikwiiya bamubona “Mwana a-Muntu uuboola mu-Bwami bwakwe” mbubwena mbuli mbwaakasyomezyede Jesu nsondo yomwe yainda. Kalwiindide lufwu lwa Jesu, Petro wakalemba kujatikizya ‘mbobakalibonena ameso bupati bwa Kristo nobakali awe kucilundu cisalala.’
Iba Farisi bakali kuyanda kuti Jesu abape citondezyo cakusinizya kuti wakali ngonguwe wakasyomezyegwa mu Magwalo kuti uyooba Mwami uusalidwe aa Leza. Teebakapegwa citondezyo cili boobu pe. Pele basikwiiya ba Jesu bayandwa babaa coolwe cakubona kusanduka kwa Jesu ikusinizya businsimi bwa Bwami. Aboobo Petro wakazyoolemba kuti: “Mbubonya obo mbutwakasimpikizigwa lusinizyo lwamajwi aabasinsimi.” Matayo 16:13, 28–17:13; Marko 9:1-13; Luka 9:27-37; 2 Petro 1:16-19.
▪ Ino bamwi bamubona buti Kristo kaboola mu Bwami bwakwe kabatanafwa?
▪ Ino ncinzi Musa a Eliya ncobabandika a Jesu mucilengaano?
▪ Nkaambo nzi cilengaano eci ncociyumya-yumya kuli basikwiiya?