Madaimona Ayumya Kuzangila Leza
Ziyanza zimwi ziyeeme abubeji bwakuti bafwide balakonzya kutubona
Pele ino nkaambonzi Saatani amadaimona aakwe ncobabeleka canguzu kweena bantu? Nkaambo bayanda kuti aswe tusangane mukuzanga. Bayanda kuti katubakomba. Bayanda kuti tusyome kubeja kwabo akucita zintu nzyatayandi Jehova. Bunji bwazintu ezi zijatikizya zilengwa zijatikizya bafwide.
Lufu lwauyandwa ncintu cicisizya moyo kapati, alimwi ncalyoonse alimwi cileelede kutondezya kuusa. Naakazimina mulongwaakwe Lazaro, Jesu “wakalila.”—Johane 11:35.
Kuli zilengwa zinji zijatikizya lufu, elyo ezi zilaandeene nyika yoonse mbwiizulwa. Bunji bwazyo tazikazyanyi amilao ya-Bbaibbele. Nekubaboobo, zimwi zilengwa, zibikidwe amuzeezo wakuti bafwide balapona alimwi balakonzya kubona bapona. Kubucesya, kulila kwakutalijata, amadilwe malamfu zyoonse zibikidwe akuyoowa kubisizya myuuya yabafwide. Pele mbokunga bafwide “tabezi cintu niciba comwe,” abo bacita zintu zyamusyobo oyo batola ambele kubeja kwa-Saatani.—Mukambausi 9:5.
Ziyanza zimwi ziyeeme abubeji bwakuti bafwide tulakonzya kubagwasya
Zimwi ziyanza na mapobwe zizwa akusyoma kuti bafwide bayanda lugwasyo kuzwa kubapona elyo inga bacisa bapona ikuti na tababakomanisyi. Mumanyika amwi mapobwe amitulo zilacitwa ndiza kwamazuba ali 40 na kwainda mwaka kuzwa muntu naafwa. Eci ceelede kugwasya uufwide ‘kukosola’ kunyika yamyuuya. Acimwi cilengwa cicitwa kapati nkupa cakulya azyakunywa kubafwide.
Zintu ezi zililubide nkaambo zitola ambele kubeja kwa-Saatani kwabafwide. Sena Jehova inga wazumina kuti tubweze lubazu muziyanza zibikidwe akuyiisya kwamadaimona? Kulekule!—2 Ba-Korinto 6:14-18.
Balanda ba-Leza wamasimpe tabaabani muziyanza zikwabilila kubeja kwa-Saatani. Mubusena bwaceeco, babika kapati nguzu zyabo akugwasya bapona akubatontonzya. Balizi kuti ciindi muntu nafwa, pele alike Jehova nguukonzya kumugwasya.—Jobu 14:14, 15.
Bulozi Bulakazigwa a-Leza
Bamwi bantu balajatana amadaimona cakaanzambwene na kwiinda mubantu basimabibo. Eci ciitwa kuti bulozi. Bukombi busyoma myuuya mibi, bulozi, buŋanga, basikwaambila zyoolwe, alimwi akubuzya kubafu zyoonse ezi ninzila zimwi zyabulozi.
Leza ulazikazya zintu ezi zibi. Uyanda kuti tulyaabe kulinguwe cakumaninina.—Kulonga 20:5
Ibbaibbele lilazikazya zintu ezi, noliti: “Kutajanwi akati kanu muntu . . . uusonda, naba muŋanga, naba mulozi, naba mucape, naba simabibo, naba sibusangu, naba sibamooba, naba muntu uubuzya makani kubafu. Nkaambo kufumbwa muntu uucita ezi ncisesemyo kuli-Jehova.”—Deuteronomo 18:10-12.
Ino nkaambonzi Jehova ncatucenjezya canguzu kuziyanza zyamusyobo oyu?
Kububotu bwesu, Jehova ulatucenjezya kuzwa kuzintu zyoonse zyabulozi. Ulabayanda alimwi akubabamba bantu, alimwi ulizi kuti abo bajatana amadaimona balalangilwa kupenga.
Umwi wabantu bamusyobo oyo wakali Nilda, wakali sibusangu mu Brazil. Madaimona aacita buumi bwakwe kuba bwamapenzi. Ulalungulula kati: “Myuuya . . . yakandinjila, kundeendelezya. Ndakali kucincauzya ziimo zyangu kuyeeya akutayeeya, alimwi ndakaba apenzi lyamizeezo. Madaimona akandipenzya kapati cakuti nsinga zyangu zyakajatikizigwa. Ndakatalika kunywa misamu akunywa makoko alimwi akufweba lyoonse. Eci caatolelela kwamyaka.”
Aabo bacita bulozi tabakonzyi kupona kabotu. Balakonzya kusiya maanda aabo, tabajisi lwaanguluko alimwi inga basweekelwa buumi bwabo
Muciindi, kwiinda mulugwasyo lwa-Jehova Abakamboni bakwe anyika, Nilda wakazwa kukweendelezegwa amadaimona nkabela lino ulaabuumi bubotu. Ulati: “Ndilabayumya boonse kuti, batakasoli neciba ciindi comwe, kujatana amyuuya [mibi].”