Kusangalizya Ambomulimvwa

IMUNTU amuntu uupona kuli mbwalimvwa. Ciindi muntu nacita zintu zimwi kweelana ambwalimvwa, ulatondezya nzyayeeya mumoyo wakwe, mbwalimvwa kubukkale bumwi ambwababona bantu. Ibantu banji balasisa mbobalimvwa akaambo kamakatazyo aakabacitikila mubuumi—alimwi zimwi ziindi ambobakakomena. Pele Jehova utukulwaizya kuba abube buyandika mumyoyo yesu, alimwi akwaamba mbotulimvwa kweelana azili mumoyo.—Rom. 12:10; 1 Tes. 2:7, 8.

Notukanana, mabala ngotubelesya alakonzya kutondezya kabotu-kabotu mbotulimvwa. Pele ciindi notwaamba twaambo tuteendelani ambotulimvwa, ibatuswiilila balakonzya kuzidooneka nzyotwaamba. Kulubazu lumwi, notwaambaula kweelana ambotulimvwa, nzyotwaamba zinookondelezya alimwi zinooli zyeezyo zibanjila mumoyo ibatuswiilila.

Kusangalizya. Kusangalizya kanji-kanji kuleendelana atwaambo tujatikizya bantu. Aboobo, notwaamba zyabube bwa Jehova buyandika kapati anotutondezya kulumba kuzintu nzyatucitila Jehova, tweelede kwaamba munzila iisangalizya. (Is. 63:7-9) Alimwi anotubandika abeenzuma, tweelede kukanana munzila iisangalizya.

Sicinsenda wakasika munsi aa Jesu akumukumbila kuti amuponye. Amweezyeezye ijwi lya Jesu mbolyakali kulimvwisya nakaamba kuti: “Ndazumina, kosalazigwa.” (Mk. 1:40, 41) Alimwi amweezyeezye bukkale oobu eelyo mwanakazi wakali kuciswa kalobola kwamyaka iili 12 naakaboola kuli Jesu cakuyubaila musyule lyakwe akwaampa moombe wacibaki cakwe. Mbwaakazyiba buyo kuti wabonwa, mwanakazi ooyu wakaunka kumbele kakankama akuwida kumaulu aa Jesu akwaamba kumbele lyabantu boonse ncaakamwaampila alimwi ambwaakaponesyegwa. Amumvwe buyo Jesu mbwaakaambila mwanakazi ooyu naakati: “Mwanaangu, kokazika buyo moyo, lusyomo lwako lwakufutula, koya aluumuno.” (Lk. 8:42b-48) Ikusangalizya nkwaakatondezya Jesu mubukkale oobu kulatukulwaizya aswebo sunu.

Mbubwenya mbuli Jesu, notubeengelela bantu anotuyandisya ncobeni kubagwasya, ikuyandisya kwesu kulabonwa munzila njotubandika ambabo. Ikusangalizya kuli boobu takuli kwakuupa-upa ameso buyo pe. Ikusangalizya kulayandika kapati ikuti katuyanda kuti bantu bakatambule kasimpe. Bunji bwazintu nzyotwaamba mumulimo wamumuunda ziyandika kuzyaamba munzila iisangalizya, ikapati notupandulula twaambo, notukulwaizya, notupa lulayo anotufwida bamwi luzyalo.

Ikutegwa mubatondezye kuti mulabayanda bamwi, amumwetemwete. Ikuti kamusangalizya, ibamuswiilila bayoomuyanda kapati mbubwenya umwi mbwakonzya kuswena afwaafwi amulilo ciindi camasiku nokuli mpeyo. Ikuti kubusyu kamuboneka kuti tamukkomene, ciyoobayumina ibamuswiilila kuzumina kuti mulababikkila maano. Kusangalizya takusamwi buya mbuli umwi mbwakonzya kusama syaamankwamu—mweelede kukkomana ncobeni.

