Cibalo 59
Ino Jesu Nguni?
LINO bwato bujisi Jesu abasikwiiya bakwe nobwasika ku Betsaida, bantu bamuletela muntu moofu akumukumbila kuti amugume akumuponya muntu oyo. Jesu wamujata kujanza oyu muntu wamugwisya mumunzi mpoonya naamana kumuswida mate kumeso wamubuzya ategwa: “Sa wabona cintu?”
Muntu oyu waingula ategwa: “Ndabona bantu, ndababona beenda mbuli masamu.” Naabikka maanza aakwe ameso amuntu oyu, Jesu wacita kuti mboni zyakwe zijaluke cakuti wabonesya. Mpoonya Jesu watuma muntu oyu kuŋanda wamulailila kuti atanjili mumunzi.
Lino Jesu wazwa abasikwiiya bakwe kuya kuminzi yaku Kaisareya-Filipi kunyikaa ku Palestine. Musinzo uulampa makkilomita aatandila ku 48 kuya kubusena bubotu bwa Kaisareya-Filipi bwalo busumpwide amamita aali 350 kuzwa atalaa alwizi lupati. Olu lweendo ambweni lutola mazuba obile.
Kabaceenda, Jesu wazanduka alikke kuti akapaile. Kuli buyo myezi fwuka naa kkumi iiceede kuti afwe elyo ulipengede kapati akaambo kabasikwiiya bakwe. Ibanji bakaleka kale kumutobela. Bamwi balinyongene akutyompwa akaambo kakuti waakaka kuti bantu bamubikke abe mwami alimwi akuti waakaka kupa citondezyo cizwa kujulu cakutondezya bwami bwakwe ciindi basinkondonyina nobakamwaambila kuti acite obo. Ino baapostolo bakwe basyoma kuti nguni? Nobaboola kubusena nkwaali kupailila, Jesu wabuzya ategwa: “Ino bantu baamba kuti ndimeni?”
Baingula ategwa: “Bamwi balaamba kuti nduwe Johane Mubapatizi, bamwi balaamba kuti nduwe Eliya, abamwi balaamba kuti nduwe Jeremiya naba umwi wabasinsimi.” Inzya bantu bayeeya kuti Jesu ngumwi wabaaba baalumi baabusigwa kuzwa kubafwu!
Jesu wabuzya ategwa: “Pele inywe mulaamba kuti ndimeni?”
Petro waingula cakufwambaana ategwa: “Nduwe Kristo, Mwana a-Leza muumi.”
Naamana kuzuminizya bwiinguzi bwa Petro, Jesu ulaamba: “Ndakwaambila kuti nduwe Petro. Atala amwala oyu mpenzooyakila imbungano yabantu bangu, nkabela milyango yabasikufwa tiikoozoomuzunda.” Awa kusaanguna Jesu waambilizya kuti uyooyaka mbungano yakwe alimwi akuti lufwu talukabaciti buzike basikufwa bamanizya mulimo wabo cakusyomeka anyika. Mpoonya waambila Petro ategwa: “Alimwi nzookupa zijaluzyo zya-Bwami bwakujulu.”
Aboobo Jesu wayubulula kuti Petro uyootambula mikuli yaalubazu. Peepe, Petro tapegwi busena bwakusaanguna akati kabaapostolo naa kucitwa kuti abe ntalisyo yambungano. Jesu lwakwe mwini Mwala mpoizyooyakilwa mbungano. Pele Petro uyoopegwa zijaluzyo zyotatwe izili mbuli kuti nzyakujaluzya zyoolwe zyakuti nkamu zyabantu zikanjile mu Bwami bwakujulu.
Petro wakabelesya cijaluzyo cakusaanguna aciindi ca Pentekoste mu 33 C.E., ikutondezya bama Juda beempwa ncobeelede kucita kutegwa bafwutuke. Wakali kuyoocibelesya cijaluzyo cabili mpoonya-mpoonya kujaluda coolwe kubana Samariya basyoma icakunjila mu Bwami bwa Leza. Mpoonya mu 36 C.E. wakali kuyoocibelesya cijaluzyo catatu ikujulila coolwe nciconya ku Bamasi batapaludwe, Koneliyo abeenzinyina.
Jesu wazumanana mubandi wakwe abaapostolo bakwe. Wabatyompya kwiinda mukubaambila mapenzi alufwu ndwayoofwa lino-lino mu Jerusalemu. Akaambo kakwaalilwa kumvwisya kuti Jesu uyoobusilwa kubuumi bwakujulu, Petro wamukwelela ambali Jesu. Ulaamba: “Peepe, O Mwami! Eeci citakakucitikili!” (BT) Azikucebuke, Jesu waingula ategwa: “Swena oko kusule lyangu, Saatani. Uli cilebyo kulindime, nkaambo kakuti tozi makani aa-Leza, ulizi makani aabantu alike.”
Kulibonya kuti kuli bambi beendaa Jesu kunze lyabaapostolo aboobo wabaita akubapanduluda kuti tacikabaubili pe kuba basikumutobela. Ulaamba: “Kwanooli muntu uuyanda kundicilila, asaangune kulyuubaula, abweze [cisamu, NW] cakwe, elyo anditobele. Nkaambo umwi aumwi uuyanda kuyobola buumi bwakwe uzoobusweekelwa, pele umwi aumwi uusweekelwa buumi bwakwe nkaambo kandime aka-Makani Mabotu uzoobuyobola.”
Inzya, ikuti naa bajanika kuba bantu bayandika luzyalo lwakwe, basikutobela Jesu beelede kuba basicamba alimwi balyaabide. Ulaamba: “Nkaambo umwi aumwi uundyuusila bweeme, mebo amajwi aangu, akati kabasyaasunu basibumambi basizibi, alakwe Mwana a-Muntu uyoomuusya bweeme oyo muntu ciindi ncati boole mubulemu bwawisi antoomwe abaangelo basalala.” Marko 8:22-38; Matayo 16:13-28; Luka 9:18-27.
▪ Nkaambo nzi Jesu ncabikkilide maanu kuli basikwiiya bakwe?
▪ Ino bantu bamwaamba kuti nguni Jesu?
▪ Nzijaluzyo nzi nzyaapegwa Petro, alimwi zyeelede kuyoobelesyegwa buti?
▪ Nkululamikwa nzi Petro nkwaapegwa, alimwi nkaambo nzi?