Ikuzyiba Mulimo Ngwajisi Kristo Mububambe bwa Leza

“KUMATALIKILO, Leza wakalenga julu anyika,” alimwi zyoonse nzyaakalenga zyakali “zibotu kapati.” (Matl. 1:1, 31) Jehova wakalenga bantu kabajisi bulangizi bubotu kapati bwakumbele. Nokuba boobo, buzangi ibwakacitika mu Edeni bwakalunyonganya buyo asyoonto lukkomano lwabantu. Pele makanze aa Jehova kujatikizya nyika alimwi abantu tanaakacinca pe. Leza wakatondezya kuti wakali kuyoofwutula bana ba Adamu ibamumvwida. Bukombi bwakasimpe bwakali kuyoobukulusyigwa, alimwi Leza wakali kuyoonyonyoona Saatani Diabolosi antoomwe amilimo yakwe yoonse mibi. (Matl. 3:15) Zintu zyakali kuyooba “zibotu kapati” alimwi. Jehova wakali kuyoocizuzikizya eeci kwiinda mu Mwanaakwe, Jesu Kristo. (1Joh. 3:8) Aboobo, cilayandika kapati kuti tuuzyibe mulimo ngwajisi Kristo mububambe bwa Leza.—Mil. 4:12; Flp. 2:9, 11.

MULIMO NGWAJISI KRISTO

² Notuyeeya mulimo ngwajisi Kristo mububambe bwa Leza, tulizyi kuti mulimo wakwe ujisi zibeela zinji. Jesu ulabeleka kali Mufwutuli wabantu, Mupaizi Mupati, Mutwe wambungano ya Banakristo, alimwi lino ngo Mwami wa Bwami bwa Leza. Ikuzinzibala kuyeeya milimo eeyi kutukulwaizya kumulumba kapati Leza akaambo kabubambe bwakwe alimwi kutupa kumuyanda kapati Kristo Jesu. Bbaibbele lilaipandulula milimo yiindene-indene imwi njajisi.

³ Ciindi Kristo naakali kubeleka mulimo wakwe anyika, cakasalala kuti bantu ibamvwida bakali kuyooyanzanisyigwa a Leza kwiinda muli Jesu. (Joh. 14:6) Mbwali Mufwutuli wabantu, Jesu wakalyaaba mwini kuba cinunuzyo cakununuzya banji. (Mt. 20:28) Aboobo Jesu tali buyo cikozyanyo cibotu camuntu iwakapona buumi mbwakkomanina Leza. Ulayandika kapati mukuzuzikizyigwa kwamakanze ngajisi Jehova kujatikizya bantu. Walo alikke nguukonzya kupa kuti Leza atalike alimwi kutukkomanina. (Mil. 5:31; 2Kor. 5:18, 19) Lufwu lwa Jesu lwakulyaaba alimwi abubuke bwakwe zyajaluda bantu ibamvwida mulyango wakuti bakatambule zilongezyo zitamani mubulelo bwa Bwami bwa Leza bwakujulu.

⁴ Mbwali Mupaizi Mupati, Jesu ulakonzya “kutweetelela mukubula nguzu kwesu” akumanizya zibi zyabasikumutobela balyaabide ibali anyika aano. Mwaapostolo Paulo wakapandulula kuti: “Mupaizi mupati ngotujisi tali yooyo uutakonzyi kutweetelela mukubula nguzu kwesu, pele tujisi yooyo iwakasunkwa munzila zyoonse mbulindiswe, pele watakacita cibi.” Mpoonya Paulo wakakulwaizya baabo ibamusyoma Jesu Kristo kuti bacibelesye kabotu coolwe ncobajisi cakuyanzanisyigwa a Leza naakaamba kuti: “Aboobo atuswene kucuuno cabwami caluzyalo lwa Leza akwaambaula cakutayoowa, kutegwa tukajane luse aluzyalo lwa Leza zyakutugwasya aciindi ceelede.”—Heb. 4:14-16; 1Joh. 2:2.

⁵ Alimwi Jesu ngo Mutwe wambungano ya Banakristo. Mbubonya mbocakabede kuli basikumutobela bamumwaanda wamyaka wakusaanguna, andiswe mazuba aano tatuyandiki muntunsi kuba musololi wesu. Jesu ulapa busolozi kwiinda mumuuya uusalala alimwi amubeembezi mbayendelezya, balo ibayoolyaambilila kulinguwe akuli Bausyi bakujulu kujatikizya mbobeembela butanga bwa Leza. (Heb. 13:17; 1Pet. 5:2, 3) Kasinsima kujatikizya Jesu, Jehova wakati: “Amubone! Ndakamupa kuba kamboni kumasi, kuba musololi alimwi mweendelezi kumasi.” (Is. 55:4) Jesu wakasinizya kuti businsimi oobu bwakazuzikizyigwa mulinguwe naakaambila basikwiiya bakwe kuti: “Alimwi mutanikwiitwi kuti basololi, nkaambo mujisi buyo Musololi omwe, Kristo.”—Mt. 23:10.

⁶ Ikutondezya mbwayeeya alimwi ambwalisungude kutugwasya, Jesu ulatutamba ategwa: “Amuboole kulindime nyoonse nomukatede akulemenwa, eelyo ndilamukatalusya. Amulikulike joko lyangu, mwiiye kulindime, nkaambo ndili mubombe moyo, alimwi ndilalicesya, eelyo mulakatalusyigwa. Nkaambo joko lyangu talikatazyi kunyamuna, alimwi mukuli wangu muuba.” (Mt. 11:28-30) Kwiinda mukweendelezya zintu zyamumbungano ya Banakristo cabubombe alimwi munzila iikatalusya, Jesu Kristo watondezya kuti “mweembezi mubotu” iwiiya Bausyi bakujulu, Jehova Leza.—Joh. 10:11; Is. 40:11.

