Cibalo 98
Basikwiiya Bakazyanya Mboluyabuswena Lufwu lwa Jesu
JESU abasikwiiya bakwe bali munsi-munsi a Mulonga wa Jordano nkubakosoda mucooko ca Pereya kuya mu Judaya. Abamwi banji beenda antoomwe ambabo kuya kupobwe lya Kwiindilila lyamu 33 C.E., kwalo kwasyaala buyo nsondo yomwe ambweni amazuba atala.
Jesu ulikumbele aabasikwiiya bakwe alimwi bagambwa mbuli mbwasungweede cabusicamba. Amuyeeye kuti nsondo zisyoonto zyainda ciindi Lazaro naakafwa elyo Jesu kayanda kuzwa mu Pereya kuya ku Judaya, Tomaso wakakulwaizya bamwi ategwa: “Atweende aswebo, tukafwe awe.” Alimwi amuyeeye kuti Jesu naakamana kubusya Lazaro, Basinkuta Mpati bakakanza kumujaya Jesu. Ncobayoowela kapati basikwiiya mbubayaabunjila mu Judaya alimwi.
Ikubagwasya kulibambila ziboola kumbele, Jesu wabweza bali 12 kumbali akubaambila kuti: “Amubone, tulaya ku-Jerusalemu, elyo Mwana a-Muntu uyooabwa kumaanza aabapaizi basimutwe aabalembi, bayoomubeteka kuti afwe, akuyoomwaaba kumaanza aabamasi. Alimwi bayoomusabwida akumuswida mate akumukwipaula akumujaya, elyo aakumana mazuba otatwe uyoobuka.”
Eci nciindi catatu mumyeezi yalino-lino buyo Jesu ncaambila basikwiiya bakwe kujatikizya lufwu lwakwe akubuka. Alimwi nokuba kuti balaswiilila baalilwa kumvwisya. Ambweni nkaambo kakuti basyoma kubambululwa kwacisi ca Israyeli anyika alimwi balangila kuyookkomana mubulemu bwabwami bwaansi antoomwe a Kristo.
Akati kabasilweendo baya kupobwe lya Kwiindilila, kuli Salome banyina bamwaapostolo Jakobo alimwi a Johane. Jesu wakaulika baalumi aba kuti “basimuzumo,” kakunyina aakudooneka nkaambo kamiyeeyo yabo. Kwaciindi cilamfwu aba bobile bajisi muzeezo wakuyakubaa zyuuno zyabulemu mu Bwami bwa Kristo, aboobo bakaambila banyina makanze aabo. Lino banyina baunka kuli Jesu kuyakubaambilila, bamufwugamina akukumbila.
Jesu wabuzya ategwa: “Ino ncinzi ncomuyanda?”
Baingula ategwa: “Lailila kuti bana bangu aba bobile bakale, umwi kululyo lwako, umwi kucimwensi cako, mu-Bwami bwako.”
Kazi muzeezo oyu nkowazwa, Jesu waambila Jakobo a Johane ategwa: “Tamuzi ncimukumbila. Sa mulakonzya kunywida mukanywido munti nywide ime?”
Baingula ategwa: “Tulakonzya.” Nokuba kuti Jesu wazwaa kubaambila mapenzi ngayoobaalo alimwi akujaigwa, kulibonya kuti tabanamvwisya kuti ncencico ncaamba kuti “kanywido” nkati nywide.
Nokuba boobo, Jesu wabaambila ategwa: “Mulanywida mukanywido kangu ncobeni, pele kukala kululyo lwangu akucimwensi cangu, teensi ndime uukonzya kupa pe, nkukwabo abo bakabambilwa kwa-Taata.”
Muciindi baapostolo bamwi aba bali kkumi baziba ncobakumbila ba Jakobo a Johane elyo banyema. Ambweni Jakobo a Johane mbebakali kumbele mukukazyanya kwamusyule akati kabaapostolo kujatikizya mupati akati kabo. Ikukumbila kwabo kwalino kutondezya kuti taakwe nobakubelesya kulaya Jesu nkwaapa kumakani aaya. Cilausisya kuti kulombozya kubaa zyuuno zyabulemu kuciliko kapati.
Aboobo ikweendelezya mazwanga aabuka lino alimwi akutalangana kabotu nkwaaleta, Jesu wabaita bali 12 antoomwe. Kabalaya caluyando ulaamba: “Mulizi kuti baami babamasi babacitila kami-kami, abalo bapati babo babeendelezya. Pele kulindinywe takuli boobo pe. Umwi aumwi uuyanda kuba mupati akati kanu uzooba mulanda wanu, alimwi umwi aumwi uuyanda kuba mutaanzi akati kanu uzooba muzike wanu.”
Jesu wapa cikozyanyo ncobeelede kwiiya mbubwena mbwapandulula ategwa: “Nkaambo mbubonya obo Mwana a-Muntu tazide kuti abelekelwe, wakeza kuti abeleke, alimwi akwaaba buumi bwakwe, bube cinunuzyo cabanji.” Jesu taabelekela buyo bamwi pele uyoocita obo kusika kuciimo cakufwida bantu! Basikwiiya bayandika miyeeyo njiyenya eyo mbuli ya Kristo yakulombozya kubelekela kutali kubelekelwa alimwi akuba muniini kutali kuba acuuno cabulemu. Matayo 20:17-28; Marko 3:17; 9:33-37; 10:32-45; Luka 18:31-34; Johane 11:16.
▪ Nkaambo nzi ncobayoowa lino basikwiiya?
▪ Ino Jesu wabagwasya buti kulibambila basikwiiya bakwe kuzintu ziboola kumbele?
▪ Nkukumbila nzi kwacitwa kuli Jesu, alimwi balimvwa buti baapostolo bamwi?
▪ Ino Jesu walibamba buti penzi lili akati kabaapostolo?