Cibalo 99
Jesu Wayiisya ku Jeriko
KANO kaindi Jesu amakamu-makamu aalaanguwe basika ku Jeriko, imunzi uulaa musinzo weendwa buzuba boonse kuzwa ku Jerusalemu. Jeriko ulaa minzi yobile, imunzi wakaindi waba Juda ulaa kkilomita lyomwe acisela kuzwa kumunzi mupya wabana Roma. Makamu-makamu aabantu mbwaayaabuzwa kumunzi wakaindi kunjila kumupya, boofu bakumbizi bobile bakumvwa kuyobeka. Umwi wabo utegwa Bartimeyu.
Mbubamvwida kuti ngu Jesu wiinda, Bartimeyu amulongwaakwe batalika koompolola ategwa: “Mwami, mwana a-Davida, tufwide luzyalo.” Imakamu naabakalalila akubaambila kuti baumune, baindizya akoongololesya ategwa: “Mwami, mwanaa a-Davida, tufwide luzyalo.”
Naamvwa kunyongana oko, Jesu waima. Waambila baabo mbali ambabo kuti baite baabo boongolola. Aaba baunka kuboofu bakumbizi akwaambila umwi wabo ategwa: “Liyumye-yumye, unyamuke, ulakwiita.” Cakukkomana kapati, oyu moofu wasowa cibaki cakwe, wasotoka akuunka kuli Jesu.
Jesu wabuzya ategwa: “Ino ncinzi ncimuyanda kuti mucitile?”
“Mwami, tulayanda kuti meso esu abononone,” bakombelezya aba boofu bobile.
Lino naabafwida luzyalo, Jesu waampa meso aabo. Kweelana acibalo ca Marko, Jesu waambila umwi wabo ategwa: “Koya buyo, lusyomo lwako lwakufutula.” Mpoonya-mpoonya aba boofu bakumbizi babona, alimwi cakutadooneka boonse bobile batalika kulumba Leza. Lino bantu boonse nobabona zyacitika, abalo balumbaizya Leza. Kakunyina akusowa ciindi Bartimeyu amulongwaakwe bamuccilila Jesu.
Mbwayabwiinda mu Jeriko Jesu, makamu avwula. Aumwi uyanda kubona waponya baalumi boofu. Ibantu bamusyaanikizya Jesu mumbazu zyoonse aboobo bamwi tabakonzyi akumubona olo aaniini. Akati kabaaba kuli Zakayu, mupati wabasimutelo mu Jeriko amasi aali munsi-munsi. Mmufwaafwi kapati cakuti takonzyi akubona zicitika.
Aboobo Zakayu wazuza kumbele akuyakutanta mumukuyu uuli munzila njabelesya Jesu. Kuzwa aabusena obu busumpukide, ulakonzya kuzibona kabotu zyoonse. Makamu-makamu naaciza, Jesu walungumana mucisamu waita ategwa: “Zakayu, kofwamba useluke, nkaambo sunu ndyeelede kuyookala kuŋanda yako.” Zakayu waseluka cakukkomana akufwambaana kuya kuŋanda kuyoobambila-bambila mweenzu wakwe uulemenede.
Nokuba boobo, bantu nobabona zicitika, boonse batalika kutongooka. Bacibona kuti taceelede pe kuti Jesu abe mweenzu kumuntu uli boobu. Kayi Zakayu wakavwuba kwiinda mukunyanga bantu mali cabumpelenge mumulimo wakwe wabusimutelo.
Ibantu banji bamutobela elyo Jesu naanjila muŋanda ya Zakayu, batongooka ategwa: “Wainka kuyookala kumwaalumi uucitazibi.” Pele Jesu wabona kuti Zakayu ulakonzya kweempwa. Alimwi Jesu taatyompwa pe nkaambo Zakayu wanyamuka akwaamba kuti: “Langa, Omwami, ndaandula lubono lwangu muzipanzya zyobile, cimwi ndapa bacete, alimwi kuti ndakanyanga muntu cintu akumucenga, ndilamubweedezezya kone.”
Zakayu watondezya kuti weempwa ncobeni kwiinda mukupa cibeela cimwi calubono lwakwe kubacete alimwi akubelesya cimwi kubweedezezya baabo mbaakacenga. Ulakonzya kuziba kuzwa kumapepa aamutelo aalembedwe kuti mali ongae ngaelede kupa bantu aba. Aboobo wakonka kubweedezezya kone mukweendelana amulawo wa Leza waamba kuti: ‘Naa muntu wabba mbelele yomwe, weelede kubbadela zyone kumbelele yomwe.’
Jesu wabotelwa kunzila Zakayu njaasyomezya kubelesya lubono lwakwe nkaambo ulaamba: “Sunu lufutuko lwasika kuŋanda eyi, awalo mbwali mwana a-Abrahamu. Nkaambo Mwana a-Muntu wakaboola kulangaula akufutula abasweekede.”
Lino-lino Jesu wakatondezyede bukkale bwa “basweekede” mucaano cakwe camwana mutaka. Lino twabaa cikozyanyo cacitika ncobeni camuntu wakasweekede wajanika. Nokuba kuti basololi bacikombelo abamwi abo babatobela baŋuŋuna akutongooka kujatikizya kubikkila maanu kwa Jesu kumuntu uuli mbuli Zakayu, Jesu wazumanana kulangaula akujana basweekede bana ba Abrahamu. Matayo 20:29-34; Marko 10:46-52; Luka 18:35–19:10; Kulonga 22:1.
▪ Nkuli Jesu nkwaaswaanganya boofu bakumbizi, alimwi ncinzi ncaabacitila?
▪ Ino Zakayu nguni, alimwi nkaambo nzi ncaatantila mucisamu?
▪ Ino Zakayu watondezya buti kuti weempwa?
▪ Nciiyo nzi ncotunga twaiya kuzwa kunzila Jesu njalanganya Zakayu?