⁷ Mulugwalo lwakusaanguna ndwaakalembela Bakorinto, Paulo wakapandulula cibeela acimbi camulimo wa Jesu Kristo mumajwi aaya: “Weelede kulela kali mwami kusikila Leza akabikke basinkondonyina boonse kunsi aamaulu aakwe. Pele Leza aakumana kubombya zintu zyoonse kumwanaakwe, mpoonya Mwana ooyo awalo uyoolibombya kuli Leza ooyo wakabombya zintu zyoonse kulinguwe, ikutegwa Leza abe mweendelezi wazintu zyoonse.” (1Kor. 15:25, 28) Katanaboola anyika, Jesu wakali “mubelesi uucibwene” wa Leza, kali wakusaanguna kulengwa akati kazilenge zya Leza. (Tus. 8:22-31) Ciindi Leza naakamutuma anyika, Jesu wakali kucita kuyanda kwa Leza ciindi coonse. Wakaliyumya mumusunko mupati kapati akufwa kasyomeka kuli Bausyi. (Joh. 4:34; 15:10) Akaambo kakuti Mwanaakwe wakasyomeka mane kusikila kulufwu, Leza wakamubusyila kubuumi bwakujulu akumupa nguzu zyakuba Mwami wa Bwami bwakujulu. (Mil. 2:32-36) Mbwali Mwami, Kristo Jesu ulijisi mulimo mupati kapati ngwaakamupa Leza wakusololela zyuulu-zyuulu zyazilenge zyamuuya izijisi nguzu kapati mukugusya bulelo bwabantu aano anyika alimwi akugusya bubi boonse buliko munyika. (Tus. 2:21, 22; 2Tes. 1:6-9; Ciy. 19:11-21; 20:1-3) Mpoonya Bwami bwa Leza bwakujulu ibweendelezyegwa a Kristo buyooba mbobweendelezi bulikke ibujisi nguzu zyakweendelezya nyika yoonse mbwiizulwa.—Ciy. 11:15.

NCOCAAMBA IKUZYIBA MULIMO NGWAJISI

⁸ Jesu Kristo, Sikutupa cikozyanyo, ulilondokede. Wakapegwa mulimo wakutulanganya. Kutegwa tugwasyigwe amulimo ooyu ngwacita wakutulanganya caluyando alimwi kapakamene, tweelede kuzumanana kusyomeka kuli Jehova akweendela antoomwe ambunga ya Jehova iiyaabuyaambele.

⁹ Basikutobela Jesu bamumwaanda wamyaka wakusaanguna bakaluuzyi kabotu mulimo ngwajisi Kristo mububambe bwa Leza. Bakatondezya oobo kwiinda mukubeleka calukamantano kabeendelezyegwa a Kristo, kabalibombya kubusolozi bwakwe bupegwa kwiinda mumuuya uusalala. (Mil. 15:12-21) Mwaapostolo Paulo wakaamba kujatikizya lukamantano lwambungano ya Banakristo bananike naakalemba kuti: “Katwaamba zyamasimpe, caluyando atukomene muzintu zyoonse mukutobela yooyo uuli ngomutwe wesu, Kristo. Kuzwa kulinguwe mubili woonse uliswaanganizyidwe kabotu-kabotu akubelekela antoomwe kwiinda munswaanganino ziindene-indene zyalo zizuzikizya mulimo uuyandika. Cizo cimwi acimwi nocibeleka kabotu, eeci cipa kuti mubili ukomene mbwaanga ulaliyaka wini muluyando.”—Ef. 4:15, 16.

¹⁰ Ciindi umwi aumwi mumbungano nabelekela antoomwe abeenzinyina alimwi boonse nobakamantene kutobela busolozi bwa Kristo, mbungano ilakomena alimwi kulaba muuya mubotu waluyando, lwalo luli “ncecaanzyo calukamantano cilondokede.”—Joh. 10:16; Kol. 3:14; 1Kor. 12:14-26.

¹¹ Zintu zicitika munyika izizuzikizya businsimi bwamu Bbaibbele cakutadooneka zitondezya kuti kuzwa mu 1914, Jesu Kristo wakapegwa nguzu zya Bwami. Lino uluujisi kweendelezya akati kabasinkondonyina. (Int. 2:1-12; 110:1, 2) Ino eeci caamba nzi kuli baabo lino ibapona anyika? Lino-lino Jesu uyootondezya mulimo ngwajisi kali Mwami wabami a Simalelo wabasimalelo kwiinda mukuleta lubeta lwa Leza kuli basinkondonyina. (Ciy. 11:15; 12:10; 19:16) Mpoonya cisyomezyo ca Jehova cakufwutula bantu icakaambwa kumatalikilo nobakazanga bantu ciyoozuzikizyigwa kuli baabo mbakkomanina ibali kujanza lyakwe lyalulyo. (Mt. 25:34) Eelo tulikkomene kapati kaka kuti tuluuzyi mulimo ngwajisi Kristo mububambe bwa Leza! Atuzumanane kukamantana mukuzuzikizya mulimo uucitwa nyika yoonse kwiinda mukusololelwa a Kristo kumazuba aano aakumamanino.