MUBUZYO 5

Ino Inga Ndacita Buti Kuti Kabandicitila Luta Kucikolo?

MUBUZYO OOYU NCOUYANDIKA

Ncokonzya kucita kuti umwi kakucitila luta inga capa kuti penzi liceye—naa likomene.

**INO INGA WACITA BUTI?**

Koezyeezya bukkale oobu: Thomas tayandi kuunka kucikolo sunu, naa juunza. Naa kucilekela limwi buya. Penzi lyakatalika myezi yotatwe yainda ciindi basicikolonyina nobakatalisya makani aakubeja kujatikizya nguwe. Mpoonya bakatalika kumwiita mazina aakumufwubaazya. Zimwi ziindi umwi wakali kumubbaampula mabbuku kumaanza akucita mbuli kuti tanaacita caali, naa umwi wabo uuli musyule lyakwe wakali kumutonta, mpoonya Thomas acebuka, takonzyi kuzyiba kuti wamutonta nguni. Jilo, zintu zyakaindila kubija ciindi umwi naakamutumina kagwalo kakumukonga aintaneti . . .

Ikuti nooli nduwe Thomas, ino inga wacita buti?

KOIMA UYEEYE!

Tacaambi kuti kunyina ncokonzya kucita pe! Mubwini ulakonzya kumuuma sikukupenzya kakunyina kumulwana. Ino inga wacita buti oobo?

UTANYEMI. Bbaibbele lyaamba kuti: “Mufwubafwuba ulatondezya bukali boonse buli mumoyo wakwe, pele musongo ulakkazika moyo alimwi ulalijata.” (Tusimpi 29:11) Kuti wazumanana kulijata—kotalitondezyi kunyema—aabo ibakucitila luta inga bagunwa akucileka.
UTAJOLELI CIBI. Bbaibbele lyaamba kuti: “Mutapilusizyi muntu uuli woonse bubi.” (Baroma 12:17) Kujolela cibi kulakonzya kupa kuti penzi likomene.
UTALINJIZI MUMAPENZI. Bbaibbele lyaamba kuti: “Muntu uucenjede abona mapenzi ulayuba.” (Tusimpi 22:3) Ikuti kacikonzyeka, kobatantamuka bantu ibalaaluta alimwi abukkale bukonzya kupa kuti bakusoke.
KOSOLA KWIINGULA MUNZILA NJOBATAYEEYELI. Bbaibbele lyaamba kuti: “Kuvwiila kabotu kulalesya bukali.” (Tusimpi 15:1) Inga wasola kucita masesya. Mucikozyanyo, ikuti siluta waamba kuti waindila kuneneya, ulakonzya kwaamba kuti: “Anu anduwe ulibwene kuti ndiyandika kukoka-koka ayi!”
KOZWA ABUSENA AAWO. Nora, uujisi myaka yakuzyalwa iili 19 wakaamba kuti: “Kuumuna buyo kutondezya kuti ulisimide alimwi akuti ulaanguzu kwiinda muntu uukucitila luta. Kutondezya kuti ulalilesya, ibube mbwatajisi siluta ooyo.”—2 Timoteyo 2:24.
KOLEKA KULITENGA. Bantu ibalaaluta balakozya kumuzyiba muntu uulitenga, alimwi uutalangilwi kucita cintu cili coonse. Mukwiimpana basiluta banji balaleka ikuti naa babona kuti tobazumizyi kukusobanina.
KOAMBILA MUNTU UMWI. Muntu umwi iwakali mwiiyi kaindi wakaamba kuti: “Ndikulwaizya boonse ibacitilwa luta kuti beelede kwaamba muciindi cakuumuna buyo. Nceciluzi kucita, alimwi inga cakwabilila bambi kuti abalo batacitilwi luta.”

Musankwa walangana asikucita luta kakunyina kulitenga — Kutalitenga kuyookupa kuba anguzu nzyatajisi siluta

SENA ULIZYI?

Kunze lyakuuma muntu, kucita luta kubikkilizya:

Kwaambila muntu majwi mabi. “Tandikaalubi mazina aakufwubaazya ngobakali kundiita naa zintu nzyobakali kundaamba. Bakali kundipa kulimvwa mbuli kuti ndinyina mulimo, tandiyandiki, alimwi akuti ndili muntu wabuyo. Nicakabota buyo kunduuma.”—Celine, uujisi myaka yakuzyalwa iili 20.
Kutantamukwa abeenzinyoko. “Basicikoloma bakatalika kunditantamuka. Bakali kucita mbuli kuti kunyina busena atebulu bwakuti ndikkale akulya ambabo cakulya camasyikati. Mwaka woonse ndakali kulya ndelikke alimwi ndakali kulila.”—Haley, uujisi myaka yakuzyalwa iili 18.
Kucita luta kwiinda mukubelesya Intaneti. “Kwiinda mukulemba buyo majwi masyoonto akkompyuta, ulakonzya kumujaila zina muntu alimwi akunyonyoona buumi bwakwe. Kwaamba boobu cilimvwisya mbuli kuti nkuciindizya, pele cilakonzya kucitika!”—Daniel, uujisi myaka yakuzyalwa iili 14.

**MIBUZYO IIJATIKIZYA KUCITA LUTA**
MASIMPE NAA NKUBEJA	BWIINGUZI
1 Kucita luta kwakatalika kaindi.	1 Masimpe. Mucikozyanyo, Bbaibbele lilaamba kujatikizya Babbabbani, inkamu iijisi zina ilyaamba kuti: “Aabo bausya beenzinyina.”—Matalikilo 6:4.
2 Kucita luta nkusobana buyo. Taali makani mapati.	2 Nkubeja. Kucitilwa luta kuli akati kazintu izipa kuti bakubusi banji kabalijaya.
3 Inzila mbotu yakulesya siluta nkumujolela.	3 Nkubeja. Kanji-kanji bantu ibalaaluta inga balaanguzu kwiinda baabo mbobacitila luta, aboobo kusola kujola takugwasyi.
4 Ikuti naa wabona muntu umwi kacitilwa luta, toyelede kucita cili coonse.	4 Nkubeja. Mubukkale oobu, kunyina muntu weelede kubona cacitika akuumuna buyo. Kuti naa wabona muntu umwi kacitilwa luta mpoonya taakwe ncocita, inga wapa kuti penzi likomene muciindi cakupa kuti limane.
5 Nokuba kuti basiluta baboneka kuba basicamba, kanji-kanji mbakandu.	5 Masimpe. Nokuba kuti basikucita luta bamwi balalidunda, banji mbakandu alimwi bafwubaazya beenzinyina kuti balimvwe kabotu.
6 Basiluta balakonzya kucinca.	6 Masimpe. Kwiinda mukugwasyigwa, bantu ibalaaluta balakonzya kucinca mbobayeeya alimwi amicito yabo.