Cibalo 62
Ciiyo Kujatikizya Kulibombya
NAAMANA kuponya mulombe wakanjidwe daimona mucisi cili afwaafwi aku Kaisareya-Filipi, Jesu uyeeya kupilukila kumunzi ku Kapernauma. Pele uyanda kuti kali alikke abasikwiiya bakwe mulweendo kutegwa kacibaambila azimbi ikulibambila lufwu lwakwe alimwi amilimo yabo kwamana waawo. Wabapanduluda ategwa: “Mwana a-Muntu ulaabwa kumaanza aabantu abati kamujaye, elyo aakujayigwa uyoobuka aakumana mazuba otatwe.”
Nokuba kuti Jesu wakalaambide kale kujatikizya makani aya alimwi baapostolo botatwe mane bakabona kusanduka kwakwe ciindi lyakabandikwa “kuunka” kwakwe, basikwiiya bakwe tabana teelelesya kujatikizya makani aya. Nokuba kuti kunyina uukazya kuti uyoojaigwa mbuli bwakacitide Petro musyule, balayoowa kumubuzya azimbi kujatikizya makani ayo.
Limwi basika ku Kapernauma ikuli mbuli kuti nkokucisiko mukati kamulimo wa Jesu. Alimwi nkokumunzi nkwazwa Petro abamwi baaposotolo bali mbobabede. Okuya, ibaalumi batelesya mali aatempele baboola kuli Petro. Ambweni kabayanda kucita kuti Jesu atole lubazu mucilengwa cabo babuzya ategwa: “Sa mufundisi wanu tateli mali aantempele?”
Petro waingula ategwa: “Ulatela.”
Jesu iwazyoosika kuŋanda eyi nokwainda kaindi kasyoonto waziba zyacitika. Aboobo Petro katanaatalika makani Jesu wabuzya kuti: “Uyeeyanzi, Simoni? Bami baansi nkulini nkubatambula mutelo na bulumbu? Sa nkubana babo nanka kubeenzu?”
Petro waingula ategwa: “Nkubeenzu.”
Jesu ulaamba: “Lino bana balaangulukide.” Mbwaanga Usyi Jesu ngo Mwami wakoonse-koonse, Walo uupailwa kutempele, tacili ceelelo buya kuti Mwanaa Leza atele mutelo watempele. Jesu ulaamba: “Kuti tutababilizyi, koya kulwizi, ukawaale kalobyo, ukabweze inswi iisaanguna kuzwa, elyo niwaasamuna mulomo wayo, ulajana mali. Tola ayo, ubapede ndiswe tobile.”
Nobaba antoomwe basikwiiya nobasika mu Kapernauma, ambweni kabali kuŋanda ya Petro babuzya ategwa: “Ino nguni mupati mu-Bwami bwakujulu?” Jesu ulicizyi capa kuti babuzye mubuzyo oyu nkaambo ulizyi cali kucitika akati kabo nobali kweenda munsi lyakwe nobapiluka kuzwa ku Kaisareya-Filipi. Aboobo wabuzya ategwa: “Ino ncinzi ncimwali kubuzyanya munzila?” Pele akaambo kansoni, basikwiiya baumuna buyo nkaambo balikukazyanya kuti ino nguni mupati akati kabo.
Mukumana kwamyaka yotatwe yakuyiisya kwa Jesu, sena cilagambya kuti basikwiiya bakwe balakonzya kukazyanya boobu? Ciyubulula kutalondoka kwini-kwini kwabuntunsi alimwi akuyunga kwabukombi bwamusyule. Ibukombi bwaci Juda mwalo mwakakomenena basikwiiya bwakali kukankaizya zyuuno naa bulemu munzila zyoonse. Kunze lyaboobo, ambweni Petro akaambo kakusyomezya kwa Jesu kuti uyootambula “zijulizyo” zyamu Bwami wakali kulimvwa kusumpulwa. Jakobo a Johane abalo balakonzya bakajisi muzeezo nguwenya akaambo kakubaa coolwe cakulibonenaa meso cilengaano cakusanduka kwa Jesu.
Kufwumbwa mbocinga caba, Jesu wapa citondezyo cikankamanisya ikusoleka kululamika mizeezo yabo. Waita kana, wakaimika akati kabo, wakabukata akwaamba kuti: “Mwataakusanduka akuba mbuli twana, tamukooyoonjila pe mu-Bwami bwakujulu. Nkaambo kaako umwi aumwi uulibombya mbuli kana aka nguwenya uuzooba mupati mu-Bwami bwakujulu. Alimwi umwi aumwi uutambula kana nikaba komwe kali boobu muzina lyangu watambula ndime.”
Elo nkubota nzila yakululamika basikwiiya bakwe! Jesu taabanyemena akubaamba kuti balaliyanda, mbalyatu alimwi akuti mbaasimapuwo. Peepe, pele wapa citondezyo mukuyiisya kwakwe kwakululamika kwiinda mukubelesya cikozyanyo cabana balo babombe alimwi batakwe mapuwo alimwi balo bazibidwe kuti tabakwe mizeezo yazyuuno akati kabo. Aboobo Jesu utondezya kuti basikwiiya bakwe beelede kwiiya ziimo ezi zyalo zijisi bana babombede. Mbubwena Jesu mbwamanizya: “Nkaambo muniini akati kanu nyoonse ngomupati.” Matayo 17:22-27; 18:1-5; Marko 9:30-37; Luka 9:43-48.
▪ Naapiluka kuzwa ku Kapernauma nkuyiisya nzi Jesu nkwaaindulula, alimwi kwatambulwa buti?
▪ Nkaambo nzi Jesu ncatayelede kutela mutelo watempele, pele nkaambo nzi ncaatela?
▪ Ncinzi cikonzya kuti ncecapa kuti batalike kukazyanya basikwiiya, alimwi Jesu wabalulamika buti?