Cibalo 97

Basimilimo Mumuunda

JESU wazwaa kwaamba kuti, “banjibanji ibasaanguna mbabayoosyalila, abalo ibasyaalila mbabayoosaanguna.” Lino wacitondezya eci kwiinda mukwaamba caano. Watalika ategwa: “Bwami bwakujulu bulikozyenye amuntu mwiniŋanda iwakazwa cifumofumo kuyoonjizya basimilimo mumuunda wakwe.”

Jesu wazumanana ategwa: “Lino [mwiniŋanda] wakazuminana abasimilimo kuti bavoole isheleni lyomwe abuzuba, elyo wakabatuma mumuunda wakwe. Nkabela wakazwa acikasaalizi, wakabona bamwi baliimvwi buyo mucisambalilo. Mpawo wakabaambila kuti, Kamunjila mumuunda anywebo, ndamuvozya mbumweelede. Lino bakaya. Alimwi wakazwa isikati, wakacita obo, akuciindi nilyaungaunga. Alimwi kumazuba wakazwa, wajana bamwi baliimvwi buyo, wabaambila wati, Ino nkaambonzi muliimvwi buyo ano buzuba boonse? Bamwaambila bati, Nkaambo kakuti taakwe muntu iwakatunjizya mumilimo. Wabaambila wati, Kamunjila mumuunda anywebo.”

Imwiniŋanda naa mwinimuunda ngu Jehova Leza elyo muunda ncisi ca Israyeli. Basimilimo mumuunda mbantu baletwa mucizuminano ca Mulawo; kubagama mbaabo bama Juda bakali kupona kuciindi cabaapostolo. Icizuminano camweelwe wakuvwola cacitwa buyo kuli babaya ibabumanina mumuunda buzuba. Ikuvwola kwamulimo wabuzuba boonse ndisheleni. Mbwaanga “acikasaalizi” nciindi ca 9:00 a.m., abo baitwa acikasaalizi, isikati, nolyaungaunga alimwi akumazuba babeleka buyo maola aali 9, 6, 3 alimwi a 1 mbubonya mbobatobelene.

Basimilimo babeleka maola aali 12 naa buzuba boonse baiminina basololi bacikombelo caba Juda balo bajisi bubi lyoonse mumilimo yacikombelo. Balaandeene abasikwiiya ba Jesu balo kwaciindi cilamfwu bali mumulimo wakuzuba nswi naa milimo yakumubili. Pele mu 29 C.E., “mwiniŋanda” wakatuma Jesu Kristo kuti ababunganye aba kuti babe basikwiiya bakwe. Aboobo bakaba “bamusule” naa basimilimo bakumazuba.

Mpoonya buzuba bwacikozyanyo bumanaa lufwu lwa Jesu aboobo ciindi cakuvwozya basimilimo nocisika. Kwatobelwa cilengwa ceenzu cakusaanguna bamusule, mbubwena mbukwapandululwa ategwa: “Lino nilyakaba igoko (kumangolezya) mwinimuunda wakaambila mubanzi wakwe wati, Ita basimilimo, ubape bulumbu bwabo, utaangune kubasyaalizi, umanine kubataanzi. Mpawo abo ibakasika kumazuba bakaboola, batambula umwi aumwi isheleni. Nkabela bataanzi nibakaboola, bakali kuyeeya kuti, Tulatambula kwiinda. Nekubaboobo abalo bakatambula umwi aumwi isheleni. Lino nibakalitambula bakatongaukila mwiniŋanda, bati, Aba basyaalizi babeleka kaindi kaniini buyo, nekubaboobo wabapa mbubonya mbuwatupa aswebo, nitwalemenwa ciminya cabuzuba boonse akubalwa izuba. Lino wakavuwa, waambila umwi akati kabo kuti, Mweenzuma, nsikubisisizye pe. Sa teetwazuminana ayebo kusheleni? Bweza lyako, uinke! Oyu musyaalizi alakwe ndayanda kumupa mbubonya mbundapa nduwe. Sa takululeme kuti mbelesye zintu zyangu mbuli mbunjanda? Sa wandifwida mulibu nkaambo ndi mwaabi?” Mukumaninzya Jesu waindulula kwaamba kaambo nkaakaambide musyule kuti: “Mbubonya obo nkubali bamusule bazooba bataanzi, alimwi nkubali bataanzi bazooba bamusule.”

Ikutambula kwasheleni takucitwi aciindi calufwu lwa Jesu pe, pele mpaciindi ca Pentekoste 33 C.E., iciindi Kristo, “mubanzi” naatila muuya uusalala kuli basikwiiya bakwe. Aba basikwiiya ba Jesu bali mbuli “bamusule” naa basimilimo bakumazuba. Isheleni taliiminini cipego camuuya uusalala pe. Isheleni ncintu cimwi cakuti basikwiiya babelesye ano anyika. Ncintu cimwi cibwene buumi bwabo, buumi butamani. Ncoolwe cakuba muna Israyeli wakumuuya, uunanikidwe kukambauka Bwami bwa Leza.

Ndilyonya aabo banjizigwa milimo kusaanguna babona kuti basikwiiya ba Jesu bavwozyegwa alimwi bababona kababelesya sheleni lyacikozyanyo. Pele baciyanda acimbi kuleka buyo muuya uusalala azyoolwe zyamu Bwami. Ikutongooka kwabo alimwi akukazya kwaba mbuli kuti nkupenzya basikwiiya ba Kristo, basimilimo “bamusule” mumuunda.

Sena oko kuzuzikizigwa kwamumwaanda mwamyaka wakusaanguna nkokuzuzikizigwa kwalikke kwacikozyanyo ca Jesu? Peepe, basicikombelo bamu Kristendomu mumwaanda wamyaka uno wa 20 kwiinda munzila mbobacita zyuuno zyabo amilimo baba “bataanzi” kunjizigwa milimo mumuunda wa Leza wacikozyanyo. Bakali kulanga bakambausi balyaabide bayanzene aa Watch Tower Bible and Tract Society kuti “[m]bamusule” kubaa mulimo mubotu uuli woonse mumulimo wa Leza. Pele masimpe aba mbabona ibakali kusulaikwa abasicikombelo mbebakatambula sheleni—mulimo wakubeleka kabali baiminizi bananikidwe ba Bwami bwa Leza bwakujulu. Matayo 19:30–20:16.

▪ Ncinzi ciimininwaa muunda? Mbaani baimininwaa mwinimuunda alimwi abasimilimo bamaola aali 12 alimwi alyomwe?

▪ Ndilili buzuba bwamilimo bwacikozyanyo nobwakamana, alimwi ndilili nokwakavwozyegwa?

▪ Ncinzi ciimininwaa kuvwozyegwa kwasheleni?