Cibalo 87
Amulibambile Zyakumbele Kwiinda Mukubelesya Maanu
JESU wazwaa kumanizya kwaamba caano camwana mutaka kunkamu iibikkilizya abasikwiiya bakwe, basimitelo batasyomeki alimwi abamwi basizibi bazibidwe antoomwe abalembi aba Farisi. Lino kaambila basikwiiya bakwe, waluula cikozyanyo cijatikizya muntu muvwubi watambula makani mabyaabi kujatikizya sikulanga ŋanda yakwe naa mubanzi.
Kweelana abwaamba Jesu, oyu muvwubi waita mubanzi wakwe akumwaambila kuti ulamutanda mulimo. Oyu mubanzi walyaambauzya ulaamba: “Ino ndiyoocita buti nkaambo simalelaangu ulanditanda kububanzi? Ukulima nsijisi nguzu pe, akukumbila ndijisi buusu. Ndilizi mbwenti cite kuti na ndatandwa kububanzi bakanditambule [bantu] mumaanda aabo.”
Ino ukanza nzi mubanzi oyu? Wabaita abo bakakolotede mali kuli simalelaakwe. Wabuzya ategwa: “Sena uli amulandunzi kulisimalelaangu?”
Wakusaanguna waingula ategwa, “Ninsazi zyamafuta izili mwaanda.”
Wamwaambila kuti, “Jata lugwalo lwako, fwamba ukale, ulembe makumi osanwe.”
Wabuzya umbi ategwa: ‘Ino yebo ujisi mulandunzi?’
Ulaamba, “Nzyeelelo izili mwaanda zyamaila.”
“Jata lugwalo lwako, ulembe makumi aali musanu mwaatatu.”
Imubanzi uliluzi kuzijola aansi zikoloto zyasimalelaakwe nkaambo uceendelezya lubono lwasimalelaakwe. Kwiinda mukucesya myeelwe, upanga zilongwe kulibaabo bakonzya kumucitila zibotu atandwa milimo.
Simalelaakwe naamvwa cacitika, wakkomana kapati. Mane “wakamulumbaizya mubanzi oyo uutaluleme mbwaakacita camaanu.” Masimpe, Jesu wayungizya: “Bana baansi ano mbasimaanu mucizukulu cabo kwiinda bana bakusalala.”
Lino kaamba ciiyo kuli basikwiiya bakwe, Jesu wabakulwaizya ategwa: “Kamulicitila beenzinyoko kulubono lwakutalulama, kuti lwaakumana, bamutambule mumaanda aatamani.”
Jesu talumbaizyi mubanzi akaambo kakutalulama kwakwe pele nkaambo kamaanu aakwe. Kanjikanji “bana baansi ano” balaabelesya mali naa zyuuno zyabo ikuvwanaa baabo bakonzya kubajosezya. Aboobo babelesi ba Leza, “bana bakusalala” abalo bayandika kubelesya lubono lwabo lwakumubili “lubono lwakutalulama” munzila yamaanu kutegwa baligwasye lwabo beni.
Pele mbubwena mbwaamba Jesu, beelede kubamba zilongwe alubono lwakutalulama abaabo bakonzya kubatambula “mumaanda aatamani.” Kuli baabo bakatanga kaniini, aya maanda ali kujulu; kuli baabo ba “mbelele zimwi” ali mu Paradaiso anyika. Mbwaanga Jehova Leza alikke a Mwanaakwe mbabakonzya kutambula bantu mumaanda aya, tweelede kuyuma-yuma kujana cilongwe ambabo kwiinda mukubelesya “lubono lwakutalulama” luli loonse ndotunga katujisi ikugwasilizya zya Bwami. Mpoonya, lubono lwakumubili lwaalilwa naa lwamana mbuli mbokuzibidwe, ibuumi bwakumbele butamani bulisyomezyedwe.
Jesu wazumanana kwaamba kuti bantu basyomeka mukulanganya noziba zyeezi zintu zyakumubili naa ziniini, bayoosyomeka amukulanganya zintu ziyandika kapati. Wakazumanana ategwa: “Aboobo kuti tamusyomeki kulubono lwakutalulama, ino nguni uuti kamusyome kulubono lwinilwini [nkokwaamba kuti zyakumuuya naa zya Bwami]? Alimwi kuti tamusyomeki kulizyabamwi [zya Bwami Leza nzyapede babelesi bakwe], ino nguni uuti kamupe canu [ibulumbu bwa buumi mumaanda aatamani]?”
Tatukonzyi kuba babelesi ba Leza beni-beni aciindi nciconya katuli bazike kulubono lwakutalulama, lubono lwakumubili mbuli Jesu mbwaamanizya ategwa: “Taakwe muzike uukonzya kubelekela bami bobile. Nkaambo ulasula umwi ayande umwi, na ulakakatila kuluumwi, asampaule umwi. Tamukonzya kubelekela Leza milimo antoomwe alubono.” Luka 15:1, 2; 16:1-13; Johane 10:16.
▪ Ino mubanzi uuli mucikozyanyo ca Jesu ubamba buti cilongwe abaabo bakonzya kumugwasya kumbele?
▪ Ino “lubono lwakutalulama” ninzi, alimwi inga twabamba buti cilongwe kubelesya ndulo?
▪ Mbaani bakonzya kututambula “mumaanda aatamani,” alimwi maanda nzi aya?