Mulimo Wabazyali

BAKU U.S. National Institute of Mental Health bakazibya twaambo twakazwa mukuvwuntauzya kujatikizya bazyali balikuyeeyelwa kuzwidilila—aabo balaa bana bajisi myaka iinda ku 21, “ibaalumi naa banakazi basimilimo ibalikukonzya kukkala kabotu mumunzi.” Aaba bazyali bakabuzigwa kuti: ‘Kweelana abukkale mbomuzi, mmalailile nzi aagwasya kwiinda, ngomunga mwabapa bazyali bambi?’ Banji bakaingula kuti: ‘Amubayandisye,’ ‘amubalaye munzila iigwasya,’ ‘kamukkala antoomwe,’ ‘amubayiisye bana banu cibi acibotu,’ ‘kamupana bulemu,’ ‘kamubaswiilila bwini-bwini,’ ‘kamubasololela muciindi cakwiide kubabwentela,’ alimwi ‘kamucita akwaamba zintu zilibonya.’

Bazyali pesi, tabali balikke mumulimo wakusola kugwasya bana kuba bantu basitikide, basimide. Bamayi abalo balijisi lubazu lupati. Umwi mwiiyi wakali sikulaya wacikolo kwaciindi cilamfwu wakaamba kuti: “Mulimo mupati walwiiyo lwamuzikolo ngwakubelekelaamwi abazyali mukugwasya bana kuba bantu basimide mumaanu, mumubili, amumizeezo.”

Eelyo bazyali abamayi bajisi mbaakani yomwe—kugwasya bana kuba bantu basimide alimwi basitikide, bakkala kabotu alimwi bakonzya kuziba mulimo wabo mumunzi mobakkala.

Babelekela Antoomwe, Kutali Bazundana

Pesi mapenzi alatalika bazyali nobakaka kubelekela antoomwe abamayi. Mucikozyanyo, bamwi bazyali tababikkili maanu kulwiiyo lwabana babo; bamwi basola kuzundana abamayi. Makani aakazwa mumagazini yaku France akati: “Mwiiyi tacili ngonguwe kapitau alikke pe. Bamazyali balibilika kuti ndiza bana babo tabakazwidilili, balanga-langa mabbuku aacikolo, akutongooka nzila zyakuyiisya, akufwambaana kunyema kukutacita kabotu kwamwana ciindi cakusaanguna.” Milimo yamusyobo oyu inga yanyonganya nguzu zyabamayi.

Bakamboni ba Jehova bayeeya kuti bana babo inga bagwasyigwa kabotu naa bamazyali babelekela antoomwe abamayi, kababikkila maanu munzila iigwasya mulwiiyo lwabana babo. Bayeeya kuti kubelekela antoomwe kulagwasya kapati nkaambo mulimo wabwiiyi uyabuya ambele kukatazya.

Mapenzi Aali Mucikolo Sunu

Mapenzi aajanwa mucikolo alakozyanya amapenzi aamumunzi cikolo mocibede nkaambo bukkale mbumwi. Mapenzi aabukkale avwula kapati myaka mboiyaabuya. Kuluula bukkale bwakucikolo cimwi camu United States, ipepa litegwa The New York Times lyakati: “Basicikolo baloona mukkilasi, balakongana mumaduze aacikolo mwalo mobalembana kubwaanda, alimwi banyansya basicikolonyina balikabotu. . . . Basicikolo banji balaa mapenzi mbuli kubaa bana, kubaa bamazyali baangidwe alimwi akutija nkamu zyazigwebenga zilwana bantu. Abuzuba basicikolo batajaniki batandila kucibeela casanu.”

Iciyoosya kapati ndipenzi lyakulwana muzikolo liyabukomena muzisi zyoonse. Mubusena bwakutontana zimwi ziindi, kuli kudubulana kwaciindi-aciindi akuyasana. Zilwanyo zyavwula akucisana kapati, bana tabacimuki kulwana alimwi balatalika kabacili baniini.

Masimpe tazili zisi zyoonse zili mubukkale bubi mbuli boobu. Nokuba boobo bamayi banji munyika yoonse bajisi penzi lyakaambwa mupepa lyansondo-ansondo litegwa Le Point lyaku France, kuti: “Mwiiyi tacipegwi bulemu pe; tajisi nguzu.”

Ooku kutalemeka bweendelezi kulakonzya ncobeni kuleta penzi kubana boonse. Elyo Bakamboni ba Jehova balasoleka kubayiisya bana babo kulemeka akumvwida bweendelezi, izintu zibulide mubuumi bwacikolo sunu.