Alimwi ijwi lyanu lyeelede kulimvwisya kuti mulikkomene. Ikuti kamuli ajwi lilemu alimwi lidedema, cilakonzya kumuyumina ikukanana munzila iisangalizya. Pele mukuya kwaciindi akusoleka-soleka inga mwacikonzya. Inzila yomwe iikonzya kumugwasya kweelana abubambe bwajwi, nkuzyiba kuti ikukanana cakubinda kupa ijwi kulimvwisya mbuli kuti mulikalede. Mutabindi nomukanana kutegwa ijwi kalilimvwisya kabotu. Eeci ciyoomugwasya ikukanana munzila iisangalizya.

Pele iciyandika kapati, nciceeco ncomubikkilide maano. Ikuti mwababikkila maano aabo mbomukananina akuti kamuyandisya kubaambila cimwi cintu cikonzya kubagwasya, jwi lyanu liyoolimvwisya mbomulimvwa.

Imakani aasangalizya alakondelezya, pele akubabikkila maano bamwi kulayandika kapati. Tatuyandiki buyo ikunoozula bamwi kwiinda mukubapa kucinca mizeezo lyoonse; pele tweelede akubakulwaizya kucita cimwi cintu.

Kutondezya Mbomulimvwa. Imuntu uuli mumapenzi ulakonzya kulibilika, kuyoowa akuusa. Mbotulimvwa notukkomene tweelede kukutondezya lyoonse mubuumi bwesu alimwi kweelede kubonwa notubandika abamwi. Kulubazu lumwi, kulimvwa kumwi takweelede kutondezyegwa. Takweendelani pe abube bwa Bunakristo. (Ef. 4:31, 32; Flp. 4:4) Tulakonzya kutondezya mbotulimvwa kwiinda mumajwi ngotubelesya, mbolimvwika jwi lyesu, mbotwaambaula, mbotuboneka kubusyu akunyanyaasya zizyo zyamubili.

Ibbaibbele lilaamba boonse mbwalimvwa muntu. Zimwi ziindi inga liile kugama kwaamba mbwaalimvwa muntu. Pele zimwi ziindi lyaamba buyo zyakacitika naa kuzubulula twaambo twaamba mbwalimvwa muntu. Nomubala zibalo mbuli bwazyeezyi cakupozya, cilakonzya kumujatikizya kapati nywebo abaabo ibamuswiilila ikuti jwi lyanu kalyeendelana anzyomubala. Ikutegwa mucite oobo muyandika kulibikka muciimo cabantu aabo mbomubala alimwi akulimvwa mbuli mbobakali kulimvwa. Pele tamweelede kukanana makani mbuli kuti ncisobano buya, aboobo amubone kuti tamuciindilizyi pe. Amubale zibalo munzila iiyoobagwasya kumvwisya zyaambwa ibamuswiilila.

Kweelana Amakani. Mbubwenya mbuli luyandisyo, ikusangalizya nomukanana akutondezya mbomulimvwa, kweelede kweendelana anzyomwaamba.

Amujule ku Matayo 11:28-30 akubona ncolyaamba. Mpoonya amubale mbuli Jesu mbwaakasinganya balembi aba Farisi kweelana ambokulembedwe mucaandaano ca 23 mubbuku lya Matayo. Kunyina notunga tweezyeezya kuti Jesu wakali kwaamba majwi aaya aacisizya moyo ajwi libombede naa lidedema.

Ino mweelede kulimvwa buti nomubala cibalo mbuli bwaceeco cili mucaandaano 44 mubbuku lya Matalikilo kujatikizya kukombelezya Juda nkwaakakombelezyela munyina Benjamini? Amubone mbwaakalimvwa mukapango 13, alimwi amajwi aatondezya mbwaakalimvwa Juda kukaambo kakaleta mapenzi mukapango 16, kubikkilizya ambwaakalimvwa Josefa kweelana ambokwaambwa ku Matalikilo 45:1.

Aboobo kunyina makani naa tubala buya naa tukanana buya, ikutegwa tucite oobo munzila iigwasya, tatweelede kubikkila maano kumabala alimwi akutwaambo tulikke, pele akutondezya mbotulimvwa notubala naa notukanana.